இந்தோனீசிய தமிழர் உருக்கம்: "நறுமண பொருள்கள், சுற்றுலாவால் வளம் பெற்ற சுலவேசி சுனாமியால் நாசம்"

[பிழம்பு]

நிலநடுக்கம் மற்றும் சுனாமியால் பாதிக்கப்பட்ட இந்தோனீசியாவின் சுலவேசி தீவில் குவியல் குவியலாக பிணங்கள் கரையில் குவிந்துள்ளன.

சுமார் 1200-க்கும் மேற்பட்டவர்கள் இறந்துவிட்டதாக இந்தோனேசீய அரசாங்கம் தெரிவித்துள்ள நிலையில், பல இடங்களில் மீட்புப் பணிகள் தொடர்ந்து நடைபெற்றுக்கொண்டிருகிறது என்றும் அறிவிப்பு வெளியாகியுள்ளது.

சுலவேசி தீவில் உள்ள பல ஹோட்டல்களில் பூட்டப்பட்ட அறைகளில் மக்கள் உயிருடன் இருப்பார்களா என்ற அச்சம் நிலவுகிறது என இந்தோனீசியாவில் வசிக்கும் தமிழ்ச் சங்கத்தைச் சேர்ந்த விசாகன் மைலாச்சலம் பிபிசி தமிழிடம் தெரிவித்தார்.

வணிகரீதியாக சென்னைக்கும் இந்தோனீசியாவுக்கும் அடிக்கடி பயணம் செய்யும் விசாகன் சுனாமி ஏற்படுவதற்கு ஒரு நாள் முன்னதாக சென்னைக்கு வந்திருந்தார்.

கடலூரில் இருந்து வேலைக்காக கடந்த 22 ஆண்டுகளுக்கு முன்னர் இந்தோனீசியாவுக்கு குடியேறிய விசாகன், சுனாமி பாதிக்கப்பட்ட சுலவேசி தீவில் உள்ள நிலைமை என்ன என பிபிசிதமிழிடம் பகிர்ந்துகொண்டார்.

இந்தோனீசியாவின் முக்கியமான ஐந்து பெரிய தீவுகளில் ஒன்று சுலவேசி. ஜாவா, சுமத்ரா, கலிமண்டன், பப்புவா ஆகிய நான்கு தீவுகளைக் காட்டிலும் குறைந்த மக்கள் தொகை இருந்தாலும், சுற்றுலாவாசிகள் அதிகம் வரும் தீவாக இருப்பது சுலவேசி என்கிறார் விசாகன்.

கிராம்பு, முந்திரி, தென்னை, கோகோ என பணப் பயிர்களும், நீண்ட கடற்கரை, அருவிகள் என இயற்கை வளமும் நிறைந்த சுற்றுலாத் தலமான சுலவேசி போர்த்துகீசியர்கள் தொடங்கி ட்ச்சுக்காரர்கள் மற்றும் ஆங்கிலயர்கள் பலரையும் ஈர்த்த தீவு என்கிறார் விசாகன்.

''உழைப்பை மட்டுமே முதலீடாக கொண்டு நம்பிக்கையுடன் வரும் எவருக்கும் வேலைவாய்ப்பை அள்ளிவழங்கிய சுலவேசி தீவு, மோசமான நிலநடுக்கம் மற்றும் சுனாமியால் முழுவதுமாக பாதிக்கப்பட்டுள்ளது. இந்தோனேசியாவுக்கு நறுமணப்பொருட்கள் மூலமாகவும், சுற்றுலா மூலமாகவும் கணிசமான வருவாயைத்தரும் மாகாணமாக சுலவேசி இருந்தது. தற்போதைய சுனாமி தாக்குதலால் அங்கு இயற்கை வளம், சுற்றுலா என எல்லாம் கடுமையாக பாதிக்கப்பட்டுள்ளன,'' என்கிறார் விசாகன்.

விமான நிலையம், சாலைகள் எல்லாம் இடிபாடுகளை சந்தித்துள்ளன. மின்சார வசதி, குடிநீர், உணவு என அத்தியாவசியத் தேவைகள் இல்லாமல், உயிர் பிழைத்தவர்கள், காயம் அடைந்தவர்கள் தற்போதும் அச்சத்தில் உறைந்தவாறு வீதிகளேயே இருக்கின்றனர் என்கிறார் அவர்.

நூற்றுக்கணக்கான சுற்றுலாப் பயணிகள் சுனாமி அலை எழுந்தபோது, கடலுக்கு இழுத்துச்செல்லப்பட்டிருக்கிறார்கள். இந்த காட்சிகள் பலருக்கும் அதிர்ச்சியை ஏற்படுத்தியுள்ளது என்று மேலும் தெரிவிக்கிறார் அவர்.'பாலு தீவில் பின்ஷி திருவிழா என்ற பெயரில் நடக்கும் படகு போட்டி மற்றும் மீன்பிடி போட்டிகள் மிகவும் பிரபலம். செப்டம்பர் மாதத்தின் இறுதி வாரத்தில் இத்திருவிழா நடைபெறும் என்பதால், உள்நாடு மற்றும் வெளிநாட்டுப் பயணிகள், உள்ளுர்வாசிகள் என பெரிய மக்கள் திரள் அங்கு வந்திருந்தது. அமைச்சர்களும் வருவார்கள் என்பதால், கலாசார நிகழ்ச்சிகளுக்காக பல பள்ளிக் குழந்தைகளும் வந்திருந்தார்கள். பாதிக்கப்பட்டவர்களைப் பற்றி நினைக்கவே அச்சமாக உள்ளது,'' என்று மிகவும் பாதிக்கப்பட்ட சுலவேசியின் நிலையை விவரித்தார் விசாகன்.

இந்த ஆண்டு தனது உள்ளூர் பயணத்தில் சுலவேசி இடம்பெற்றிருந்ததாகவும், ஆனால் இந்த இயற்கை பேரிடருக்கு பிறகு, அங்கு செல்வது பற்றி தீவிரமாக யோசிப்பதாகவும் அவர் கூறினார்.

சுனாமி தாக்குதலைப் பற்றி அறிந்தபோது, உடனடியாக நண்பர்களிடம் அவர்களின் பாதுகாப்பு குறித்து விசாரித்திருக்கிறார் இவர். ''சுலவேசியில் நிலநடுக்கம் ஏற்பட்டபோது, ஜாவா தீவில் லேசான நிலநடுக்கம் இருந்ததாக நண்பர்கள் கூறினார்கள். தமிழ்நாட்டில் இருந்து இடம்பெயர்ந்த தமிழர்களும், ஆங்கிலேயேர் காலத்தில் இந்தோனேசியாவுக்கு கொண்டுசெல்லப்பட்ட தமிழர்களின் வம்சாவழிகள் என தமிழ் குடும்பங்கள் வசிக்கும் ஜாவா, சுமத்ரா தீவுகளில் பெரிய பாதிப்பு இல்லை. ஆனால், அழாகான சுலவேசி தீவு இயற்கைப் பேரிடரை சந்தித்துள்ளது என்ற விஷயம் இந்தோனேசியாவில் வாழும் ஒவ்வொருவருக்கும் வருத்தத்தை ஏற்படுத்தியுள்ளது,'' என்கிறார் விசாகன்.

https://www.bbc.com/tamil/india-45714989