ரணில் மீதான நம்பிக்கை இல்லா தீர்மானம்.

[Nathamuni]

ரணில் மீதான நம்பிக்கை இல்லா தீர்மானத்தின் மீது, போதுமான உறுப்பினர்கள் ஆதரவு தராததால், ஒன்றிணைந்த எதிர்க்கட்சி, ஜனாதிபதியின் ஒத்துழைப்பு கோரி உள்ளனர்.

இலங்கை பொது ஜன முன்னணியின் தலைவர் பீரிஸும், கொழும்பு மாவட்ட உறுப்பினர் லொக்குகேயும் இந்த கோரிக்கையை விடுத்து உள்ளனர்.

ஒன்றிணைந்த எதிர்க்கட்சி, தமக்கு பாராளுமன்றில் 52 உறுப்பினர்கள் உள்ளதாகவும், சுதந்திரக் கட்சி 44 உறுப்பினர்கள் உள்ளதாகவும் சொல்லுகின்றனர். இந்த 52 பேரில், விமல், தினேஷ், வாசுதேவ போன்ற சிலர் வேறு கட்சியினர் ஆயினும் மகிந்த உட்பட பலர் சுதந்திரக் கட்சி உறுப்பினர்கள் ஆவர்.

அதேவேளை ஐக்கிய தேசிய கட்சி 106 உறுப்பினர்களைக் கொண்டுள்ளது. இதில் இரத்தின தேரர், விஜயதாச ராஜபக்சே போன்றோர் சுயாதீனமாக இயங்குவதால் 104 பேர் உள்ளனர்.

ஆகவே முழு சுதந்திர கட்சி உறுப்பினர்கள் சேர்ந்தால் கூட, தேவையான ஆதரவு வரப் போவதில்லை.

உள்ளூர் ஆட்சி சபைகளின் தேர்தலில், ஐக்கிய தேசிய கட்சி, பெரும் வீழ்ச்சி கண்ட போது, ஜனாதிபதி, ரணில் வெளியேற வேண்டும் என்று விரும்பியது உண்மை தான். ரணில் மறுத்தபோது, ஜனாதிபதி சார்பில், உப சபாநாயகர் திலங்க சுமதிபால, பாராளுமன்றில், ஜனாதிபதி உயர் நீதிமன்றின் அபிப்பிராயத்தினை கோருவார் என்று தெரிவித்தார்.

எனினும் அவர் அவ்வாறு கோரவில்லை. இடையே அமெரிக்கா, இந்திய போன்ற நாடுகளின் தூதுவர்கள் ஜனாதிபதியினை சந்தித்தபின், ஜனாதிபதி தனது நிலைப் பாட்டினை மாத்தி உள்ளார் போல தெரிகிறது.

யாழ்ப்பாணத்தில் நேற்று பேசிய ஜனாதிபதி, சிலர் தமது நலன்களுக்காக நிகழ்ச்சி நிரல்களை தயாரித்து, நாடு நலன்களை புறக்கணித்து, அதன்படி அனைவரும் நடக்க வேண்டும் என்று எதிர்பார்க்கின்றார்கள் என்று தெரிவித்தார். அவ்வாறு நடக்க இடமளிக்க முடியாது என்றும் குறிப்பிடடார்.

SB திசாநாயக்க போன்ற கடந்த தேர்தலில் மக்களால் நிராகரிக்கப் பட்ட, தேசிய பட்டியல் மூலம், பின்கதவு மூலம் வந்தவர்கள், மக்களால் பெரும் ஆதரவுடன் கொழும்பு மாவட்ட உறுப்பினர் ஆக வென்ற ரணில் மீதான நம்பிக்கை இல்லாத் தீர்மானத்தினை  தீவிரமாக ஆதரிப்பது நகைப்புக்கு இடமானது.

பணம் கொடுத்து உறுப்பினர்களை வாங்கும், மகிந்த பாணி அரசியலை மைத்திரி விரும்பப் போவதில்லை. இவ்வாறு செய்து ஆட்சி அமைக்கலாம் என்பதே ஒன்றிணைந்த எதிர்க்கட்சி யினரின் திட்டம் என்பதை சொல்ல வேண்டியதில்லை.  

மகிந்தவினை, ஜனாதிபதி ஆதரிக்காத நிலையில், ரணிலை வெளியேற்றினால், அடுத்த பிரதமர் யார் என்ற கேள்வி எழுகிறது. இதில் பலர் மதில் மேல் பூனையாக பலர் உள்ளனர். பெரும்பான்மை இல்லாத சுதந்திரக் கட்சியினை சேர்ந்த ஒருவர் பிரதமராக வருவதை, ஐக்கிய தேசிய கட்சி ஆதரிக்கப் போவதில்லை. 

இந்த வகையில் தமக்கு சந்தர்ப்பம் வரலாம் என SB திசாநாயக்க, நிமல் சிறிபாலா டீ சில்வா, போன்றோரும், ஐக்கிய தேசிய கட்சியில் சஜித், ஜான் போன்றோரும் மதில் மேல் தயாராக உள்ளனர்.

இந்த வகையில், ரணில் வீட்டுக்கு போக வேண்டி வரின், பல பிரச்சனைகள், தலைவலிகள் வரும் என மைத்திரி உணர்ந்துள்ளார் என்ற வகையில், அடுத்த இரண்டு வருடமும் இப்படியே போகட்டும் என்ற நிலைப்பாட்டினை, மைத்திரி எடுப்பதால் ரணில் தப்பிப் பிழைப்பார்.   

யாழுக்காக, நாதமுனி