அரசியல் நிகழ்ச்சி நிரலின் பின்னணியில் குற்றச்சாட்டுக்கள் புனையப்படுகின்றன சொத்துக்களை சேர்க்கவில்லை; வங்கிக்கணக்கும் எனக்கில்லை என்கிறார் கோத்தபாய ராஜபக் ஷ

[நவீனன்]

அரசியல் நிகழ்ச்சி நிரலின் பின்னணியில் குற்றச்சாட்டுக்கள் புனையப்படுகின்றன

 

சொத்துக்களை சேர்க்கவில்லை; வங்கிக்கணக்கும் எனக்கில்லை என்கிறார் கோத்தபாய ராஜபக் ஷ

(பா.ருத்ரகுமார்)

வங்கிக்கணக்கு என்று எனக்கு எதுவும் கிடையாது. காணியையும் வீட்டையும் சொத்  துக்களையும்கூட நான் சேர்க்கவில்லை. திருட்டு நடவடிக்கைகளிலும் ஈடுபட்ட  தில்லை. அரசியல் நிகழ்ச்சி நிரலின் பின்னணியில் குற்றச்சாட் டுக்கள் புனையப் படுகின்றன. எவ்வாறாயினும் அரச அதிகாரி எனும் பொறுப்பில் இருந்தவன் என்ற அடிப்படையில்  விசாரணைகளுக்கு பதிலளிப்பேன் என்று முன்னாள் பாதுகாப்பு அமைச்சின் செயலாளர் கோத்தபாய ராஜபக்ஷ தெரிவித்தார். 

சந்தஹிருசேயா என்ற விஹாரையின் தங்க புத்தர் சிலை விவகாரம் தொடர்பில் நிதிக்குற்றவியல் விசாரணைப் பிரிவில் நேற்று வெ ள்ளிக்கிழமை ஆஜராகிய கோத்தபாய ராஜபக்ஷ பின்னர் ஊடகங்களுக்கு கருத்துத் தெரிவிக்கையிலேயே இவ்வாறு தெரிவித்தார்.

நேற்றுக் காலை 9. 45 மணியளவில் ஆரம்பமாகிய விசாரணை சுமார் மூன்று மணிநேரம் நீடித்திருந்தது. சுங்கத் திணைக்களத்தினால் பறிமுதல் செய்யப்பட்ட தங்கம் தொடர்பில் விசாரணை நடத்தவே அவருக்கெதிராக விசாரணை நடத்தப்பட்டுள்ளது. 

யுத்த வெற்றியை நினைவுட்டும் வகையில் அனுராதபுரத்தில் நிர்மானிக்கப்பட்டிருந்த சந்தஹிருசேயா என்ற விஹாரையில் தங்க புத்தர் சிலை மற்றும் அரசமரம் ஆகியன பிரதிஸ்டை செய்யப்பட்டிருந்தன.

இந்த சிலை மற்றும் அரசமரம் ஆகியனவற்றை உருவாக்குதற்கு சுங்கத் திணைக்களத்திடமிருந்து கடற்படையினர் தங்கம் பெற்றுக்கொண்டிருந்தனர் எனவும் முழு அளவில் தங்கத்தினால் சிலை உருவாக்கப்பட தங்கம் வேண்டியிருந்தபோதிலும், தங்க மூலாம் மட்டுமே பூசப்பட்டு சிலை பிரதிஸ்டை செய்யப்பட்டதாகவும் குற்றம் சுமத்தப் பட்டுள்ளது.

இது தொடர்பில் செய்யப்பட்ட முறைப்பாட்டின் அடிப்படையில் நிதிக் குற்றவியல் விசாரணைப் பிரிவினரால் கோதபாய விசாரணைக்கு அழைக்கப்பட்டிருந்தார். விசாரணையின் முடிவில் ஊடகவியலாளர்கள் கோத்தபாயவிடம் பல்வேறு கேள்விகளை எழுப்பியிருந்தனர். இதன்போது அவர் கூறுகையில்;

சுங்கத் திணைக்களத்தினால் பறிமுதல் செய்யப்பட்டதாக கூறப்படும் தங்கம் தொடர்பில் விசாரணை நடத்துவதற்கென நான் இன்று இங்கு அழைக்கப்பட்டிருந்தேன். நான் இவ்வாறு அழைக்கப்படுவது அறிந்த விடயம்தான்.

ஜனாதிபதி தேர்தலில் போட்டியிடப்போவதாக நான் ஒருபோதும் கூறியது கிடையாது. இதுபற்றி கூறுபவர்களிடம்தான் கேட்கவேண்டும். அத்துடன் அவ்வாறான தீர்மானம் எதனையும் நான் இதுவரையில் எடுக்கவில்லை.

மேலும் அரச ஊழியன் என்ற வகையில் நான் ஆற்றிய பணிகள் தொடர்பில் விசாரணை களை நடத்துவார்களாயின் அதற்கு நிச்சயமாக பதிலளிப்பேன் . அவ்வாறு இல்லாது திருட்டு மற்றும் ஊழல் தொடர்பில் என்னிடம் விசாரிப்பார்களாயின் அதுதொடர்பில் என்னால் பொறுப்பு கூற முடியாது. நான் எந்தகுற்றச்செயலையும் செய்யவில்லை. திருட்டு நடவடிக்கைகளிலும் ஈடுபடவில்லை. சொத்துக்களை கொள்வனவு செய்யவில்லை. வீடுகளை வாங்கவில்லை. காணி.யை வாங்கவில்லை. அதேபோன்று வங்கிக்கணக்கு எதுவும் என்னிடம் கிடையாது.

இதேவேளை மிக் விமானம் கொள்வனவு தொடர்பில் என்மீது குற்றச்சாட்டுக்கள் முன்வைக்கப்படுகின்றன. மிக் விமானம் கொள்வனவு செய்யப்பட்டதானது கேள்வி மனுக்கோரலின் அடிப்படையிலேயேயாகும். இதனை விமானப்படையே கொள்வனவு செய்தது. பொறுப்புள்ள அதிகாரி என்ற வகையில் அதற்கான நடவடிக்கைகளை மேற்கொண்டிருந்தேன்.

எனினும் என்மீதான அனைத்துக் குற்றச்சாட்டுக்களும் அரசியல் நிகழ்ச்சி நிரலின் பின்னணியில் புனையப்பட்டதாகவே அமைந்துள்ளன. நாம் செயற்பட்ட காலத்தில் எம்மோடு இருந்தவர்களும் இன்றைய அரசாங்கத்தில் அங்கம்வகிக்கின்றனர். அவர்கள் இவை தொடர்பில் நன்கு அறிந்து வைத்துள்ளனர் என்றார். 

http://content.epaper.virakesari.lk/newspaper/Daily/main/2017-02-18#page-1