சிறிலங்கா அரசுத்தலைவர் தேர்தல் செய்திகள்

[வினித்]

தலதா மாளிகையில் அரசுத் தலைவர் வேட்பாளர் அறிவிப்பு: ஜாதிக ஹெல உறுமய
[திங்கட்கிழமை, 5 செப்ரெம்பர் 2005, 19:44 ஈழம்] [கொழும்பிலிருந்து தி.இராஜேஸ்வரி]
ஜாதிக ஹெல உறுமயவின் அரசுத் தலைவர் வேட்பாளரை தலதா மாளிகைக்கு முன்னால் வைத்து அறிவிப்பதாக ஜாதிக ஹெல உறுமயவின் கொள்கை வகுப்பாளர் பாட்லி சம்பக்க ரணவக்க தெரிவித்தார்.


இது குறித்து சம்பக்க ரணவக்க கூறியதாவது:

சிறிலங்கா அரசுத் தலைவர் தேர்தலுக்கான வேட்புமனுக் கோரும் திகதியை தேர்தல் ஆணையாளர் அறிவித்ததும் தமது வேட்பாளர் பெயர் அறிவிக்கப்படும்.

பிரதமர் மகிந்த ராஜபக்சவுடனும் எதிர்க்கட்சித் தலைவர் ரணில் விக்கிரமசிங்கவுடனும் நடாத்தப்பட்ட பேச்சுக்கள் நல்லமுறையில் நடந்தாலும் ஜாதிக ஹெல உறுமயவின் கொள்கைகளுக்கு அவசியமான வகையில் பேச்சுவார்த்தைகள் இடம்பெறவில்லை.

ஜாதிக ஹெல உறுமய வேட்பாளர் ஒருவரை நிறுத்தக் கூடிய சூழ்நிலையில் இல்லை என்றும் அதனால் அவர்கள் மகிந்த ராஜபக்ச பின்னாலும் ரணில் விக்கிரமசிங்கவின் பின்னாலும் செல்வதாக அனேகமானவர்கள் கூறிவருகின்றனர்.

ஜாதிக ஹெல உறுமய இவர்கள் இருவரின் பின்னாலும் செல்லவில்லை. அந்த இருகட்சிகளும் தான் ஜாதிக ஹெல உறுமயவுடன் பேச்சுவார்த்தைகளை நடத்த வேண்டும் என விருப்பம் தெரிவித்தன.

எமது கட்சிக்கு வேட்பாளராக நிற்கும் நபர் முக்கியமில்லை. ஜாதிக ஹெல உறுமய முன்வைத்துள்ள கொள்கைகளுக்கு ஆதரவு தெரிவித்து அதனை செயற்படுத்த விரும்புபவருக்கே எமது கட்சி ஆதரவளிக்கும் என்றார் சம்பக்க ரணவக்க.