அடுத்த வருடம் இடம்பெறவுள்ள ஆசிய கால்பந்தாட்ட சம்மேளனத்தின் 16 வயதின்கீழ் பெண்களுக்கான கால்பந்தாட்ட சம்பியன்ஷிப் தொடருக்கான தகுதிகாண் போட்டிகள் முதற்தடவையாக இலங்கையில் நடைபெறவுள்ளது. இதில் பங்குபற்றவுள்ள இலங்கை அணியில் யாழ். மாவட்டப் பாடசாலைகளைச் சேர்ந்த ஆறு மாணவிகளும், குருநகால் மாவட்ட பாடசாலைகளைச் சேர்ந்த ஏழு மாணவிகளும் இடம்பெற்றுள்ளனர். 

நாளை (15) முதல் எதிர்வரும் 23ஆம் திகதி வரை கொழும்பு CR&FC மைதானத்தில் நடைபெறவுள்ள ஆசிய சம்மேளன கிண்ண, 16 வயதுக்குட்பட்ட பெண்களுக்கான கால்பந்தாட்டத் தொடரின் குழு ஏ இற்கான தகுதிகாண் போட்டிகளில் வரவேற்பு நாடான இலங்கையுடன், சீனா, உஸ்பெகிஸ்தான், ஜோர்தான் மற்றும் குவாம் தீவுகள் உள்ளிட்ட 5 நாடுகள் போட்டியிடவுள்ளன.

இறுதியாக 2012ஆம் ஆண்டு நடைபெற்ற ஆசிய சம்மேளன கிண்ண 16 வயதுக்குட்பட்ட பெண்களுக்கான கால்பந்தாட்டத் தொடரில் இலங்கை அணி விளையாடியிருந்தமை குறிப்பிடத்தக்கது.

இந்த நிலையில், 16 வயதுக்குட்பட்ட இலங்கை பெண்கள் அணி தனது முதலாவது போட்டியில் குவாம் தீவுகள் அணியை நாளை (15) சந்திக்கவுள்ளது. பின்னர், 17ஆம் திகதி ஜோர்தானையும், 19ஆம் திகதி சீனாவையும், 21ஆம் திகதி உஸ்பெகிஸ்தானையும் இலங்கை எதிர்த்தாடவுள்ளது.

இந்த நிலையில், இந்த தொடரில் பங்குகொள்ளவுள்ள 23 பேர்கொண்ட குழாத்தை இலங்கை கால்பந்தாட்ட சம்மேளனம் நேற்று (13) அறிவித்தது.

இந்த குழாத்தில் இடம்பெற்றுள்ள பெரும்பாலான வீராங்கனைகள் கடந்த மாதம் பூட்டானில் நடைபெற்ற தெற்காசிய கால்பந்தாட்ட சம்மேளனத்தின், 15 வயதுக்குட்பட்டோருக்கான மகளிர் சம்பியன்ஷிப் தொடரில் இலங்கை அணியைப் பிரதிநிதித்துவப்படுத்தியிருந்தமை சிறப்பம்சமாகும்.

அத்துடன், இலங்கையின் 16 வயதுக்குட்பட்ட அணியில் முதல் தடவையாக யாழ். பண்டத்தரிப்பு பெண்கள் உயர்தர பாடசாலையைச் சேர்ந்த ஏ.டி.மேரி கொன்சிகா, ரகுதாஸ் கிருஷாந்தினி, பாஸ்கரன் செயந்தினி ஆகிய 3 மாணவிகளும், யாழ் மகாஜனா கல்லூரியைச் சேர்ந்த ஜெகநாதன் ஜெதுசிகா, எஸ் தவப்பிரியா, யூ ஜோகிதா ஆகிய மூவரும் இடம்பெற்றுள்ளனர்.

இதில் தெல்லிப்பளை மகாஜனா கல்லூரி மாணவிகள் ஏற்கனவே 14 மற்றும் 15 வயதுக்குட்பட்ட இலங்கை அணிகளில் இடம்பெற்றிருந்ததுடன், பண்டத்தரிப்பு பெண்கள் உயர்தர பாடசாலையைச் சேர்ந்த மாணவிகள் கடந்த மாதம் பூட்டானில் நடைபெற்ற தெற்காசிய கால்பந்தாட்ட சம்மேளனத்தின், 15 வயதுக்குட்பட்ட பெண்களுக்கான கால்பந்தாட்ட தொடரின்மூலம் இலங்கை அணிக்காக முதல் தடவை விளையாடியிருந்தமை குறிப்பிடத்தக்கது.

இதுஇவ்வாறிருக்க, குருநாகல் கவிசிகமுவ மகா வித்தியாலயத்தைச் சேர்ந்த உத்பலா காவிந்தி ஜயகொடி அணித் தலைவியாகவும், பொலன்னறுவை பெந்திவௌ மகா வித்தியாலயத்தைச் சேர்ந்த சந்தருவனி பண்டார துணைத் தலைவியாகவும் செயற்படவுள்ளனர். குறித்த வீராங்கனை இருவரும் கடந்த மாதம் பூட்டானில் நடைபெற்ற தெற்காசிய கால்பந்தாட்ட சம்மேளனத்தின், 15 வயதுக்குட்பட்ட பெண்களுக்கான சம்பியன்ஷிப் தொடரிலும் தலைவியாகவும், உதவித் தலைவியாகவும் செயற்பட்டிருந்தமை குறிப்பிடத்தக்கது.

இதேநேரம், கடந்த தெற்காசிய கால்பந்தாட்ட சம்மேளனத்தின் 15 வயதுக்குட்பட்டோருக்கான மகளிர் சம்பியன்ஷிப் தொடரில் இலங்கை அணியைப் பிரதிநிதித்துவப்படுத்தியிருந்த குருநாகல் மலியதேவ பெண்கள் கல்லூரியைச் சேர்ந்த ஆறு வீராங்கனைகளும் ஆசிய தகுதிகாண் போட்டிகளுக்கான இலங்கை குழாத்தில் இடம்பிடித்துள்ளனர்.

இந்த தொடருக்கான இலங்கை அணியின் பயிற்றுவிப்பாளராக ஏற்கனவே இலங்கை 16 வயதின் கீழ் ஆண்கள் தேசிய அணி மற்றும் 15 வயதின் கீழ் பெண்கள் தேசிய அணிகளை பயிற்றுவித்த ஏ.கே.எம் அஜ்வாத் செயற்படவுள்ளார். கடந்த 3 மாதங்களாக இலங்கை 15 வயதுக்குட்பட்ட பெண்கள் அணியை பயிற்றுவித்து வருகின்ற அவர், கடந்த மாதம் பூட்டானில் நடைபெற்ற தெற்காசிய கால்பந்தாட்ட சம்மேளனத்தின் 15 வயதுக்குட்பட்ட பெண்களுக்கான சம்பியன்ஷிப் தொடரில் இலங்கை அணியை முதற்தடவையாக வழிநடாத்தியிருந்தார்.

இந்த நிலையில், ஆசிய சம்மேளன கிண்ண 16 வயதுக்குட்பட்ட பெண்களுக்கான கால்பந்தாட்ட சம்பியன்ஷிப் தொடருக்கான தகுதிகாண் போட்டிகளில் பங்குகொள்ளவுள்ள இலங்கை அணியின் ஆயத்தம் குறித்து பயிற்றுவிப்பாளர் அஜ்வாத் கருத்து வெளியிடுகையில்,

”அண்மையில் நிறைவுக்கு வந்த சாப் கிண்ணத்தில் விளையாடியதை விட சிறப்பாக செயல்பட எதிர்பார்த்துள்ளோம். இலங்கை அணிக்கு போதுமான சர்வதேச அனுபவங்கள் இல்லை என்பதுடன் சாப் கிண்ண கால்பந்தாட்டப் போட்டித் தொடர்தான் அவர்கள் பங்குபற்றிய முதலாவது சர்வதேச போட்டியாகும். அந்த போட்டியில் எமது பலவீனத்தை அடையாளம் காண முடிந்தது. எனவே எதிர்வரும் காலங்களில் அந்த குறைபாடுகளை நிவர்த்தி செய்து விளையாட முயற்சி செய்வோம்” என்றார்.

இலங்கை அணி விபரம்

மலீகா ஹானி (கொழும்பு கேட்வே சர்வதேச பாடசாலை), நெத்மி குணரத்ன, நிம்சரா குமாரி (பிபிலை நாநாபுரவ மகா வித்தியாலயம்), ஏ.டி.மேரி கொன்சிகா, ரகுதாஸ் கிருஷாந்தினி, பாஸ்கரன் செயந்தினி (யாழ். பண்டத்தரிப்பு பெண்கள் உயர்தர பாடசாலை), ஜெகநாதன் ஜெதுன்சிகா, எஸ் தவப்பிரியா, யூ ஜோகிதா (யாழ். மகாஜனா கல்லூரி), காவிந்தி ஜயகொடி (குருநாகல் கவிசிகமுவ மகா வித்தியாலயம்), மின்தரா சேனாதீர, மதுபாஷினி தசநாயக்க, தஷானி ஜயகாது, ஐ. வர்ஷாதீர, மதுஷானி குமாரி, சங்கலனி பண்டார (குருநாகல் மலியதேவ பெண்கள் கல்லூரி), அமாவி அனுத்தரா (நிட்டம்புவ ரணபெகுணுகம மகா வித்தியாலயம்), நிஷங்சலா குமாரிஹாமி (கம்பளை புனித ஜோசப் கல்லூரி), சந்தருவனி பண்டார (பொலன்னறுவை பெந்திவெல மகா வித்தியாலயம்), செநுரி பண்டார (கண்டி எஸ்.டபிள்யு.ஆர்.டீ பண்டாரநாயக்க கல்லூரி), தசுனி ஹன்சிகா (கிரிபத்கொட விஹாரமகாதேவி பெண்கள் கல்லூரி), விநுகி சனெல்கா (இராஜகிரிய கேட்வே சர்வதே பாடசாலை), ரசுனி சன்வதனா (கேகாலை கேகலு பெண்கள் பாடசாலை)

`தண்டனை பெற்ற மக்கள் பிரதிநிதிகளுக்குத் தேர்தலில் போட்டியிட வாழ்நாள் தடை விதிக்க வேண்டும்’ என வழக்கறிஞர் அஸ்வினி குமார் உபாத்யா பொதுநல வழக்கு ஒன்றை சுப்ரீம் கோர்ட்டில் போட்டார். நீதிபதிகள் ரஞ்சன் கோகாய், நவீன் சின்கா ஆகியோர் அடங்கிய பெஞ்ச் முன்பு, இந்த வழக்கு விசாரணைக்கு வந்தபோது, `குற்றப் பின்னணி கொண்ட எம்.பி., எம்.எல்.ஏ-களை விசாரிக்கச் சிறப்பு நீதிமன்றங்கள் அமைக்க வேண்டும்’ எனக் கடந்த ஆண்டு நவம்பரில் உத்தரவிட்டது. இதன்பிறகு இந்த வழக்கு கடந்த ஆண்டு டிசம்பர் மாதம் விசாரணைக்கு வந்தபோது `குற்றப் பின்னணி மக்கள் பிரதிநிதிகள் மீதான ஊழல் வழக்குகளை விசாரிக்க 12 சிறப்பு நீதிமன்றங்கள் அமைக்கப்படும். இதில் இரண்டு நீதிமன்றங்கள் 228 எம்.பி-க்கள் தொடர்பான ஊழல் வழக்குகளை விசாரிக்கும். 65-க்கும் மேற்பட்ட எம்.எல்.ஏ-க்கள் மீது ஊழல் வழக்குகள் உள்ள தமிழ்நாடு, ஆந்திரா, பீகார், கர்நாடகா, கேரளா, மத்தியபிரதேசம், மராட்டியம், தெலங்கானா, உத்தரபிரதேசம், மேற்கு வங்காளம் ஆகிய 10 மாநிலங்களில் தலா ஒரு சிறப்பு நீதிமன்றம் அமைக்கப்படும். இந்தச் சிறப்பு நீதிமன்றங்கள் அமைக்க 7.80 கோடி ரூபாய் ஒதுக்கப்பட்டுள்ளது.' என மத்திய அரசு தெரிவித்தது.  

`நீண்ட காலமாக எம்.பி மற்றும் எம்.எல்.ஏ-கள் மீது நிலுவையில் உள்ள 1,581 வழக்குகளை இந்தச் சிறப்பு நீதிமன்றங்கள் ஓர் ஆண்டுக்குள் விசாரித்துத் தீர்ப்பு அளிக்க வேண்டும். இந்தச் சிறப்பு நீதிமன்றங்கள் மார்ச் 1-ம் தேதி முதல் செயல்பட வேண்டும்' என சுப்ரீம் கோர்ட் டிசம்பரில் உத்தரவு போட்டது.  

அ.தி.மு.க. எம்.எல்.ஏ-கள் 28 பேர் மீதும் தி.மு.க. எம்.எல்.ஏ-கள் 42 பேர் மீதும் குற்ற வழக்குகள் இருக்கின்றன. மாவட்டங்களில் மந்த கதியில் நடைபெறும் இந்த வழக்குகள் சிறப்பு நீதிமன்றம் அமைக்கப்பட்டால் விரைந்து முடிக்கப்படும். அதனால், சிறப்பு நீதிமன்றத்தை அமைக்காமல் காலம் தாழ்த்தி வந்தது தமிழக அரசு. மற்ற மாநிலங்களிலும் தனி நீதிமன்றங்கள் அமைப்பதிலும் வழக்குகளை ஒதுக்குவதிலும் தாமதம் ஏற்பட்டது. இந்த நிலையில் வழக்கு மீண்டும் சுப்ரீம் கோர்ட்டில் விசாரணைக்கு வந்தபோது, மத்திய சட்டம் மற்றும் நீதித்துறை அமைச்சகம் பிரமாணபத்திரம் ஒன்றைத் தாக்கல் செய்தது. அதில், `மக்கள் பிரதிநிதிகள் மீதான வழக்குகளை விசாரிக்க 11 மாநிலங்களில் 12 சிறப்பு நீதிமன்றங்கள் அமைக்கப்பட்டுள்ளன. தமிழகத்தில் உள்ள சிறப்பு நீதிமன்றத்தின் அந்தஸ்து குறிப்பிடப்படவில்லை' எனத் தெரிவித்திருக்கிறது. `சிறப்பு நீதிமன்றத்துக்கு 1,233 வழக்குகள் மாற்றப்பட்டுள்ளன. இதில் 136 வழக்குகள் முடித்து வைக்கப்பட்டுள்ளன. 1,097 வழக்குகள் நிலுவையில் உள்ளன’ எனவும் குறிப்பிடப்பட்டிருக்கிறது.  

வழக்கை விசாரித்த நீதிபதி ரஞ்சன் கோகாய் தலைமையிலான பெஞ்ச், எம்பி, எம்.எல்.ஏ-க்கள் மீதான நிலுவையில் உள்ள குற்றவியல் வழக்குகள் குறித்து தகவல்களை அக்டோபர் 10-ம் தேதிக்குள் தெரிவிக்க வேண்டும் என மாநில அரசுகள், யூனியன் பிரதேசங்கள் மற்றும் உயர் நீதிமன்ற பதிவாளர்களுக்கு உத்தரவிட்டது. சிறப்பு நீதிமன்றங்களுக்கு மாற்றப்பட வேண்டிய வழக்கு விவரங்களை தாக்கல் செய்ய வேண்டும் எனவும் சுப்ரீம் கோர்ட் சொன்னது.  

இப்படியான சூழலில்தான் தனி நீதிமன்றத்தை அமைப்பதில் தமிழக அரசு ஆர்வம் காட்டவில்லை. மற்ற மாநிலங்கள் சிலவற்றில் தனி நீதிமன்றம் அமைக்கப்பட்டு வழக்குகள் மாற்றப்பட்டிருக்கின்றன. ஆனால், தமிழகத்தில் தனி நீதிமன்றம் அமைக்காமல் இருந்தார்கள். தற்போது சுப்ரீம் கோர்ட்டில் வழக்கு விசாரணைக்கு வந்த நிலையில் தமிழக அரசின் உள் துறை செயலாளர் நிரஞ்சன் மார்டி தனி நீதிமன்றம் அமைக்கப்படும் எனக் கடந்த 6-ம் தேதி அரசிதழ் வெளியிட்டிருக்கிறார். கடந்த ஆண்டு நவம்பரிலும் டிசம்பரிலும் சுப்ரீம் கோர்ட் போட்ட உத்தரவுக்கு இப்போதுதான் செயல் வடிவம் கொடுத்திருக்கிறார்கள்.

1991-1996 அ.தி.மு.க. ஆட்சிக்காலத்தில் நடந்த ஊழல்களை விசாரிப்பதற்காகத் தனி நீதிமன்றங்கள் அமைக்கப்பட்டன. அந்த நீதிமன்றங்கள் சென்னை கலெக்டர் அலுவலகத்தில் செயல்பட்டன. அதே இடத்தில்தான் இந்தச் சிறப்பு நீதிமன்றமும் அமையும் எனத் தெரிகிறது. இதுபற்றி இறுதி முடிவைச் சென்னை உயர் நீதிமன்றம் விரைவில் எடுக்கும். சிறப்பு நீதிமன்றத்தின் நீதிபதியையும் முடிவு செய்வார்கள். 

சிறப்பு நீதிமன்றங்களுக்கு மாற்றப்படும் வழக்கு விவரங்களைத் தரச் சொல்லி அனைத்து உயர் நீதிமன்றங்களுக்கு சுப்ரீம் கோர்ட் உத்தரவிட்டிருக்கும் நிலையில் இந்த நடைமுறைகள் விரைவில் தொடங்கும். சிறப்பு நீதிமன்றம் உடனே அமைக்கப்படுவதோடு எம்.எல்.ஏ-கள் மீது மாவட்டங்களில் உள்ள வழக்குகள் இங்கே மாற்றப்படும். இந்த விவரங்கள் அனைத்து அக்டோபர் 10-ம் தேதிக்குள் சுப்ரீம் கோர்ட்டில் தெரிவிக்க வேண்டும்.

2016 சட்டசபைத் தேர்தலில் ஜெயித்த 232 எம்.எல்.ஏ-க்களில் 75 பேர் கிரிமினல் பின்னணி கொண்டவர்கள். இதில் கருணாநிதி, ஜெயலலிதா இப்போது உயிருடன் இல்லை. இடைத் தேர்தலில் வென்ற டி.டி.வி தினகரன் மீது ஐந்து வழக்குகள் இருக்கின்றன. மொத்தம் 74 எம்.எல்.ஏ-கள் மீதான வழக்குகளை சிறப்பு நீதிமன்றம் விசாரிக்கப் போகிறது. இவர்களில் 42 பேர் மீது கொலை, கொலை முயற்சி, கடத்தல், பெண்களுக்கு எதிரான குற்றங்கள் என சீரியஸ் வழக்குகள் இருக்கின்றன. குற்றப் பின்னணி எம்.எல்.ஏ-களில் 27 பேர் அ.தி.மு.க-வினர். 42 பேர் தி.மு.க-வினர். 5 பேர் காங்கிரஸ் கட்சியைச் சேர்ந்தவர்கள்.

யாழ். மாவட்டத்தில் கழகமட்ட கிரிக்கெட் விளையாட்டினை மக்கள் மத்தியில் பிரபல்யப்படுத்தும் நோக்குடன் T20 லீக் போட்டித் தொடர் ஒன்றினை யாழ் மாவட்ட கிரிக்கெட் சங்கத்தினர் ஏற்பாடு செய்துவருகின்றனர்.  

 “Jaffna Super League” என பெயரிடப்பட்டிருக்கின்ற இந்த போட்டித் தொடரிற்கு யாழ் மாவட்டத்தின் பிரதான நகரங்களை மையமாகக்கொண்ட 08 அணிகள் உருவாக்கப்படும். போட்டித் தொடரில் அணியின் உரிமையாளராக ஆர்வமுள்ளவர்கள் தமது கேள்வித் தொகையினை யாழ். மாவட்ட கிரிக்கெட் சங்கத்தினரிடம் முன்வைக்க வேண்டும். கேள்வித் தொகையின் அடிப்படையில், அதிகூடிய தொகையினை முன்வைத்த முதல் 08 விண்ணப்பதாரிகளும் அணிகளின் உரிமையாளர்களாக ஒப்பந்தம் செய்யப்படுவார்கள்.  

அணிகளின் உரிமையாளர்கள் எதிர்வரும் ஞாயிற்றுக்கிழமையன்று (16.09.2018) உறுதி செய்யப்படுவர்.  அதன் பின்னர் வீரர்கள் ஏலத்திற்கான ஏற்பாடுகள் இடம்பெறும். ஜி.பி.எல் போன்று அல்லாது உரிமையாளர்கள் கிரிக்கெட் சங்கம் நிர்ணயிக்கும் தொகைக்குட்பட்டே வீரர்களை ஏலத்தில் கொள்வனவு செய்ய வேண்டும். ஏலத்தொகை வீரர்களிற்கு வழங்கப்படமாட்டாது.  

ஏலத்தில் பங்கெடுக்க விரும்பும் வீரர்கள் யாழ் மாவட்ட கிரிக்கெட் சங்கத்தில் பதிவுசெய்யப்பட்ட 25 கழகங்களினூடாக மட்டுமே தமது விண்ணப்பத்தினை முன்வைக்கலாம்.  

ஒரு அணிக்கு 15 வீரர்களை மட்டுமே ஏலத்தில் கொள்வனவு செய்யலாம்.  ஒரு கழகத்திலிருந்து 05 வீரர்களை தெரிவு செய்யலாம். ஆனால் 04 வீரர்கள் மட்டுமே விளையாடும் பதினொருவருள் இடம்பிடிக்க முடியும்.

யாழ்ப்பாணத்தில் ஜி.பி.ல் போட்டித் தொடர் பிரபல்யமடைந்ததனைத் தொடர்ந்து, கடந்த வருடத்தில் கழக அணிகளுக்கிடையில் நடத்தப்பட்ட V.T. மகாலிங்கம் பிறீமியர் லீக்கிற்கு பிரதியீடாக இந்த ஜெப்னா சுப்பர் லீக் போட்டித் தொடர் அறிமுகம் செய்யப்படுகின்றது.  ஆனால், ஜி.பி.எல் போன்று ஏலத்தொகை வீரர்களிற்கு வழங்கப்படமாட்டாது என்பது இந்த சுற்றுத் தொடரில் உள்ள வேறுபாடாகும்.   

அதேவேளை, வெற்றிபெறும் அணிகளுக்கான பரிசுத்தொகையினை வீரர்களிற்கு பகிர்ந்தளிப்பதற்கு ஏற்பாட்டாளர்கள் உத்தேசித்துள்ளனர்.

போட்டித் தொடரினை ஒக்டோபர் மாதத்தில் ஆரம்பிக்க உத்தேசிக்கப்பட்டுள்ள அதேவேளை, வார இறுதி நாட்களில் மட்டும் போட்டிகளை நடாத்துவதற்கும் திட்டமிட்டுள்ளனர்.

இந்த தொடர் குறித்து விளக்கமளிக்கும் ஊடக சந்திப்பொன்று அண்மையில் யாழ்ப்பாணத்தில் இடம்பெற்றது. இதன்போது, யாழ் மாவட்ட கிரிக்கெட் சங்க தலைவர் வி.மணிவண்ணன் கருத்து தெரிவிக்கையில்,

“யாழ். மாவட்ட கிரிக்கெட் சங்கத்தின் மைதான உட்கட்டுமானப் பணிகள் வெகு விரைவில் நிறைவடைந்து விடும். அடுத்த ஆண்டளவில் இந்த மைதானத்தில் போட்டிகள் இடம்பெறுகின்ற போது நாம் ஏனைய மாவட்ட வீரர்களையும் உள்வாங்கி போட்டியின் தரத்தினை மேம்படுத்தலாம். மண்டைதீவில் அமையப்பெறவிருக்கும் சர்வதேச கிரிக்கெட் மைதானத்தின் பணிகள் நிறைவுபெறும் பட்சத்தில் நாம் சர்வதேச வீரர்களையும் உள்வாங்கி, இத்தொடரினை ஓர் சர்வதேச தரத்திலான போட்டியாக மாற்ற முடியும். “எனத் தெரிவித்தார்.

அவர் மேலும் தெரிவிக்கையில் “ இப்போட்டியின் தரத்தினை உயர்த்துவதில் வீரர்கள், அணி உரிமையாளர்கள், ஊடகங்களினது பங்களிப்பும், இவை அனைத்திற்கும் மேலாக மக்கள் பங்கேற்பும் அவசியம். “ என்பதனை வலியுறுத்தினார்.

யாழ் மாவட்ட கிரிக்கெட் வீரர்களை மக்கள் மத்தியில் பிரபல்யப்படுத்துவதற்கும், அவர்களது திறமைகளையும், சிறப்பான பெறுதிகளையும் வெளிக்காட்டுவதற்குமான களமாக யாழ் மாவட்ட கிரிக்கெட் சங்கம் ஜெப்னா சுப்பர் லீக்கினை அறிமுகம் செய்கின்றமை குறிப்பிடத்தக்கது.

மேலதிக விபரங்களுக்கு

சுற்றுப்போட்டித் தலைவர்

யாழ் மாவட்ட துடுப்பாட்டச் சங்கம்

0773144627