நாகப்பட்டினத்தில் சுனாமி நினைவு தினத்தில், கடல் உள்வாங்கியதால் பரபரப்பு

[hirusy]

(தினத்தந்தி)

தஞ்சாவூர்,

நாகையில் கடல் உள்வாங்கியதாக வெளியான தகவலால் பரபரப்பு ஏற்பட்டது.

கடல் உள்வாங்கியது

2004 டிசம்பர் 26 அன்று நாகையையே நாசப்படுத்திய சுனாமி பேரலைகளின் 3-வது ஆண்டு நினைவஞ்சலி நிகழ்ச்சிகள் இன்று நடைபெறுகின்றன.

இந்த சூழ்நிலையில், பருவ மழை நேரத்தில் பெரும் சீற்றத்துடனே காணப்பட்ட நாகை கடல், கடந்த சில நாட்களாக அமைதியாக காணப்பட்டது. நேற்று கடல் உள்வாங்கியதாக தகவல் வெளியானது.

இதனால், கீச்சாங்குப்பம், அக்கரைப்பேட்டை, நம்பியார்நகர், சாமந்தம்பேட்டை, ஆரியநாட்டுத் தெரு, பொய்கைநல்லூர், செருதூர் போன்ற கடலோர கிராமங்களில் பரபரப்பு ஏற்பட்டது.

மீனவர் கருத்து

இது குறித்து தமிழ்நாடு மீனவர் பேரவை துணைத் தலைவர் ராஜேந்திரன் கூறியதாவது:-

"கடந்த ஒரு காலமாக பெரும் சீற்றத்துடன் காணப்பட்ட கடல் இன்று சீற்றமின்றி மிகவும் அமைதியாக, அதுவும் குளம்போல் காணப்படுகிறது. ஆண்டுதோறும் இதுபோன்ற சம்பவம் நடைபெறும்.

அதாவது தை-மாசி மாதங்களில் கடல் தண்ணீர் உள்வாங்கும். இதை நாங்கள், "கொச்சம் கொடுக்கிறது, அதாவது கடல் நடுத்தரம் கொடுக்கிறது'' என்று சொல்வோம். ஆனால் ஒரு மாதத்திற்கு முன்னாலே கொச்சம் கொடுத்து இருக்கிறது.

கொந்தளிப்பு ஏற்படும்

எங்களது அனுபவத்தை வைத்து சொல்கிறேன். இந்த மாதிரி கொச்சம்(கடல் உள்வாங்குதல்) கொடுத்தால் 10 நாட்களில் கடல் கொந்தளிப்பு அல்லது கடும் மழை பெய்யவும், புயல் வீசவும் வாய்ப்பு உள்ளது. மற்றபடி 24-12-2004-ல் ஏற்பட்டது போல், சுனாமியின் அறிகுறி எல்லாம் கிடையாது. மேலும் பவுர்ணமி நாட்கள் முடிந்து 3-வது நாளிலும் இதுபோன்ற அறிகுறி ஏற்படுவது உண்டு.

கடல் உள்வாங்குவதற்கு எத்தனை மணிநேரம் ஆனதோ அதேபோல் கொஞ்சம், கொஞ்சமாக மீண்டும் கடல் சகஜநிலைக்கு வந்து விடும்.''

இவ்வாறு அவர் கூறினார்.

கலெக்டர் தகவல்

நாகை கலெக்டர் தென்காசி ஜவகர் கூறியதாவது:-

"நாகை கடல் நேற்று உள்வாங்கியதாக வந்த தகவலால், பொதுமக்கள் எவ்வித அச்சமும் அடையத் தேவையில்லை. துறைமுக அலுவலகம், மீன்துறை அலுவலர்கள் மற்றும் கடலோர மீனவர்களிடம் தீர விசாரித்ததில் கடல் உள்வாங்கவில்லை என்று தெரிய வந்துள்ளது. சுனாமி குறித்த எச்சரிக்கை ஏதும் இருந்தால் மாவட்ட நிர்வாகம் மூலம் முறையாக அறிவிக்கப்படும்."

இவ்வாறு அவர் கூறினார்.