அதிமுக பொதுச் செயலாளர் விவகாரம்: மார்ச் 20-ம் தேதிக்குள் முடிவை அறிவிப்பதாக தேர்தல் ஆணையம் தகவல்

[நவீனன்]

அதிமுக பொதுச் செயலாளர் விவகாரம்: மார்ச் 20-ம் தேதிக்குள் முடிவை அறிவிப்பதாக தேர்தல் ஆணையம் தகவல்

 

 

ஓ. பன்னீர்செலவ்வம்(இடது), வி.கே.சசிகலா( வலது). | கோப்புப் படம்.

 

 

அதிமுக பொதுச் செயலாளர் நியமன விவகாரத்தில் மார்ச் 20-ம் தேதிக்குள் முடிவை அறிவிப்பதாக தேர்தல் ஆணைய வட்டாரங்கள் தெரிவித்தன.

அதிமுகவின் தற்காலிக பொதுச் செயலாளராக சசிகலா தேர்வு செய்யப்பட்டது செல்லாது என அறிவிக்கக் கோரி தலைமைத் தேர்தல் ஆணையத்திடம் ஓ.பன்னீர் செல்வம் தரப்பினர் மனு அளித்தனர். இந்தப் புகாருக்கு பதில் அளிக்கும்படி சசிகலாவுக்கு தேர்தல் ஆணையம் நோட்டீஸ் அனுப்பியது. அதற்கு அதிமுக துணைப் பொதுச் செயலாளர் டிடிவி தினகரன் பதில் அனுப்பினார்.

அதை ஏற்க மறுத்த தேர்தல் ஆணையம், சசிகலாதான் பதில் அளிக்க வேண்டும் என்று தெரிவித்தது. இதையடுத்து, 70 பக்கங்கள் கொண்ட பதிலை வழக்கறிஞர்கள் மூலம் சசிகலா அனுப்பினார். அதில், அதிமுக சட்ட விதிகளின்படியே பொதுச் செயலாளர் நியமனம் நடந்ததாகவும், தன்னை முன்மொழிந்தவர்களே இப்போது எதிர்ப்பதாகவும் தெரிவித்திருந்தார்.

சசிகலாவின் பதிலுக்கு மார்ச் 14-ம் தேதிக்குள் விளக்கம் அளிக்கும்படி ஓ.பன்னீர்செல்வம் அணிக்கு தேர்தல் ஆணையம் நோட்டீஸ் அனுப்பியது. அதன்படி, ஓ.பன்னீர்செல்வம் அணியினர் 61 பக்கங்கள் கொண்ட விளக்கத்தை தயாரித்தனர். அதை தேர்தல் ஆணையத்திடம் மைத்ரேயன் எம்.பி. 14-ம் தேதி வழங்கினார்.

'பொதுச் செயலாளரை நியமிக்கும் அதிகாரம் கட்சி பொதுக் குழுவுக்கோ, செயற்குழுவுக்கோ கிடையாது. தற்காலிக பொதுச் செயலாளர் என்ற பதவியே அதிமுகவில் இல்லை. எனவே, சசிகலா நியமனம் செல்லாது. விதிகளை மாற்றுவதற்கு மட்டுமே பொதுக்குழுவுக்கு அதிகாரம் உள்ளது. கட்சியின் அடிப்படை உறுப்பினர்களால் மட்டுமே பொதுச் செயலாளர் தேர்வு செய்யப்பட வேண்டும் என அதிமுக விதிகளில் கூறப்பட்டுள்ளது' என விளக்கக் கடிதத்தில் தெரிவித்துள்ளனர்.

இந்நிலையில், இந்த விவகாரம் குறித்து தலைமைத் தேர்தல் ஆணையர் நசீம் ஜைதியை டெல்லியில் இன்று (புதன்கிழமை) நேரில் சந்தித்தார் ஓ.பன்னீர்செல்வம்.

அதற்குப் பிறகு செய்தியாளர்களிடம் பேசிய ஓபிஎஸ், ''அதிமுக சட்டவிதிக்கு மாறாக பொதுச்செயலாளராக சசிகலா தேர்ந்தெடுக்கப்பட்டுள்ளதாக தேர்தல் ஆணையத்திடம் எடுத்துரைத்தோம்.

தேர்தல் ஆணையத்தின் மேற்பார்வையில் அதிமுக பொதுச்செயலாளர் தேர்தலை மீண்டும் நடத்த வேண்டும். ஆர்.கே. நகர் தேர்தலுக்கு முன்பாகவே இரட்டை இலை சின்னத்தை எங்களுக்கு ஒதுக்கித் தர வேண்டும் என்ற கோரிக்கையை முன்வைத்தோம்'' என்றார்.

இந்நிலையில், இரு தரப்பினரின் கோரிக்கைகள் பரிசீலனையில் உள்ளதாகவும், அதிமுக பொதுச் செயலாளர் நியமன விவகாரத்தில் மார்ச் 20-ம் தேதிக்குள் முடிவை அறிவிப்பதாகவும் தேர்தல் ஆணைய வட்டாரங்கள் தெரிவித்தன.

http://tamil.thehindu.com/tamilnadu/அதிமுக-பொதுச்-செயலாளர்-விவகாரம்-மார்ச்-20ம்-தேதிக்குள்-முடிவை-அறிவிப்பதாக-தேர்தல்-ஆணையம்-தகவல்/article9585140.ece?homepage=true

[நவீனன்]

 

 

 

இரட்டை இலை சின்னம் வேண்டும்: தேர்தல் கமிஷனில் பன்னீர் வாதம்

 

ஆர்.கே.நகர் இடைத் தேர்தலில், எங்களுக்கே இரட்டை இலை சின்னத்தை தர வேண்டும்' என, தேர்தல் கமிஷனில் முன்னாள் முதல்வர் பன்னீர் செல்வம் தரப்பினர் வாதிட்டு
உள்ளனர்.

முன்னாள் முதல்வர் ஜெயலலிதாவின் மறைவைத் தொடர்ந்து, அ.தி.மு.க.,வின் இடைக்கால பொதுச் செயலராக, அவரது தோழி சசிகலா பதவியேற்றார். அதைத் தொடர்ந்து நடந்த அரசியல் மாற்றங்களால், அ.தி.மு.க., இரண்டாகப் பிரிந்தது. முன்னாள் முதல்வர் பன்னீர்செல்வம் தலைமையில் தனி அணி உருவானது.

இந்நிலையில், சொத்துக் குவிப்பு வழக்கில், சசிகலாவுக்கு, நான்கு ஆண்டு சிறை தண்டனையை, சுப்ரீம் கோர்ட் உறுதி செய்தது. தன் உறவினரான தினகரனை, கட்சியின் துணைப் பொதுச் செயலராக அறிவித்துவிட்டு, பெங்களூரு சிறைக்கு சென்றார் சசிகலா.

கட்சியின் இடைக்கால பொதுச் செயலராக சசிகலா பொறுப்பேற்றதை எதிர்த்து, பன்னீர்செல்வம் தரப்பினர், தேர்தல் கமிஷனில் புகார் அளித்தனர். அதற்கு சசிகலா தரப்பில் பதிலளிக்கப்பட்டது.
அந்த பதில் மீதும், தன் தரப்பு விளக்கத்தை பன்னீர்செல்வம் தரப்பு அறிக்கையாக தாக்கல் செய்தது.

அறிக்கை தாக்கல்

இந்த சூழ்நிலையில், முன்னாள் முதல்வர் பன்னீர்செல்வம் தலைமையில், மூத்த நிர்வாகிகள் மைத்ரேயன், நத்தம் விஸ்வநாதன், கே.பி.முனுசாமி உள்ளிட்டோர், தலைமை தேர்தல்
கமிஷனர் நசீம் ஜைதியை, டில்லியில் நேற்று சந்தித்தனர். அப்போது, மிக விரிவான அறிக்கையை தாக்கல் செய்தனர். அப்போது, பன்னீர்செல்வம் தரப்பில் வாதிடப்பட்டதாவது:

அ.தி.மு.க.,வில் பொதுச் செயலரை, தேர்தல் நடத்தி, அனைத்து அடிப்படை உறுப்பினர்களே தேர்வு செய்வர். கட்சியில், இடைக்கால பொதுச் செயலர் என்ற பதவியே கிடையாது. அந்தப்
பதவிக்கு சசிகலாவின் பெயர் அறிவிக்கப்பட்டதே தவிர, அவரை தேர்ந்தெடுக்கவில்லை. அதனால், சசிகலா பதவியேற்றது செல்லாது என, அறிவிக்க வேண்டும்.

கட்சியின் விதிகளின்படி, பொதுச் செயலர் பதவிக்கு தேர்தல் நடத்தி, புதியவரை தேர்வு செய்யும் வரை, அடுத்த மூத்த நிர்வாகிதான், பொதுச் செயலர் பொறுப்பை ஏற்று நடத்த முடியும்; அதன்படி, அவைத் தலைவர் தான் கட்சியை நடத்த முடியும்.இடைக்கால பொதுச் செயலராக சசிகலா பதவியேற்றது, செயல்படுவது செல்லாது. இந்த நிலையில், அவர் பல்வேறு நியமனங்கள் செய்தும், சிலரை கட்சியில் இருந்து நீக்கி பிறப்பித்த உத்தரவுகளும் செல்லாது என, அறிவிக்க வேண்டும்.

அதிகாரம்

ஜெயலலிதாவின் மறைவைத் தொடர்ந்து, அவரது, ஆர்.கே.நகர் சட்டசபை தொகுதிக்கு இடைத் தேர்தல் நடக்க உள்ளது. அதில், கட்சியின் வேட்பாளரை அவைத் தலைவர் தான் தேர்ந்தெடுக்க முடியும். கட்சியின் வேட்பாளரை தேர்ந்தெடுக்கும், கட்சி சின்னமான இரட்டை இலையை ஒதுக்கும் அதிகாரம் எங்களுக்கே தரப்பட வேண்டும்.இவ்வாறு பன்னீர்செல்வம் தரப்பில் வாதிடப்பட்டுள்ளது.

மார்ச் 20க்குள் முடிவு

சசிகலாவின் பதவியை எதிர்த்து தாக்கல் செய்யப்பட்ட மனு, அதற்கு அளிக்கப்பட்ட பதில் வந்துள்ள நிலையில், இந்தப் பிரச்னையில், வரும், 20ம் தேதிக்குள் தன் முடிவை தேர்தல் கமிஷன் அறிவிக்கும் என, எதிர்பார்க்கப்படுகிறது; இதை தேர்தல் கமிஷன் வட்டாரங்கள் உறுதி செய்துள்ளன.

ஏட்டிக்குப் போட்டி

பன்னீர்செல்வம் தரப்பினர், தலைமை தேர்தல் கமிஷனர் நசீம் ஜைதியை சந்தித்துள்ள நிலையில், ஏட்டிக்கு போட்டியாக, சசிகலா தரப்பினரும், அவரை சந்திக்க அவகாசம் கேட்டுள்ளனர்.லோக்சபா துணை சபாநாயகர் தம்பிதுரை தலைமையில், சசிகலா தரப்பினர், நசீம் ஜைதியை இன்று சந்திக்க உள்ளனர்.

பா.ஜ.,வுடன் கூட்டணியா?

தலைமை தேர்தல் கமிஷனருடனான சந்திப்புக்கு பின், பன்னீர்செல்வம் கூறியதாவது:

சசிகலா இடைக்கால பொதுச் செயலராக அறிவிக்கப்பட்டார்; தேர்ந்தெடுக்கப்படவில்லை. கட்சியின் சட்டவிதிகள் மிகவும் தெளிவாக உள்ளன. அதன்படி, கட்சியின் பொதுச் செயலருக்கு உள்ள அதிகாரங்களை சசிகலா பயன்படுத்த முடியாது. புதிய நிர்வாகிகளை சேர்க்கவோ, ஏற்கனவே உள்ளவர்களை நீக்கவோ, அவருக்கு அதிகாரம் கிடையாது.

அதேபோல் பொதுச் செயலர் பதவி காலியாக இருந்தால், புதியவரை தேர்ந்தெடுக்கும் வரை, கட்சியின் அடுத்த மூத்த தலைவரே, கட்சியை வழிநடத்த வேண்டும். அதன்படி, அவைத் தலைவர் தான் கட்சியை வழிநடத்த வேண்டும். இதையே தலைமை தேர்தல் கமிஷனரிடம் வலியுறுத்தினோம்.

அதன்படி, ஆர்.கே.நகர் சட்டசபை இடைத் தேர்தலில், கட்சி வேட்பாளரை அறிவிக்கவும், இரட்டை இலை சின்னம் ஒதுக்கவும் எங்கள் தரப்புக்கே அதிகாரம் உள்ளது என்பதை திட்டவட்டமாக, தகுந்த ஆதாரங்களுடன் கூறியுள்ளோம்.இவ்வாறு அவர் கூறினார்.தமிழகத்தில், பா.ஜ.,வுடன் கூட்டணி அமைப்பீர்களா என்ற கேள்விக்கு, ''எங்கள் கட்சித் தலைமை அதை
முடிவு செய்யும். விரைவில் நல்ல செய்தி வரும்,'' என, பன்னீர்செல்வம் பதில் அளித்தார்.

- நமது சிறப்பு நிருபர் -

http://www.dinamalar.com/news_detail.asp?id=1731152

[நவீனன்]

இரட்டை இலை சின்னம் யாருக்கு? - இரு அணிகளையும் விசாரணைக்கு அழைத்தது தேர்தல் ஆணையம்

பதிவு: மார்ச் 17, 2017 19:39

 

 

இரட்டை இலை சின்னம் யாருக்கு என்பதை, இரு அணிகளிடமும் 22-ம் தேதி விசாரணை நடத்தி முடிவு செய்யப்படும் என, தலைமைத் தேர்தல் ஆணையம் தெரிவித்துள்ளது.

 

 

 

 

 

புது டெல்லி:

அ.தி.மு.க.வின் பொதுச்செயலாளராக சசிகலா நியமிக்கப்பட்டது, இரட்டை இலை சின்னம் உள்ளிட்ட விவகாரங்கள் தொடர்பாக முன்னாள் முதல்வர் ஓ.பன்னீர்செல்வம் தலைமையிலான அணியினர் தலைமை தேர்தல் ஆணையத்திடம் மனு அளித்தனர். இதனையடுத்து சசிகலா நியமனம் தொடர்பாக மார்ச் 20-ம் தேதிக்குள் முடிவெடுக்க உள்ளதாக தேர்தல் ஆணையமும் அறிவித்தது.

அதேசமயம் ஆர்.கே.நகர் இடைத்தேர்தலில் இரட்டை இலை சின்னத்தை ஒதுக்கும்படி ஓபிஎஸ் அணி வலியுறுத்தியுள்ளது. ஓ.பி.எஸ். அணி சார்பில் போட்டியிடும் மதுசூதனனுக்கு வழங்குமாறு தேர்தல் ஆணையத்திடம் மனோஜ் பாண்டியன் இன்று மனு ஒன்றை அளித்துள்ளார்.



இந்த நிலையில், இரட்டை இலை சின்னம் யாருக்கு என்பது 22-ம் தேதி முடிவு செய்யப்படும் என தலைமைத் தேர்தல் ஆணையம் தெரிவித்துள்ளது.

இதுகுறித்து தலைமைத் தேர்தல் ஆணையம் வெளியிட்டுள்ள செய்திக்குறிப்பில் கூறி இருப்பதாவது:-

வருகின்ற 22-ம் தேதி காலை 10.30 மணிக்கு டெல்லி தலைமை தேர்தல் ஆணையத்தில் இரு அணிகளும் ஆஜராக வேண்டும்.விசாரணைக்குப்பின் இரட்டை இலை சின்னம் யாருக்கு என்பது அன்றிரவே முடிவு செய்யப்படும்.

இவ்வாறு அதில் தெரிவிக்கப்பட்டுள்ளது.

http://www.maalaimalar.com/News/TopNews/2017/03/17194011/1074404/Election-Commission-called-admk-both-teams-to-decide.vpf