கொடுப்பதெல்லாம் சேமிக்கும் கொண்டல்மேகம்

[கிருபன்]

கொடுப்பதெல்லாம் சேமிக்கும் கொண்டல்மேகம்

ஷங்கர் அருணாச்சலம்

மேகக்கணிமை (Cloud Computing)

க்ளவுட். எல்லாரும் இதைப் பற்றிப் பேசுகிறார்கள். புரிந்தோ புரியாமலோ இதைப் பற்றி ஓரிரு வார்த்தைகள் தெரிந்து வைத்திருத்தல் அவசியம் என்று எல்லாருக்கும் படுகிறது. “பேத்தி ஃபோட்டோவை வாட்சாப்புல அனுப்பிடுவான் பையன். அது ஜங்குன்னு க்ளவுட்ல ஏறி என்னோட ஸ்மார்ட்ஃபோனுக்கு வந்துடும்” என்று பெருமிதப்பட்டுக்கொள்ளும் தாத்தா, பாட்டிகளிலிருந்து தொடங்கி எல்லாருக்கும் இந்தக் க்ளவுட் தேவைப்படுகிறது. அதனாலேயே சில குழப்பமான புரிதல்களும், பல புரிபடாத குழப்பங்களும் மலிந்து கிடக்கின்றன.

ஃபேஸ்புக்கும் க்ளவுடாம். ஜிமெயிலும் க்ளவுடாம். வாட்ஸாப் க்ளவுடா இல்லையா? சரி, நாம் பயன்படுத்தும் இச்சேவைகள் தவிர வேறு எங்கெல்லாம் க்ளவுட் இருக்கிறது?  நோண்டிப் பார்த்தால் நம் கண்கள் இன்னும் அகல விரியும். உலகின் மிகப்பெரிய நிறுவனங்கள் பலவும் இன்று பல்வேறு விதங்களில் மேகக்கணிமையைப் பயன்படுத்துகின்றன. சென்ற ஆண்டு வால்மார்ட் நிறுவனம் தனது மின் வணிகக் கட்டமைப்பு முழுவதையும் க்ளவுடுக்கு நகர்த்தியது பெரிய விஷயமாகப் பேசப்பட்டது. க்ளவுடுக்கு நகர்த்துவது என்றால்…? ஒவ்வொன்றாகப் பொறுமையாகப் பார்ப்போம்.

க்ளவுட் பிறந்த கதை

கணிப்பொறி வன்பொருளில் அந்தக் காலத்து ஜாம்பவான்களில் ஒன்றான காம்பாக் (Compaq) நிறுவனத்தின் ஹ்யூஸ்டன் நகரத்து அலுவலகம். 1996ஆம் ஆண்டு. இணையம் பொதுமக்களிடையே கொஞ்சம் கொஞ்சமாகப் பிரபலமாகிக் கொண்டிருந்த காலம். டாட்காம் கூத்தெல்லாம் நடப்பதற்கு முந்தைய தேனிலவுக் காலம். இணையம் குறித்துப் பொதுவான நல்லெண்ணமும் எதிர்பார்ப்பும் மிகுந்து, பெரிய நிறுவனங்கள் அனைத்தும் இணையத்தில் இடம்பிடிப்பது அத்தியாவசியம் என்று உணர்ந்திருந்த நேரம்.

இணையத்தின் வணிக சாத்தியங்கள் குறித்து விவாதித்துக் கொண்டிருந்த காம்பாக் விற்பனை நிர்வாகிகள் சிலர் ஒரு வணிகத் திட்டத்தை உருவாக்கினர். அத்திட்டத்தின் முதல் இலக்கு: ”மேகக்கணிமையின் முக்கியத்துவத்தையும் அதை நோக்கிய பயணத்தையும் நிறுவத்திற்கு விளக்கியுரைத்தல்”. அவ்விவாதத்தில் பங்களித்த ஒரு நபர் ஒரு வருடம் கழித்து Cloud Computing என்ற பதத்தை ட்ரேட்மார்க் செய்யவும் முனைந்தார். ‘மேகம்’ என்னும் சொல்லைக் ’கணிமை’ என்னும் நோக்கம் சார்ந்து பயன்படுத்தியது இதுவே முதல்முறை எனலாம்.

கணிமை எனப்படுவதியாதெனின்…

Computing என்பது ஒரு பொதுவான சொல். கணினித் தொழில்நுட்பத்தைப் பயன்படுத்தி ஒரு பணியை முடிப்பது என்று இங்கு அதற்குப் பொருள் கொள்ளலாம். இன்னும் சற்று விரிவாக – வன்பொருள், மென்பொருள், வலையமைப்பு ஆகியவற்றைப் பயன்படுத்தி, தரவுகளைச் சேமிக்கவும், நிர்வகிக்கவும், மாற்றவும், பரிமாறவும் செய்வதே கணிமை என்று வரையறுத்துக்கொள்வோம்.

கணிமைகள் பலவிதம்

மெயின்ஃப்ரேம் கணிமை

1996க்கு முன்னமே கணினித் தொழில்நுட்பத்தில் மேகம் எக்கச்சக்கமாகப் பயன்பட்டிருக்கிறது. கணினி வலையமைப்பு (Computer Networking) குறித்துப் பேசும்போது எங்கோ தொலைவாக இருக்கும் கணினி வலைப்பின்னலைக் குறிக்க ஒரு மேகத்தை வரைவது 1960களிலேயே வந்தாயிற்று. இன்னும் சொல்லப் போனால் அறுபதுகளிலும் எழுபதுகளிலும் கோலோச்சிய மெயின்ஃப்ரேம் கணினிகளை ‘க்ளவுட்’ முறையில்தான் பயன்படுத்தினர் என்றுகூட சொல்லிக்கொள்ளலாம். நிறுவனத்தின் தரவுமையத்தில் இந்த ராட்சதக் கணினி ஆஜானுபாகுவாக வீற்றிருக்க, அதை வேறெங்கோ ஒரு மூலையிலிருந்து ஒரு பயனர் தனது ஊமை முனையத்திலிருந்து (dumb terminal) இயக்குவார். இதை க்ளவுடுடன் ஒப்பிடுவதன்மூலம் மேகக்கணிமையின் முக்கியமான ஒரு பண்பு புலனாகிறது:

• கணிமையின் ஏதேனும் ஒரு பகுதி உங்களிடம் இல்லாமல் வேறெங்கோ இருக்கும்
• நீங்கள் ஒரு வலையமைப்பின் மூலம் அதனுடன் தொடர்புகொள்வீர்கள்

மெயின்ஃப்ரேம்கள் மிகவும் விலையுயர்ந்தவை. பெரிய நிறுவனங்கள் தவிர மற்ற அனைவருக்கும் இது எட்டாக்கனியாகவே இருந்தது. அதுமட்டுமல்லாமல், மெயின்ஃப்ரேமில் தொகுதி தொகுதியாக வேலைகளை முடித்துக்கொள்ள முடியுமேயொழிய, பயனர்கள் ஊடாடும் வகையில் செயலிகளை அமைப்பது ஓரளவுக்குமேல் சாத்தியமில்லை.

கிளையண்ட்–சர்வர் கணிமை

பெருநிறுவனங்களில் மெயின்ஃப்ரேம்கள் புழங்கிவந்தாலும் எண்பதுகளில் நிகழ்ந்த மேசைக்கணினிப் புரட்சிதான் அன்றாட வாழ்க்கையில் கணினியின் தாக்கத்தைத் தொடங்கி வைத்தது. மேகத்திலிருந்து கீழிறங்கி வீட்டுக்குள் நுழைந்த வன்பொருளும் மென்பொருளும் கணிமையை உங்கள் கையருகே வைத்தன. மிகப்பெரிய விஷயம்தான் என்றாலும் அந்நேரத்தில் கணிமை மொத்தமும் அந்த ஒரு கணினியிலேயே நடந்தது. உங்களுக்கும் எனக்கும் சில சிறுநிறுவனங்களுக்கும் அது போதுமென்றாலும் பெரு நிறுவனங்களுக்கு அது பற்றாது.

நிறுவனத்தின் அனைத்துக் கணினிகளும் ஒரு வலையமைப்பில் இணைந்து, அவற்றிற்கிடையே தகவல் பரிமாற்றம் நிகழ்ந்தாக வேண்டும். அனைத்துக் கணினிகளுக்கும் உயர்தர வன்பொருள் தருவதும் இயலாது. அதனால் சில கணினிகள் சக்திவாய்ந்தவையாகவும் மேலும் பல சோப்ளாங்கிகளாகவும் அமைக்கப்பட்டன. சக்திவாய்ந்த கணினிகள் நிறுவனத்தின் தரவுமையத்தில் சர்வர்களாயின. மற்றவை பயனர் முனையங்களாயின. இப்போது பயனர்களின் கணிமை எங்கே நிகழும்? கையிலுள்ள முனையத்தில் சில அடிப்படை வேலைகளும், சர்வரில் மேலும் பல கடினமான வேலைகளும் நிகழும். இங்கும் மேகக்கணிமையின் பண்புகள் தென்படுகின்றன:

• ஒரு சில சக்திவாய்ந்த கணினிகளை மட்டும் பயன்படுத்தி, ஓரளவு குறைந்த செலவில் பயனர்கள் அனைவருக்கும் கணிமை வழங்க முடிகிறது
• சர்வர் பகுதியில் மாற்றங்கள் தேவைப்பட்டாலும், அதனால் பயனர்கள் பெரும்பாலும் பாதிப்படைய மாட்டார்கள்

கணிமையின் பயன்கள் பல்வேறு தளங்களில் விரிந்து பரவ கிளையண்ட்-சர்வர் கணிமை காரணமாக இருந்தது. இதிலும் சில பிரச்னைகள் இருக்கத்தான் செய்தன:

1. பல சமயங்களில் பயனர் முனையங்களிலும் வன்பொருள்/மென்பொருள் மாற்றங்கள் செய்யத் தேவையிருந்தது
2. ஒரு பயனர் தனது முனையத்தின் முன் அமர்ந்திருக்காவிடில் அவரால் ஆணிகள் எதுவும் பிடுங்க இயலாத நிலை இருந்தது
3. சர்வர் படுத்தால் சர்வமும் காலி

இணையக் கணிமை

தொண்ணூறுகளின் மத்தியில் வெடித்துப் புறப்பட்ட இணையக் கணிமை, அடுத்த சில வருடங்களில் டாட்காம் ஆர்வக்கோளாற்றில் அடிபட்டுத் திருந்தி, இருபத்தொன்றாம் நூற்றாண்டின் முதற்பகுதியில் தெளிவடைந்திருந்தது. பொதுவாகவே கணினி வன்பொருட்களின் விலை குறைவு, மென்பொருள் பெருக்கம் ஆகிய காரணங்களால் மேசைக்கணினி மென்பொருட்களின் பயன்பாடு மிகுந்திருந்தது (உதாரணம்: மைக்ரோசாப்ட் வேர்டு, எக்ஸெல், ஃபோட்டோஷாப் இத்யாதி). இதன்கூடவே இணையம் சார்ந்த மென்பொருட்களின் பயன்பாடும் அதிகரிக்கலானது. வலைதளங்கள் என்று பொதுவாக அழைக்கப்பட்டாலும் இவற்றில் இருவகையுண்டு. முதல்வகை: மாற்றங்கள் ஏதும் இல்லாத நிலையான இணையப்பக்கங்கள், படங்கள், அவற்றிற்கிடையான இணைப்புகள். இவற்றையே வலைதளங்கள் என்றழைக்க வேண்டும். இரண்டாம் வகை – நிமிடத்துக்கு நிமிடம் மாறும் தரவுகளைக் கொண்ட தளங்கள் (உதாரணம்: அமேசான் போன்ற மின்வணிகத் தளங்கள்). இவற்றை வலைச்செயலிகள் என்றழைப்பதே பொருந்தும்.

கிளையண்ட்-சர்வர் கணிமைக்கும் வலைச்செயலிகளின் கணிமைக்கும் சில வேறுபாடுகள் உண்டு. இவை, மேகக்கணிமையின் பண்புகளாகவும் தென்படுவது தற்செயலன்று:

• வலைச்செயலிகளில் பயனர் தரப்பு செயலியாக (கிளையண்ட்) இருப்பது அக்கணினியின் உலாவியே. அதனால், மென்பொருளின் பெரும்பாலான வேலைகளும் சர்வரிலேயே செய்யப்பட்டு, விளைவுகள் மட்டும் உலாவியில் வழங்கப்படும். இதனால் கிளையண்ட் மாற்றங்கள் எதுவுமே தேவைப்படாது
• பயனர் முனையம் என்று குறிப்பிட்ட ஓர் கணினி தேவையில்லை. உங்கள் பக்கத்து வீட்டிற்குப் போய் அவர்களது கணினியில்கூட இந்த வலைச்செயலியைப் பயன்படுத்திக் கொள்ளலாம்

ஓடமும் ஒருநாள் வண்டியேறும், வண்டியும் ஒருநாள் ஓடமேறும் என்பதுபோல், இது கிட்டத்தட்ட மெயின்ஃப்ரேமின் கணிமைக்கு இணையான முறையாகவேகூட உங்களுக்குத் தோன்றலாம்.

என்னதான் சொல்ல வருகிறேன்?

1960ல் தொடங்கி 2010 வரை பல்வகையான கணிமைகளைப் பார்த்தாயிற்று. அங்கங்கே இவை மேகக்கணிமையின் பண்புகள் என்று பலவற்றைக் குறித்து வந்தாயிற்று. இவையெல்லாம் மேகக்கணிமை என்றால், ஒட்டுமொத்தமாய் மேகக்கணிமையின் பொருளும் நோக்கமும்தான் என்ன? இவற்றைத் தாண்டி மேகக்கணிமையில் வேறென்ன புதிதாய் இருக்கிறது? அடுத்த பகுதியில் பார்க்கும்வரை யோசித்து வைக்கிறீர்களா?

- See more at: http://solvanam.com/?p=42908#sthash.tZQIkNyi.dpuf

 

[கிருபன்]

கொடுப்பதெல்லாம் சேமிக்கும் கொண்டல்மேகம் – 2

ஷங்கர் அருணாச்சலம்

இதுவரை…

மேகக்கணிமை என்றால் என்னவென்று சொல்லாமலே டபாய்த்துவிட்டு, கணினிகளின் கற்காலம் முதல் சில ஆண்டுகள் முன்புவரை புழங்கிவந்த பலவகையான கணிமை முறைகளை ஹெலிகாப்டர்மூலம் பார்வையிட்டோம். அதன்வழியே, மேகக்கணிமையின் சிலபல பண்புகளை/தேவைகளை அடிக்கோடிட்டோம்.

இனி…

கணிமையின் பயனர்கள் யாவர்? உதாரணத்துக்கு:

1. இந்தக் கட்டுரையை ஒரு கணினியில் எழுதிக்கொண்டிருந்த நான்
2. இதை ஒரு ப்ரவுசரில் படித்துக்கொண்டிருக்கும் நீங்கள்
3. இந்தக் கட்டுரையைப் பிரசுரித்திருக்கும் நமது சொல்வனம் அன்பர்கள்
4. இந்தக் கட்டுரை இணையம் என்னும் மாபெரும் வலையமைப்பில் எங்கோ ஓரிடத்தில் உள்ள சொல்வனம் வலைதள சர்வரில் சேமித்து வைக்கப்பட்டிருக்கிறது. அதை மேற்பார்வையிட்டுப் பராமரிக்க ஒரு மென்பொருள் இருக்கிறது. அம்மென்பொருளை இயக்கும் ஊழியர்
5. இந்த இணைய இணைப்பை ஒரு தொலைதொடர்பு நிறுவனம் உங்களுக்கு வழங்கியிருக்கிறது. உங்கள் இணைப்பிற்கான மாதக் கட்டணத்தை நிர்ணயிக்க ஒரு மென்பொருள் உள்ளது. அதில் உங்கள் கட்டணத்தை இஷ்டத்துக்கு ஏற்றிவைத்திருக்கும் மகானுபாவர்

1 மற்றும் 2ஆம் பயனருக்கும் 4 மற்றும் 5ஆம் பயனருக்கும் இடையே உள்ள வித்தியாசம் உங்களுக்கு உடனே புலப்பட்டுவிடும் என்று நினைக்கிறேன். 1, 2ஆம் பயனர்கள் நுகர்வோர்கள். அவர்களது கணிமைத் தேவை 4,5ஆம் பயனர்களின் கணிமைத் தேவையைக் காட்டிலும் மிகவும் வித்தியாசமானது. 4,5ஆம் பயனர்கள் நிறுவன ஊழியர்களும் நிர்வாகிகளும் – வணிகப்பயனர்கள். இங்கு அவர்களது கணிமைத் தேவைகள் அவர்களது பணி மற்றும் நிறுவனத்துடன் தொடர்புடையது. நிறுவனத்தின் எல்லைக்குள்ளேயே இயங்க வேண்டிய கட்டாயம்கூட இருக்கலாம். (3ஆம் பயனரை எப்படி வகைப்படுத்துவீர்கள்? அவர்களது கணிமைத் தேவை என்ன?)

இங்கே சுவாரசியமான விஷயம் என்னவென்றால், இந்த ஐந்து விதமான பயனர்களும் அவர்களது கணிமைத்தேவையை மேகக்கணிமை மூலம் தீர்த்துக் கொள்ளலாம்!

எனது கட்டுரையை நான் கூகுள் ஆவணத்தில் (Google docs) எழுதலாம். இரண்டு பத்திகளை என் கணினியில் எழுதிவிட்டு, ஒரு விமானத்தைப் பிடித்து சென்னைக்கு வந்து, அடுத்த இரண்டு பத்திகளை என் அப்பாவின் கணினியில் எழுதலாம். நீங்கள் உங்கள் பிரவுசரை மூடி வைத்துவிட்டு உங்கள் மனைவியின் ஸ்மார்ட்போனில் இதே பக்கத்தை எடுத்துப் படிக்கலாம். சொல்வனத்தின் ஆசிரியர் இந்த வேர்ட்பிரஸ் தள மேலாண்மையை எங்கிருந்து வேண்டுமானாலும் செய்யலாம்.

இந்தத் தளத்தை அமேசான் நிறுவனத்தின் க்ளவுட் சர்வர்களிலிருந்து வழங்குவதாக வைத்துக் கொள்வோம். அமேசானின் மேகக்கணிமைத் தொழில்நுட்பத்தின் மூலம் நீங்கள் நினைத்த வேளையில் உங்களுக்கென்று ஒரு சர்வரை முளைக்கச்செய்யலாம். அது வர்ஜீனியாவிலோ, சா போலோவிலோ, ஃப்ராங்க்ஃபர்ட்டிலோ அல்லது டோக்யோவிலோ இருக்கலாம். சொல்வனத்தின் ஆசிரியர் அதை எங்கிருந்து வேண்டுமானாலும் இயக்க முடிவதோடு, அமேசான் நிறுவனத்தின் ஊழியரும் அதை எங்கிருந்து வேண்டுமானாலும் பராமரிக்கலாம்.

நான் மேலே சொன்னது எதுவுமே ’ஒரு பேச்சுக்கு’ அல்ல. இவையெல்லாம் இன்று நடைமுறையில் உள்ள, நான் உட்பட பலரும் தினந்தோறும் பயன்படுத்தி வருகின்ற தொழில்நுட்பங்கள். மேகக்கணிமையே இவற்றையெல்லாம் சாத்தியமாக்குகிறது.

சரி. இதுவரை கணிமை முறைகளையும் கணிமையின் பயனர்களையும் பார்த்தோம். இனி, நேரே கோதாவில் இறங்குவோம்.

மேகக்கணிமையின் அடிப்படைத் தொழில்நுட்பங்கள்

மெய்நிகராக்கம்

வள்ளலார் பாட்டெல்லாம் இல்லை. இது கணிமை தொடர்பான விஷயம்தான். நீங்கள் ஒரு சர்வரில் உங்கள் வலைச்செயலியை ஓட்டிக்கொண்டிருக்கிறீர்கள் என்று வைத்துக்கொள்வோம். நான் சர்வர் என்று சொல்லும்போது உங்கள் மனதில் தோன்றும் பிம்பம் என்ன? உங்களுக்கெனப் பிரத்யேகமாகக் கொலுவீற்றிருக்கும் ஒரு சக்திவாய்ந்த கணினிதானே? உங்கள் சர்வரை நீங்கள் இயக்கும்போது இப்படி ஒரு பிம்பத்தைத்தான் அக்கணினி அளிக்கிறது. ஆனால் உண்மையில் இந்த ஒரே கணினி பலருக்கும் “பிரத்யேக” சர்வராக வீற்றிருக்கும். இது எப்படிச் சாத்தியமாகிறது? ஒரே கணினியில் பல இயங்குதளங்களை மெய்நிகராக இத்தொழில்நுட்பத்தின் மூலம் இயக்கமுடிகிறது. எனவே, இக்கணினியின் அனைத்து வளங்களும் முழுமையாகப் பயன்படுத்தப்படுகிறது. ஒரே ஒரு இயங்குதளமும் வலைச்செயலியும் மட்டும் இருந்தால் இக்கணினியின் வளங்கள் பலவும் வாளாவிருக்கத்தான் வேண்டும்.

ஒரு புதிய பயனருக்கு வலைச்செயலி வேண்டும் என்றால் இன்னொரு சர்வரைத் தேடி ஓட வேண்டியதில்லை. உடனடியாக ஒரு மெய்நிகர் இயங்குதளத்தை இதே கணினியில் அமைத்து, சில நிமிடங்களில் இப்புதிய வலைச்செயலியைப் புழங்க விட்டுவிடலாம் (தேவையான வளங்கள் இருக்கும் பட்சத்தில்). இந்த ஒரே கணினியைக் கூறுபோட்டுப் பல பயனர்களுக்கு மெய்நிகர் சர்வர்களாக வழங்கமுடிவதே இத்தொழில்நுட்பத்தின் சிறப்பு. இவற்றைக் கணினித்துணுக்குகள் என்று அழைப்போமா?

திடீரென்று உங்கள் வலைச்செயலிக்கு எக்கச்சக்கமான பயனர்கள் வந்துவிட்டார்கள் என்று வைத்துக்கொள்வோம். இப்போது இந்த ஒரு கணினித்துணுக்கு மட்டும் உங்களுக்குப் போதவில்லை. இந்நிலையில், இதே கணினியிலோ இல்லை இன்னொன்றிலோ உங்களுக்கு ஒரு புதிய துணுக்கை அளிக்க முடியும். சரி, இத்துணுக்கில் இப்போது எல்லா மென்பொருட்களையும் உங்கள் வலைச்செயலியையும் மறுபடி நிறுவவேண்டுமே! அதற்கு எக்கச்சக்க நேரம் பிடிக்குமல்லவா? அதுதான் இல்லை. உங்கள் முதற்துணுக்கைப் புகைப்படம் எடுப்பதுபோல் முழுமையாகப் படம்பிடித்து அதை அப்படியே உங்கள் புதிய துணுக்கில் பொருத்திவிட முடியும்!

சேவைசார் கட்டமைப்பு

நான் சர்வர் என்று சொல்லும்போது உங்கள் மனதில் தோன்றும் பிம்பம் என்ன? மறுபடியும் மொதல்லேருந்தா என்று பதறாதீர்கள்! இப்போது இக்கேள்வியின் நோக்கம் சற்று மாறுபட்டது. ஒரே ஒரு வலைச்செயலி மென்பொருள் உங்கள் சர்வரில் ஓடுகிறது என்றுதான் பொதுவாக நினைக்கத் தோன்றும். ஆனால் உண்மையோ வேறு.

உங்கள் வலைப்பக்கங்களை வழங்க ஒரு மென்பொருள், அப்பக்கங்களில் உள்ள தரவுகளை வழங்க ஒரு தரவுத்தள மென்பொருள் என்ற அடிப்படைப் பிரிவு ஒருபக்கம். இன்னொரு பக்கம் பார்த்தால் பல சமயங்களில், குறிப்பாகப் பெருநிறுவனங்களில், பலவகைத் தரவுகள் நிறுவனத்தின் பல்வேறு துறைகளிலிருந்து வரவேண்டும். இத்தரவுகளை பராமரிக்கும், வழங்கும் பொறுப்பு அத்துறையையே சாரும். அப்படி இருக்க, அத்தரவுகளை உங்கள் வலைச்செயலி பெறுவது எப்படி? சில சமயங்களில் சில தரவுகள் வேறொரு நிறுவனத்திடலிருந்து வரவேண்டி இருக்கும். உதாரணம்: ஃபேஸ்புக் மற்றும் ட்விட்டரிலிருந்து வரும் தரவுகள். இவற்றைப் பெறுவது எப்படி?

இதற்கெல்லாம் துணைசெய்யும் தொழில்நுட்பம் வலைச்சேவைகள் என்று பொதுவாக அழைக்கப்படுகிறது. இவ்வாறு பல்வேறு தனித்தனி சேவைகள் ஒன்றுசேர்ந்து செயல்படுவதையே சேவைசார் கட்டமைப்பு என்று அழைக்கின்றனர். மேகக்கணிமையில் சேவைசார் கட்டமைப்பு ஒரு அடிப்படை அங்கம்.

பயனீட்டுக் கணிமை

நிக்கோலஸ் கார் என்ற அமெரிக்க எழுத்தாளர் கணிமையின் பயன்பாட்டை மின்சக்தியின் பயன்பாட்டுடன் ஒப்பிட்டு எழுதிய புத்தகம் மிகவும் பிரபலம். இருபதாம் நூற்றாண்டின் தொடக்கத்தில் மின் உற்பத்தியாளர்கள் தாம் உருவாக்கிய மின்சக்தியைத் தனித்தனியே பயனர்களுக்கு விற்றுக்கொண்டிருந்தனர். ஆனால் விரைவில் ஒரு பொதுவான மின்தொகுப்பு உருவாகி, மின்சக்தி ஒரு அடிப்படைப் பயன்பாடு ஆனது. மின் அளவிகளின் மூலம் நீங்கள் பயன்படுத்திய சக்தியை அளவிட்டு அதற்கு மட்டுமே நீங்கள் பணம் செலுத்தும் நிலை உருவானது. அதேபோல், கணிமையும் ஒரு தரநிலைப்படுத்தப்பட்ட அடிப்படைப் பயன்பாடாகி, உங்கள் பயன்பாட்டளவின்படி நீங்கள் கட்டணம் செலுத்தும் நிலை வரும் என்பதே காரின் நிலைப்பாடு. இன்று, மேகக்கணிமை அந்நிலையை நோக்கி வெகுவேகமாகச் சென்றுகொண்டிருக்கிறது.

இதுவரை மேகக்கணிமையின் சில அடிப்படைத் தொழில்நுட்பங்களைப் பார்த்தோம். அடுத்த பகுதியில் மேகக்கணிமையின் அனைத்து அடிப்படைப் பண்புகளையும் ஒரு சுற்று பார்த்துவிடலாம். மேற்சொன்ன தொழில்நுட்பங்கள் பற்றிய புரிதல் இருந்தால் அப்பண்புகளை உள்வாங்கிக்கொள்வது எளிதாக இருக்கும்.

கடந்த இரு கட்டுரைகளிலும் பயன்படுத்தப்பட்ட சில கலைச்சொற்களுக்கான ஆங்கில இணைகளைக் கீழே தருகிறேன். ஆங்கிலக் கட்டுரைகளைப் படிக்கும்போது இது உங்களுக்கு உதவக்கூடும்.

கலைச்சொற்கள்

1. கணிமை: Computing
2. வன்பொருள்: Hardware
3. மென்பொருள்: Software
4. வலையமைப்பு/வலைப்பின்னல்: Network
5. தரவு: Data
6. தரவுத்தளம்: Database
7. தரவுமையம்: Data Center
8. மேசைக்கணினி: Desktop Computer / Personal Computer
9. உலாவி: Browser
10. இயங்குதளம்: Operating System
11. செயலி: Application
12. வலைதளம்: Web Site
13. வலைச்செயலி: Web Application
14. வலைச்சேவை: Web Service
15. தொகுதிச் செயலாக்கம்: Batch Processing
16. பயனர் முனையம்: User Terminal
17. ஊமை முனையம்: Dumb Terminal
18. ஊடாடும் பயனர்: Interative User
19. நுகர்வோர்: Consumer
20. வணிகப்பயனர்: Business User
21. மின்வணிகக் கட்டமைப்பு: E-Commerce Infrastructure
22. தள மேலாண்மை: Website Management
23. மெய்நிகராக்கம்: Virtualization
24. மெய்நிகர் இயங்குதளம்: Virtual Operating System
25. கணினித் துணுக்கு: Computing Instance / Droplet
26. சேவைசார் கட்டமைப்பு: Service-Oriented Architecture
27. பயனீட்டுக் கணிமை: Utility Computing
28. மின்தொகுப்பு: Electric Grid
29. தரநிலைப்படுத்தப்பட்ட: Standardized

- See more at: http://solvanam.com/?p=43281#sthash.vsFT8OJe.dpuf

 

[கிருபன்]

மீட்டர் போட்ட ஆட்டோக் கணிமை

ஷங்கர் அருணாச்சலம் 

 

இதுவரை…

கணிமை என்றால் என்ன? கணிமையின் பயனர்கள் யாவர்? கடந்த பல ஆண்டுகளாகக் கணிமை எவ்வித மாற்றங்களை அடைந்திருக்கிறது? சமீபத்தில் கணிமையில் பயன்படக்கூடிய சில தொழில்நுட்பங்கள் ஆகியவற்றைப் பார்த்திருக்கிறோம். கூடவே, மேகக்கணிமையின் சில பண்புகளையும் மேலோட்டமாகப் பார்த்திருக்கிறோம்.

இனி…

குன்ஸாக ஒரு சில விஷயங்களை இதுவரை உள்வாங்கியிருப்பீர்கள். அவையாவன:

1. கணிமை உங்கள் கணினியில் மட்டும் நடப்பதில்லை. கணிமை உங்கள் கணினியில் நடக்காமலிருப்பது பலவகைகளில் நல்லது. (ஏன்?)
2. கணிமையின் செயல்பாட்டில் மாற்றங்கள் தேவைப்படும் போது பயனர்களை பாதிக்காமல் அவற்றைச் செய்ய முடிந்தால் சிறப்பு. (எதற்கு?)
3. உங்களுக்குத் தேவையான கணிமையை உங்கள்கணினியில் மட்டுமல்லாது வேறு எந்தக் கணினியிலிருந்தும் பெற முடிந்தால் அமோகம்.  (எப்படி?)

இந்தப் புரிதலையும் இதுவரை நாம் பார்த்த தொழில்நுட்பங்களையும் வைத்து மேகக்கணிமையின் பண்புகளை/சிறப்பம்சங்களைக் கீழ்க்கண்டவாறு தொகுத்துக்கொள்ளலாம்:

1. நினைத்த நேரத்தில் நினைத்த இடத்தில்…

உங்களுக்குத் தேவையான கணிமை எங்கும் எப்போதும் கிடைக்கவேண்டும். இது அடிப்படை. நீங்கள் உங்களது மேசைக்கணினியையோ மடிக்கணினியையோ ஒரே ஒரு சர்வரையோ மட்டும் நம்பி இருக்க வேண்டிய நிலை கூடாது. இது எப்படிச் சாத்தியமாகிறது? மேகக்கணிமையில் உங்களது கணிமை ஒரு வலைச்செயலியாக வழங்கப்படுகிறது. அதை நீங்கள் எங்கிருந்து வேண்டுமானாலும் ஒரு உலாவி கொண்டு இயக்கலாம். மென்பொருள் ஏதும் நிறுவத் தேவையில்லை. விண்டோஸில் தான் ஓடும், லைனக்ஸில்தான் ஓடும் என்ற இம்சையெல்லாம் இல்லை.

2. வளங்கள் பகிர். வீணாக்கம் தவிர்.

உங்கள் வலைச்செயலி எங்கோ ஓர் கணினித்துணுக்கில் (அல்லது துணுக்குகளில்) மெய்நிகராக நிறுவப்பட்டிருக்கிறது. எனவே, கணிமை, தரவுத்தளம், வன்பொருள் என அனைத்து வளங்களும் வீணாகாமல் பகிரப்படுகிறது. அதே நேரத்தில், இயன்றவரை உங்கள் செயலியின் கணிமைத்திறனை ஒரு வலைச்சேவையாக வழங்க முடிந்தால், மற்ற வலைச்செயலிகளும் அதன் திறனை ஒரு சேவைசார் கட்டமைப்பின்மூலம் பெறமுடியும்.

3. வீக்கத்துக்குத் தகுந்த விரல்

வன்பொருள், மென்பொருள் நெருக்கடியால் உங்கள் வலைதளத்துக்கு வரும் பயனர்களை இழக்க வேண்டிய நிலை இல்லை. மேகக்கணிமைத் திறனை வழங்கும் அமேசான், மைக்ரோசாஃப்ட் போன்ற நிறுவனங்கள் அனைத்தும் எக்கச்சக்க வளங்களை அவர்களது தரவுமையங்களில் குவித்திருக்கின்றனர். மெய்நிகராக்கம் மூலம் கேட்ட நேரத்தில் கேட்ட அளவுக்கு உங்கள் வன்பொருள், மென்பொருள் தேவைகளைப் பூர்த்தி செய்துகொள்ள முடியும். சில நிறுவனங்கள் இத்தகைய நெகிழ்வுகளைத் தன்னியக்கமாகவே செய்யும் திறன் பெற்றிருக்கின்றன. அதுபோலவே, பயனர் தேவை குறையும்போது தேவையற்ற வளங்களை விடுவித்து விடவும் இயலும்.

4. மீட்டர் போட்ட ஆட்டோக் கணிமை

மேலே சொன்னதுபோல், தேவைக்கேற்ற திறன் பெறமுடிவதால் தோசைக்கேற்ற காசு கொடுத்தால் போதும். பயனீட்டுக் கணிமைத் தொழில்நுட்பத்தின் மூலம் மேகக்கணிமை நிறுவனங்கள் உங்கள் பயன்பாட்டின் அனைத்துக் கூறுகளையும் துல்லியமாக அளந்து அதற்கேற்ற கட்டணத்தை மட்டும் வசூலிக்கும்: 200 மணிநேரம் கணிமை, 180 மணி நேரம் மெமரி, 100 மணி நேரம் தரவுத்தளம் என்று எண்ணி எண்ணி பில்போட முடியும். இக்கூறுகள் தெளிவாகத் தெரிந்துவிடுவதால், உங்கள் வலைச்செயலியில் எவ்வளவு பயன்பாடு இருந்தால் எவ்வளவு செலவாகும் என்பது தெளிவாகிவிடும். அதனால், அடுத்த மாதம் உங்கள் தளத்தில் தலைவர் பட டிக்கெட் விற்பதாக இருந்தால் இப்போதிருந்தே எவ்வளவு வளங்கள் ஏற்றவேண்டும் என்ற கொள்திறன் திட்டமிடுதல் சாத்தியமாகிறது.

5. சிரஞ்சீவிக் கணிமை

உங்கள் வலைச்செயலியின் கணினித்துணுக்கில் ஏதேனும் வன்பொருள், மென்பொருள் வில்லங்கத்தால் அத்துணுக்கு மண்டையைப் போட நேரிட்டால் மெய்நிகராக்கத்தின்மூலம் சுலபமாக இன்னொரு துணுக்குசெய்து உடனுக்குடன் உங்கள் செயலிக்கு உயிர் தரலாம். உங்கள் செயலி எவ்வளவு தடவை அடித்தாலும் சாகாத கரப்பான்பூச்சியாக (கொஞ்சம் உணர்ச்சிவசப்பட்டுவிட்டேனோ?) வலம் வரலாம்.

6. தரமோ பொலிவு. விலையோ மலிவு.

தேவைக்கேற்ற மீட்டர்தான் என்பதால் உங்கள் செயலியின் பராமரிப்புச் செலவு நன்றாகக் குறைய வாய்ப்பிருக்கிறது. வணிகப்பயனர்கள் தங்களுக்குத் தேவையான வன்மென்பொருட்களை மாய்ந்து மாய்ந்து வாங்கிக் குவிக்கத்தேவையில்லை. அவற்றைப் பராமரிக்க ஒரு ஐடி படையையும் நியமிக்கத் தேவையில்லை.

7. எங்கெங்கு காணினும் செயலியடா!

பொதுவாக உங்கள் சர்வர்கள் ஏதோ ஒரு நாட்டில்தான் ஒட்டுமொத்தமாக இருக்கும். ஒரு பேச்சுக்காக உங்கள் சர்வர் அமெரிக்காவில் இருக்கிறது என்று வைத்துக்கொள்வோம். அதன் அருகிலிருக்கும் பயனர்கள் உங்கள் செயலியை டக்கு டக்கு என்று திறந்து பயன்பெற, வெகுதொலைவில் ஆஸ்திரேலியாவிலிருக்கும் பயனர்கள் ஒரு பட்டனைத் தட்டிவிட்டுத் தேவுடுகாத்துக்கொண்டிருக்க வாய்ப்பிருக்கிறது. மேகக்கணிமையில் நீங்கள் விருப்பப்பட்டால் உலகின் பல்வேறு மூலைகளில் உங்கள் கணினித்துணுக்குகளை ஏற்படுத்திக்கொள்ள இயலும். எனவே அமெரிக்காவிலும் ஆஸ்திரேலியாவிலும் ஒரே டக்கைத் தர இயலும்.

எல்லாம் நல்ல விஷயங்களாகவே சொல்லிக்கொண்டு வந்தால் எப்படி! இதோ, மேகக்கணிமையின் சில பிரச்னைகள்:

1. தரவுப் பாதுகாப்பு

உங்கள் தரவுகளை உங்கள் முழுக் கட்டுப்பாட்டில் இல்லாத ஒரு இடத்தில் சேமிப்பது பலருக்கும் பிரச்னையாகப் படுகிறது. என்னதான் அந்நிறுவனம் பிஸ்தாவாக இருந்தாலும் இடர்காப்பு விஷயத்தில் பலரும் தயங்கவே செய்கிறார்கள். குறிப்பாக உங்கள் தொழில் ரகசியங்கள் போன்ற முக்கியமான விஷயங்களை மேகத்தில் வைப்பது கொஞ்சம் யோசித்துச் செய்யவேண்டிய விஷயம்.

2. துணுக்குக் கணக்கு. தவறினால் பிணக்கு.

பராமரிப்புச் செலவு குறையும் என்று மேலே சொல்லியிருந்தேன். ஆனால், அதை வெற்றிகரமாகச் செய்ய தெளிவான திட்டமிடலும் கூர்ந்த கவனிப்பும் தேவை. இல்லாவிட்டால் கையையும் காலையும் விற்று பில் கட்டவேண்டியிருக்கும். குறிப்பாக வளங்களை அதிகப்படுத்திய பிறகு பயனர் தேவை சார்ந்து அதை மீண்டும் குறைக்க மறந்து விடுவது ஒரு பொதுவான தவறு.

3. உன் வாழ்வு உன் கையில். இல்லை.

அமேசானின் தரவுமையத்தில் ஏதேனும் பெரிய பிரச்னை வந்து அவர்களின் அனைத்துத் துணுக்குகளும் படுத்துவிட்டால்? இது நடப்பதற்கான சாத்தியங்கள் மிகக் குறைவு என்றாலும் ஒருசில முறை இது நடந்திருக்கிறதுதான். அப்போது உங்கள் நிறுவனத்தில் எத்தனை அசகாய சூரர்கள் இருந்தாலும் அவர்களால் ஆணிகள் ஏதும் பிடுங்க இயலாது. அமேசான் இப்பிரச்னைக்குத் தீர்வு காணும் வரையில் நீங்கள் தலைசொறிந்து கிடக்கவேண்டியதுதான். அவ்வாறு நடக்கும்போது அவர்கள் எவ்வளவு நேரம் உங்கள் துணுக்கு செயல்படவில்லையோ அதற்கேற்ற அபராதத்தைக் கட்ட வாய்ப்பிருக்கிறது. ஆனால் அந்நேரத்தில் நீங்கள் பெரியதோர் வணிகத்தை இழந்திருந்தால் அதற்கான நஷ்ட ஈடு என்பதெல்லாம் கொஞ்சம் கஷ்டம்.

மேகக்கணிமையின் அடிப்படை சங்கதிகள் இப்போது ஓரளவு தெளிவாகியிருக்கும் என்று நம்புகிறேன். அமேசான், மைக்ரோசாஃப்ட், கூகுள், சேல்ஸ்ஃபோர்ஸ் என்று மேகக்கணிமை நிறுவனங்கள் பல இருக்கின்றன. இவை அடிப்படையில் ஒத்த சேவைகளைத் தந்தாலும் ஒவ்வொன்றும் வெவ்வேறு சேவை அமைப்புகளைக் கொண்டிருக்கின்றன. அது என்ன சேவை அமைப்பு? அடுத்த பகுதியில் பார்க்கலாம்!

இப்பகுதியில் வரும் கலைச்சொற்கள்

• கணிமை: Computing
• வன்பொருள்: Hardware
• மென்பொருள்: Software
• தரவு: Data
• தரவுத்தளம்: Database
• தரவுமையம்: Data Center
• உலாவி: Browser
• செயலி: Application
• வலைதளம்: Web Site
• வலைச்செயலி: Web Application
• வலைச்சேவை: Web Service
• வணிகப்பயனர்: Business User
• மெய்நிகராக்கம்: Virtualization
• கணினித் துணுக்கு: Computing Instance / Droplet
• சேவைசார் கட்டமைப்பு: Service-Oriented Architecture
• பயனீட்டுக் கணிமை: Utility Computing
• வளங்கள்: Resources
• நெகிழ்வு: Elasticity, flexibility, adjustment
• தன்னியக்கமாக: automated
• கொள்திறன் திட்டமிடுதல்: Capacity planning
• தரவுப் பாதுகாப்பு: Data Security
• இடர்காப்பு: Risk Management
• சேவை அமைப்பு: Service model

- See more at: http://solvanam.com/?p=43579#sthash.aP46yWlX.dpuf

 

[நிழலி]

தெளிவான ஒரு கட்டுரை... பகிர்வுக்கு நன்றி கிரு

[கிருபன்]

மேகக் கணிமை (Cloud Computing) – 4

ஷங்கர் அருணாச்சலம்

 

இதுவரை…

மேகக்கணிமையின் பயனர்கள், தொழில்நுட்பங்கள், பண்புகள், பிரச்னைகள் என்று சில விஷயங்களைப் பார்த்திருக்கிறோம்.

இனி…

 

மேகக்கணிமை நிறுவனங்களின் சேவை அமைப்புகள் குறித்து விளக்குவதாகச் சொல்லி சென்ற பகுதியை முடித்திருந்தேன். அது என்ன சேவை அமைப்பு?

எல்லா மேகக்கணிமை நிறுவனங்களும் ஒரே மாதிரியான சேவையைத் தருவதில்லை. இதைப் புரிந்துகொள்ள கொஞ்சம் தொழில்நுட்பத்தில் இறங்க வேண்டும். “சகதி”யில் இறங்காமல் சங்கதி கிடைப்பதெப்படி!

மேலுள்ள படத்தைப் பாருங்கள். ஒரு வலைச்செயலிக்குத் தேவையான அனைத்து கணிமைப் பகுதிகளும் இங்கே அடுக்கப்பட்டுள்ளன.

1. அடித்தளத்தில் வன்பொருட்கள்: கணினி செயலி, நினைவகம், வன்தட்டுகள் இத்யாதி.
2. அதன்மேலே இருப்பது அடிப்படை மென்பொருளாகிய இயங்குதளம். இது விண்டோஸ், லைனக்ஸ் என்று நம் தேவைக்கேற்ப.
3. அதன்மேல் நிறுவப்படுவது வலைச்செயலிக்குத் தேவையான:

அ. சர்வர் – அபாச்சே, ஐ.ஐ.எஸ் என்று தேவைக்கேற்ப

ஆ. தரவுத்தளம் – மைக்ரோசாஃப்ட் எஸ்.க்யூ.எல். சர்வர், ஆரக்கிள், மைசீக்வல், மாங்கோடீபி என்று தேவைக்கேற்ப

இ. இதர செயலிகள் – டாட்.நெட், ஜாவா, பைத்தான், பி.ஹெச்.பி. என உங்கள் வலைச்செயலியின் தேவைக்கேற்ப மென்பொருட்களாகவோ, அல்லது வலைச்சேவைகளாகவோ இருக்கலாம்.

4. இவற்றின் மேலே, இவற்றின் துணையோடு கட்டப்படுவதே உங்கள் வலைச்செயலி.

இவை எல்லாவற்றையும் உங்கள் சொந்த சர்வரில் உங்கள் விருப்பப்படி நிறுவி, இயக்கி, பொறுப்பெடுத்துக்கொள்வது அந்தக் காலம். இதில் ஒன்றுக்கு மேற்பட்ட விஷயங்களை உங்கள் பொறுப்பிலிருந்து நீக்கி மேகத்தில் ஏற்றி அம்மேகக் கணிமை நிறுவனத்தின் பொறுப்பில் விடுவதே இந்தக்காலம்.

இதில் எந்தெந்த விஷயங்களுக்கு மேகக்கணிமை நிறுவனங்கள் பொறுப்பெடுத்துக்கொள்கின்றன என்பதே அந்நிறுவனங்களின் சேவை அமைப்பு எனப்படுகிறது.

இதையொட்டி மூன்று வகையான சேவை அமைப்புகள் புழக்கத்தில் உள்ளன:

1. அடிப்படை உள்கட்டமைப்பைச் சேவையாகத் தருவது:

இவ்வகையில் பொதுவாக வன்பொருள் கட்டமைப்பு (படத்தில் ’1’ எனக் குறித்த அடுக்கு), மற்றும் இயங்குதளம் (படத்தில் ‘2’) மட்டும் சேவையாக வழங்கப்படும். அதற்குமட்டும் அவர்கள் பொறுப்பு. EC2 எனப்படும் அமேசானின் மேகக்கணிமைச் சேவையும், மைக்ரோசாஃப்டின் அசூர் மெய்நிகர் கணினிச் சேவையும் இவ்வகையைச் சார்ந்தவை. அவர்களது கட்டமைப்பில் ஒரு துணுக்கில் விண்டோஸ் அல்லது லைனக்ஸ் மெய்நிகராக நிறுவி உங்களுக்கு அளித்து விடுவார்கள். அதன்மேல் நீங்கள் என்ன சர்வர் நிறுவுகிறீர்கள், என்ன செயலியை ஓட்டுகிறீர்கள் என்பதெல்லாம் உங்கள் கையில்.

2. மென்பொருள் அடித்தளத்தை (ப்ளாட்ஃபார்ம்) சேவையாகத் தருவது:

இவ்வகையில் பொதுவாக உள்கட்டமைப்புடன் சேர்த்து உங்கள் செயலிக்குத் தேவையான மென்பொருள் அடித்தளத்தையும் (படத்தில் ‘3’) சேவையாக வழங்கிவிடுவார்கள். அவர்கள் தரும் மென்பொருள் உபகரணங்களைப் பயன்படுத்தி உங்கள் செயலியை நிறுவி இயக்குவது மட்டுமே உங்கள் பொறுப்பு. சமீபத்தில் சேல்ஸ்ஃபோர்ஸ் நிறுவனம் வாங்கிய ஹிரோகு சேவை, மற்றும் கூகிளின் ஆப் எஞ்சின் சேவை இவ்வகையைச் சார்ந்த சேவைகள்.

3. மென்பொருட்களை/வலைச்செயலிகளைச் சேவையாகத் தருவது:

இவ்வகையில் நீங்கள் உங்கள் செயலிக்குக் கூடப் பொறுப்பில்லை. குழப்பமாக இருக்கிறதல்லவா? இதைப் புரிந்துகொள்ள இன்றைய சூழலின் செயலித் தேவைகளை நாம் புரிந்துகொள்ளவேண்டும். நீங்கள் ஒரு மின்வணிக நிறுவனத்தைத் தொடங்கப்போகிறீர்கள் என்று வைத்துக்கொள்வோம். உங்களுக்கான உடனடித் தேவை என்ன? பொருட்களை இணையத்தில் கூவி விற்கத் தேவையான ஒரு வலைதளம், உங்கள் வாடிக்கையாளர்கள் குறித்த விவரங்களைப் பராமரிக்க ஒரு பயனர் தொடர்பு நிர்வாகச் செயலி, உங்கள் நிறுவனத்தின் கணக்கு வழக்குகளைப் பராமரிக்க ஒரு செயலி என்று சொல்லிக்கொண்டு போகலாம். இவற்றில் எந்தச் செயலியாவது புதிதாக எதாவது செய்கிறதா? இவை அனைத்துமே உலகத்தில் உள்ள பெரும்பான்மையான மின்வணிக நிறுவனங்களும் அன்றாடம் பயன்படுத்தும் செயலிகள்தானே? எனவே, மெனக்கெட்டு முதலிலிருந்து இச்செயலிகளை நீங்கள் உருவாக்குவீர்களா, அல்லது இத்துறை விற்பன்னர்கள் ஏற்கனவே உருவாக்கி வைத்திருக்கும் செயலிகளைப் பயன்படுத்துவீர்களா?

ஏற்கனவே இருக்கும் செயலியைத்தான் பயன்படுத்தப்போகிறீர்கள் என்றால் அதை நிறுவி, பராமரிக்கும் தலைவலி மட்டும் உங்களுக்கு ஏன்? இதுதான் இச்சேவை அமைப்பின் அடிப்படை. சிறந்த உதாரணங்கள் சேல்ஸ்ஃபோர்ஸ் நிறுவனத்தின் விற்பனை மேகம், சேவை மேகம், கூகிளின் ஜீமெயில், டாக்ஸ், டிரைவ் போன்ற வணிகச்சேவைகள்.

மேலோட்டமாக இச்சேவை அமைப்புகளைப் பற்றிப் பார்த்தோம். இனி எவ்வகை அமைப்பு யாருக்கு உகந்தது, இவ்வமைப்புகளின் நல்லதுகெட்டது என்ன என்பதைப் பார்ப்போம்.

உங்கள் வலைச்செயலி புதியதோர் சிறப்பியல்பை முன்வைக்கிறது என்று வைத்துக்கொள்வோம். அப்போது நீங்கள் உங்கள் செயலியை முழுவதுமாக முதலிலிருந்து உருவாக்கியாகவேண்டும். அதனால் நீங்கள் நேரடியாக ஒரு மென்பொருள் சேவையைப் பயன்படுத்த இயலாது. அதேபோல், உங்கள் செயலி இயங்குதளத்தோடும், தரவுத்தளத்தோடும், இன்னபிற செயலிகளோடும் புதிய புதிய வகைகளில் வினையாற்றவேண்டும், அல்லது புதிய செயலிகளை நீங்கள் நிறுவிப் பயன்படுத்தவேண்டும் என்று வைத்துக்கொள்வோம். இக்காரணத்தால் நீங்கள் ஒரு ப்ளாட்ஃபார்ம் சேவையையும் பயன்படுத்த முடியாது. ஏனெனில் ப்ளாட்ஃபார்ம் சேவையில் உங்களுக்கு வழங்கப்படும் செயலிகளும் உபகரணங்களும் ஏற்கனவே வரையறுக்கப்பட்டவை. இவ்வகை வினையாற்றங்களும் புதிய செயலிகள் நிறுவுதலும் இதில் சாத்தியமில்லை. இத்தருணத்தில் உள்கட்டமைப்புச் சேவை உங்களுக்குத் தேவைப்படும். மேலும், உள்கட்டமைப்புச் சேவைதான் இம்மூன்றில் மலிவானது. எனவே, பெரும் சிறப்பியல்புகள் இல்லாவிட்டாலும், உங்களிடம் நல்ல கட்டமைப்பு நிர்வாகிகளும் நிரலாளர்களும் இருந்தால் இவ்வமைப்பின் மூலம் நீங்கள் குறைந்த செலவில் மேகமேறலாம்.

மேற்சொன்ன தனிப்பயனாக்கங்கள் இல்லாமல், ஆனால் ஒரு புதிய செயலியை நீங்களே உருவாக்கவேண்டிய தேவை இருந்தால் அப்போது ப்ளாட்ஃபார்ம் சேவை உங்கள் நண்பன்.

மென்பொருள் சேவை யாருக்குப் பயன்படும் என்பதை ஏற்கனவே பார்த்துவிட்டோம். மேலதிகமாகச் சொல்லவேண்டுமானால், மென்பொருள் சேவைதான் இம்மூன்றில் அதிகச் செலவு பிடிக்கும் அமைப்பு. எனவே, உங்களிடம் பெரிய அளவில் ஐடி துறை வல்லுனர்கள் இல்லாவிடில், அல்லது உங்களுக்குத் தேவைப்படும் செயலி சேல்ஸ்ஃபோர்ஸின் விற்பனை மேகத்தைப் போல சிக்கலான பல்கூட்டமைப்பாக இருக்குமானால் பேசாமல் பல்லைக்கடித்துக்கொண்டு பணத்தை எடுத்து வைத்தால் மென்பொருள் சேவை மேகம் உங்கள் நண்பனே!

இம்மூன்று அமைப்புகளிலும் மேகக்கணிமையின் பண்புகள் வேலை செய்யும். உங்களுக்குத் தேவைப்படும் அளவு வளங்களை உடனுக்குடன் கூட்டவோ குறைக்கவோ இவை மூன்றிலுமே முடியும். எவ்வகை வளங்கள் என்பதே வித்தியாசம். உள்கட்டமைப்புச் சேவையில் வளங்கள் என்றால் வன்பொருள் வளங்கள், மெய்நிகர் துணுக்குகள். ப்ளாட்ஃபார்ம் சேவையில் வளங்கள் என்றால் மெய்நிகர் துணுக்குகள், தரவுத்தளங்கள், பைத்தான், மைசீக்வல் போன்ற செயலிகள். மென்பொருள் சேவையில் வளங்கள் என்றால் பொதுவாகப் பயனர் எண்ணிக்கை, ஒரு குறிப்பிட்ட செயலியின் வளங்கள் – உதாரணமாக, ஒரு மின்வணிக வலைதளம் என்றால், அதில் எவ்வளவு பொருட்களை விற்கமுடியும், ஒரு மாதத்தில் எவ்வளவு விற்பனைக்கு எவ்வளவு கமிஷன் போன்ற வரையறைகள்.

உள்கட்டமைப்புச் சேவையில் உங்களது கணிமை வளங்கள்மேல் உங்களுக்கு முழுச் சுதந்தரம் உண்டு. உங்களுக்குத் தேவையான மென்பொருட்கள், செயலிகளை உங்கள் விருப்பத்திற்கேற்ப நிறுவிக்கொள்ளலாம். இச்சுதந்தரத்தின் விலை, பொறுப்பு. இச்செயலிகள் ஏதேனும் மக்கர் செய்தால் நீங்கள்தான் களத்தில் இறங்கவேண்டும். அதேபோல், மென்பொருட்களின் புதிய பதிப்பு வரும்போதோ அல்லது ஏதேனும் பாதுகாப்புப் பிரச்னைகள் வரும்போதோ அதை நீங்கள்தான் பார்த்துக்கொள்ளவேண்டும். நல்ல ஐடி ஆட்கள் உங்களிடம் இருப்பது மிகவும் அவசியம்.

மேற்சொன்ன இடையூறுகளெல்லாம் இல்லாமல் இருப்பதற்காகத்தான் ப்ளாட்ஃபார்ம் சேவைக்கு மேலதிகக் கட்டணம் செலுத்துகிறீர்கள். ப்ளாட்ஃபார்ம் சேவையில் மென்பொருள் பதிப்புகளெல்லாம் அவர்களே பார்த்துக்கொள்வார்கள். ஒரு தரவுத்தளம் வேலை செய்யவில்லை என்றால் அந்நிறுவனத்திற்குப் போன் போட்டு எகிறலாம். ஆனால் மேற்சொன்ன சுதந்திரமும் உங்களுக்கு இல்லை. திடீரென்று உங்களுக்கு பைத்தான் பிடித்தால், உங்கள் ப்ளாட்ஃபார்ம் சேவையில் பைத்தான் இருந்தால்தான் உண்டு. இல்லையென்றால் இல்லைதான். மேலும், கூகிள் ஆப் எஞ்சின் போன்ற சில சேவைகளின்மூலம் உருவாக்கிய ஒரு செயலியை நாளை நீங்கள் வேறொரு ப்ளாட்ஃபார்ம் சேவை நிறுவனத்தில் நிறுவினால் அங்கே அது வேலை செய்யும் என்று நிச்சயமில்லை.

மென்பொருள் சேவையில் இவ்வளவு இறங்கியெல்லாம் ஆடமுடியாது. கொடுக்கும் மென்பொருளைப் பயன்படுத்துவதோடு சரி. அம்மென்பொருளை உங்களுக்குத் தேவையான வடிவத்தில் திருத்தியமைத்துக்கொள்ளப் பொதுவாக வழிவகைகள் இருக்கும். அந்த அளவில்தான் உங்கள் சுதந்திரமும் இருக்கும். மென்பொருள் வேலை செய்யவில்லையென்றால் அந்நிறுவனத்திற்குப் ஃபோன் போட்டுவிட்டுப் பிரார்த்தனைகளில் ஈடுபடலாம். இதுவே, உள்கட்டமைப்புச் சேவையாக இருந்தால், உங்கள் தீரபராக்கிரம நிரலாளர் களத்தில் இறங்கி, நோண்டிப்பார்த்து, “அடடா! இந்தத் தரவுத்தளத்திற்கு மெமரி போதவில்லை. அதுதான் பிரச்னை” என்று அறிந்து சில பல பட்டன்களைத்தட்டி உங்கள் செயலிக்கு உயிர்தந்துவிட வாய்ப்பிருக்கிறது.

இதுவரை, மேகக்கணிமையின் பல்வேறு சேவை அமைப்புகளைப் பார்த்தோம். அடுத்த பகுதியில், தனிமேகம், பொதுமேகம், நீலமேகம் என்றெல்லாம் சில சமாசாரங்களைப் பார்க்கலாம்!

இப்பகுதியில் வரும் கலைச்சொற்கள்

சேவை அமைப்பு: Service model

வன்பொருள்: Hardware

கணினி செயலி: Computer processor

நினைவகம்: Memory

வன்தட்டு: Hard disk

மென்பொருள்: Software

இயங்குதளம்: Operating system

வலைச்செயலி: Web Application

தரவுத்தளம்: Database

வலைச்சேவை: Web Service

உள்கட்டமைப்புச் சேவை: Infrastructure as a service (Iaas)

ப்ளாட்ஃபார்ம் சேவை: Platform as a service (Paas)

மென்பொருள் சேவை: Software as a service (Saas)

மெய்நிகர்: Virtual

துணுக்கு: Computing Instance / Droplet

செயலி: Application

மென்பொருள் உபகரணங்கள்: Software tools

மின்வணிகம்: E-commerce

வலைதளம்: Web Site

பயனர் தொடர்பு நிர்வாகம்: Customer relationship management (CRM)

விற்பனை மேகம், சேவை மேகம்: Sales cloud, Service cloud (Salesforce.com offerings)

கட்டமைப்பு நிர்வாகி: System/Infrastructure administrator

நிரலாளர்: Programmer

தனிப்பயனாக்கங்கள்: Customizations

வளங்கள்: Resources

நெகிழ்வு: Elasticity, flexibility, adjustment

தன்னியக்கையாக: automated

(மென்பொருட்களின்) புதிய பதிப்பு: New version

- See more at: http://solvanam.com/?p=43680#sthash.oTSGll9W.dpuf

 

[கிருபன்]

ஏன் மேகக் கணினியம் & எப்படி மேகத்திரளில் பிணையலாம்?

ஷங்கர் அருணாச்சலம் 

 

இதுவரை…

மேகக்கணிமையின் பயனர்கள், தொழில்நுட்பங்கள், பண்புகள், சேவை அமைப்புகள் ஆகியவற்றை ஓரளவு விரிவாகப் பார்த்திருக்கிறோம்.

இனி…

மேகக்கணிமையின் பயனர்களை நுகர்வோர்கள், வணிகப்பயனர்கள் என்று பிரிக்கலாம் என முன்பே சொல்லியிருந்தேன். இப்பகுதியில் இவ்விருவகைப் பயனர்கள் மேகக்கணிமையை நோக்கி எவ்வாறு நகர்வது என்று கொஞ்சம் பார்க்கலாம்.

’நகர்வது’ என்றால்? பொதுவாகவே கணிமைப் பயன்பாடென்பது உங்கள் கணினியில் நிறுவப்பட்டிருக்கும் ஒரு மென்பொருளை இயக்குவது என்ற பொருள்படவே அறியப்படுகிறது. மக்கள் பயன்படுத்தி வந்த பிரபல கணிமைக்கருவிகள் பலவும் இவ்வகையிலேயே இருந்திருக்கின்றன. எனவே, மேகக்கணிமையைப் பாவிப்பதென்பது, தெரிந்த ஒரு விஷயத்திலிருந்து தெரியாத ஒன்றுக்குப் போவதுபோலத்தான். அதனாலேயே, இந்த மாற்றம் குறிப்பிடத்தகுந்த ஒரு செயல்பாடாகிறது. இம்மாற்றத்தையே நகர்வு என்று குறிப்பிடுகிறேன்.

நுகர்வோரைப் பொறுத்தமட்டில் அவர்கள் மேகக்கணிமைக்கு நகர்வது என்பது ஒரு மென்பொருள் சார்ந்த எளிதான தெரிவு. நான் இக்கட்டுரையை என் கணினியில் உள்ள மைக்ரோசாஃப்ட் வேர்டு மென்பொருளில் எழுத வேண்டுமா, அல்லது கூகுள் டாக்ஸில் எழுத வேண்டுமா என்ற தெரிவு. உங்கள் ஆவணத்தை எந்தக் கணினியிலும் உடனடியாக எடுக்க முடிதல், மலிவு விலை, கணினியில் மென்பொருள் நிறுவத் தேவையின்மை, உடனுக்குடன் சேமிக்க இயலுதல், இணைய இணைப்பு என்று பல்வேறு கோணங்களில் நோக்கி நான் இம்முடிவை எடுப்பேன். முடிவெடுத்த பிறகு மேகக்கணிமையைப் பயன்படுத்துவதில் பெரிய தயாரிப்புகள் ஏதும் இல்லை. வேர்டு உங்கள் கணினியிலேயே நிறுவப்பட்டிருப்பதால் அதில் சில சிறப்பியல்புகள் இருக்கலாம். அவை உலாவியில் பயன்படுத்தக்கூடிய கூகுள் டாக்ஸில் இல்லாமல் இருக்கலாம். மற்றபடி, புதியதொரு மென்பொருளைப் பயன்படுத்தும்போது இயல்பாக வரும் சில பிரச்னைகள், கேள்விகள் தவிர மேகக்கணிமையின் பயன்பாட்டில் பெரிய சிக்கல்கள் இல்லை. அதனால்தான் இன்று நுகர்வோர் பலர் எளிதாக மேகக்கணிமை நோக்கி நகர்ந்துவிடுகின்றனர்.

இதுவே வணிகப்பயனர்கள் என்றால் கதையே வேறு. என் நண்பன் பணிபுரியும் நிறுவனத்தில் பயனர் தொடர்பு நிர்வாக வலைச்செயலியைப் பராமரிக்கும் அணிக்கு அவன் மேலாளர். இந்த வலைச்செயலி அவனது நிறுவனத்திலேயே முழுமையாக உருவாக்கப்பட்டு இதுவரை பராமரிக்கப்பட்டு வந்துள்ளது. இந்த வலைச்செயலியை அந்நிறுவனத்தின் சர்வர் வன்பொருளிலேயே நிறுவி இயக்குகின்றனர்.

அவனது நிறுவனத்தில் பணிபுரியும் ஆயிரத்திற்கும் மேற்பட்ட விற்பனையாளர்களும் சேவைப் பிரதிநிதிகளும் அன்றாடம் பயன்படுத்தும் செயலி இது. அவர்களது பணியைச் செவ்வனே செய்து முடிக்க இச்செயலி அவர்களுக்கு இன்றியமையாதது. இதில் ஏதேனும் பிரச்னைகள் வந்தால் உடனே சட்டையைப் பிடிக்க வருவார்கள். எனவே எவ்விதத் தடங்கலும் இல்லாமல் இச்செயலி தொடர்ந்து இயங்க வேண்டிய தேவை இருக்கிறது. மேலும், இந்நிறுவனம் அமெரிக்கா, ஐரோப்பா, ஆசியா, ஆஸ்திரேலியா என்று உலகெங்கும் விற்பனை மேற்கொள்வதால் இச்செயலி இருபத்து நான்கு மணிநேரமும் உலகின் பல மூலைகளிலிருந்தும் இயங்கவேண்டிய தேவையும் இருக்கிறது.

இந்நிறுவனம் இச்செயலியை மேகக்கணிமைக்கு நகர்த்துவதைப் பற்றி யோசித்தது. காரணங்கள் பல:

1. அவர்களது வீச்சையும் விற்பனையையும் அதிகமாக்கவேண்டும்
2. அவர்களது தேவைக்கேற்ப இதன் பயனர் எண்ணிக்கையைக் கூட்டவும் குறைக்கவும் முடியவேண்டும்
3. வன்பொருள், மென்பொருள் பராமரிப்புச் செலவுகளைக் குறைக்கவேண்டும்
4. இச்செயலியில் புதிய பயன்பாடுகளைச் சேர்க்கவேண்டுமென்றால் அதிக காலமும், செலவும் ஆகிறது. இதைக் குறைக்கவேண்டும்

நுகர்வோரைப்போல இந்நிறுவனத்தின் பயனர்கள் சட்டென்று ஒரு முடிவெடுத்து ஒரு மேகக்கணிமைச் செயலியைப் பயன்படுத்தத் தொடங்கமுடியுமா? அல்லது என் நண்பன் அப்படி ஒரு முடிவெடுத்து தடாலடியாக ஒரு புதிய செயலியை அவர்களுக்களித்து அவர்களை மாறச்சொல்ல முடியுமா? வாய்ப்பே இல்லை. அவர்களது அன்றாடப் பணிகள் முற்றிலும் பாதிக்கப்படும். இதனால் அந்நிறுவனத்தின் விற்பனை, சேவை என்று பலவும் அடிபடும்.

மேலும், இச்செயலி சேகரிக்கும் தரவுகளை அந்நிறுவனத்தில் பல்வேறு துறைகள் பலவிதங்களில் பயன்படுத்துகின்றன. இத்துறைகளெல்லாம் இனி தரவுகளுக்கு எங்கே போகும்? புதிய மேகக்கணிமைச் செயலி இத்தரவுகளை அதே சட்டகத்தில், அதே நேரத்தில், அதே தரத்தில் அளிக்க இயலுமா? இதுதான் மேகக்கணிமை எதிர்கொள்ளும் சவால்.

வணிகப்பயனர்களின் மிகப்பெரிய அவசியம் வணிகத் தொடர்ச்சி. அதாவது, உள்கட்டமைப்பில் எவ்வித மாற்றங்கள் ஏற்பட்டாலும் நடக்கிற வணிகம் நடந்தே ஆகவேண்டும். வணிகத் தொடர்ச்சியைப் பாதிக்காமல் எவ்வாறு மேகக்கணிமைக்கு நகர்வது? மேகக்கணிமையில் எந்த சேவை அமைப்பு அவர்கள் விரும்பும் முன்னேற்றங்களை அதிக பாதிப்பில்லாமல் அளிக்கக் கூடும்? இக்கேள்விகளுக்கு ஏற்ற விடைகளை அளிக்காமல் வணிகப்பயன்பாட்டில் மேகக்கணிமை நோக்கி நகர்வது சாத்தியமே இல்லை.

இனி, அந்நிறுவனம் எப்படி இதை அணுகியது என்பதை விளக்க முயற்சி செய்கிறேன். இங்கு சரியான அணுகுமுறை என்று ஏதுமில்லை. அந்த நிறுவனத்திற்கு மிகச்சரி என்று படுவது இன்னொரு நிறுவனத்திற்கு வெகுசொதப்பலாக இருக்கும். இதை மனதில் வைத்துக்கொண்டே மேலும் படியுங்கள்.

1. அவர்களிடம் ஏற்கனவே உள்ள வலைச்செயலியை அவர்களது சர்வரிலிருந்து அப்படியே அமேசான் அல்லது மைக்ரோசாஃப்ட் மேகத்தின்மேல் ஏற்றிவிட முடியுமா? முடியும். வன்பொருள் பராமரிப்புச் செலவுகள் குறையும். தேவைக்கேற்ப பயனர் எண்ணிக்கையைக் கூட்ட குறைக்க முடியும். தேவைக்கேற்ப கணினித் துணுக்குகளைச் சேர்த்துக்கொண்டால் போதும். ஆனால் அவர்கள் விரும்பும் முன்னேற்றங்கள் அனைத்தையும் அடையமுடியாது. குறிப்பாக, செயலி இன்னும் அதேதான் என்பதால் புதிய பயன்பாடுகள் சேர்ப்பது இன்னும் அதே வழியில்தான் நடந்தாகவேண்டும். இதனால் நேரம் விரயமாகிறது என்பது ஏற்கனவே உறுதிப்படுத்தப்பட்டு விட்டது. எனவே, அமேசான் போன்ற உள்கட்டமைப்புச் சேவை அமைப்பு அவர்களுக்குச் சரிவராது.

2. ஹிரோகு, கூகுள் போல ப்ளாட்ஃபார்ம் சேவையை வாங்கி அதன்மேல் புதியதோர் செயலியைக் கட்டமைக்க முடியுமா? முடியும். பராமரிப்புச் செலவுகள் உள்கட்டமைப்புச் சேவையைவிடச் சற்று அதிகம்தான். ஆனாலும், மற்ற முன்னேற்றங்கள் கிடைக்க வாய்ப்புண்டு. புதுச்செயலி தயாரானதும் அதன்மேல் புதிய பயன்பாடுகள் சேர்ப்பது சுலபமாக இருக்க இயலும் (எதிர்பார்ப்புதான்). ஆனால், அந்நிறுவனத்தின் வீச்சையும் விற்பனையையும் அதிகரிப்பது எப்படி? புதிய செயலியில் எந்த புதிய காயகல்பத்தைச் சேர்ப்பது? அவர்களுக்கு இதில் அவ்வளவு தெளிவும் நிபுணத்துவமும் இல்லை.

3. சரி, சிறந்த பயனர் தொடர்பு நிர்வாக வலைச்செயலி ஏதேனும் மென்பொருள் சேவையாகக் கிடைக்கிறதா? நிச்சயமாக. சேல்ஸ்ஃபோர்ஸ் நிறுவனத்தின் விற்பனை மேகமும் சேவை மேகமும் அவர்களது தேவைகளுக்கு அருகிலுள்ளது. பராமரிப்புச் செலவுகள் அந்நிறுவனத்தின் சொந்தக்கடையைக் காட்டிலும் சற்று குறைவு. பயனர்களைச் சேர்க்கவேண்டுமென்றால் சேல்ஸ்ஃபோர்ஸில் சில நிமிடங்கள் வேலை. தேவைக்கேற்ப அது கணிமைத் திறனை ஏற்றிக்கொள்ளும். பயனர் எண்ணிக்கைக்கு ஏற்றவாறு சேவைக்கட்டணம்.

புதிய பயன்பாடுகள் சேர்ப்பதென்பது எளிது. சேல்ஸ்ஃபோர்ஸ் போன்ற மென்பொருள் சேவைகள் பல ஆண்டுகாலமாக இத்துறையில் பல சவால்களைச் சந்தித்திருப்பதால் அவர்கள் தனிப்பயனாக்கி திருத்தியமைக்கக்கூடிய பல்வேறு சிறப்பியல்புகளை ஏற்கனவே உருவாக்கி வைத்திருக்கிறார்கள். அதேபோல, விற்பனையை எளிதாக்கவும் புதிய விற்பனை வாய்ப்புகளை முன் உணர்ந்து சொல்லவும் வழிவகைகள் வைத்திருக்கிறார்கள். எனவே, என் நண்பனின் நிறுவனம் மேகம் நோக்கி நகர இது ஒரு பொருத்தமான வழியாக இருக்கிறது.

(குறிப்பு: இது சேல்ஸ்ஃபோர்ஸ் நிறுவனத்திற்கான விளம்பரமல்ல. நிஜ வாழ்க்கையில் நடந்த ஒரு விஷயத்தில் பங்கேற்ற ஒரு மேகக்கணிமை நிறுவனம் இது. அவ்வளவே! வேறொரு சூழலில் இதே சேல்ஸ்ஃபோர்ஸ் நிறுவனம் மிகத்தவறான தேர்வாக இருக்கலாம்).

சரி, இனி சேல்ஸ்ஃபோர்ஸ் விற்பனை மேகத்திடமிருந்து அந்நிறுவனத்தின் இதர துறைகள் விற்பனை மற்றும் பயனர் தரவுகளை எவ்வாறு பெறுவது? சேல்ஸ்ஃபோர்ஸ் சேவைசார் கட்டமைப்பாக API சேவைகளை அளிக்கிறது. இதன்மூலம் அத்துறைகள் அதே தரவுகளைப் பெற இயலும். ஆனால் இதில் வணிகத் தொடர்ச்சி அடிபடும். ஏனெனில் அத்துறைகள் அவர்களது கட்டமைப்பை மாற்றி இனி சேல்ஸ்ஃபோர்ஸிடம் ஊடாடவேண்டும். இதைச்செய்ய அத்துறைகளுக்குக் கொஞ்ச கால அவகாசம் தேவைப்படும். அவர்களுக்கு வேறுவேறு வேலைகள் இருக்கிறதல்லவா!

அதற்குப் பதிலாக என் நண்பனின் அணி ஒரு இடைநிலை மென்பொருளை உருவாக்க முடிவு செய்தது. எப்போதெல்லாம் சேல்ஸ்ஃபோர்ஸ் பக்கம் தரவுகள் மாறுகிறதோ அப்போதெல்லாம் இந்த இடைநிலை மென்பொருள் பழைய தரவுத்தளத்திலேயே இம்மாற்றங்களை உடனுக்குடன் சேமிக்கும். இதனால், இதர துறைகள் எப்போதும்போல் பழைய தரவுத்தளத்திலிருந்தே தரவுகளை எடுத்துக்கொள்ளலாம். வணிகத் தொடர்ச்சிக்குக் குந்தகம் விளையாது. அத்துறைகளுக்கு நேரம் கிடைக்கும்போது அவர்கள் சேல்ஸ்ஃபோர்ஸுக்கு மாறிக்கொள்ளலாம்.

சரி, இனி பழைய வலைச்செயலியின் பயனர்களின் கதி? திடீரென்று ஒருநாள் அவர்களை சேல்ஸ்ஃபோர்ஸுக்கு மாறச்சொன்னால் அவர்களால் தாக்குப்பிடிக்க முடியுமா? அங்கே வணிகத் தொடர்ச்சி அடிபடுமா? ஆம். இதுவும் நிறுவனச்சூழலில் ஒரு மிகப்பெரிய பிரச்னை. மாற்றம் எப்போதும் மக்களுக்குப் பிடிப்பதில்லை. ஏனெனில் மாற்றம் அவர்களது பணிச்சுமையை அதிகரிக்கிறது; ஆக்கத்திறனைக் குறைக்கிறது; மன உளைச்சலும்கூட ஏற்படுத்துகிறது. இந்தப் பிரச்னையை எதிர்நோக்கிய அவர்கள் எல்லாப் பயனர்களையும் தடாலடியாக மாற்ற முயலவில்லை. மாறாக, ஒரு சிறு குழுவை உருவாக்கி அவர்களை முதல் சேல்ஸ்ஃபோர்ஸ் பயனர்களாக அங்கீகரித்தனர். அவர்களுக்குப் போதிய அளவு பயிற்சியளித்து, பிறகு கொஞ்சம் கொஞ்சமாகப் பயனர் எண்ணிக்கையை அதிகரிக்க முடிவுசெய்தனர்.

விடாமுயற்சி விஸ்வரூப வெற்றியளித்ததா? கதைக்குப் பொருத்தமாக, அவர்கள் வெற்றிபெற்றனர் என்று டுமீல் விட்டுவிட்டுப் போய்விடலாம்தான். ஆனால் உண்மையில் இந்நிறுவனம் இன்னும் இம்மாற்றத்தைச் செயல்படுத்திக்கொண்டுதான் இருக்கிறது. வெற்றியா தோல்வியா என்பதை நானும் பொறுத்திருந்துதான் பார்க்கவேண்டும். ஆனால் அவர்களது அணுகுமுறை சரியானது என்று நான் கணிக்கிறேன்.

தனி மேகம், பொது மேகம் பற்றி விளக்குவதாகச் சென்ற பகுதியில் சொல்லியிருந்தேன். ஆனால் இப்படி ஒரு நடைமுறை உதாரணம் அளிக்காமல் அவற்றைப் பற்றிப் பேசுவது அதிகம் பயனளிக்காது என்று உணர்ந்ததால் அதை அடுத்த பகுதிக்குத் தள்ளிவைத்திருக்கிறேன். ஏதேனும் குழப்பம் ஏற்பட்டிருந்தால் மன்னிக்கவும்!

 

இப்பகுதியில் வரும் கலைச்சொற்கள்

சேவை அமைப்பு: Service model

வணிகப்பயனர்கள்: Business users

பயனர் தொடர்பு நிர்வாகம்: Customer relationship management (CRM)

வலைச்செயலி: Web application

செயலி: Application

வணிகத் தொடர்ச்சி: Business continuity

உள்கட்டமைப்புச் சேவை: Infrastructure as a service (Iaas)

ப்ளாட்ஃபார்ம் சேவை: Platform as a service (Paas)

மென்பொருள் சேவை: Software as a service (Saas)

துணுக்கு: Computing Instance / Droplet

விற்பனை மேகம், சேவை மேகம்: Sales cloud, Service cloud (Salesforce.com offerings)

தனிப்பயனாக்கங்கள்: Customizations

சேவைசார் கட்டமைப்பு: Service-oriented architecture

இடைநிலை மென்பொருள்: Middleware

- See more at: http://solvanam.com/?p=44282#sthash.tS4zfGFl.dpuf