இன்பம் - ஐம்பது

[ஆதித்ய இளம்பிறையன்]

கொஞ்சம் பெரிய கவிதை தான். ஆனாலும் இதை எழுதியவரின் திறமையும், தமிழின் இனிமையையும் மெச்சித்தான் ஆக வேண்டும்..
 
இன்பம் - ஐம்பது

அன்பொடு இகத்தினில் வாழுதல் இன்பம்;
     அறிவொடு நிலத்தினில் ஆளுதல் இன்பம்;
பண்புடை மாந்தராய்த் திகழுதல் இன்பம்;
     பணிவுடை மனிதரைப் புகழுதல் இன்பம்;
தென்றலில் மழையினில் நனைதல் இன்பம்;
     சந்தனக் காற்றினில் தவழுதல் இன்பம்;
வெண்மதி வானில் உலவுதல் இன்பம்;
     நிம்மதி நெஞ்சினில் நிலவுதல் இன்பம்;


இரவினில் காதலில் கொஞ்சுதல் இன்பம்;
     உறவினில் களிப்பினில் கெஞ்சுதல் இன்பம்;
அருகினில் சிறகினில் துஞ்சுதல் இன்பம்;
     அருமையில் பெருமையில் மிஞ்சுதல் இன்பம்;
திரையினில் மறைவினில் அஞ்சுதல் இன்பம்;
     திறமையில் கடமையில் விஞ்சுதல் இன்பம்;
உரியதோர் மங்கையின் கொங்கையில் இன்பம்;
     உருகிடும் சங்கம கங்கையில் இன்பம்;

இசையுற வாழ்வினில் இலங்குதல் இன்பம்;
     இல்லறம் சிறப்புற விளங்குதல் இன்பம்;
பசையுறப் பாரினில் துலங்குதல் இன்பம்;
     பருவத்தில் திருமணம் புரிதலில் இன்பம்;
தசையுறு திடத்தினில் கலக்குதல் இன்பம்;
      தருமத்தின் உயர்வினை விளக்குதல் இன்பம்;
வசையற வாயுரை முழக்குதல் இன்பம்;
     வரவுக்குள் செலவினை அடக்குதல் இன்பம்;

அயர்வற மகிழ்வொடு களித்தல் இன்பம்;
     அருமறை உயர்வொடு செழித்தல் இன்பம்;
உயர்வுறக் கருத்தொடு நினைத்தல் இன்பம்;
     ஓய்வறப் பொறுப்பொடு நிலைத்தல் இன்பம்;
துயரற பயமறத் துலங்குதல் இன்பம்;
     சுயப்படு பொருளினை வழங்குதல் இன்பம்;
தெளிவுறு மதியினில் திளைத்தல் இன்பம்;
     திறம்படத் தமிழினில் உரைத்தல் இன்பம்;

தன்மையில் பணிந்து திகழுதல் இன்பம்;
     தவறினைத் துணிந்து விலகுதல் இன்பம்;
தொன்மையின் உண்மை துலக்குதல் இன்பம்;
     தூய்மையில் துறவறம் துலங்குதல் இன்பம்;
பன்மையில் விழித்துப் பழகுதல் இன்பம்;
     பசித்தவர் களிப்புறப் பொழியுதல் இன்பம்;
உன்னலில் உயர்வினைச் செய்தலும் இன்பம்;
     அன்னையின் மடியினில் சாய்வதும் இன்பம்;

எழுதல் இன்பம்; இரவினில் மறுகி
     விழுதல் இன்பம்; இதயம் குழைந்து
அழுதல் இன்பம்; இறையை உருகித்
     தொழுதல் இன்பம்; இளமையில் கற்றுத்
தெளிதல் இன்பம்; உயிருக்கு உயிராய்
     பழகுதல் இன்பம்; உயிரொடு உடலைத்
தழுவுதல் இன்பம்; உணர்வில் கலந்து
     ஒழுகுதல் இன்பம்; ஆளுதல் இன்பம்;

எழுதுதல் இன்பம்; அறிவிலி வாதில்
     நழுவுதல் இன்பம்; அறவழிப் பாதையில்
ஒழுகுதல் இன்பம்; அறிவுக் கடலில்
     ஆழுதல் இன்பம்; அகத்தினில் ஜோதி
மூழுதல் இன்பம்; அறிவொளிச் சுடரில்
     மூழ்குதல் இன்பம்; ஆன்மத் தூய்மை
சூழுதல் இன்பம்; அன்புடை வாழ்கை
     நீளுதல் இன்பம்; வாழுதல் இன்பம்;

உழைத்தல் இன்பம்; உழவுத் தொழிலில்
     பிழைத்தல் இன்பம்; மழையில் மரங்கள்
கிளைத்தல் இன்பம்; பயிர்கள் மண்ணில்
     முளைத்தல் இன்பம்; மணிகள் முற்றின்
விளைத்தல் இன்பம்; மனையில் சேர்ந்து
      திளைத்தல் இன்பம்; மகிழ்வுற விருந்தினை
அழைத்தல் இன்பம்; மகிழ்ச்சி பொங்கக்
     களித்தல் இன்பம்; உறவுகள் இன்பம்;

படித்தல் இன்பம்; படித்தபின் வேலை
     பிடித்தல் இன்பம்; துடிப்பொடு கடமை
முடித்தல் இன்பம்; பிடித்தவர் கண்ணை
     அடித்தல் இன்பம்; சபையினர் போற்ற
நடித்தல் இன்பம்; காதலில் திருமணம்
      முடித்தல் இன்பம்; இசையெனக் கவிதை
வடித்தல் இன்பம்; கருணையில் உடைமை
      கொடுத்தல் இன்பம்; படைத்தல் இன்பம்;

விருத்தம் இன்பம்; நாட்டிய மங்கையர்
     நிருத்தம் இன்பம்; நல்லிசைப் பாட்டில்
திருத்தம் இன்பம்; நாயகன் நாயகி
     பொருத்தம் இன்பம்; நலமாய்த் திகழும்
கருத்தும் இன்பம்; ஆசையை அறவே
     அறுத்தல் இன்பம்; அறவழிப் பெருமை
சிறத்தல் இன்பம்; அழிவின் வழியை
     நிறுத்தல் இன்பம்; மறுத்தல் இன்பம்;

துயிலுதல் இன்பம்; தொடர்ந்து மகிழ்வைப்
      பயிலுதல் இன்பம்; துவளாது வாழ்வில்
முயலுதல் இன்பம்; தொடுகை உணர்வில்
      மயங்குதல் இன்பம்; துணையைப் பொருந்தி
முயங்குதல் இன்பம்; தொடரும் கலையில்
      தயங்குதல் இன்பம்; துவங்கிய பின்னே
இயங்குதல் இன்பம்; மெய்யெனும் பொய்யில்
     மகிழ்வதும் இன்பம்; நெகிழ்வதும் இன்பம்;

அணைத்தல் இன்பம்; அதரச் சுவையில்
      பிணைத்தல் இன்பம்; அன்பொடு நெஞ்சினை
இணைத்தல் இன்பம்; அண்மையில் அழகினை
      மலைத்தல் இன்பம்; நன்மைகள் தருவன
நினைத்தல் இன்பம்; நயம்படு பொருளினைச்
      சுவைத்தல் இன்பம்; உளத்தொடு சுகத்தினில்
திளைத்தல் இன்பம்; உதவியில் மனிதரை
      முகிழ்த்தல் இன்பம்; பகிர்தல் இன்பம்;

உணருதல் இன்பம்; ஊடலில் கசிந்து
     புணருதல் இன்பம்; காதலில் கூடி
மலருதல் இன்பம்; காவியம் பாடித்
     திணறுதல் இன்பம்; இரவினில் ஆடிக்
கிளருதல் இன்பம்; கனிமொழி பேசிக்
      குளறுதல் இன்பம்; கரைகளைத் தேடி
வளருதல் இன்பம்; கனவுகள் வளர்த்துப்
      புலருதல் இன்பம்; உலருதல் இன்பம்;

தேடுதல் இன்பம்; தேனிசைத் தமிழில்
     பாடுதல் இன்பம்; சுகத்தொடு கண்களை
மூடுதல் இன்பம்; தாள இலயத்தொடு
     ஆடுதல் இன்பம்; அழகின் சிரிப்பை
நாடுதல் இன்பம்; அகமும் புறமும்
     கூடுதல் இன்பம்; அன்பிற்கு ஏங்கி
வாடுதல் இன்பம்; அன்னையைத் தேடி
      ஓடுதல் இன்பம்; சாடுதல் இன்பம்;


தானம் இன்பம்; வானம் இன்பம்;
      தன்னிலை மறக்கும் கானம் இன்பம்;
மோகம் இன்பம்; போகம் இன்பம்;
     மோதலில் பிறக்கும் காதல் இன்பம்;
நாணம் இன்பம்; பாசம் இன்பம்;
     நட்பினில் வருகிற நேசம் இன்பம்;
பானம் இன்பம்; பதவியும் இன்பம்;
      பணிவில் தெரிகிற துணிவும் இன்பம்;


தகிப்பது இன்பம்; சுகிப்பது இன்பம்;
     கொடுப்பது இன்பம்; எடுப்பது இன்பம்;
நகைப்பது இன்பம்; புகைப்பது இன்பம்;
     இசைப்பது இன்பம்; இசைவது இன்பம்;
பசிப்பது இன்பம்; புசிப்பது இன்பம்;
      ரசிப்பது இன்பம்; ருசிப்பது இன்பம்;
சகிப்பது இன்பம்; வசிப்பது இன்பம்;
      நுகர்வது இன்பம்; பகர்வது இன்பம்;


உதயம் இன்பம்; இரவும் இன்பம்;
     மதியம் இன்பம்; மாலை இன்பம்;
கதிரும் இன்பம்; நிழலும் இன்பம்;
     அனலும் இன்பம்; புனலும் இன்பம்
உறவும் இன்பம்; பிரிவும் இன்பம்;
     வரவும் இன்பம்; செலவும் இன்பம்;
பரிவும் இன்பம்; உரிமை இன்பம்;
     அறிவும் இன்பம்; தெளிவும் இன்பம்;


கவனம் இன்பம்; புவனம் இன்பம்;
     காட்சி இன்பம்; தேர்ச்சி இன்பம்;
அகமும் இன்பம்; புறமும் இன்பம்;
     ஆட்சி இன்பம்; மாட்சி இன்பம்;
மவுனம் இன்பம்; தவமும் இன்பம்;
     மீட்சி இன்பம்; நீட்சி இன்பம்;
வரமும் இன்பம்; திறமும் இன்பம்;
     சாட்சி இன்பம்; தீட்சை இன்பம்;

பார்வை இன்பம்; தேர்வை இன்பம்;
     தண்மை இன்பம்; மென்மை இன்பம்;
வாய்மை இன்பம்; நேர்மை இன்பம்;
     கண்மை இன்பம்; நன்மை இன்பம்;
தாய்மை இன்பம்; சேய்மை இன்பம்;
     அண்மை இன்பம்; அன்னை அன்பாய்
காய்தல் இன்பம்; உவத்தல் இன்பம்;
     தந்தை காட்டும் சிரத்தை இன்பம்;

பிள்ளை இன்பம்; கிள்ளை மழலையை
     உள்ளல் இன்பம்; அமுத மழையினை
அள்ளல் இன்பம்; கன்னம் கொஞ்சிக்
     கிள்ளல் இன்பம்; கைகளில் வாரிக்
கொள்ளல் இன்பம்; கவலையை ஒருங்கே
      தள்ளல் இன்பம்; துடிப்போடு ஆடித்
துள்ளல் இன்பம்; பாடலைக் கூடி
      விள்ளல் இன்பம்; பள்ளி இன்பம்;

பிறத்தல் இன்பம்; நல்லவை சொல்லி
      வளர்த்தல் இன்பம்; நல்வினை பெருக்கி
சிறத்தல் இன்பம்; நல்லவர் தம்முடன்
     உரத்தல் இன்பம்; அல்லவை தன்னைத்
துறத்தல் இன்பம்; தீமையை நெஞ்சினில்
      அறுத்தல் இன்பம்; தீயவர் தொடர்பை
மறுத்தல் இன்பம்; நிலமகள் போலும்
      பொறுத்தல் இன்பம்; திருத்தல் இன்பம்;

சமைத்தல் இன்பம்; சபையினர் கூடிச்
     சுவைத்தல் இன்பம்; சத்திய தத்துவம்
படைத்தல் இன்பம்; பைத்திய வழக்கம்
     உடைத்தல் இன்பம்; நம்பிக்கை தருவன
விதைத்தல் இன்பம்; வையகம் செழிக்க
     விளைத்தல் இன்பம்; கையறு நிலையினைச்
சிதைத்தல் இன்பம்; கனவுகள் மெய்ப்பட
     விழித்தல் இன்பம்; அமைத்தல் இன்பம்;

ஆக்கம் இன்பம்; ஆயும் மனதின்
     ஏக்கம் இன்பம்; அரங்கம் தருகிற
ஊக்கம் இன்பம்; அதனால் வருகிற
     தாக்கம் இன்பம்; அறிவால் துணிந்த
நோக்கம் இன்பம்; ஆழ்ந்து நுணுகும்
     நோக்கும் இன்பம்; விரிந்து காணும்
போக்கும் இன்பம்; வேலும் ஆலும்
     பாக்கும் இன்பம்; தேக்கும் இன்பம்;

யாகம் இன்பம்; யோகம் இன்பம்;
     தாரம் இன்பம்; பாரம் இன்பம்;
ஆய்வு இன்பம்; ஓய்வு இன்பம்;
     அன்பு இன்பம்; பண்பு இன்பம்;
தியானம் இன்பம்; தியாகம் இன்பம்;
      திரைக்கடல் இன்பம்; திரவியம் இன்பம்;
நாயாய் உழன்று நடப்பதும் இன்பம்;
     கடற்கரை மணலில் கிடப்பதும் இன்பம்;

கோடை இன்பம்; குளிர் இன்பம்;
      குருவிக் கூட்டில் மழை இன்பம்;
வாடை இன்பம்; அலை இன்பம்;
     அருவிப் பாட்டில் இசை இன்பம்;
ஆடை இன்பம்; அவை இன்பம்;
      அழகிய தமிழில் சுவை இன்பம்;
மேடை இன்பம்; கலை இன்பம்;
      தினமொரு குறளின் உரை இன்பம்;

தாயகம் காக்கும் படை இன்பம்;
      தண்ணீர் தேக்கும் மடை இன்பம்;
தியாகம் வேள்விக்குக் கொடை இன்பம்;
      தெரியும் கேள்விக்கு விடை இன்பம்;
வாயில் புன்னகைக் கடை இன்பம்;
      வைகறைக் காற்றில் நடை இன்பம்;
தூய்மை துலங்கும் உடை இன்பம்;
     வெயிலோ மழையோ குடை இன்பம்;

அரும்புகள் மலரும் வனம் இன்பம்;
     அறுசுவை பகரும் உணவு இன்பம்;
குறும்புகள் காட்டும் மகவு இன்பம்;
     குறுநகை தீட்டும் மொழி இன்பம்;
உறவினர் கூடும் நாள் இன்பம்;
     ஊரார் சேரும் தேர் இன்பம்;
விருந்தினர் நிறையும் இல் இன்பம்;
     மருந்தையும் பகிரும் சொல் இன்பம்;

காற்றில் ஒலிக்கும் இசை இன்பம்;
     கண்கள் உரைக்கும் மொழி இன்பம்;
ஏற்றம் இரைக்கும் ஒலி இன்பம்;
     இரவில் கலங்கரை ஒளி இன்பம்;
ஆற்றும் உரையில் இதம் இன்பம்;
     ஆற்று மணலில் நடை இன்பம்;
தேற்றும் மனிதரின் உளம் இன்பம்;
     தேக பலத்தில் நலம் இன்பம்;

பறவைகள் வாழும் சோலை இன்பம்;
     நறுமணம் சூழும் மாலை இன்பம்;
நிறைமகள் இடுகிற கோலம் இன்பம்;
     வயல்வெளி மகளிரின் குலவை இன்பம்;
அறுபது அகவை நிறைதல் இன்பம்;
     அதனினும் எண்பதும் நூறும் இன்பம்;
முறையொடு ஆற்றும் வினையும் இன்பம்;
      முதுமொழிக் கூற்றில் நிறையும் இன்பம்;

அச்சம் அற்ற ஆண்மை இன்பம்;
     அழுகை அற்ற பெண்மை இன்பம்;
குற்றம் அற்ற கற்பு இன்பம்;
     குறைகள் அற்ற வெற்றி இன்பம்;
சஞ்சலம் அற்ற கல்வி இன்பம்;
     சுயநலம் அற்ற தொண்டு இன்பம்;
வஞ்சகம் அற்ற நெஞ்சம் இன்பம்;
     வருத்தம் அற்ற அண்மை இன்பம்;


அரசியல் அற்ற பணிமனை இன்பம்;
     ரகசியம் அற்ற துணையும் இன்பம்;
துரோகம் அற்ற தோழமை இன்பம்;
     ரோகம் அற்ற தேகம் இன்பம்;
விரோதம் அற்ற சுற்றம் இன்பம்;
      விரசம் அற்ற சொற்கள் இன்பம்;
உரசல் அற்ற நட்பும் இன்பம்;
     விரிசல் அற்ற மனையும் இன்பம்;

தழுவல் அற்ற படைப்பும் இன்பம்;
     தளைகள் அற்ற நடையும் இன்பம்;
நழுவல் அற்ற நண்பர் இன்பம்;
     களங்கம் அற்ற நல்லோர் இன்பம்;
வழுவல் அற்ற ஒழுக்கம் இன்பம்;
     பிழைகள் அற்ற பழக்கம் இன்பம்;
அழுகல் அற்ற கனிகள் இன்பம்;
     பழுதுகள் அற்ற விருதுகள் இன்பம்;

படுத்தல் அற்ற பாடம் இன்பம்;
     பகைத்தல் அற்ற வீடும் இன்பம்;
தடுத்தல் அற்ற காடும் இன்பம்;
     தடைகள் அற்ற நாடும் இன்பம்;
விடுத்தல் அற்ற பிடிப்பும் இன்பம்;
     கடுத்தல் அற்ற மொழியும் இன்பம்;
தொடுத்தல் அற்ற துணையும் இன்பம்;
     முடித்தல் அற்ற தொடரும் இன்பம்;

மறைத்தல் அற்ற இனிமை இன்பம்;
      சிதைத்தல் அற்ற தொன்மை இன்பம்;
குறைத்தல் அற்ற வாயில் இன்பம்;
      குழைத்தல் அற்ற பணிவும் இன்பம்;
வறுமைகள் அற்ற இளமை இன்பம்;
     களைத்தல் அற்ற பணியும் இன்பம்;
சிறுமைகள் அற்ற வளமை இன்பம்;
     வளைத்தல் அற்ற வாய்மை இன்பம்;

விலங்கு அற்ற விடுதலை இன்பம்;
     விளம்பரம் அற்ற உபயம் இன்பம்;
சிலந்தி அற்ற மூலை இன்பம்;
     சிக்கல் அற்ற வேலை இன்பம்;
சலனம் அற்ற வேளை இன்பம்;
     குழப்பம் அற்ற மூளை இன்பம்;
கலக்கம் அற்ற இதயம் இன்பம்;
      கவலை அற்ற உதயம் இன்பம்;

 

சோதனை அற்ற சாலை இன்பம்;
     சோகம் அற்ற பயணம் இன்பம்;
வேதனை அற்ற மனமும் இன்பம்;
     வேகம் அற்ற மாலை இன்பம்;
போதனை அற்ற காதல் இன்பம்;
     வரம்பும் அற்ற உரிமை இன்பம்;
ரோதனை அற்ற சூழல் இன்பம்;
     தொல்லை அற்ற செல்வம் இன்பம்;


மெல்வதை மட்டும் கடிப்பது இன்பம்;
     மெத்தையில் நித்திரை கொள்வது இன்பம்;
வெல்வதைச் சொல்லிச் செய்வது இன்பம்;
     வித்தையில் யாவையும் கற்பது இன்பம்;
சொல்லில் நிலையாய் நிற்பது இன்பம்;
     சுத்தத்தைப் பேணிக் காப்பது இன்பம்;
வல்லவை செய்து முடிப்பது இன்பம்;
     வளம்பெற ஆவணம் வடிப்பது இன்பம்;

உயிரினை மேம்படப் போற்றுதல் இன்பம்;
     உண்மையை மெய்ம்படச் சாற்றுதல் இன்பம்;
பயிரினைச் செழிப்புறத் தேற்றுதல் இன்பம்;
      பார்வையை விழிப்புற மாற்றுதல் இன்பம்;
இயற்கையைக் களிப்புறச் சேர்குதல் இன்பம்;
      இன்மையை முழுவறத் தீர்க்குதல் இன்பம்;
செயற்கையை நலம்பெறத் தீட்டுதல் இன்பம்;
      செய்வினை வளம்பெறக் கூட்டுதல் இன்பம்;

கலையினை அழகொடு புதுக்குதல் இன்பம்;
     கந்தலை இழிவினை ஒதுக்குதல் இன்பம்;
சிலையினை உயிரெனச் செதுக்குதல் இன்பம்;
     சிந்தனைச் சிறகினை விரிக்குதல் இன்பம்;
கவிதையின் நயத்தினைக் கதைத்தல் இன்பம்;
     காவியம் இலக்கியம் படைத்தல் இன்பம்;
மழைமுகில் வருகையில் மயிலுக்கும் இன்பம்;
     ஓவியம் வரைகையில் மனதுக்கும் இன்பம்;

நினைவினைக் கிளறும் புகைப்படம் இன்பம்;
     நெடுநாள் நினைக்கும் திரைப்படம் இன்பம்;
நினைத்தவை வாழ்கையில் நடக்கையில் இன்பம்;
     நெஞ்சினில் நினைவுகள் படர்கையில் இன்பம்;
தொலைந்தவை கிட்டின் தொடர்ந்திடும் இன்பம்;
     கலைந்தவை கூடின் நிறைந்திடும் இன்பம்;
விளைந்தவை நன்றெனின் பெருகிடும் இன்பம்;
     இனியவை காண்கையில் மலர்ந்திடும் இன்பம்;

தேர்வை வென்ற தகவல் இன்பம்;
     திடத்தைத் தருகிற அஞ்சல் இன்பம்;
யாரையும் வெல்லும் கனியுரை இன்பம்;
     வாய்மொழி சொல்லும் தேன்மொழி இன்பம்;
தூர தேசத்துத் தொடர்பும் இன்பம்;
     தொடரால் வருகிற அழைப்பும் இன்பம்;
வரவைப் பெருக்கும் தொழிலும் இன்பம்;
     வாய்ப்பைக் குவிக்கும் வர்த்தகம் இன்பம்;

கடன்களை அடைக்கும் உளம் இன்பம்;
     காய்மையைக் கலைக்கும் மனம் இன்பம்;
உடமையில் மாண்பே உயர் இன்பம்;
     உலகினில் நீரே நிறை இன்பம்;
கடமையயில் நடுநிலைச் செயல் இன்பம்;
     கலகத்தைத் தீர்க்கும் தரகு இன்பம்;
படையினைத் தேற்றும் தலை இன்பம்;
     பணிவினைப் பேணும் நிலை இன்பம்;

அழகினைக் காட்டிலும் அறிவு இன்பம்;
      அலையினைக் காட்டிலும் கடல் இன்பம்;
உழைப்பினைக் காட்டிலும் முனைப்பு இன்பம்;
      உலகினைக் காட்டிலும் உயிர் இன்பம்;
மழையினைக் காட்டிலும் பயிர் இன்பம்;
     மலரினைக் காட்டிலும் மணம் இன்பம்;
நிழலினைக் காட்டிலும் நீர் இன்பம்;
     நிலவினைக் காட்டிலும் வான் இன்பம்;

மலையினைக் காட்டிலும் சிலை இன்பம்;
     மணலினைக் காட்டிலும் வீடு இன்பம்;
விலையினைக் காட்டிலும் பயன் இன்பம்;
     நினைவினைக் காட்டிலும் நனவு இன்பம்;
செலவினைக் காட்டிலும் வரவு இன்பம்;
     கனவினைக் காட்டிலும் கதை இன்பம்;
பகலினைக் காட்டிலும் இரவு இன்பம்;
     அனலினைக் காட்டிலும் குளிர் இன்பம்;

பிரிவினைக் காட்டிலும் உறவு இன்பம்;
     பெறுவதைக் காட்டிலும் தரல் இன்பம்;
ஊரினைக் காட்டிலும் பேர் இன்பம்;
     உறவினைக் காட்டிலும் உணர்வு இன்பம்;
நீரினைக் காட்டிலும் மோர் இன்பம்;
     நிறத்தினைக் காட்டிலும் அறிவு இன்பம்;
பாரினைக் காட்டிலும் பரிவு இன்பம்;
     பசுவினைக் காட்டிலும் பால் இன்பம்;

கருக்கலில் மழையின் வரவு இன்பம்;
     மழையில் மணலின் மணம் இன்பம்;
அறுவடை நாளின் உணவு இன்பம்;
     அனுபவம் பேசும் மொழி இன்பம்;
வறுமையை அழிக்கும் வழி இன்பம்;
      திறமையை வளர்க்கும் கலை இன்பம்;
பொறுமையைக் காட்டும் குணம் இன்பம்;
     புதுமையை ஏற்கும் மனம் இன்பம்;

வித்தில் விளையும் விந்தையே இன்பம்;
     யுத்தம் களையும் சிந்தையே இன்பம்;
பக்தியில் தேடும் முக்தியே இன்பம்;
     முக்தியை நாடும் பக்தியே இன்பம்;
சித்தியில் தெளியும் புத்தியே இன்பம்;
     புத்தியில் அறியும் உணர்வே இன்பம்;
சக்தியில் மலரும் சாதனை இன்பம்;
     சத்தியம் ஒளிரும் சோதனை இன்பம்;

காலம் முழுதும் கடமையில் ஒன்றாய்
     ஆலயம் தொழுதல் சாலவும் இன்பம்;
நாளும் பொழுதும் நல்லதை எண்ணி
      வாழும் நாளில் வளருதல் இன்பம்;
ஆழும் மனதில் அடக்கம் பேணி
      அறிவில் ஞானம் பெருகுதல் இன்பம்;
புலனை ஒன்றி இறையை உணர்ந்தே
      மீளாத் துயிலில் மாளுதல் இன்பம்;

இயற்கையைக் காத்தலே இன்பம்; - நெஞ்சில்
      இனிமையைச் சேர்த்தலே இன்பம்; - உளத்தில்
உயிர்களை மதித்தலே இன்பம்; - உலகில்
     பிணிகளை அழித்தலே இன்பம்; - நிலத்தில்
பயிர்களை வளர்த்தலே இன்பம்; - வளத்தில்
     மக்களைப் பெறுதலே இன்பம்; - நலத்தில்
வயிற்றுக்குப் புசித்தலே இன்பம்; - களிப்பில்
      யாக்கை சுகித்திடத் துய்த்தலே இன்பம்;

பயத்தினை வெல்வதே இன்பம்; - மனத்தில்
      மரணத்தை வெல்வதே இன்பம்; - கல்வியில்
முயன்றதை அறிவதே இன்பம்; - கடமையில்
      தாயகம் காப்பதே இன்பம்; - களத்தில்
உயர்வினை அடைவதே இன்பம்; - நடப்பில்
      இன்னலைச் சகித்தலே இன்பம்; - நிறைவில்
உய்த்திடும் ஞானமே இன்பம்; - இறுதியில்
     இரணமே இல்லாத மரணமே இன்பம்;
     \

உறுதியாய்
     மரணம் ஒன்றே மாறாப் பேரின்பம்;
 
- எழுதியவர் பெயர் தெரியவில்லை

[suvy]

இன்பம் ஐம்பதா ஐநூறா...! அவ்வளவும் அருமை...!!

 

எழுதியவர்  இன்பத்தை எழுதி முடித்து விட்டார் , இப்ப துன்பத்தை எழுதிக் கொண்டிருக்கின்றார் , இப்போதைக்கு முடிக்க மாட்டார்...!

 

நன்றி நன்பரே...!!! 

[ஆதித்ய இளம்பிறையன்]

வரவுக்கும் நட்புறவு பாராட்டும் மனதுக்கும் நன்றி சுவி

[தமிழ் சிறி]

இன்பத்தில்.... இத்தனை வகைகளா?
நாம்... தான் அதனை உணரத் தெரியாமல் இருக்கிறோம் போலுள்ளது.

[ஆதித்ய இளம்பிறையன்]

இன்பத்தில்.... இத்தனை வகைகளா?

நாம்... தான் அதனை உணரத் தெரியாமல் இருக்கிறோம் போலுள்ளது.

 

இவ்வளவு இன்பம் இருக்கிறதோ? இல்லையோ தெரியாது ?? ஆனால் இத்தமிழை வாசிக்கையில் எல்லாம் இன்பமயமாக இருக்கிறது ...!