பட மூலாதாரம்,GETTY IMAGES

“ஓடிடியின் வருகை தமிழ் ரசிகர்களுக்கு எளிய வழியில் உலக சினிமாக்களை பார்க்கும் வாய்ப்பை வழங்கியுள்ளது. இது அவர்களது ரசனையையும், ஒரு கதையைக் கொண்டாடுவதற்கான அளவுகோலையும், எதிர்பார்ப்பையும் உயர்த்தியுள்ளது.

எனவே படைப்பாளிகள் தங்களது கதை சொல்லும் திறனை மேம்படுத்திக் கொண்டால் மட்டுமே மக்களை திரையரங்கை நோக்கி வரவைக்க முடியும்," என்று கூறுகிறார் அயலான் பட இயக்குநர் ரவிக்குமார்.

தமிழ்நாட்டில் உள்ள திரையரங்குகளை கடந்த சில மாதங்களாகவே புதிய தமிழ்ப் படங்களைக் காட்டிலும் மலையாளப் படங்களும், பழைய தமிழ்ப் படங்களும் ஆக்கிரமித்திருப்பதைப் பார்க்க முடிகிறது.

மக்களின் எதிர்பார்ப்புகளுக்கு ஏற்ற படங்கள் வருவதில் ஒரு முடக்கம் நிகழ்ந்துள்ளதோ என்ற விமர்சனத்தை இது ஏற்படுத்தியுள்ளது.

தமிழ் சினிமாவின் வரலாறு

பட மூலாதாரம்,GETTY IMAGES

தமிழ் சினிமாவின் முதல் ஒலியில்லா படமாக 1918இல் வெளிவந்த கீச்சக வதம் கருதப்படுகிறது. அதன் பிறகு 1931இல் வெளியான காளிதாஸ் தமிழின் முதல் பேசும் படமாகக் கருதப்படுகிறது.

நூறாண்டுகள் கடந்த தமிழ் சினிமாவால் நிகழ்ந்த மாற்றங்கள் ஏராளம். குறிப்பாக தமிழ்ச் சமூகத்தின் அரசியல், இலக்கியம், கலை மற்றும் பண்பாடு என திரைத்துறை ஆற்றிய பணி அளப்பரியது.

கருத்துப் படங்களில் தொடங்கி காதல், காமெடி, வாழ்வியல், அறிவியல் எனப் பலதரப்பட்ட படங்கள் தமிழ் சினிமாவில் வெளியாகியுள்ளன.

இதில் பல்வேறு இயக்குநர்களின் மூலம் உலகளாவிய கலைநுட்பங்கள் முதல் தொழில்நுட்பம் வரை தமிழ் சினிமாவில் முயற்சி செய்யப்பட்டு, பல உலகத்தரம் வாய்ந்த படங்களும் வெளியாகியுள்ளன.

தமிழ் திரையரங்குகள் இப்போது எப்படி செயல்படுகின்றன?

பட மூலாதாரம்,GETTY IMAGES

தமிழ் திரைத்துறையின் முக்கியமான ஆன்மாக்களில் ஒன்று திரையரங்குகள். சினிமாவும், அதன் ரசிகர்களும் உரையாடல் நடத்தும் இடமே திரையரங்கம்தான். தமிழ் திரைப்படத் தயாரிப்பாளர்கள் சங்க இணையதளத்தின்படி, தமிழ்நாட்டில் 1104 திரையரங்குகள் உள்ளன.

ஆனால், கடந்த ஓரிரு மாதங்களாக இந்தத் திரையரங்குகளில் புதிய தமிழ்ப் படங்கள் அரிதாகவே தென்பட்டு வந்த நிலையில், சமீபத்தில்தான் அரண்மனை 4 படம் வெளியாகியுள்ளது.

இந்த இடைவெளியில் அடுத்தடுத்து வந்த மலையாளப் படங்களும், தமிழில் வெளியான கில்லி, வேட்டையாடு விளையாடு, தீனா போன்ற படங்கள் மீண்டும் வெளியிடப்பட்டு வசூல் வேட்டை செய்து கொண்டிருந்தன.

ஆனால், இதே காலகட்டத்தில் வெளியான சிறிய பட்ஜெட் தமிழ்ப் படங்கள் சில ஓரிரு நாட்கள்கூட திரையரங்குகளில் நீடிக்கவில்லை.

தமிழ் சினிமாவில் படங்களுக்கு பஞ்சமா?

பட மூலாதாரம்,GETTY IMAGES

தமிழ் திரைத்துறையில் கடந்த 5 ஆண்டுகளில் 300க்கும் மேற்பட்ட திரைப்படங்கள் எடுத்து முடிக்கப்பட்ட பிறகும் வெளியிடப்படாமல் இருப்பதாக தயாரிப்பாளர் கே.ராஜன் கூறுகிறார்.

இதற்குக் காரணம், “வெளியீட்டிற்கான செலவுகளைச் செய்ய பல தயாரிப்பாளர்களிடமும் பணம் இல்லை. முன்பெல்லாம் சிறிய படமாக இருந்தாலும் திரையரங்குகள் முன்பணம் கொடுத்து வாங்கியதால், அந்தப் பணத்தில் தயாரிப்பாளர்கள் படத்தை வெளியிடுவார்கள்."

“இப்போதெல்லாம் யாரும் சிறிய படங்களை வாங்க முன்வருவதில்லை. பணம் வாங்காமல் வெளியிட்டுவிட்டு அந்தப் படம் ஓடினால் பணம் தருகிறோம் என்ற நிலை உருவாகிவிட்டது,” என்கிறார் அவர்.

இதனால் ஒரு படத்தின் முழு பணியும் முடிந்துவிட்டாலும்கூட அதை வெளியிடுவதில் சிக்கல் நீடிக்கிறது. இதன்மூலம் பல நல்ல படங்கள் தேங்கிப் போகும் சூழலும் ஏற்பட்டுள்ளது.

நல்ல படங்கள் வருவதில்லையா?

“மக்கள் வந்தால்தானே திரையரங்குகள் சிறிய பட்ஜெட் படங்களை வாங்க முடியும். நல்ல கதையம்சம் உள்ள படங்கள் வருவதில்லை. அதனால் மக்கள் ஆதரவு கிடைப்பதில்லை. எனவேதான் சிறிய பட்ஜெட் படங்களை வாங்குவதில் சிக்கல் நிலவுகிறது” என்று கூறுகிறார் தமிழ்நாடு திரையரங்கு மற்றும் மல்டிபிளக்ஸ் உரிமையாளர் சங்கத்தின் தலைவர் திருப்பூர் சுப்ரமணியம்.

தற்போது வெளியாகியிருக்கும் அரண்மனை 4 படம் இந்த இடைவெளியை முடிவுக்குக் கொண்டு வந்திருந்தாலும், இது தற்காலிக இடைவெளி மட்டுமே என்றும் கூறுகிறார் அவர்.

நல்ல கதைகளைத் தேர்வு செய்வதில் என்ன பிரச்னை?

பட மூலாதாரம்,ANTHANAN

தமிழ் சினிமாவில் எத்தனையோ நல்ல கதையம்சம் கொண்ட படங்கள் வெளியாகியுள்ளன. அவற்றைப் பல நூறு நாட்களுக்கு ஓட வைத்து மக்கள் கொண்டாடியுள்ளனர். ஆனால், தற்போது வரும் திரைப்படங்கள் பலவும் மூன்று நாட்களைத் தாண்டுவதே குதிரைக் கொம்பாக இருப்பதாகக் கூறுகிறார் சினிமா விமர்சகர் அந்தணன்.

அதற்கு காரணம், நல்ல கதைகள் வராததே என்பது அவரது கூற்று.

“இயக்குநர்கள் நல்ல கதையோடு வந்தாலும், தயாரிப்பாளர்கள் தயங்குகிறார்கள். அந்தக் கதைகளைப் படமாக்கத் துணிவதற்குப் பதிலாக, வழக்கமான கதையையே எடுக்க விரும்புகிறார்கள். இதனால் பல நல்ல இயக்குநர்களுக்கு வாய்ப்பு கிடைப்பதில்லை,” என்கிறார் அவர்.

அதேபோல், மலையாள சினிமாவில் இருப்பது போல் இயற்கைத்தன்மை இல்லாமல் இருப்பதும் நல்ல படங்கள் வருவதில் தடையாக இருப்பதாகக் கூறுகிறார் கே.ராஜன்.

“மலையாள சினிமாவில் கதைக்காக ஹீரோ நடிக்கிறார். ஆனால், தமிழ் சினிமாவில் ஹீரோவுக்காக பல கதைகள் எழுதப்படுகின்றன. அதுவே அவற்றின் தோல்விக்குக் காரணம்” என்கிறார் அவர்.

எது நல்ல படம்?

பட மூலாதாரம்,GOPI NAINAR / X

ஒரு திரைப்படம் என்று வரும்போது, அதைப் பார்க்கும் பலதரப்பட்ட மக்களையும் அது திருப்திபடுத்தாது. அப்படியிருக்க ஒரு நல்ல படம் என்றால் என்ன?

இதற்குப் பதிலளித்த இயக்குநர் கோபி நயினார், “ஒருவருக்கு மட்டுமே பிடித்த படம்கூட சிறந்த படமாக இருக்க முடியும். ஆனால், அது வெகுமக்களுக்குப் பிடிக்கிறதா என்பதைப் பொறுத்தே அது அவர்களுக்கான படமா என்பதை அளவிட முடியும்,” என்கிறார்.

அப்படி வெகுமக்கள் விரும்புகின்ற படங்களை எடுக்காததால்தான் மக்கள் திரையரங்குகளை நோக்கி வருவதில் பெரிய பின்னடைவு ஏற்பட்டுள்ளதாகவும் அவர் தெரிவிக்கிறார்.

இதற்கு ஒரு முக்கியக் காரணம், “படத்தின் கதைக்காக நடிகர்கள் நடிப்பதைவிட, நடிகர்களுக்காக படத்தின் கதை எழுதப்படுவது" என்று கூறுகிறார் கோபி நயினார்.

இதே கருத்தை ஒப்புக்கொள்ளும் தயாரிப்பாளர் கே.ராஜன், ஹீரோவுக்காக எழுதப்பட்ட கதையை, இயக்குநரை மட்டும் சில தயாரிப்பு நிறுவனங்கள் தேர்வு செய்வதன் விளைவே மக்களுக்குப் பிடித்த திரைப்படங்கள் வெளியாவதற்கு முட்டுக்கட்டையாக இருப்பதாகக் கூறுகிறார்.

மக்களின் மனநிலை என்ன?

பட மூலாதாரம்,GETTY IMAGES

முன்பெல்லாம் சிறிய படம் என்றாலும் குறைந்தபட்சம் மக்கள் திரையரங்கம் சென்று என்னதான் இருக்கிறது என்றாவது பார்ப்பார்கள். ஆனால், சமூக ஊடகங்கள், ஓடிடி தளங்கள் வந்த பிறகு அந்த ரசனைத்தன்மை குறைந்துவிட்டது என்கிறார் அந்தணன்.

“தமிழ்நாட்டைப் பொறுத்தவரை பெரிய படங்களாக இருந்தால் மட்டுமே மக்கள் திரையரங்குகளை நோக்கி வருகிறார்கள்." சிறிய படங்களில் பெரும்பாலும் சாதாரண படங்களே வெளியாவதாலும், அவற்றை ஓடிடியில் பார்த்துக்கொள்ளலாம் என்ற மனநிலையில் மக்கள் திரையரங்குகளுக்கு வருவதில்லை என்றும் அந்தணன் கூறுகிறார்.

"அதைத் தாண்டி ஏதாவது ஒரு சிறிய பட்ஜெட் படம் நல்ல கதையாக இருந்து கொஞ்சம் பிரபலமடைந்தால் மக்கள் திரையரங்கம் சென்று பார்க்கின்றனர். ஆனால், அது வெளியாகி மக்களைச் சென்று அடைவதற்குள் திரையரங்குகளில் இருந்து அவை வெளியேறி விடுகின்றன."

‘மக்களின் எதிர்பார்ப்புகள் உயர்ந்துள்ளன’

பட மூலாதாரம்,RAVIKUMAR / INSTAGRAM

சமீப காலமாக மக்களின் சினிமா ரசனையும், எதிர்பார்ப்பும் அதிகரித்துள்ளதற்கு நுட்பமான காரணம் ஒன்றை முன்வைக்கிறார் அயலான் பட இயக்குநர் ரவிக்குமார்.

“ஓடிடி வந்த பிறகு உலகளாவிய போட்டி உருவாகியுள்ளது. மக்கள் பல மொழிப் படங்களையும் , உலகப் படங்களையும் தங்களது மொழியிலேயே பார்க்கிறார்கள். எனவே, அதற்கு இணையாக இங்கும் படம் வெளியாக வேண்டும் என்று எதிர்பார்க்கிறார்கள்.”

“ஆனால் அந்த எதிர்பார்ப்பு பொய்யாகும்போது, சில நேரங்களில் ஏமாற்றமடைகிறார்கள். எனவே அதற்கு ஏற்றவாறு படங்களை உருவாக்க வேண்டும் என்ற கட்டாயம் படைப்பாளர்களுக்கு உருவாகியுள்ளது,” என்கிறார் ரவிக்குமார்.

மற்ற எந்த மொழியைவிடவும் தமிழ் திரைத்துறை பல புதிய வகை நுட்பங்களை, கதைகளை சினிமாவில் அறிமுகப்படுத்தியுள்ளது என்று கூறும் அவர், மக்களின் எதிர்பார்ப்புக்கு ஏற்ற வகையில் படங்களை இயக்குகையில் சிறிய படம், பெரிய படம் எனப் பேதமின்றி அவர்கள் ஆதரவு வழங்குவார்கள் என்கிறார்.

ஓடிடியின் போட்டி

பட மூலாதாரம்,K RAJAN

தமிழ்ப் படங்கள் வெளியாவதன் சிக்கல் குறித்து பிபிசி தமிழிடம் பேசிய தயாரிப்பாளர், இயக்குநர், திரையரங்கு உரிமையாளர், விமர்சகர் என அனைவரும் ஒரு சேர ஒப்புக்கொள்வது, 'ஓடிடியின் வருகை சினிமாவில் பல்வேறு மாற்றங்களை உருவாக்கியுள்ளது' என்பதாகும்.

அதில் 'சிலருக்கு நல்ல மாற்றங்கள் கிடைத்திருந்தாலும், சிலருக்கு பாதகங்களும் ஏற்பட்டுள்ளன.' அப்படிப்பட்ட ஒன்றாகவே திரையரங்கிற்கு வரும் மக்களின் எண்ணிக்கையில் ஏற்பட்டுள்ள சரிவைப் பார்க்கிறார்கள் இவர்கள்.

கோவிட் பெருந்தொற்று காலத்தில் மிகப் பிரபலமாக உருவெடுத்த ஓடிடி தளங்கள் சினிமா துறையில் ஏற்பட்ட புரட்சியாக பரவலாகப் பார்க்கப்பட்டாலும், திரைத்துறையினர் பலரால் அப்படிப் பார்க்கப்படவில்லை.

பட மூலாதாரம்,G DHANANJEYAN / X

கடந்த இரண்டு ஆண்டுகளில் சிறிய படங்களுக்கு மக்கள் திரையரங்கம் வருவது கடுமையான அளவில் குறைந்துள்ளதாகக் கூறுகிறார் தமிழ் திரைப்பட தயாரிப்பாளர் சங்கத்தின்(TFAPATN) பொருளாளர் மற்றும் தயாரிப்பாளரான ஜி.தனஞ்செயன்.

“பெரிய படங்களை திரையரங்குகளில் பார்த்துக் கொள்ளலாம். சிறிய படங்கள் எப்படியும் சில வாரங்களில் ஓடிடியில் வெளியாகிவிடும். அதில் பார்த்துக் கொள்ளலாம் என்ற எண்ணம் தீவிரமாக வளர்ந்துவிட்டது. அதை மாற்றவே நாங்கள் போராடிக் கொண்டிருக்கிறோம்,” என்று கூறுகிறார் அவர்.

இதே கருத்தை ஒப்புக்கொள்ளும் திருப்பூர் சுப்பிரமணியம், ஓடிடி வருகைக்குப் பிறகு சிறிய படங்களுக்கு மக்களிடம் சுத்தமாக ஆதரவு இல்லை என்று கூறுகிறார்.

ஆனால், அதைத் தாண்டியும் குட் நைட், டாடா, போர்த்தொழில் பழகு, பார்க்கிங், இறுகப்பற்று போன்ற படங்கள் திரையரங்குகளில் வெற்றி பெற்றுள்ளன என்கிறார்கள் அந்தணன் மற்றும் கே.ராஜன்.

மக்கள் எதிர்பார்ப்புகளுக்கு ஏற்ற கதைகள், வேறு யாரும் கொடுக்க முடியாத படைப்பை வெளிக்கொண்டு வரும்போது அது எந்தப் படமாக இருந்தாலும் ஓடிடி போன்ற சவால்களையும் தாண்டி திரையரங்கில் மக்கள் ஆதரவு கிடைக்கும் என்று கூறுகின்றனர் கோபி நயினார் மற்றும் ரவிக்குமார்.

https://www.bbc.com/tamil/articles/c19dr0kpxpzo

பட மூலாதாரம்,GETTY IMAGES

ஆயுர்வேதம், 3,000 ஆண்டுகளுக்கு முன்பு இந்தியாவில் தோன்றியது. இந்த பண்டைய மருத்துவ முறையின் மறுமலர்ச்சி மையமாக கேரளா உள்ளது.

கேரளாவிற்கு விடுமுறையைக் கழிக்கச் சென்ற ஷில்பா ஐயர், ஆயுர்வேத சிகிச்சைக்கு புகழ் பெற்ற ‘ஆர்ய வைத்யா சாலா’ அமைந்துள்ள கோட்டக்கல் நகரத்திற்குச் செல்ல முடிவு செய்தார். இந்த மையம் 1902ஆம் ஆண்டில் தொடங்கப்பட்டது.

ஏழு நாட்கள் அங்கு தங்கி, உடல் மற்றும் மனதை தூய்மைப்படுத்தும் மற்றும் புத்துணர்ச்சியூட்டும் சிகிச்சையான பஞ்சகர்மாவை முடித்த பிறகே அந்த சிகிச்சை மையத்தை விட்டு வெளியேறினார்.

"நான் தொடர்ந்து நவீன வாழ்க்கையின் தேவைகளால் ஆக்கிரமிக்கப்பட்டு இருந்தேன், தொடர்ச்சியான உடல் வலிகளும் இருந்தது. அதனால் தான் எனது சொந்த ஆரோக்கியத்தில் கவனம் செலுத்த முடிவு செய்தேன்" என்று ஷில்பா கூறுகிறார்.

பஞ்சகர்மா, நச்சு நீக்கும் செயல்முறைகளை உள்ளடக்கிய ஒரு முழுமையான ஆயுர்வேத சிகிச்சை. இது மூலிகை மருந்துகள், உடல் சுத்திகரிப்பு சிகிச்சைகள், பிரத்யேகமான உணவுத் திட்டங்கள் மற்றும் ஆரோக்கிய செயல்பாடுகளை ஒருங்கிணைத்து நோய்க்கான மூல காரணத்தை நீக்கி, உடலை புத்துயிர் பெறச் செய்து, ஆரோக்கியத்தையும் நீண்ட ஆயுளையும் உறுதி செய்கிறது.

முன்பை விட ஆரோக்கியமாகவும், சிறப்பாகவும் உணர்வதாக ஷில்பா கூறுகிறார்.

கேரளாவில் ஆயுர்வேத சிகிச்சை செய்து கொள்வதற்காக பலரும் முன்பதிவு செய்கிறார்கள். கேரளாவின் இந்த கடற்கரை சொர்க்கத்தில் முழுமையான மருத்துவ சிகிச்சை என்பது ஒரு வாழ்க்கை முறையாக இருக்கிறது. கேரளாவில் உடலும் மனமும் புத்துணர்வு பெற ஆயுர்வேத சிகிச்சையில் என்ன செய்கிறார்கள்?

பட மூலாதாரம்,AMAL TAMARA

3000 ஆண்டுகளுக்கு முன் தோன்றிய முறை

‘ஆயுர்’ (வாழ்க்கை) மற்றும் ‘வேதம்’ (அறிவியல் அல்லது அறிவு) ஆகிய சமஸ்கிருத வார்த்தைகளிலிருந்து பெறப்பட்ட ஆயுர்வேதம், 3,000 ஆண்டுகளுக்கு முன்பு இந்தியாவில் தோன்றியது.

உடல்நலம் மற்றும் ஆரோக்கியம் என்பது மனம், உடல், ஆன்மா மற்றும் சுற்றுச்சூழலுக்கு இடையே ஒரு நுட்பமான சமநிலையைச் சார்ந்தது மற்றும் நோய் தீர்க்கும் உத்திகளுக்குப் பதிலாக தடுப்பு உத்திகளுக்கு அதிக முக்கியத்துவம் அளிப்பது என்ற சித்தாந்தத்தின் அடிப்படையில் இது அமைந்துள்ளது.

பழங்கால மருத்துவ முறையானது, பிரகிருதி (உடலின் அமைப்பு) மற்றும் தோஷங்கள் (உயிர் சக்திகள்) ஆகியவற்றுக்கு இடையேயான உலகளாவிய ஒற்றைத் தொடர்பை மையமாகக் கொண்டது. ஆகாஷ் (ஆகாயம்), ஜல் (நீர்), பிருத்வி (பூமி), அக்னி (நெருப்பு) மற்றும் வாயு (காற்று) ஆகிய ஐந்து கூறுகளின் மாறுபட்ட கலவைகள் மூன்று தோஷங்களை உருவாக்குகின்றன.

ஆயுர்வேத பயிற்சியாளரான டாக்டர் கௌரங் பனேரி, ஒவ்வொரு நபருக்கும் வாத, பித்த மற்றும் கபா ஆகிய மூன்று தோஷங்கள் வெவ்வேறு வலிமை மற்றும் அளவுகளில் உள்ளன என்பதை விளக்குகிறார்.

"முக்கியமான தோஷம் அவற்றின் பிரகிருதியை தீர்மானிக்கிறது. வெளிப்புற அல்லது உள் தூண்டுதலால் (பொதுவாக உணவுப் பழக்கம், வாழ்க்கை முறை அல்லது உடற்பயிற்சி ஆகியவற்றுடன் தொடர்புடையது) தோஷங்கள் பாதிக்கப்படும் போது நோய்கள் எழுகின்றன. மூன்றிற்கும் இடையே நல்லிணக்கத்தை உறுதிப்படுத்த ஆயுர்வேதம் செயல்படுகிறது," என்று அவர் கூறுகிறார்.

ஆயுர்வேத மருத்துவம், பல தலைமுறைகளாக ஆயுர்வேத பயிற்சியாளர்கள் மூலம் இந்தியா முழுவதும் பரப்பப்பட்டுள்ளது. ஆனால் உண்மையிலேயே ஆயுர்வேதத்திற்கு புகழ் பெற்ற மாநிலம் கேரளா தான். பல நூற்றாண்டுகளாக கேரள மக்கள் ஆயுர்வேத சிகிச்சை முறையின் மிகப்பெரிய விசுவாசிகளாக இருந்து வருகிறார்கள்.

ஆயுர்வேதத்தின் பிரபலத்தைப் பற்றி அறிந்த மாநில அரசு, 1994ஆம் ஆண்டு முதல் கேரளாவை ஆயுர்வேத ஆரோக்கியம் பெறுவதற்கான ஒரு இடமாக நிலைநிறுத்த பல முயற்சிகளை எடுத்து வருகிறது.

கேரளா சுற்றுலாத் துறை இயக்குநர் பி.பி.நூஹ் கூறுகையில், "ஆயுர்வேதத்தை முழுமையாக நடைமுறைப்படுத்துவது கேரளாவில் மட்டுமே உள்ளது. இங்குள்ள பெரும்பாலான பயிற்சியாளர்கள் ஆயுர்வேத மருத்துவக் குடும்பங்களில் இருந்து வந்தவர்கள். இந்த அறிவு தலைமுறைதலைமுறையாக கடத்தப்பட்டு வருகிறது.

கேரளாவில் உள்ள ஒவ்வொரு சிறிய நகரத்திலும் கிராமத்திலும் ஆயுர்வேத மருந்தகம் உள்ளது. இது மாநிலத்தில் அதன் பிரபலத்தை வெளிப்படுத்துகிறது." என்றார்.

பட மூலாதாரம்,GETTY IMAGES

கேரளாவின் ‘ஆயுர்வேத பருவம்’

இந்தியாவில் வருடாந்திர பருவமழையைப் பெறும் முதல் இடம் கேரளாவாகும். கேரள மக்கள் இந்த மழைக்காலத்தை ‘ஆயுர்வேதப் பருவம்’ என்று அழைக்கின்றனர்.

"மக்கள் வருடாந்திர புத்துணர்ச்சி சிகிச்சைக்கு செல்லும் நேரம் இது. கேரளாவில் உள்ள யானைகளுக்கு கூட அவற்றின் வேலை அட்டவணையில் இருந்து ஓய்வு அளிக்கப்பட்டு, பிரத்யேகமாக தயாரிக்கப்பட்ட மருத்துவ உணவும் அளிக்கப்படுகிறது," என்று நூஹ் கூறுகிறார்.

கேரளாவின் காலநிலை மற்றும் வளமான மண், பாரம்பரிய மருத்துவ தாவரங்கள் மற்றும் நடைமுறையில் பயன்படுத்தப்படும் மூலிகைகள் வளர்ச்சிக்கு உகந்ததாக உள்ளது என்றும் அவர் குறிப்பிடுகிறார்.

"கேரளாவின் அடர்ந்த வெப்பமண்டல காடுகளில் ஆயுர்வேதத்தால் பரிந்துரைக்கப்பட்ட சாறுகள் மற்றும் அமுதங்கள் தயாரிக்கப் பயன்படும் மூலிகைகள் மற்றும் மருத்துவ தாவரங்கள் உள்ளன," என்று அவர் மேலும் கூறுகிறார்.

இந்தச் சிறிய மாநிலத்தில் 100க்கும் மேற்பட்ட அரசு நடத்தும் ஆயுர்வேத மருத்துவமனைகள், 800 ஆயுர்வேத மருந்து தொழிற்சாலைகள் மற்றும் 800 ஆயுர்வேத மருந்தகங்கள் உள்ளன. 120 ஆயுர்வேத விடுதிகள் மற்றும் தனியார் ஆரோக்கிய மையங்கள் கட்டி வஸ்தி (Kati vasti) போன்ற சிறப்பு சிகிச்சைகளை வழங்குகின்றன.

இது முதுகு வலி மற்றும் வீக்கத்திற்கான எண்ணெய் அடிப்படையிலான சிகிச்சையாகும். இலக்கிழி , உடல் வலிகள் மற்றும் தசைக்கூட்டு காயத்தைச் சரிசெய்வதற்கு சூடான மூலிகைப் பொடிகள் கொண்டு அளிக்கப்படும் சிகிச்சை. ஞாஞ்சவரா கிழி (Njavara kizhi) கீல்வாதம் அல்லது நாள்பட்ட தசைக்கூட்டு அசௌகரியத்திற்கான மசாஜ் சிகிச்சை.

ஷிரோதாரா, மன அழுத்தம் மற்றும் பதட்டத்தை குறைப்பதற்கான ஒரு மறுசீரமைப்பு சிகிச்சை. இது நெற்றியில் சூடான, மருத்துவ எண்ணெயை தடவுவதன் மூலம் செய்யப்படும் சிகிச்சை.

பெரும்பாலான சிகிச்சை மையங்கள் நோய் எதிர்ப்புச் சக்தி, மனநலம், பதட்டம், வலி மேலாண்மை, எடை இழப்பு, தோல் மற்றும் உடல்நலப் பாதுகாப்பு, தூக்கப் பிரச்சனைகள், தடிப்புத் தோல் அழற்சி, கண் பராமரிப்பு, கீல்வாதம், பக்கவாதம், சியாட்டிகா, இரைப்பை பிரச்சனைகள் மற்றும் பலவிதமான உடல்நலப் பிரச்னைகளுக்கு சிகிச்சைகளை வழங்குகின்றன.

"சிகிச்சைகளில் பொதுவாக உணவு மாற்றங்கள், மூலிகை மருந்துகள், மசாஜ் சிகிச்சைகள், பவுல்டிசஸ், தியானம் மற்றும் மூச்சுப் பயிற்சிகள் ஆகியவை அடங்கும். தாவரங்கள், மூலிகைகள், எண்ணெய்கள் மற்றும் சில மசாலாப் பொருட்கள் அறிகுறிகளை நிர்வகிக்கவும், உடல் மாற்றங்களுக்கு சிகிச்சையளிக்கவும் மற்றும் நோய் எதிர்ப்பை உருவாக்கவும் பயன்படுத்தப்படுகின்றன" என்று ஆயுர்வேத மருத்துவர் ஷைனி ஹரிஷ் விளக்குகிறார். இவர் கேரள மாநிலம் கோட்டக்கல்லில் மருத்துவராக உள்ளார்.

ஆயுர்வேதம், நோய் தடுப்பு உத்திகளுக்கு அதிக முக்கியத்துவம் கொடுக்கிறது. ஒருவரின் வாழ்க்கையில் சமநிலையை கவனித்து ஆரோக்கியத்தை பராமரிக்க ஊக்குவிக்கிறது. இயந்திரத்தனமான வாழ்க்கை மற்றும் அது கொண்டு வரும் பிரச்னைகளால் சோர்வடைந்த மக்களுக்கு இது பயன்படுகிறது.

கேரளாவில் உள்ள ஒரு சொகுசு ஆயுர்வேத ரிசார்ட்டான அமல் தமராவின் பொது மேலாளரும் மூத்த ஆயுர்வேத ஆலோசகருமான டாக்டர் ரெஜி ராஜ் கருத்துப்படி, “தேசிய மற்றும் சர்வதேச அளவில் ஆயுர்வேதம் மீதான ஆர்வத்தைத் தூண்டியது கொரோனா தான். ஏனெனில் உடலை மீட்டெடுக்கவும் உடலின் சமநிலையைப் பராமரிக்கவும் அவ்வப்போது உடலைச் சுத்தம் செய்வதிலும் ஆயுர்வேதம் கவனம் செலுத்துகிறது" என்கிறார்.

பட மூலாதாரம்,GETTY IMAGES

‘ஆரோக்கியச் சுற்றுலா’

நவம்பர் 2021 முதல், ஆயுர்வேத சிகிச்சைகளுக்காக கேரளா மாநிலத்திற்கு வருகை தரும் உள்நாட்டுப் பயணிகளின் எண்ணிக்கையில் 15% அதிகரித்துள்ளது.

நீண்ட காலமாக கேரளாவில் அதன் கடற்கரைகள், மலைகள், உணவு வகைகளை விரும்பி சர்வதேச சுற்றுலாப் பயணிகள் வருகை தருகின்றனர். ஆயுர்வேத மையங்களுக்கு ஆரோக்கிய சுற்றுலா வருபவர்களின் எண்ணிக்கையும் அதிகரித்துள்ளது.

தேவை மிகவும் அதிகமாக உள்ளது, ஆகஸ்ட் 2023இல், இந்திய அரசாங்கம் ஆயுஷ் விசாவை அறிமுகப்படுத்தியது. பாரம்பரிய மருத்துவ முறைகளின் கீழ் சிகிச்சை பெறும் வெளிநாட்டுப் பிரஜைகளுக்கான பயணத்தை எளிதாக்கும் ஒரு புதிய வகை விசா அது.

(ஆயுஷ் என்பது ஆயுர்வேதம், யோகா, இயற்கை மருத்துவம், யுனானி, சித்தா மற்றும் ஹோமியோபதி என இந்தியாவில் நடைமுறையில் உள்ள ஆறு பாரம்பரிய மருத்துவ முறைகளின் சுருக்கமாகும்.)

"கேரளாவில் செழித்தோங்கியுள்ள உள்நாட்டு மற்றும் முழுமையான சுகாதார அமைப்புகளை உள்ளடக்கியது ஆயுஷ். மக்கள் இன்னும் இந்த அமைப்புகளின் அடிப்படையில் மருத்துவத் தீர்வுகளைத் தேடுகின்றனர்," என்று நூஹ் கூறுகிறார்.

இவற்றில், ஆயுர்வேதம் மிகவும் பிரபலமானது. மார்க்கெட் ரிசர்ச் ஃபியூச்சரின் 2024 அறிக்கையின்படி , உலகளாவிய ஆயுர்வேத சந்தை அளவு, 2022இல் 8 பில்லியன் அமெரிக்க டாலர்களாக இருந்தது. 2023இல் 9.2 பில்லியன் டாலர்களிலிருந்து 2032இல் 26.16 பில்லியன் டாலர்களாக உயர வாய்ப்புள்ளது.

ஆயுர்வேதத்தின் நன்மைகள் பற்றிய புரிதல், அலோபதியின் குறைகள் பற்றிய விழிப்புணர்வு, எளிதான அணுகல் மற்றும் மக்களின் செலவழிக்கும் திறன் அதிகரிப்பு ஆகியவை ஆயுர்வேதத்தின் தேவையை அதிகரிக்கின்றன என்று அந்த அறிக்கை கூறுகிறது.

பட மூலாதாரம்,GETTY IMAGES

கூடுதலாக, கேரளாவின் அமைதியான உப்பங்கழிகள் (Backwaters), சுத்தமான கடற்கரைகள் மற்றும் பசுமையான மலை வாசஸ்தலங்களுடன் சிகிச்சையை இணைப்பது பயணிகளை ஈர்க்கும் ஒரு அம்சமாகும்.

கேரளாவில் உள்ள நவீன மருத்துவ நிறுவனங்கள் இப்போது விமுறை காலத்தை ஆரோக்கியத்துடன் இணைக்கும் விதத்தில் சிறப்பு பேக்கேஜ்களை வழங்குகின்றன. இந்த ஆயுர்வேத ஸ்பாக்கள் மற்றும் ரிசார்ட்களில் பெரும்பாலானவை பிரமிக்க வைக்கும், அமைதியான தளங்களில் அமைந்துள்ளன.

ஷில்பாவின் பஞ்சகர்மா சிகிச்சைத் திட்டம் மூலிகை மருந்துகள், நச்சு நீக்க சிகிச்சைகள், ஆரோக்கிய நடவடிக்கைகள் மற்றும் தனிப்பட்ட உணவுத் திட்டம் ஆகியவற்றை ஒருங்கிணைத்தது.

"செழிப்பான, பசுமையான, அமைதியான சுற்றுப்புறங்கள் எனது எதிர்பாராத ஆரோக்கிய பயணத்திற்கு ஒரு இனிமையான சூழலை உருவாக்கியது. உடல் சுத்திகரிப்பு முறையைத் தொடங்கும்போது நான் அற்புதமான மன அமைதியை அனுபவித்தேன்," என்று அவர் கூறுகிறார்.

இதேபோல், புனேவைச் சேர்ந்த நீதா கேட்கர், தொடர்ச்சியான இருமலுக்கு சிகிச்சை பெற கேரளாவின் ஆலப்புழா நகரின் ஆயுர்வேத மையத்திற்குச் சென்றார். ஆரோக்கிய சிகிச்சை பெற்றதோடு மட்டுமல்லாது, படகு இல்ல பயணங்களுக்குப் பெயர் பெற்ற ஆலப்புழா நகரத்தின் அழகையும் ரசித்தார் நீதா.

பட மூலாதாரம்,GETTY IMAGES

நீதாவைப் பொறுத்தவரை, ஆயுர்வேத முறை நோயின் அறிகுறிகளில் கவனம் செலுத்தாமல் நோய்க்கான காரணத்தை மையமாகக் கொண்டு இருப்பது தான் முக்கிய அம்சம்.

"நோயின் தன்மை மற்றும் கட்டமைப்பை ஒருவர் புரிந்து கொள்ளும்போது தான், உடலின் சமநிலையை மீண்டும் நிலைநிறுத்த வேலை செய்ய முடியும் என்று மருத்துவர் கூறுகிறார். இந்த முறை தான் ஆயுர்வேதத்தை ஒரு சிறந்த மருந்தாக மாற்றுகிறது," என்று நீதா கூறுகிறார்.

பாரம்பரிய மருத்துவ முறை இன்றைய உலகத்திற்கும் மக்களுக்கும் நன்றாக பொருந்துகிறது என ராஜ் ஒப்புக்கொள்கிறார்.

"மனம், உடல் மற்றும் ஆன்மா ஆகியவற்றுக்கு இடையேயான சமநிலைக்கு பண்டைய அறிவியல் கொடுக்கும் முக்கியத்துவம், நோய் தடுப்பு சுகாதாரத்தின் முக்கியத்துவம் பற்றிய விழிப்புணர்வுடன் ஒத்துப்போகிறது. மனநலம், முறையற்ற தூக்கம், மன அழுத்தம் மற்றும் பதட்டம் போன்ற பிரச்னைகளை நிவர்த்தி செய்ய இது உதவுகிறது" என்று கூறுகிறார்.

https://www.bbc.com/tamil/articles/ck7le4ypz2mo

பட மூலாதாரம்,ILAYARAJA / INSTAGRAM

7 மணி நேரங்களுக்கு முன்னர்

இந்தியாவில் ஒவ்வோர் ஆண்டும் கிட்டத்தட்ட 20000த்துக்கும் அதிகமான பாடல்கள் உருவாக்கப்படுவதாக சமீபத்திய ஆய்வுகள் குறிப்பிடுகின்றன. அதேபோல் ஒட்டுமொத்த உலகத்தின் வாராந்திர சராசரி பாடல் கேட்கும் அளவைவிட, இந்தியர்கள் பாடல் கேட்கும் வாராந்திர சராசரி அளவு அதிகம்.

குறிப்பாக இந்திய பொழுதுபோக்குத் துறையில் அங்கம் வகிக்கும் இசைத் துறையின் வருடாந்திர வருமானமே பல ஆயிரம் கோடிகள் என தரவுகள் தெரிவிக்கின்றன.

ஆனால், அதே நேரம் இதே இசைத் துறையில் காப்புரிமை என்பது பெரும் விவாதப் பொருளாகவே இருந்து வருகிறது. குறிப்பாக இசையமைப்பாளர் இளையராஜா இசையமைத்துள்ள 4,500 பாடல்களை எக்கோ நிறுவனம் உட்பட சில நிறுவனங்கள் பயன்படுத்த தடை விதிக்க கோரி உயர்நீதிமன்றத்தில் நடந்து வரும் வழக்கு முக்கியமானதாகப் பார்க்கப்படுகிறது.

இந்நிலையில் காப்புரிமை என்றால் என்ன? அது திரைப்படத் துறையில் எப்படி இயங்குகிறது? அதற்கான சட்டங்கள் என்ன? உண்மையில் இசை யாருக்குச் சொந்தம் என்பது குறித்து இங்கு காணலாம்.

இளையராஜா வழக்கு

பட மூலாதாரம்,ILAYARAJA / INSTAGRAM

இந்திய இசைத்துறையில் முக்கியமான இசையமைப்பாளரான இளையராஜா 1976ஆம் ஆண்டு தனது இசைப் பயணத்தைத் தொடங்கியவர். இதுவரை பல்வேறு மொழிகளில் 7000த்திற்கும் அதிகமான பாடல்களுக்கு இசையமைத்துள்ளார்.

இந்நிலையில் கடந்த 2019ஆம் ஆண்டு எக்கோ மற்றும் அகி உள்ளிட்ட இசை நிறுவனங்கள் தாம் இசையமைத்த பாடல்களை அனுமதி இல்லாமல் பயன்படுத்தி வருவதாகவும், அதற்குத் தடை விதிக்க வேண்டும் என்றும் இளையராஜா தரப்பு வழக்குப் பதிவு செய்தது.

இந்த வழக்கில் முதலில் படத் தயாரிப்பாளரிடம் உரிமம் பெற்ற இசை நிறுவனங்கள் பயன்படுத்தத் தடை இல்லை என்றும், அதேநேரம் அதன் மீது இளையராஜாவுக்கும் தார்மீக உரிமை உள்ளது என்றும் தீர்ப்பு வழங்கப்பட்டது.

அதன்பிறகு இளையராஜா இந்தத் தீர்ப்பை எதிர்த்து மேல்முறையீடு செய்தபோது, இந்த நிறுவனங்கள் அந்த பாடல்களைப் பயன்படுத்த இடைக்கால தடை விதிக்கப்பட்டது. இதை எதிர்த்து இசை நிறுவனங்கள் தரப்பில் மீண்டும் மேல்முறையீடு செய்யப்பட்டு தற்போது இருதரப்பின் வழக்கு விசாரணையும் உயர்நீதிமன்றத்தில் இருக்கிறது.

இளையராஜா இந்த நிறுவனங்கள் மட்டுமின்றி இதற்கு முன்பு அவரது நீண்டகால நண்பரான பாடகர் எஸ்.பி.பாலசுப்ரமணியம், பாடகர்கள் சித்ரா மற்றும் எஸ்.பி.பி.சரண் ஆகியோர் தனது பாடல்களை மேடைகளில் பாடக்கூடாது என்றும்கூட வழக்கறிஞர் நோட்டீஸ் அனுப்பியுள்ளார். ஆனால், அந்தப் பிரச்னை அதற்குப் பின் சமரசத்தில் முடிந்து, இளையராஜா மற்றும் எஸ்.பி.பி ஒன்றிணைந்தனர்.

தற்போது இளையராஜாவுக்கு எதிரான மேல்முறையீட்டில், ஒரு தயாரிப்பாளரிடம் சம்பளம் பெற்றுவிட்டு இசையமைத்துக் கொடுக்கும் இசையமைப்பாளருக்கு அதற்குப் பின் அந்த இசையின் மீது எந்த உரிமையும் இல்லை என்று எதிர்தரப்பால் வாதிடப்படுகிறது.

இது சட்டபூர்வமாக எந்தளவுக்கு உண்மை? காப்புரிமை சட்ட விதிகள் சொல்வது என்ன?

காப்புரிமை சட்டம்

பட மூலாதாரம்,GETTY IMAGES

காப்புரிமை சட்டம் என்பது 1957ஆம் ஆண்டு தனிநபர் ஒருவரின் படைப்பு அல்லது கண்டுபிடிப்பு ஆகியவற்றின் மீதான அவரது உரிமையைப் பாதுகாக்கும் நோக்கத்தில் உருவாக்கப்பட்டது என்று கூறுகிறார் வழக்கறிஞர் கார்த்திகேயன்.

அதேநேரம் “எல்லா படைப்புகளுக்கும் காப்புரிமையைப் பதிவு செய்ய வேண்டும் என்று அவசியமில்லை. குறிப்பாக ஒரு புதிய விஷயத்தைக் கண்டுபிடிக்கிறோம் அல்லது நிறுவனத்தைத் தொடங்குகிறோம் என்றால் அதைப் பதிவு செய்து அதற்கான உரிமையைப் பெற்றுக் கொள்ள வேண்டும்,” என்கிறார் அவர்.

ஆனால், இதுவே ஒரு ஓவியம் வரைகிறோம், இசையமைக்கிறோம், கதை எழுதுகிறோம் என்றால் அதைப் பதிவு செய்ய வேண்டும் என்று அவசியமில்லை. ஒருமுறை அது வெளியிடப்பட்டு விட்டாலே அது உங்களுக்கு மட்டுமே சொந்தம் என்று கூறுகிறார் கார்த்திகேயன்.

மேற்கத்திய கோட்பாடு

பட மூலாதாரம்,FACEBOOK

ஆனால், இந்தக் 'காப்புரிமை' என்கிற கோட்பாடே மேற்கத்திய உலகிலிருந்து வந்ததுதான். 'காப்புரிமை' என்பது கலைஞர்களுக்கும் அவர்கள் படைப்புகளுக்குமான வணிகப் பாதுகாப்பை உறுதி செய்கிற ஒரு விஷயம் என்கிறார் இசையமைப்பாளர் ஜேம்ஸ் வசந்தன்.

இந்தக் காப்புரிமை கோட்பாடு பிறந்த இடத்திற்கும் நம் நாட்டுக்கும் உள்ள ஓர் அடிப்படை வேறுபாடுதான் இந்தக் குழப்பங்களுக்கும் அடிப்படைக் காரணம்.

அங்கு இசை என்பது தனித்து நிற்பது; இங்கு திரைப்படங்களின் ஊடாக இணைந்திருப்பது. அந்த மாறுபாட்டை உணராமல் இயற்றப்பட்ட சட்டம் என்பதாலேயே அது பல முரண்களைக் கொண்டு வந்திருக்கிறது என்கிறார் அவர்.

இசை யாருக்கு சொந்தம்?

சமீப காலமாக தமிழ்திரைத்துறையில் இசையமைப்பாளர் மற்றும் இசை நிறுவனங்களுக்கு இடையில் ஏற்படும் உரசல்களில் அதிகம் எழும் வாதம் இசையமைப்பாளரால் உருவாக்கப்பட்ட இசை யாருக்கு சொந்தம் என்பதே!

இதுகுறித்து கார்த்திகேயனிடம் கேட்டபோது, “ஒரு இசையமைப்பாளர் தனி ஆல்பமாக உருவாக்கி இசையமைக்கிறார், அதை வெளியிடுகிறார் என வைத்துக்கொள்வோம். அப்படிச் செய்தால் அது முழுக்க முழுக்க அவருக்கே சொந்தம்."

ஆனால், ஒரு தயாரிப்பாளர் குறிப்பிட்ட படத்தின் தன்மைக்கு ஏற்ப தனக்கு இந்தப் பாடல்கள் வேண்டும் என்று கேட்கிறார்.

அதற்காக "ஒரு குறிப்பிட்ட பணத்தை சம்பளமாகப் பெற்றுக் கொண்டு ஒப்பந்தத்தின் அடிப்படையில் அந்த இசையமைப்பாளரும் இசை அமைத்துக் கொடுக்கிறார் என்றால் அந்த இசையின் மீதான மொத்த உரிமையும் அந்தத் தயாரிப்பாளருக்கே உள்ளது,” என்கிறார் அவர்.

பட மூலாதாரம்,KARTHIKEYAN.N

மேலும், “ஒரு படத்தில் வரும் பாடல் என்பது குறிப்பிட்ட இசையமைப்பாளரை மட்டும் சார்ந்தது கிடையாது. அதில் சவுண்ட் இன்ஜினியரில் தொடங்கி, பாடலாசிரியர் உள்ளிட்ட பலரும் பங்கு செலுத்துகிறார்கள். இதனால், ஒவ்வொருவரிடமும் ஒப்பந்தம் போட்டு அதன் அடிப்படையில்தான் அந்தப் பாடலை ஒரு தயாரிப்பாளர் தயாரிக்கிறார்,” என்று கூறுகிறார் வழக்கறிஞர் கார்த்திகேயன்.

இதுவே அந்த இசையமைப்பாளர் எந்த ஒப்பந்தமும் இல்லாமல், அந்தப் பாடலை இலவசமாக உருவாக்கிக் கொடுக்கிறார் என்றால் அப்போது அவர் சொந்தம் கொண்டாடிக் கொள்ள முடியும் என்றும் குறிப்பிடுகிறார் அவர்.

இந்தப் பிரச்னையை இரண்டு கோணங்களில் பார்க்க வேண்டும் என்று கூறுகிறார் ஜேம்ஸ் வசந்தன்.

அவரது கூற்றுப்படி, “சட்டம் என்பது ஒன்று; தார்மீகம் என்பது ஒன்று. சட்டம், அது இசையமைப்பாளருக்கே சொந்தம் என்று சொல்கிறது. தார்மீகப்படி அது தயாரிப்பாளருக்குத்தானே சொந்தம்?” என்று கூறுகிறார் அவர்.

ஆனால், அதை சட்டரீதியாக வாதிட்டு முடிவு செய்ய வேண்டுமே தவிர, கோயம்பேடு வணிகர்கள் போல வெறும் கடைநிலை விநியோகஸ்தர்களாக இருக்கும் இசை நிறுவனங்கள் ஒரு இசையமைப்பாளருக்கு அவரது பாடல் மீது உரிமை இல்லை என்று சொல்லக்கூடாது என்கிறார் ஜேம்ஸ் வசந்தன்.

பட மூலாதாரம்,ILAIYARAAJA/ FACEBOOK

பாடலின் தன்மையை மாற்றும்போது யாருக்கு சொந்தம்?

இளையராஜா வழக்கில்கூட அவரது தரப்பில் ஆஜரான வழக்கறிஞர் குழு, ஒரு பாடல் படத்திற்காக இசையமைக்கப்பட்டு வீடியோ காட்சிகளோடு இணைக்கப்பட்டு வெளியாகிறது.

அதன் மீது மட்டுமே அந்த தயாரிப்பாளருக்கு உரிமை உண்டு. அதை ஆடியோ போன்று வேறு எந்த வடிவத்திலும் வெளியிட உரிமை கிடையாது என்று வாதிட்டது. ஆனால், வழக்கறிஞர் கார்த்திகேயன் கூறும் கருத்தோ அதற்கு எதிர்மாறானதாக இருக்கிறது.

அவரது கூற்றுப்படி, “ஒரு படத்தில் பாடல் அமைப்பதற்காக தயாரிப்பாளர் மற்றும் இசையமைப்பாளர் இடையே ஒப்பந்தம் போடும்போதே, அதில் ‘All Rights Reserved’ என்று குறிப்பிடப்பட்டிருக்கும்.

அதன் அர்த்தம், குறிப்பிட்ட பாடலை எந்த விதத்திலும் பயன்படுத்திக் கொள்ளலாம் என்பதே. எனவே ஒரு பாடலை ஆடியோ, வீடியோ என எந்த வகையிலும் பயன்படுத்திக் கொள்ளவும் அந்த தயாரிப்பாளருக்கு உரிமை உண்டு.”

எத்தனை ஆண்டுகளுக்கு சொந்தம் கொண்டாட முடியும்?

பட மூலாதாரம்,GETTY IMAGES

ஒரு இசையமைப்பாளர் குறிப்பிட்ட நிறுவனம் அல்லது தயாரிப்பாளரிடம் ஒப்பந்தம் போட்டு ஒரு இசையை உருவாக்கித் தருகிறார் என்றால் அடிப்படையில் குறிப்பிட்ட தயாரிப்பாளர் அந்த இசையை தனது வாழ்நாள் வரை மற்றும் அவரது இறப்புக்குப் பிறகு அவரின் வாரிசுகள் 60 ஆண்டுகள் வரை பயன்படுத்திக் கொள்ள முடியும் என்கிறார் கார்த்திகேயன்.

இதே ஒரு நிறுவனமாக இருந்தால் அந்நிறுவனம் அந்த இசையை 60 ஆண்டுகளுக்குப் பயன்படுத்திக் கொள்ளலாம். அதற்குப் பிறகு அந்தப் பாடல்களை யாரும் உரிமை கொண்டாட முடியாது. அது பொதுத்தளத்திற்கு வந்துவிடும். யார் வேண்டுமானாலும் பயன்படுத்திக் கொள்ளலாம் என்கிறார் அவர்.

'குளிர்காயும் இசை நிறுவனங்கள்'

இந்த ஒட்டுமொத்த விவகாரத்தில் குளிர்காய்வது, கொள்ளையடிப்பது இசை நிறுவனங்கள் மட்டுமே. அவர்களை அவர்களுக்குரிய இடத்தில் வைக்கும் சட்டம் வேண்டும் என்று அழுத்தமாக கூறுகிறார் ஜேம்ஸ் வசந்தன்.

“ஒரு வணிகத்துக்கு மூன்று நிலைகள் உண்டு. உற்பத்தியாளர், இடைத்தரகர், விற்பனையாளர். இங்கு இடைத்தரகர் என்பது தயாரிப்பாளர். இசை நிறுவனங்கள் மூன்றாவது நிலை. அவர்களின் பங்களிப்புக்கு ஏற்ற விகிதத்துக்கு சட்டம் மாற்றப்பட வேண்டும்.”

“ஒரு படத்துக்குப் போடப்பட்ட இசையை வேறு படத்திற்கோ, தளத்திற்கோ பயன்படுத்த வேண்டுமென தயாரிப்பாளரோ, இசை நிறுவனமோ நினைத்தால் அதற்குரிய தொகையை அந்த இசையமைப்பாளருக்குக் கொடுக்க வேண்டும். அந்தத் தொகையை நிர்ணயிக்கும் உரிமை இசையமைப்பாளருக்கு மட்டுமே உண்டு” என்று வலியுறுத்துகிறார் ஜேம்ஸ் வசந்தன்.

சட்டத்தில் மாற்றம் வேண்டுமா?

பட மூலாதாரம்,GETTY IMAGES

ஜேம்ஸ் வசந்தனை பொறுத்தவரை தற்போது இருக்கும் சட்டத்தை முறையாக வடிவமைத்தால் இதற்கு நிரந்தரத் தீர்வு காணமுடியும். அதற்கு திரைப்பட இசையையும், தனி இசையையும் இரண்டாகப் பிரித்து சட்டத் திருத்தம் செய்யவேண்டும் என்கிறார்.

"தனி இசை உருவாக்கம் பாடகரை மையப்படுத்தியது. திரைப்பட இசை அந்தத் திரைப்பட இயக்குநர், நடிகர், தயாரிப்பாளர், பாடலாசிரியர், பாடகர் என்போரின் அடையாளங்களை மையப்படுத்திய ஒரு புதுமைக் கலவை.

எனவே, இந்தக் காப்புரிமைச் சட்டத்தை இதற்கு ஏற்றாற்போல நாமே மாற்றியமைத்துக்கொள்ள வேண்டும். அப்படிச் செய்யாத வரை இந்த முரண்களும், மோதல்களும் தீரவே தீராது" என்று கூறுகிறார் அவர்.

ஆனால், தற்போது இருக்கும் சட்டமே போதுமானது. அதன்படி தனியாக ஆல்பமாக ஒரு இசையை வெளியிடும்போது அதற்கான காப்புரிமை வழங்கப்படுகிறது. இதுவே ஒரு படத்தைச் சார்ந்ததாக இசை உருவாகும்போது, அதில் பலதரப்பட்ட பங்குதாரர்களும் உள்ளதால் அதன் ஒட்டுமொத்த உரிமை தயாரிப்பாளர்களிடம் இருக்கிறது அவ்வளவுதான் என்கிறார் கார்த்திகேயன்.

எனவே குறிப்பிட்ட இசையமைப்பாளர்தான் ஒப்பந்தம் போடும்போதே அதற்கான தக்க சம்பளம் என்ன என்பதை நிர்ணயித்துப் பெற்றுக்கொள்ள வேண்டும் என்கிறார் அவர்.

- இது, பிபிசிக்காக கலெக்டிவ் நியூஸ்ரூம் வெளியீடு

https://www.bbc.com/tamil/articles/c4n1ppkdyp2o

53 நிமிடங்களுக்கு முன்னர்

ஒன்பது மாதங்களுக்கு முன்பு வெளியான ஓப்பன்ஹெய்மர் திரைப்படம் உலகளவில் பல்வேறு பிரிவுகளில் ஏழு விருதுகளை வென்றுள்ளது. இந்நிலையில் கடந்த வெள்ளிக்கிழமைதான் இந்த படம் ஜப்பானில் வெளியிடப்பட்டது.

ஆனால், இந்தப் படத்தை ஜப்பானில் வெளியிட தயாரிப்பாளர்கள் மற்றும் விநியோகஸ்தர்கள் எடுத்த முடிவு அவ்வளவு எளிதானதல்ல.

பிரபல இயக்குனர் கிறிஸ்டோபர் நோலன், அமெரிக்க இயற்பியலாளர் ஜே. ராபர்ட் ஓப்பன்ஹெய்மரின் வாழ்க்கைக் கதையை அடிப்படையாகக் கொண்டு இந்தப் படத்தை இயக்கியுள்ளார். மிக ரகசியமாக வைக்கப்பட்டிருந்த மன்ஹாட்டன் திட்டத்தில் ராபர்ட் ஓப்பன்ஹெய்மரின் பங்கு என்ன என்பதும் இந்த படத்தில் காட்சிப்படுத்தப்பட்டிருந்தது.

அறிவியல் சோதனைகள் மற்றும் ஆராய்ச்சிகளின் முடிவுகள், அணுகுண்டு தயாரிப்பது, ஜப்பானின் ஹிரோஷிமா மற்றும் நாகசாகி மீதான அணுகுண்டு தாக்குதல்கள், அதன் பின்விளைவுகள் உள்ளிட்ட அனைத்தும் இந்தப் படத்தில் காட்டப்பட்டுள்ளன.

பட மூலாதாரம்,GETTY IMAGES

ஜப்பானில் ஏன் தாமதம்?

ஜூலை 21, 2023 அன்று வெளியான ஓப்பன்ஹெய்மர் உலகம் முழுவதும் சுமார் ஒரு பில்லியன் டாலர்களை வசூலித்துள்ளது. ஆனால், இந்த படத்தின் பின்னணியைக் கருத்தில் கொண்டு, ஜப்பானில் இந்த படத்தை வெளியிடுவதில் தாமதம் ஏற்பட்டது.

ஜப்பானில் இப்படத்தின் திரையிடல் குறித்து கடந்த ஆண்டு பேசியிருந்த இயக்குனர் கிறிஸ்டோபர் நோலன் , ஜப்பானியன் சூழலுக்கு ஏற்ப "கவனமான அணுகுமுறையை" எடுத்து வருகிறோம் என்று தெரிவித்தார்.

சினிமா ப்ளன்ட் பப்ளிக்கேஷனின் இயக்குனர் இதுகுறித்து பேசுகையில்,” உலகமே இந்தப் படத்தைப் பார்த்திருக்கிறது. எனவே ஜப்பானின் திரைப்பட ஆர்வலர்கள் மற்றும் இந்த படத்தை பார்க்க ஆர்வமாக உள்ளவர்களும் இந்தப் படத்தைப் பார்க்க வாய்ப்பு கிடைக்க வேண்டும்,”என்று கூறியுள்ளார் .

1945ஆம் ஆண்டு ஆகஸ்ட் 6 மற்றும் 9 ஆகிய தேதிகளில் ஜப்பானின் ஹிரோஷிமா மற்றும் நாகசாகி ஆகிய இரு நகரங்கள் மீதும் அணுகுண்டுகள் வீசப்பட்டன.

இந்த அணுகுண்டு தாக்குதலில் சுமார் 1 லட்சத்து 40 ஆயிரம் பேர் உயிரிழந்தது ஜப்பான் வரலாற்றில் பெரும் சோகமான நிகழ்வாக அமைந்தது.

இந்த படத்தை பார்த்த ஜப்பானிய பார்வையாளர் ஒருவர் பிபிசியிடம் பேசுகையில், "அவர்கள் கூட்ட அறையில் அமர்ந்து ஹிரோஷிமாவைப் பற்றியே மீண்டும் மீண்டும் பேசிக்கொண்டிருந்தனர். அங்குள்ள மக்களின் உணர்வுகளுக்கு மதிப்பளிக்காதது எனக்கு வருத்தமாக இருந்தது" என்று கூறினார்.

வேறு சிலரோ கதை சொல்லும் மேற்கத்திய பாணி தங்களுக்குப் பிடிக்கவில்லை என்று கூறினார்கள்.

பட மூலாதாரம்,GETTY IMAGES

வெளியீடு என்ன ஆனது?

ஓப்பன்ஹெய்மர் படத்தின் தயாரிப்பாளரான யுனிவர்சல் ஸ்டுடியோஸ் மற்றும் விநியோகஸ்தரான பிட்டர்ஸ் எண்ட் ஆகியோர் டைம்ஸ் இதழிடம், ஜப்பானில் இந்த படத்தை வெளியிடுவது குறித்து பல மாதங்கள் கருத்து ரீதியான விவாதத்தில் ஈடுபட்டதாக கூறியுள்ளனர்.

“இயக்குனர் கிறிஸ்டோபர் நோலன் பாரம்பரிய கதை சொல்லும் பாணிக்கு பதிலாக புதிய சினிமா அனுபவத்தை பார்வையாளர்களுக்கு கொடுத்துள்ளார். இதை பார்வையாளர்களே பெரிய திரையில் தங்கள் கண்களால் பார்த்து அனுபவிக்க வேண்டும் என்று நாங்கள் விரும்புகிறோம்," என்று அந்நிறுவனங்கள் கூறுகின்றன.

இருப்பினும், ஹிரோஷிமா மற்றும் நாகசாகியில் அணுகுண்டு வீசியதால் ஏற்பட்ட பேரழிவுகளின் உண்மையான காட்சிகளை படத்தில் காட்டாதது குறித்து ஏற்கனவே நோலனை சர்வதேச பத்திரிகைகளும், பொதுமக்களும் கேள்வி எழுப்பியுள்ளனர்.

இதற்கு பதிலளித்த நோலன், "சில நேரங்களில் அதிகமான காட்சிகளை வைப்பதை விட, தேவையான சில காட்சிகளை வைப்பது போதுமானது என்று நம்புவதால், படத்தில் உள்ள காட்சிகளே இந்த நிகழ்வு சோகம் நிறைந்தது என்பதை தெளிவுபடுத்துவதாக கருதுகிறேன்" என்றார்.

ஆசிரியர் நவோகோ வேக் தி கன்வெர்ஷனல் போர்ட்டலில் எழுதிய கட்டுரையில், “கிறிஸ்டோபர் நோலன் குண்டுவெடிப்புகளால் ஏற்பட்ட பேரழிவை அலட்சியப்படுத்தவில்லை. ஹாலிவுட் நடிகர் சிலியன் மர்பி(ஓப்பன்ஹைமர்) ஹிரோஷிமா குண்டுவெடிப்புக்குப் பிறகு நடத்தப்பட்ட ஒரு கொண்டாட்ட உரையில் தனது நண்பர்களுடன் பேசும்போது குண்டுவெடிப்பை கற்பனை செய்வதைப் போன்ற காட்சி அமைக்கப்பட்டிருக்கும்" என்று கூறியுள்ளார்.

“ஆனால், அந்த கற்பனை காட்சியில் ஓப்பன்ஹெய்மர் ஒரு இளம் வெள்ளைப் பெண்ணின் (நோலனின் மகள் ஃப்ளோரா நடித்திருந்த பாத்திரம்) முகத்தை மட்டுமே பார்க்கிறார். அவர்கள் யாரும் உண்மையில் தாக்கப்படவில்லை இல்லையா? அங்கு ஜப்பானியர்கள், கொரியர்கள் மற்றும் ஆசிய, அமெரிக்கர்கள் மீது தான் குண்டு வீசப்பட்டது," என்றும் அவர் தெரிவித்துள்ளார்.

பட மூலாதாரம்,GETTY IMAGES

படம் பார்த்த மக்கள் கூறியது என்ன?

ஜப்பானில் இந்த படம் வெளியானதை தொடர்ந்து பார்வையாளர்கள் சிலர் கலவையான விமர்சனங்களை பிபிசியிடம் பகிர்ந்து கொண்டனர்.

1945 ஆம் ஆண்டு ஹிரோஷிமாவில் அணுகுண்டு வெடித்து சிதறிய இடத்தில் இருந்து சில மீட்டர் தொலைவில் இந்த படத்தை பார்த்த சிலரிடம் பிபிசியின் ஜப்பான் செய்தியாளர் ஷைமா கலீல் பேசிக் கொண்டிருந்தார்.

அவர்களிடம் ஓப்பன்ஹெய்மர் குறித்து என்ன நினைக்கிறார்கள் என்ற கேள்வியை அவர் முன்வைத்தார்.

" மக்கள் அணுகுண்டு சோதனைகளை ரசித்ததைக் கண்ட போது நான் மிகவும் வருத்தப்பட்டேன்," என்று இந்த படத்தை பார்த்த எரிகா அபிகோ கூறியுள்ளார்.

அணுகுண்டு எதிர்ப்பு ஆர்வலரான மயூ செட்டோ, படத்தை பார்த்து விட்டு தான் அதிர்ந்து விட்டதாக தெரிவித்தார்.

“சில காட்சிகள் என்னை கோபமூட்டியது. அங்கு மீண்டும் மீண்டும் ஹிரோஷிமா குறித்தே பேசிக் கொண்டிருந்தார்கள். ஆனால் அங்கிருந்தவர்களின் உணர்வுகள் குறித்து அவர்கள் சிந்திக்கவே இல்லை,” என்று அவர் கூறினார்.

மசாடோ டெய்னாமா என்ற இளைஞர், “இந்த திரைப்படம் ஓப்பன்ஹெய்மரை ஒரு சிறந்த மனிதராக காட்டினாலும், இந்த நிகழ்வு குறித்து அவர் மனதில் இருந்த குற்றவுணர்வை மறைக்க முடியவில்லை என்று காட்டியது மிகவும் சுவாரஸ்யமாக இருந்தது” என்று தெரிவித்துள்ளார்.

கனேய் குமே என்ற மாணவர் படத்தைப் பார்த்த பிறகு, இந்த சம்பவத்தை வெளி உலகம் எப்படிப் பார்க்கிறது என்று புரிந்துள்ளதாக கூறினார்.

“இந்த படத்தில் அணுகுண்டுகள் பல உயிர்களைக் காப்பாற்றியுள்ளதாக கூறப்பட்டுள்ளது. அதன் வழியாக அமெரிக்கர்களும், உலக மக்களும் இந்த சம்பவத்தை எப்படிப் பார்க்கிறார்கள் என்பது எனக்கு புரிந்துள்ளது” என்று அவர் கூறியுள்ளார்.

https://www.bbc.com/tamil/articles/c6p41e6g2ego

 

March 11, 2024, 1:18 pm IST

ஓப்பன்ஹெய்மர் படத்திற்கு ஏழு ஆஸ்கர் விருதுகள் - கிறிஸ்டோபர் நோலன் கூறியது என்ன?

பட மூலாதாரம்,GETTY IMAGES

20 நிமிடங்களுக்கு முன்னர்

அமெரிக்காவின் லாஸ் ஏஞ்சல்ஸ் நகரில் 2024ஆம் ஆண்டுக்கான அகாடமி விருதுகள் (ஆஸ்கார் விருதுகள்) விழாவில் ஓப்பன்ஹைமர் திரைப்படம் பெரும் வரவேற்பைப் பெற்றுள்ளது. இப்படம் ஏழு பிரிவுகளில் ஆஸ்கர் விருதுகளை வென்றுள்ளது.

சிறந்த படம், சிறந்த இயக்குநர் (கிறிஸ்டோபர் நோலன்), சிறந்த நடிகர் (சிலியன் மர்பி), சிறந்த துணை நடிகர் (ராபர்ட் டவுனி ஜூனியர்), சிறந்த ஒளிப்பதிவாளர் (ஹாய்ட் வான் ஹோய்டெமா), சிறந்த திரைப்பட எடிட்டிங் (ஜெனிஃபர் லெம்ம்), சிறந்த இசை, சிறந்த படத்தொகுப்பு ஆகியவற்றுக்கு ஓபன்ஹெய்மர் பரிந்துரைக்கப்பட்டு விருதும் வென்றுள்ளது.

கிறிஸ்டோபர் நோலன் இயக்கிய இந்தப் படம் இந்த ஆண்டுக்கான ஆஸ்கர் விருதுகளில் மொத்தம் 13 பிரிவுகளில் பரிந்துரைக்கப்பட்டது. ஓபன்ஹைமர் படம் ஏழு பிரிவுகளிலும், மற்ற படங்கள் ஆறு பிரிவுகளிலும் விருதுகளை வென்றன.

பட மூலாதாரம்,GETTY IMAGES

சிறந்த இயக்குநருக்கான விருதை கிறிஸ்டோபர் நோலன் பெற வந்தபோது, ஸ்டீவன் ஸ்பீல்பெர்க் அவருக்கு கோப்பையை வழங்கினார்.

அந்தச் சந்தர்ப்பத்தில், நோலன் தனது மனைவியும் இந்த படத்தின் இணை தயாரிப்பாளருமான எம்மா தாமஸுக்கு நன்றி தெரிவித்தார்.

அப்போது பேசிய எம்மா தாமஸ், அந்த தருணத்தைப் பற்றி தான் நீண்ட நாட்களாக நினைத்துக் கொண்டிருந்ததாகவும், அந்தத் தருணத்திலேயே தான் நின்றிருப்பதாகவும் கூறினார்

அவர் தனது கணவரை 'தனித்துவமானவர் என்று வர்ணித்தார். இருப்பினும், ஒட்டுமொத்த அணியின் சிறப்பான செயல்பாட்டிற்காக அவர் பெருமையடைவதாகக் கூறினார். மேலும் தனது மூன்று குழந்தைகளுக்கும் நன்றி தெரிவித்தார்.

பட மூலாதாரம்,GETTY IMAGES

சிறந்த நடிகைக்கான ஆஸ்கார் விருதைப் பெற்ற எம்மா ஸ்டோன்

பட மூலாதாரம்,GETTY IMAGES

எம்மா ஸ்டோன் சிறந்த நடிகையாக அவரது பெயர் அறிவிக்கப்பட்டபோது அதிர்ச்சியடைந்தார்.

"நான் அந்த நேரத்தில் அப்படியே சுயநினைவு இழந்துவிட்டேன். நான் மிகவும் அதிர்ச்சியடைந்தேன்,” என்று அவர் மேடைக்குப் பின்னால் கூறினார்.

"நான் கொஞ்சம் கொஞ்சமாகச் சுழல்வது போல் உணர்கிறேன். இது ஒரு பெரிய மரியாதை. எனக்கு இது ஆச்சரியமாக உள்ளது," என்றார்.

யோர்கோஸ் லாந்திமோஸ் படத்தில் பெல்லா பாக்ஸ்டராக நடித்ததில் இருந்து தான் நிறைய கற்றுக்கொண்டதாக அவர் கூறினார்.

"புதிதாக ஆனால் உருவகமாக நடிப்பதற்கான ஒரு வாய்ப்பு... மொழி மற்றும் திறமைகளை வேகமாகப் பெறும் ஒரு நபராக நடிக்கும் வாய்ப்பு... அவள் மகிழ்ச்சியும் ஆர்வமும் உண்மையான அன்பும் நிறைந்தவளாக இருந்தாள்," என அந்தக் கதாப்பத்திரத்தைப் பற்றி அவர் பேசினார்.

ஓபன்ஹைமர் சிலியன் மர்பிக்கு சிறந்த நடிகருக்கான ஆஸ்கார் விருது

பட மூலாதாரம்,GETTY IMAGES

சில்லியன் மர்பி செய்தியாளர் அறைக்குள் வரும்போது அவர் இன்னும் அதிர்ச்சியில் இருந்து மீளவில்லை என்பதைப் போலத் தெரிந்தது. (அவர் வெற்றி பெற்றதில் ஆச்சரியமில்லை என்றாலும்).

"நான் கொஞ்சம் திகைப்புடன் இருக்கிறேன், இன்று இங்கு நிற்கும் ஐரிஷ் நாட்டவராக இருப்பதில் நான் மிகவும் வியப்படைகிறேன், பணிவாகவும் நன்றியுடனும் இருக்கிறேன், மிகவும் பெருமைப்படுகிறேன்," என்று அவர் கூறுகிறார்.

“இந்தத் திரைப்படம் எனக்கு மிகவும் முக்கியத்துவம் வாய்ந்தது. எனக்கும் கிறிஸுக்கும் (நோலன்) அத்தகைய சிறப்பு உறவு இருக்கிறது. நாங்கள் 20 வருடங்களாக இணைந்து பணியாற்றி வருகிறோம், அவர் சரியான இயக்குநர் என்று நினைக்கிறேன்...என் அதிர்ஷ்டத்தை என்னால் நம்ப முடியவில்லை. நான் சிறுவயதில் அவருடன் ஒரு ஸ்கிரீன் டெஸ்ட் செய்தேன், அப்படித்தான் இருக்கும் என்று நினைத்தேன்!"

ஐரிஷ் நாட்டில் பிறந்த, ஆஸ்கார் வாங்கும் முதல் நடிகராக இங்கு நிற்பதில் அவர் பெருமை கொள்வதாகத் தெரிவித்தார்.

"நான் என்ன சொன்னேன் என்பது எனக்கு நினைவில் இல்லை (ஏற்புரையில்), ஆனால் அயர்லாந்தில் கலைஞர்களை ஆதரிப்பதில் நாங்கள் மிகவும் சிறந்தவர்கள். அது தொடர வேண்டும்," என்றார்.

https://www.bbc.com/tamil/articles/c51w4gqq9pqo

காணொளிக் குறிப்பு,

மஞ்சும்மல் பாய்ஸ்: கொடைக்கானல் குணா குகை சம்பவத்தை தழுவிய படம் எப்படி உள்ளது?

28 பிப்ரவரி 2024

மலையாள சினிமாவில் சமீபத்தில் வெளியான திரைப்படங்கள் நல்ல வரவேற்பை பெற்றுள்ளன. பிரமயுகம், பிரேமலு வரிசையில் பிப்ரவரி 22ம் தேதி வெளியான திரைப்படம் மஞ்சும்மல் பாய்ஸ். விமர்சன ரீதியாக பெரும் வரவேற்பையும் பாராட்டையும் பெற்ற இந்த திரைப்படம் குறித்து ஊடகங்கள் என்ன சொல்கின்றன?

கேரளா மாநிலம் எர்ணாகுளம் மாவட்டத்தைச் சேர்ந்த மஞ்சும்மல் எனும் சிறிய ஊரில் இருந்து 11 நண்பர்கள் தமிழ்நாட்டிலுள்ள கொடைக்கானலுக்கு சுற்றுலா செல்கின்றனர்.

குணா படத்தின் மூலம் பிரபலமான குணா குகையை சுற்றிப்பார்க்க சென்றபோது 11 பேரில் ஒருவர் அந்தக்குகையில் இருந்த பள்ளத்தாக்கு ஒன்றில் விழுந்துவிட அவருக்கு என்ன ஆனது? நண்பர்களால் காப்பாற்றப்பட்டாரா? என்பதுதான் மஞ்சும்மல் பாய்ஸ் திரைப்படத்தின் கதை.

2006-ம் ஆண்டு கொடைக்கானலில் நடந்த உண்மை சம்பவத்தை தழுவி இந்த திரைப்படம் எடுக்கப்பட்டுள்ளது

பட மூலாதாரம்,INSTA/CHIDAMBARAM

இந்தியா டுடே விமர்சனம்

மஞ்சும்மல் பாய்ஸ் திரைப்படம் நட்பு, உயிர் வாழ்வதற்கான வேட்கை, வாழ்க்கையின் மீதான நம்பிக்கை போன்ற பல்வேறு விஷயங்களை குறித்து பேசுவதாக இந்தியா டுடே தனது திரை விமர்சனத்தில் தெரிவித்துள்ளது.

மலையாள இயக்குனர் சிதம்பரம் இயக்கத்தில் சௌபின் ஷாஹிர், ஸ்ரீநாத் பாஸி உள்ளிட்ட பலர் நடித்திருக்கும் மஞ்சும்மல் பாய்ஸ் திரைப்படம் கமல்ஹாசனின் குணா படத்தில் இளையராஜா இசையில் வரும் 'கண்மணி அன்போடு காதலன்' பாடலில் 'மனிதர் உணர்ந்து கொள்ள இது மனிதக்காதல் அல்ல அதையும் தாண்டி புனிதமானது' எனும் வரியோடு தொடங்குகிறது.

க்ளைமேக்சில் மீண்டும் ஒருமுறை வரும் இந்த பாடல் வரி இது வரை காதல் குறித்து பாடுவதாகவே பார்க்கப்பட்டது. ஆனால், மஞ்சும்மல் பாய்ஸ் திரைப்படத்தில் இந்த வரி பயன்படுத்தப்பட்ட விதம் படத்தில் வரும் 11 நண்பர்களுக்கு இடையேயுள்ள நட்பை கூறும் விதமாக இருப்பதாக இந்தியன் எக்ஸ்பிரஸ் தனது விமர்சனத்தில் தெரிவித்துள்ளது.

இந்த ஒட்டுமொத்த கதையும் மனித உணர்வுகளை பற்றி ஆழமாக பேசுவதாக இந்தியா டுடே கூறுகிறது.

பட மூலாதாரம்,INSTA/CHIDAMBARAM

படத்தின் ஆரம்பத்திலேய ஸ்ரீநாத் பாஸி பள்ளத்தில் விழும் காட்சி காட்டப்பட்டு அதற்கு அவரது நண்பர்கள் கொடுக்கும் ரியாக்ஷனோடு படத்தின் தலைப்பு போடப்படுவதில் இருந்தே, பார்வையாளர்களை படத்திற்குள் இயக்குநர் இழுத்து வந்துவிடுவதாக இந்தியன் எக்ஸ்பிரஸ் தெரிவித்துள்ளது.

மஞ்சும்மல் பாய்ஸ் திரைபடத்தின் கதை 2006ல் நடப்பதாக இருப்பதால், அந்த காலகட்டத்தை இயக்குனர் உறுத்தல் இல்லாமல் இயல்பாகவும் சிறப்பாகவும் காட்சிப்படுத்தி இருப்பதாக கூறும் இந்தியன் எக்ஸ்பிரஸ் ஊடகம், படம் வேகம் எடுக்கும் இடமே 11 நண்பர்களும் கொடைக்கானலுக்கு சுற்றுலா செல்ல்லும்போதுதான். அப்போது கலகலப்பாக இருக்கும் திரைப்படம், நண்பர்கள் குணா குகைக்கு சென்றவுடன் த்ரில்லிங்காக மாறுவதாக குறிப்பிட்டுள்ளது

நண்பர்களுக்குள் நடக்கும் சின்ன சின்ன சண்டைகள் முதல் ஒரு உயிரை காப்பாற்ற போராடுவது வரை படம் முழுவதும் மனித உணர்வுகளின் இரண்டு எல்லைகளையும் இயக்குனர் சிதம்பரம் சிறப்பாக காட்சிப்படுத்தியிருப்பதாக இந்தியா டுடே புகழாரம் சூட்டியுள்ளது.

மஞ்சும்மல் பாய்ஸ் படத்தில் அனைவராலும் பொதுவாக பாராட்டப்படும் ஒரு அம்சம் நடிகர்கள் வெளிப்படுத்தியிருக்கும் நடிப்பு. தனது நண்பர் ஒருவர் பெரும் பள்ளத்தாக்கில் விழுந்துவிட்டதும் அவரை உயிருடன் மீட்க வேண்டும் எனும் சூழலில் அனைத்து நடிகர்களிடமும் வெளிப்படும் நடிப்பு அபாரமாக இருப்பதாக டைம்ஸ் ஆப் இந்தியா தனது விமர்சனத்தில் தெரிவித்துள்ளது.

பட மூலாதாரம்,INSTA/CHIDAMBARAM

'கூஸ்பம்ப்ஸ்' தரும் இளையராஜா

நடிப்பை தாண்டி படத்திற்கு பெரிய பலமாக அமைந்தது படத்தின் இயக்குனர் சிதம்பரத்தின் திரைக்கதை, சுஷின் ஷ்யாமின் இசை மற்றும் ஷைஜு காலித்தின் ஒளிப்பதிவு என இந்தியன் எக்ஸ்பிரஸ் கூறியுள்ளது.

படத்தில் ஒரெயொரு குறை இருப்பதாக சுட்டிகாட்டும் டைம்ஸ் ஆஃப் இந்தியா, பள்ளத்தில் விழுந்த ஸ்ரீநாத் பாஸியை காப்பாற்ற முயலும் காட்சி குறைந்த நேரமே வருவதால் அது படத்தோடு ஒட்டவில்லை என விமர்சித்துள்ளது

மலையாளத்தில் இந்த வருடம் தொடங்கி இரண்டு மாதத்திற்குள் ரசிகர்களின் வரவேற்பை பெற்ற படங்களான பிரம்மயுகம், பிரேமலு ஆகிய படங்களின் வரிசையில் மஞ்சும்மல் பாய்ஸ் திரைப்படமும் தனக்கான இடத்தை பிடித்திருப்பதாக தி இந்து ஆங்கில நாளிதழ் தெரிவித்துள்ளது.

பார்வையாளர்களால் கணிக்க கூடிய வகையில் படத்தின் முடிவு இருந்தாலும், எங்கேயும் விறுவிறுப்பு குறையாமல் பார்வையாளர்களை படத்திற்குள் கட்டிப்போட்டதுதான் படத்தின் வெற்றி என தி இந்து ஆங்கில நாளிதழ் பாராட்டியுள்ளது.

தமிழில் சந்தானபாரதி இயக்கத்தில் கமல் நடித்த குணா திரைப்படக் குழுவினருக்கு நன்றி என்ற கார்டு உடன் தான் இந்தப்படமே தொடங்குகிறது என இந்து தமிழ் திசை தமது விமர்சனத்தில் குறிப்பிட்டுள்ளது. குறிப்பாக இசையமைப்பாளர் இளையராஜாவுக்கு நன்றி தெரிவிக்கப்படுகிறது. கண்மணி அன்போடு காதலன் பாடல்தான் டைட்டில் கார்டில் வருகிறது. படத்தின் முக்கியமான ஒரு இடத்தில் இந்தப் பாட்டின் ஒரு குறிப்பிட்ட பகுதி வரும், அது படம் பார்க்கும் அனைவருக்கும் கூஸ்பம்ப்ஸைத் தருகிறது என இந்து தமிழ் திசை கூறியுள்ளது.

https://www.bbc.com/tamil/articles/cd1wezzrd5jo

 

 

அரக்கோணத்தை சேர்ந்த இரண்டு கிரிக்கெட் அணிகளுக்கு இடையே போட்டியாக உள்ளது. படம் துவங்கியதுமே அந்த இரண்டு அணிகள் மோதும் கிரிக்கெட் போட்டி குறித்து பேசுகிறார்கள். இந்த ஒரு போட்டியை பற்றி தான் மொத்த படமும் இருக்குமோ என தோன்றுகிறது. ஆனால் அப்படி இல்லை. பெரிதும் பேசப்படும் அந்த கிரிக்கெட் போட்டி படத்தின் முதல் பாதியிலேயே நடந்துவிடுகிறது.

யார் ஜெயிக்கிறார், தோற்கிறார் என்பதை தாண்டி காட்டியிருப்பது தான் ப்ளூ ஸ்டார் படத்தின் நல்ல விஷயமே. ஒரே ஒரு கோணத்தில் தான் படத்தை எடுக்க வேண்டும் இல்லை என்று காட்டியிருக்கிறார் இயக்குநர் எஸ். ஜெயகுமார்.
படம் முழுக்க ஹீரோ ரஞ்சித்தின்(அசோக் செல்வன்)காதல் டிராக்கை மட்டும் காட்டவில்லை ஜெயகுமார். பிற கதாபாத்திரங்களுக்கும் முக்கியத்துவம் உள்ளது. பகவதி பெருமாளின் பிளாஷ்பேக் தியேட்டரில் இருப்பவர்களை கவர்கிறது.

ரொம்ப யோசிக்காமல் படம் பார்க்கலாம். எதை சொல்ல வருகிறோம் என்பதில் இயக்குநர் தெளிவாக இருக்கிறார். தான் சொல்ல வருவதை ரசிகர்களை புரிந்து கொள்ளவும் வைத்திருக்கிறார்.

ஹீரோ படும் அவமானங்களை புரிய வைக்க பலர் அவரை பற்றியும், அவரின் நண்பர்களை பற்றியும் மோசமாக பேசுவதை காட்டியிருக்கிறார்கள். கதாபாத்திரங்களின் வேதனை புரிந்துவிட்டது என்றாலும் ரசிகர்களை இயக்குநர் சும்மா விடுவதாக இல்லை. வேதனையை வெளிப்படுத்தும் வசனங்கள் அதிகமாக உள்ளது. அது படத்திற்கு மைனஸாக அமைந்துவிட்டது.
கதாபாத்திர தேர்வை பாராட்டியே ஆக வேண்டும். அசோக் செல்வனின் நடிப்பு அருமை. 30களில் இருக்கும் அசோக் செல்வன் டீனேஜராக அசால்டாக நடித்து அசத்தியிருக்கிறார்.

அசோக் செல்வன், கீர்த்தி பாண்டியன் இடையேயான கெமிஸ்ட்ரி அற்புதம். எதிரணியின் கேப்டன் ராஜேஷாக சிறப்பான நடிப்பை வெளிப்படுத்தியுள்ளார் சாந்தனு பாக்யராஜ். சஜு நவோதயாவுக்கு தனித்து தெரிகிறார்.

ப்ளூ ஸ்டாரின் முக்கிய ஸ்டாரே இசையமைப்பாளர் கோவிந்த் வசந்தா தான். விளையாட்டை மையமாக வைத்து எடுக்கப்பட்டிருக்கும் படத்திற்கு கோவிந்த் வசந்தாவின் பின்னணி இசை பெரிய பலம்.

ப்ளூ ஸ்டார்- பார்த்து என்ஜாய் பண்ணலாம்

செயற்கை நுண்ணறிவு: பாடகர் ஷாஹுல் ஹமீது குரலுக்கு ஏ.ஆர்.ரஹ்மான் உயிர் கொடுத்ததன் ரகசியம்

பட மூலாதாரம்,GETTY IMAGES

இனிமேல் உங்கள் விருப்பமான பாடகர்களை, அவர்கள் மறைந்த பின்னரும் உயிர்ப்பிக்க முடியும் என்றால் அதை நம்ப முடிகிறதா?

புதிய தொழில்நுட்பங்களைப் பயன்படுத்துவதைத் தனது சிறப்புகளில் ஒன்றாகக் கொண்டிருக்கும் இசையமைப்பாளர் ஏ.ஆர்.ரஹ்மான் இப்போது இறந்த பாடகர்களுக்கு செயற்கை நுண்ணறிவு மூலம் உயிர் கொடுப்பதைச் செய்து காட்டியுள்ளார்.

செயற்கை நுண்ணறிவு தொழில்நுட்பத்தைப் பயன்படுத்தி அவர் உருவாக்கியுள்ள பாடல், சூப்பர் ஸ்டார் ரஜினிகாந்த் நடித்திருக்கும் ‘லால் சலாம்’ திரைப்படத்தில் இடம்பெற்றுள்ளது.

செயற்கை நுண்ணறிவுக்கு எதிராக அமெரிக்காவின் ஹாலிவுட் போர்க் கொடி தூக்கி வரும் நிலையில் இந்திய திரை உலகம் அந்த நுட்பங்களைப் பயன்படுத்தி புதுமைகளைப் படைத்திருப்பது உலக அளவில் கவனம் ஈர்த்துள்ளது.

'ஊர்வசி ஊர்வசி' என்று பாடிய குரல் மீண்டும் ஒலிக்கிறது

பட மூலாதாரம்,A R RAHMAN/X

லால் சலாம் திரைப்படத்தின் ‘திமிறி எழுடா’ என்ற பாடலில் மறைந்த பாடகர்கள் ஷாஹுல் ஹமீது, பம்பா பாக்யாவின் குரல்களைப் பயன்படுத்தியுள்ளனர்.

இருவருமே தமிழ் சினிமாவில் ஏ.ஆர்.ரஹ்மானுடனும், பிற இசை அமைப்பாளர்களுடனும் இணைந்து பல பிரபல பாடல்களைப் பாடியுள்ளனர்.

ஷாஹுல் ஹமீது 1980கள் முதல் ஏ.ஆர்.ரஹ்மானுடன் இணைந்து பணியாற்றி வந்தார். 1993ஆம் ஆண்டில் "திருடா திருடா" திரைப்படத்தில் அவரது தனித்துவமான குரலை வெளிப்படுத்திய "ராசாத்தி என் உசுரு" பாடல் ஹமீதுக்கு திருப்புமுனையாக இருந்தது.

"வண்டிச்சோலை சின்ராசு" படத்தில் "செந்தமிழ் நாட்டு தமிழச்சியே", "காதலன்" படத்தில் "ஊர்வசி ஊர்வசி" மற்றும் "ஜீன்ஸ்" படத்தில் "வாரயோ தோழி" உள்ளிட்ட 1990களின் மிகவும் பிரபலமான தமிழ்ப் பாடல்களை அவர் பாடினார். அவர் 1998ஆம் ஆண்டு தனது 44வது வயதில் கார் விபத்தில் உயிரிழந்தார்.

பட மூலாதாரம்,A R RAHMAN/FACEBOOK

பம்பா பாக்யா தமிழ் திரை உலகில் பின்னணிப் பாடகராக வலம் வந்தவர். பொன்னியின் செல்வன் திரைப்படத்தில் “பொன்னி நதி” பாடல், நடிகர் விஜய்யின் சர்கார் திரைப்படத்தில் “சிம்டான்காரன் பாடல், நடிகர் ரஜினிகாந்தின் 2.0 திரைப்படத்தில் “புல்லினங்காள்” பாடல் ஆகியவை அவர் பாடியதில் பிரபலமான பாடல்கள். அவர் 2022ம் ஆண்டு உயிரிழந்தார்.

பட மூலாதாரம்,A R RAHMAN/X

ஏ.ஆர்.ரஹ்மான் பிபிசியிடம் பேசும்போது, "எந்தவொரு தொழில்நுட்பமும் மனித சமுதாயத்திற்கு நன்மை தரவேண்டும். வாழ்வாதாரத்தைப் பறிப்பதாக இருக்கக்கூடாது என்று கருதுகிறேன்.

இந்தப் பாடலை உருவாக்கும்போது நிறைய யோசித்தேன். பாடகர்களின் குடும்பத்தாரையும் சந்தித்தோம். வாழ்வாதாரத்தைப் பாதிக்கும் எதையும் செய்வதற்கு நான் விரும்புவதில்லை.

இப்போது நாங்கள் இந்தப் பாடலுக்குத் தேவையானதைச் செய்திருக்கிறோம். நாளை இதேபோன்ற முயற்சியை வேறு யாராவது செய்தாலும் இந்த வழிமுறையைப் பின்பற்றுவார்கள். பாடகரின் குடும்பத்திற்கு, அவர்களின் வாரிசுகளுக்கு உரிய தொகையைச் செலுத்திவிட்டு அந்த முயற்சியை மேற்கொள்வார்கள்," என்றார்.

பட மூலாதாரம்,SCREENGRAB

'கடவுளுக்கு பிறகு, ரஹ்மான் அங்கிளுக்கு தான் நன்றி' - ஷாஹூல் ஹமீதின் மகள்

ஷாஹூல் ஹமீதின் மகள், ஃபாத்திமா ஷாஹுல் ஹமீது இது முற்றிலும் எதிர்பாராதது என்று தெரிவித்தார். அவர் நம்மிடம் பேசும்போது, “ரஹ்மான் அங்கிள், தனக்கே உரிய பாணியில் மேஜிக் செய்கிறார். அப்பாவின் குரலை மீண்டும் கேட்க மிகவும் மகிழ்ச்சியாக இருந்தது, அது மிகவும் உணர்ச்சிகரமாக இருந்தது.

என்னால் அதை வார்த்தைகளால் விவரிக்க முடியாது. வேறு யாருக்கும் புரியும் என்று நான் நினைக்கவில்லை. என் அம்மாவுக்கும் அது மிகுந்த மகிழ்ச்சியைத் தந்தது. தாத்தாவின் காலத்தில் அவருடன் இருக்க முடியாமல் தவித்த என் மகள், இப்போது இந்தப் பாடலைக் கேட்டு குதூகலிக்கிறாள்,” என்றார்.

ஏ.ஆர்.ரஹ்மானுக்கும் தனது தந்தைக்குமான உறவு நட்பையும் தாண்டியது என்கிறார் ஃபாத்திமா.

“அவர்கள் சகோதரர்களைப் போலவே இருந்தார்கள். இருவரும் அவரவர் துறைகளில் வளர்ந்து வரும் காலத்திலேயே தொடங்கிய நட்பு அது. தூர்தர்ஷன் தொலைக்காட்சிக்காக ஜிங்கிள்ஸ் இசைக்கும்போது இருவரும் அறிமுகமானார்கள்.

ரஹ்மான் அங்கிளின் சொந்த ஸ்டூடியோவில் பதிவு செய்யப்பட்ட முதல் ஆல்பமான – 'தீன் இசை மாலை'- இஸ்லாமிய பக்திப் பாடல்கள் கொண்டது. அதில் ரஹ்மான் அங்கிளின் டேக் லைனாக மாறிய 'எல்லாப் புகழும் இறைவனுகே' என்ற பாடலை என் தந்தை பாடியிருந்தார்.

சுற்றி பல திறமைசாலிகள் இருந்தாலும் ரஹ்மான் அங்கிள்தான் திறமையை அடையாளம் கண்டு சரியான தளத்தில் பயன்படுத்தினார். கடவுளுக்கு அடுத்தபடியாக ரஹ்மான் அங்கிளுக்கு தான் நன்றி செலுத்துகிறோம்,” என்று மகிழ்ச்சி பொங்கத் தெரிவித்தார்.

மறைந்தவர்களின் குரலை மீண்டும் பயன்படுத்துவது குறித்து எழுப்பப்படும் விமர்சனங்கள் குறித்துக் கேட்டபோது, “தொழில்நுட்பத்துடன் நாம் வளர வேண்டும். இதில் எதிர்மறையாக எதுவும் இல்லை. அப்பாவின் குரலைப் பயன்படுத்துவது குறித்து எங்களுக்கு முறையாக தகவல் தெரிவிக்கப்பட்டு அனுமதி பெறப்பட்டது," என்றார் ஃபாத்திமா.

"நான் எப்படி உணர்கிறேன் என்பதை விட, மக்கள் இதை எவ்வாறு ஏற்றுக்கொள்வார்கள் என்று நான் யோசித்துக்கொண்டிருந்தேன். அவரது ரசிகர்கள் அன்புடனும் மரியாதையுடனும் அதை வரவேற்றதை அறிந்து நான் மகிழ்ச்சியடைந்தேன்."

உண்மையில், பாடல் முதன்முதலில் ஆன்லைனில் வெளியிடப்பட்டபோது, அவரது ரசிகர் ஒருவர்தான் பாடலின் இணைப்பையும் பாடலில் தன் அப்பாவின் குரல் எந்த நிமிடத்தில் ஒலிக்கிறது என்பதையும் குறிப்பிட்டு அனுப்பியதாகவும் தெரிவித்தார்.

மேலும், “இந்தப் பரபரப்பான வாழ்க்கையில், மக்கள் மறப்பது மிகவும் எளிதானது. ஆனால், அவர் இறந்து 27 ஆண்டுகளுக்குப் பிறகும், 5 ஆண்டுகளுக்கும் குறைவாகவே சினிமாவில் இருந்த ஒருவரை மக்கள் எவ்வாறு அன்புடன் நினைவில் கொள்கிறார்கள் என்பதை அறிந்து நான் மிகவும் ஆச்சரியப்படுகிறேன்,” என்றார்.

இனி பாடகர்களின் குரலே பாடலைப் பாடும்

பட மூலாதாரம்,GETTY IMAGES

இந்தியாவிலேயே முதல் முறையாக மறைந்த பாடகர்களின் குரலை மீண்டும் ஒலிக்க செய்வது இதுவே முதல் முறை.

இது எப்படி சாத்தியமானது என்று செயற்கை நுண்ணறிவு தொழில்நுட்பம் மூலம் இதை உருவாக்கிய டைம்லெஸ் வாய்ஸஸ் என்ற நிறுவனத்தின் தலைவர் கிருஷ்ண சேத்தன் பிபிசியிடம் பேசினார்.

“நான் ஏ.ஆர்.ரஹ்மானுடன் நீண்டகாலமாகப் பணிபுரிந்து வருகிறேன். எனக்கு தொழில்நுட்பத்தில் மிகுந்த ஆர்வம் உண்டு. ரஹ்மான் சார் ஏதாவது புதிய இசைக் கருவி வாங்கி வந்தால், அது எப்படிச் செயல்படுகிறது என்று முழுமையாகக் கற்றுக் கொள்வேன்.

கொரோனா பெருந்தொற்று ஊரடங்கு காலத்தில், இசையமைப்பாளர்களுக்கான இசை உருவாக்கத் தேவைப்படும் மென்பொருட்களைத் தயாரிக்க நானும் என் குழுவும் தொடங்கினோம். கடந்த எட்டு மாதங்களுக்கு முன்பு, டைம்லெஸ் வாய்ஸஸ் நிறுவனத்தைத் தொடங்கினோம்," என்றார் கிருஷ்ண சேத்தன்.

யாருடைய குரலை உருவாக்க நினைக்கிறோமோ, அவரது குரலின் பதிவு தேவை. அது ஸ்டுடியோவில் பதிவு செய்யப்பட்டதாக இருக்க வேண்டும் என்றும் இந்தத் தொழில்நுட்பம் குறித்து விவரிக்கத் தொடங்கினார்.

"பதிவு செய்யப்பட்ட குரலைக் கொண்டு ஒரு செயற்கை நுண்ணறிவு மாடலை பயிற்றுவிக்க வேண்டும். அந்த ஏஐ மாடல் பாடகரின் குரலில் உள்ள ஏற்ற இறக்கங்கள் உட்பட அனைத்து அம்சங்களையும் கிரகித்துக் கொள்ளும்.

பின்பு, நாம் பதிவு செய்ய நினைக்கும் பாடலை வேறு ஒரு நபரைப் பாடச் சொல்லி பதிவு செய்துகொள்ள வேண்டும். இது பைலட் வாய்ஸ் எனப்படும். பின்பு, நாம் உருவாக்கிய செயற்கை நுண்ணறிவு மாடல் பைலட் வாய்ஸை பாடகரின் குரலாக மாற்றும். இந்தியாவிலேயே இதுபோன்ற முயற்சி மேற்கொள்ளப்படுவது இதுவே முதல்முறை,” என்று இந்தத் தொழில்நுட்பத்தை விளக்கினார்.

ஏன் ஷாஹூல் ஹமீது மற்றும் பம்பா பாக்யாவின் குரல்கள் தேர்ந்தெடுக்கபட்டன என்று கேட்டதற்கு, “ஷாஹுல் ஹமீத், பம்பா பாக்யாவின் குரல்கள் மிகவும் தனித்துவமானவை. செயற்கை நுண்ணறிவை ஆக்கப்பூர்வமான பயன்பாட்டிற்குக் கொண்டு வர இதைவிடச் சிறந்த வழி எதுவுமில்லை," என்றார்.

பட மூலாதாரம்,KRISHNA CHETAN

மேலும், "பம்பா பக்கியாவின் குரல் ரஹ்மான் சாருக்கு மிகவும் பிடிக்கும் என்று எனக்குத் தெரியும். நான் ஒரு மாதிரி குரலை உருவாக்கியபோது, அவருக்கு அது மிகவும் பிடித்திருந்தது. ஷாஹூல் ஹமீது அவருடன் நெடு நாட்களாகப் பயணம் செய்தவர் என்பது அனைவருக்கும் தெரிந்ததே,” என்று கூறினார்.

டைம்லெஸ் வாய்ஸஸ் என்பது பாடர்களின் குரல்களைப் பாதுகாப்பதற்கான ஒரு முயற்சி என்று குறிப்பிடுகிறார் கிருஷ்ணன் சேத்தன்.

“இந்தத் தொழில்நுட்பத்தைக் கொண்டு, ஒரு பாடகரின் குரலை காலத்துக்கும் பாதுகாக்க முடியும். மறைந்த பாடகரின் குரலைப் பயன்படுத்தும்போது, அவர்களின் உரிமைகளைப் பாதுகாக்கும் வகையில், அவர்களுக்கு உரிய வெகுமதியை முன்கூட்டியே குடும்பத்தினருக்கு அளித்துவிடுகிறோம்,” என்றார்.

இந்தத் தொழில்நுட்பம் இசைத் துறையில் பல மாற்றங்களை எதிர்காலத்தில் கொண்டு வரும் என்று நம்பிக்கை தெரிவிக்கிறார் கிருஷ்ண சேத்தன்.

“செயற்கை நுண்ணறிவு தொழில்நுட்ப உதவியுடன் தங்கள் குரல்களைப் பாதுகாக்கவும் பயன்படுத்தவும் விரும்பும் முன்னணி பாடகர்களுடன் நாங்கள் பணியாற்றத் தொடங்கியுள்ளோம். அவர்களின் குரல்களைப் பதிவு செய்து சோதனை செய்து வருகிறோம்.

ஸ்டூடியோவுக்கு நேரில் செல்ல முடியாத ஒரு பாடகரின் ஏஐ குரலைக் கொண்டு, பாடலைப் பதிவு செய்துகொள்ள முடியும். பல்வேறு கால கட்டங்களில் ஒரு பாடகரின் குரல் எப்படி இருந்ததோ அதைப் பதிவு செய்து ஒரே பாடலில் சேர்க்க முடியும்.

மேலும், ஒரே நேரத்தில் பல மொழிகளில் வெளியிடப்படும் திரைப்படங்களின் நடிகர்களுக்குத் தங்களுக்கு மொழி தெரியாவிட்டாலும், ஏஐ மூலம் அவரது குரலிலேயே அனைத்து மொழி ரசிகர்களிடமும் பேச முடியும்,” என்றார்.

https://www.bbc.com/tamil/articles/cnknq92w234o

பாலிவுட்டில் சர்ச்சைக்குரிய கவர்ச்சி நாயகியாக வலம் வந்தவர் பூனம் பாண்டே. இவர் கடந்த 2013-ம் ஆண்டு வெளியான நாஷா என்கிற இந்தி படம் மூலம் அறிமுகமானார். இதையடுத்து சமூக வலைதளத்தில் தொடர்ந்து கவர்ச்சி புகைப்படங்களை வெளியிட்டு பேமஸ் ஆன இவர் அடிக்கடி சர்ச்சைகளிலும் சிக்கி உள்ளார். இவருக்கு கடந்த 2020-ம் ஆண்டு திருமணம் ஆனது. தன்னுடைய நீண்ட நாள் காதலனான சாம் பாம்பே என்பவரை திருமணம் செய்துகொண்டார்.

கொரோனா சமயத்தில் இவர்களது திருமணம் நடைபெற்றதால், இதில் குடும்பத்தினர் மட்டுமே கலந்துகொண்டனர். இதையடுத்து காதல் கணவருடன் ஹனிமூன் கொண்டாட கோவா சென்றிருந்த பூனம் பாண்டே, அங்கு தன் கணவர் தன்னை அடித்து துன்புறித்தியதாக போலீசில் புகார் அளித்தார். இதையடுத்து திருமணமான இரண்டே வாரத்தில் பூனம் பாண்டேவின் கணவர் சாம் மும்பை போலீசாரான் கைது செய்யப்பட்டார்.

 

பின்னர் சில தினங்களிலேயே தன்னுடைய கணவருடன் மீண்டும் இணைந்துவிட்டதாக பூனம் பாண்டே அறிவித்ததை பார்த்த நெட்டிசன்கள் அவர் விளம்பரத்திற்காக இதுபோன்று செய்துவருவதாக விமர்சித்தனர். இதுதவிர நிர்வாண படங்களிலும் நடித்து வந்த பூனம் பாண்டே அடிக்கடி சர்ச்சைகளில் சிக்கி வந்தார். சமீபகாலமாக சோசியல் மீடியா பக்கமே தலைகாட்டாமல் இருந்த அவர் தற்போது மரணமடைந்துள்ளதாக வெளிவந்துள்ள தகவல் அதிர்ச்சியை ஏற்படுத்தி உள்ளது.

அவர் கேன்சர் பாதிப்பால் உயிரிழந்துள்ளதாக அறிவிக்கப்பட்டு உள்ளது. இதுகுறித்து அவரது இன்ஸ்டாகிராம் பக்கத்தில் வெளியிடப்பட்டுள்ள பதிவில் "இன்று காலை எங்களுக்கு மிகவும் கடினமான ஒன்று. கர்ப்பப்பை புற்றுநோயால் எங்கள் அன்புக்குரிய பூனத்தை இழந்துவிட்டோம் என்பதை உங்களுக்கு மிகுந்த வருத்தத்துடன் தெரிவித்துக் கொள்கிறோம்" என்று அந்த அறிக்கையில் குறிப்பிட்டு உள்ளனர். பூனம் பாண்டேவின் மறைவு பாலிவுட்டில் பெரும் சோகத்தை ஏற்படுத்தி உள்ளது.

 

https://tamil.asianetnews.com/gallery/gallery/poonam-pandey-died-at-the-age-of-32-due-to-cervical-cancer-gan-s87u2c#image3