நவீனன்

கருத்துக்கள உறவுகள்
  • Content count

    56,588
  • Joined

  • Last visited

  • Days Won

    367

Everything posted by நவீனன்

  1. இங்கிலாந்து கவுன்டி சம்பியன்ஷிப் போட்டிகளுக்காக சாரே அணிக்காக எட்டாவது சதத்தினை பதிவு செய்த சங்கக்கார! Published: 20th September, 2017 Kumar Sangakkara’s eighth Specsavers County Championship hundred of a remarkable final season for Surrey left Somerset in trouble after two days at the Kia Oval. https://www.kiaoval.com/main-news/another-sanga-century-gives-surrey-day-2-lead/ http://www.espncricinfo.com/series/8052/report/1068577/day/2/
  2. சங்காவின் சதத்துடன் முதல் இன்னிங்சில் வலுவடைந்திருக்கும் சர்ரே கழகம் இங்கிலாந்து கவுன்டி கிரிக்கெட் தொடரின் இந்தப் பருவகாலத்திற்கான போட்டியொன்றில், இலங்கை அணியின் முன்னாள் நட்சத்திர துடுப்பாட்ட வீரர் குமார் சங்கக்கார பெற்றுக்கொண்ட சதத்துடன் சர்ரே (Surrey) அணி யோர்க்ஷையர் (Yorkshire) அணிக்கு எதிராக தமது முதல் இன்னிங்சில் 592 ஓட்டங்களைக் குவித்துள்ளது. டிவிஷன் – I அணிகளான சர்ரே மற்றும் யோர்க்ஷையர் அணிகளுக்கு இடையிலான இந்தப் போட்டி லண்டன் ஓவல் மைதானத்தில் செவ்வாய்க்கிழமை (12) ஆரம்பமாகியிருந்தது. போட்டியின் நாணய சுழற்சியில் வெற்றி பெற்ற சர்ரே அணி தமது முதல் இன்னிங்ஸ் துடுப்பாட்டத்தை ஆரம்பித்தது. சர்ரே அணிக்கு ஆரம்ப துடுப்பாட்ட வீரர்களான ரோரி பர்ன்ஸ் மற்றும் மார்க் ஸ்டோன்மேன் ஆகியோர் உறுதியான அடித்தளம் ஒன்றை வழங்கினர். ஏனெனில் முதல் விக்கெட்டிற்காக 178 ஓட்டங்கள் இவர்களால் இணைப்பாட்டமாக பகிரப்பட்டது. இதில் ரோரி பர்ன்ஸ் 75 ஓட்டங்களைக் குவித்து சர்ரே அணியின் முதல் விக்கெட்டாக ஓய்வறை திரும்பினார். அவருக்கு அடுத்தபடியாக மார்க் ஸ்டோன்மேனும் சதமொன்றை கடந்து 131 ஓட்டங்களுடன் ஓய்வறை நோக்கி நடக்க, இன்னுமொரு விக்கெட்டையும் விரைவாக பறிகொடுத்த சர்ரே அணி நல்லதொரு ஆரம்பத்தை பெற்றிருப்பினும் சற்று தடுமாற்றத்தை வெளிக்காட்டியது. இவ்வாறனதொரு தருணத்தில் களம் நுழைந்திருந்த இலங்கை அணியின் முன்னாள் அணித் தலைவர் குமார் சங்கக்கார சர்ரே அணியின் விக்கெட் காப்பாளர் பென் போக்ஸ் உடன் இணைந்து தனது அழகிய துடுப்பாட்டத்தின் மூலம் சரிவுப்பாதை ஒன்றில் விழ இருந்த அணியை மீட்டெடுத்தார். இதனால் போட்டியின் முதல் நாள் நிறைவில், சங்காவின் அரைச் சதத்துடன் சர்ரே அணி 3 விக்கெட்டுகளை பறிகொடுத்து 398 ஓட்டங்களைப் பெற்றிருந்தது. போட்டியின் இரண்டாம் நாளில், தமது முதல் இன்னிங்சை மீண்டும் தொடங்கிய சர்ரே அணியில், குமார் சங்கக்கார தனது 63 ஆவது முதல்தர சதத்தை பூர்த்தி செய்தார். இதனால், மேலும் வலுவடைந்த சர்ரே அணி 500 ஓட்டங்களை எட்டியது. யோர்க்ஷையர் அணிக்கு மிகவும் நெருக்கடியாக காணப்பட்டிருந்த சங்கக்காரவின் விக்கெட்டை ஜேக் புருக்ஸ் கைப்பற்றியிருந்தார். அடுத்து வந்த ஏனைய துடுப்பாட்ட வீரர்களை ஓய்வறை அனுப்புவது யோர்க்ஷையர் கழக பந்து வீச்சாளர்களுக்கு இலகுவாக காணப்பட 137.2 ஓவர்களில் சர்ரே அணி அனைத்து விக்கெட்டுகளையும் இழந்து 592 ஓட்டங்களை தமது முதல் இன்னிங்சுக்காக குவித்தது. சர்ரே அணிக்காக அபார சதம் கடந்த குமார் சங்கக்கார 187 பந்துகளில் 3 சிக்ஸர்கள் மற்றும் 21 பவுண்டரிகளை விளாசி மொத்தமாக 164 ஓட்டங்களைப் பெற்று தனது திறமையை மீண்டும் வெளிக்காட்டினார். அத்தோடு மறுமுனையில் பென் போக்ஸ் சதம் விளாசி 110 ஓட்டங்களைப் பெற்றிருந்தமை குறிப்பிடத்தக்கது. தற்போது நடைபெற்று முடிந்திருக்கும் கரீபியன் பிரிமியர் லீக் தொடரிலும் சிறப்பாக செயற்பட்டிருந்த சங்கக்கார இந்த போட்டியிலும் சதம் கடந்ததன் மூலம், இந்தப் பருவகாலத்திற்கான கவுண்டி கிரிக்கெட் தொடரில் அதிக ஓட்டங்கள் குவித்த மூன்று வீரர்களில் ஒருவராகவும் மாறியுள்ளார் என்பது குறிப்பிடத்தக்கது. சங்காவின் விக்கெட்டைக் கைப்பற்றிய ஜேக் புருக்ஸ் 5 விக்கெட்டுகளை யோர்க்ஷையர் அணி சார்பாக கைப்பற்றினார். போட்டியின் சுருக்கம் சர்ரே (முதல் இன்னிங்ஸ்) – 592 (137.2) – குமார் சங்கக்கார 164, மார்க் ஸ்டோன்மேன் 131, பென் போக்ஸ் 110, ஜேக் புருக்ஸ் 113/5, ஸ்டீவன் பெட்டர்சன் 120/3 யோர்க்ஷையர் (முதல் இன்னிங்ஸ்) – 171/1 (51) – ஷோன் மார்ஷ் 77*, டொம் கோஹ்லர் 78 http://www.thepapare.com
  3. கனடாவில் போலி செய்திகளை கண்டறிவது குறித்து கூகுள் விளக்கம் அளிக்க உள்ளது குளோபல் தமிழ்ச் செய்தியாளர் கனடாவில் போலி செய்திகளை கண்டறிவது குறித்து கூகுள் நிறுவனம் விளக்கம் அளிக்க உள்ளது. எவ்வாறு போலி செய்திகளை கண்டறிவது எவ்வாறான செய்திகள் நம்பகமானவை என்பது குறித்து இளைஞர் யுவதிகளுக்கு கூகுள் நிறுவனம் விளக்கம் அளிக்க உள்ளது. தேர்தல்கள் நடைபெறவுள்ள நிலையில் கனடாவில் இந்த தி;ட்டத்தை கூகுள் நிறுவனம் ஆரம்பித்துள்ளது. இந்த புதிய திட்டம் இளைஞர் யுவதிகளுக்கு மத்தியில் ஊடக அறிவினை மேம்படுத்தும் என தெரிவிக்கப்படுகிறது. இந்த முயற்சியானது வரவேற்கப்பட வேண்டியது எனவும் இந்த முயற்சியினால் அனைத்து பிரச்சினையும் தீர்வு காண முடியாது எனவும் சில நிபுணர்கள் சுட்டிக்காட்டியுள்ளனர். போலி செய்திகளை கண்டறிவதற்கான விழிப்புணர்வு நடவடிக்கைகளுக்காக கூகுள் நிறுவனம் 500,000 டொலர்களை ஒதுக்கீடு செய்துள்ளது. இணைய தளத்தில் போலி செய்திகள், பிழையான தகவல்களை எவ்வாறு கண்டறிந்து கொள்வது என்பது தொடர்பிலே விளக்கம் அளிக்கப்பட உள்ளது. http://globaltamilnews.net/archives/41833
  4. புதிய வீரர்களோடு பாகிஸ்தானை எதிர்கொள்ளவுள்ள இலங்கை டெஸ்ட் அணி பாகிஸ்தான் அணியுடன் ஆரம்பமாகும் டெஸ்ட் தொடரில் மோதுவதற்காக ஐக்கிய அரபு இராச்சியம் பயணிக்கவுள்ள இலங்கை அணியில் சதீர சமரவிக்ரம மற்றும் ரோஷன் சில்வா ஆகிய அறிமுக வீரர்களுக்கு வாய்ப்பளிக்கப்பட்டுள்ளது. பாகிஸ்தான் அணியுடன் இரண்டு டெஸ்ட் போட்டிகள் கொண்ட தொடரில் விளையாட ஞாயிற்றுக்கிழமை (20) இலங்கை அணி ஐக்கிய இராச்சியம் பயணிக்கவுள்ளது. இத்தொடரில் இலங்கை சார்பாக ஆடவுள்ள 15 வீரர்கள் அடங்கிய பட்டியலை புதிதாக நியமனம் செய்யப்பட்ட கிரஹம் லப்ரோய் தலைமையிலான தேசிய அணியின் தேர்வுக்குழாம் இன்று (20) வெளியிட்டுள்ளது. செப்டம்பர் 28ஆம் திகதி அபுதாபி நகரில் இரு அணிகளுக்குமிடையிலான முதலாவது டெஸ்ட் போட்டி ஆரம்பமாகின்றது. டுபாயில் ஆரம்பமாகும் தொடரின் இரண்டாவது டெஸ்ட் போட்டி, இலங்கை அணி விளையாடவுள்ள முதலாவது பகலிரவு டெஸ்ட் ஆட்டமாக அமையவுள்ளது. நீண்ட கால எதிர்பார்ப்பாக காணப்பட்ட 22 வயதேயான இளம் துடுப்பாட்ட வீரர் சதீர சமரவிக்ரம முதன்முறையாக இலங்கை அணியில் விளையாடும் வாய்ப்பினை இத்தொடர் மூலம் பெற்றுள்ளார். சதீர சமரவிக்ரம இலங்கை கிரிக்கெட் வாரியம் 2016/17 ஆம் ஆண்டின் பருவகாலத்தில் நடாத்திய பிரீமியர் லீக் கிரிக்கெட் தொடரில் 1016 ஓட்டங்களினை (6 அரைச் சதங்கள் மற்றும் 3 சதங்களுடன்) கொல்ட்ஸ் அணிக்காக குவித்த சதீர சமரவிக்ரம அத்தொடரில் அதிக ஓட்டங்கள் சேர்த்த வீரராக பதிவாகியிருந்தார். உள்ளூர் போட்டிகளின் துடுப்பாட்ட ஜாம்பவானாக திகழும் ரோஷென் சில்வாவும் இத்தொடர் மூலம் இலங்கை அணிக்கு முதற்தடவையாக அழைக்கப்பட்டுள்ளார். முதல்தரப் போட்டிகளில் 10 வருடங்களுக்கு மேலான அனுபவத்தினை கொண்டிருக்கும் சில்வா 100 இற்கு மேலான போட்டிகளில் ஆடி 18 சதங்களுடன் 26 அரைச் சதங்களினையும் விளாசியிருப்பது குறிப்பிடத்தக்கது. ரோஷென் சில்வா இலங்கை அணியின் முன்னாள் தலைவரான அஞ்செலோ மெதிவ்ஸ் பயிற்சியின்போது தொடை தசையில் ஏற்பட்ட உபாதை காரணமாக தொடரில் உள்ளடக்கப்படவில்லை. மெதிவ்சின் இடத்தினை நிரப்பும் விதமாகவே ரோஷென் சில்வாவுக்கு அணியில் வாய்ப்பு வழங்கப்பட்டுள்ளது. குறைந்த உயரம் கொண்ட துடுப்பாட்ட வீரர்களில் ஒருவரான கெளசால் சில்வாவுக்கு இலங்கை அணியின் ஆரம்ப வீரராக மீண்டும் வருவதற்கு ஒரு சந்தர்ப்பம் கிட்டியுள்ளது. இலங்கைக்காக இறுதியாக தென்னாபிரிக்க அணியுடனான சுற்றுப் பயணத்தில் ஆடியிருந்த சில்வா, இலங்கை டெஸ்ட் அணியின் ஆரம்ப வீரர் உபுல் தரங்க டெஸ்ட் போட்டிகளில் இருந்து 6 மாதங்களுக்கு ஓய்வினை எடுத்துக்கொண்டதன் காரணமாகவே அணிக்கு மீண்டும் நுழையும் சந்தர்ப்பத்தினை பெற்றிருக்கின்றார். இந்திய அணியுடனான ஒரு நாள் தொடரில் இரண்டு பெறுமதியான அரைச் சதங்களை குவித்து தனது திறமையினை வெளிக்காட்டியிருந்த அழகிய துடுப்பாட்ட வீரர்களில் ஒருவரான லஹிரு திரிமான்னவும் இந்த தொடர் மூலம் இலங்கை அணிக்காக டெஸ்ட் போட்டிகளில் மீண்டும் விளையாட சந்தர்ப்பத்தினை பெற்றுள்ளார். திரிமான்ன கடந்த ஒரு வருடத்துக்கு மேலாக டெஸ்ட் போட்டிகளில் இலங்கைக்காக விளையாடாதிருந்தமை குறிப்பிடத்தக்கது. தில்ருவான் பெரேரா இந்திய அணியுடனான மூன்று போட்டிகள் கொண்ட டெஸ்ட் தொடரில் 2 விக்கெட்டுக்களை மாத்திரம் கைப்பற்றியிருப்பினும் இலங்கை அணிக் குழாத்தில் தனது இடத்தில் நீடிக்கின்றார். இவருடன் சேர்ந்து அணியின் சுழல் பந்துவீச்சு துறையினை ரங்கன ஹேரத் மற்றும் லக்ஷான் சந்தகன் ஆகியோர் வலுப்படுத்துவர். வேகப்பந்து வீச்சாளர்களான நுவன் பிரதீப் மற்றும் சுரங்க லக்மால் ஆகியோர் தமது உபாதைகளிலிருந்து மீண்டு பூரண உடற்தகுதியுடன் காணப்படுவதால் அவர்கள் லஹிரு கமகே மற்றும் இடது கை பந்து வீச்சாளர் விஷ்வ பெர்னாந்துவுடன் அணியில் உள்வாங்கப்பட்டுள்ளனர். இந்திய அணியுடனான தொடரில் இலங்கையில் காணப்பட்ட இடது கை சுழல் வீரர் மலிந்து புஷ்பகுமார மற்றும் வலது கை வேகப்பந்து வீச்சாளர் லஹிரு குமார ஆகியோருக்கு இத்தொடரில் வாய்ப்பு வழங்கப்படவில்லை. இலங்கை டெஸ்ட் குழாம் திமுத் கருணாரத்ன, கெளசால் சில்வா, குசல் மெண்டிஸ், தினேஷ் சந்திமால் (அணித் தலைவர்), சதீர சமரவிக்ரம, லஹிரு திரிமான்ன (உப தலைவர்), நிரோஷன் திக்வெல்ல, தில்ருவான் பெரேரா, ரங்கன ஹேரத், சுரங்க லக்மால், நுவன் பிரதீப் , லஹிரு கமகே, விஷ்வ பெர்னாந்து, ரோஷேன் சில்வா, லக்ஷன் சந்தகன், மலிந்த புஷ்பகுமார http://www.thepapare.com
  5. பாகிஸ்தானுக்கு எதிராக விளையாடவுள்ள இலங்கை கிரிக்கெட் அணி அறிவிப்பு அபுதாபியில் எதிர்வரும் 28ஆம் திகதி ஆரம்பமாகவுள்ள பாகிஸ்தானுக்கு எதிரான இரண்டு டெஸ்ட் போட்டிகள் அடங்கிய தொடரில் விளையாடவுள்ள இலங்கை அணி வீரர்கள் அறிவிக்கப்பட்டுள்ளனர். அணியின் தலைவராக தினேஷ் சந்திமால் தெரிவுசெய்யப்பட்டுள்ளார். உப தலைவராக லஹிரு திரிமான்னே கடமையாற்றவுள்ளார். இவர்கள் தவிர, திமுத் கருணாரத்ன, கௌஷல் சில்வா, குசல் மெண்டிஸ், சதீர சமரவிக்ரம, ரோஷென் சில்வா, நிரோஷன் திக்வெல்ல, ரங்கன ஹேரத், லக்சன் சந்தகன், தில்ருவன் பெரேரா, சுரங்க லக்மால், நுவன் பிரதீப், விஷ்வ பெர்னாண்டோ மற்றும் லஹிரு கமகே ஆகியோரும் அணியில் சேர்த்துக்கொள்ளப்பட்டுள்ளனர். இதேவேளை, மேலதிக வீரர்களாக, தனஞ்சய டி சில்வா, ஜெஃப்ரி வெண்டர்சே, அகில தனஞ்சய, லஹிரு குமார மற்றும் தசுன் ஷானக ஆகியோரும் ஐக்கிய அரபு இராச்சியம் நோக்கிச் செல்லும் அணியில் இடம்பெற்றுள்ளனர். http://www.virakesari.lk/article/24706
  6. பொன்சேகாவின் எழுச்சியும் வீழ்ச்சியும் இலங்கை இராணுவம் 2008 ஆம் ஆண்டு ஜூலை 16 ஆம் திகதி, மன்னார் மாட்டத்தில் விடத்தல்தீவில் அமைந்திருந்த, விடுதலைப் புலிகளின் போர் தந்திரோபாய ரீதியில் முக்கியத்துவம் வாய்ந்த, கடற்புலித் தளத்தைக் கைப்பற்றிக் கொண்டது. இது, இராணுவத்தினர் பெற்ற முக்கிய வெற்றி என்பதில் எவ்வித சந்தேகமும் இல்லை. அதுவரை இராணுவத்தினர், குறிப்பிட்டதோர் இடத்தில், எவ்வளவு பாரிய வெற்றியை அடைந்தாலும், அவர்கள் மீண்டும் கோட்டைவிட்டு விடுவார்கள், புலிகள் மீண்டும் இராணுவத்தினர் கைப்பற்றிய இடத்தைக் கைப்பற்றிக் கொள்வார்கள் என்றதோர் சந்தேகக் கண்கொண்டே, சிங்கள மக்கள் முன்னைய, அந்த வெற்றிகளை நோக்கினார்கள். ஆனால், விடத்தல்தீவில் இராணுவத்தினர் அடைந்த வெற்றியை, சிங்கள மக்கள் அவ்வாறு நோக்கவில்லை. முன்னொரு போதும் இல்லாதவாறு, இது இறுதி வெற்றியின் முக்கியமானதோர் கட்டமாகவே அவர்கள் விடத்தல்தீவு இராணுவ வெற்றியைக் கண்டார்கள். அதற்குச் சில மாதங்களுக்கு முன்னர்தான், இராணுவத்தினர் முழு கிழக்கு மாகாணத்தையே, புலிகளிடமிருந்து மீண்டும் கைப்பற்றியிருந்தார்கள். மாவிலாற்றிலிருந்து ஆரம்பித்த, கிழக்கு மாகாணப் போரின் போது, எவ்வித தங்கு தடையுமின்றி படையினர் முன்னேறினர். அந்த மாபெரும் வெற்றியை அடைந்த கையோடு, விடத்தல்தீவை அவர்கள் கைப்பற்றியிருந்தமையினாலேயே சிங்கள மக்கள் மத்தியில் இந்தப் புதிய நம்பிக்கை ஏற்பட்டது. எனவே, நாட்டில் தென் பகுதிகளெல்லாம் இராணுவத்தினரைப் பாராட்டியும் வாழ்த்தியும் ‘பெனர்’களும் போஸ்டர்களும் போடப்பட்டு இருந்தன. ஆனால், அவை எந்தவொரு குறிப்பிட்ட குழுவினால் போடப்பட்டவையாகத் தென்படவில்லை. அவற்றின் அளவு, அவற்றில் இருந்த சுலோகங்கள், அவற்றுக்காக பாவிக்கப்பட்டு இருந்த புடவை, கடுதாசி மற்றும் பொலித்தீன் ஆகியவை பல்வேறுபட்டவையாக இருந்தன. உண்மையிலேயே அவை எவரினதும் தூண்டுதலின்றி, சாதாரண சிங்கள மக்களால் போடப்பட்டவையாகவே இருந்தன. கிழக்கு மாகாணப் போர் நடவடிக்கைகளைப் பற்றியும், அதையடுத்து விடத்தல்தீவு போராட்டத்தைப் பற்றியும் சிங்கள ஊடகங்கள் தொடர்ச்சியாக வெற்றித் தோரணையில் வெளியிட்ட செய்திகள் மற்றும் கட்டுரைகளின் விளைவாகவே, அம் மக்கள் மத்தியில் இந்தப் புதிய நம்பிக்கை உருவாகியது. அப்போதைய இராணுவத் தளபதி லெப்டினன்ட் ஜெனரல் சரத் பொன்சேகாவின் வாழ்க்கையிலும் விடத்தல்தீவு சண்டை, முக்கிய திருப்பத்தை ஏற்படுத்தியது எனலாம். ஏனெனில், கிழக்கு மாகாணப் போர் மற்றும் விடத்தல்தீவுச் சண்டையைப் பற்றிய ஊடக அறிக்கையிடலின் பயனாக, அவர் அதிலிருந்து சிங்கள மக்களால் ஏறத்தாழ வணங்கப்படலானார். விடத்தல்தீவு கடற்புலித் தளத்தைக் கைப்பற்றிய இராணுவத்தின் 58 ஆவது படையணி, அதன் தளபதி பிரிகேடியர் ஷவேந்திர சில்வாவின் தலைமையில், வன்னிப் பெரு நிலப்பரப்பின் மேற்குக் கரையோரமாகப் புலிகளின் தளங்களையும் அரண்களையும் பெருந்தெருக்களையும் கைப்பற்றிக் கொண்டு, வன்னிக்குள் பிரவேசித்து, அங்கு பூநகரி, பரந்தன் என்று முக்கிய சந்திகளையும் பாரிய எதிர்ப்புகளின்றியே கைப்பற்றிக் கொள்ளும் போது, பொன்சேகாவின் புகழ் ‘ரொக்கெட்’ வேகத்தில் உயர்ந்தது. ஆனால், இராணுவத்தினருக்கு புலிகளின் நிர்வாகத் தலைநகரான கிளிநொச்சியை அவ்வளவு இலேசாகக் கைப்பற்றிக் கொள்ள புலிகள் இடமளிக்கவில்லை. எனவே, சிலநாட்கள் அந்நகரை முற்றுகையிட்டு இருந்து, கடுமையான சண்டையொன்றின் மூலம், 2009 ஆம் ஆண்டு ஜனவரி மாதம் 2 ஆம் திகதி படையினர் கிளிநொச்சி நகரையும் கைப்பற்றிக் கொண்டனர். பொன்சேகாவின் புகழ் வானளாவ உயர்ந்தது. சிங்கள மக்களுக்கு அவர் ஒரு கண்கண்ட தெய்வமாகிவிட்டார். அடுத்த, ஜனாதிபதித் தேர்தலில் பொன்சேகா போட்டியிட்டால், அவர் ஜனாதிபதி மஹிந்த ராஜபக்ஷவையும் தோற்கடிப்பார் என சிங்கள மக்கள் பேசிக் கொண்டனர். மஹிந்தவுக்கும் அப்போது அரசியல் ரீதியாக சவால்விட நாட்டில் எவரும் இருக்கவில்லை. அந்த நிலையில், அவரையும் பொன்சேகா தோற்கடிப்பார் என்று சாதாரண மக்கள் கூறுவதாக இருந்தால், போர் அவருக்கு எந்தளவு மகத்தான வரவேற்பையும் புகழையும் தேடிக் கொடுத்தது என்பதை ஊகித்துக் கொள்ளலாம். 2002 ஆம் ஆண்டு பெப்ரவரி 21, 22 ஆம் திகதிகளில் நோர்வே நாட்டின் அனுசரணையுடன், தமிழீழ விடுதலைப் புலிகள் அமைப்பின் தலைவர் வே. பிரபாகரனுக்கும் அப்போதைய பிரதமர் ரணில் விக்கிரமசிங்கவுக்கும் இடையில் கைச்சாத்திடப்பட்ட போர் நிறுத்த உடன்பாடானது, ஒரு வகையில் ரணிலின் சாணக்கியத்தின் உச்சக் கட்டம் எனலாம். அவர், அந்த உடன்படிக்கை, தரையில் மட்டும் அமுலாகும் வகையில் பார்த்துக் கொண்டார். கடல் மார்க்கமாகத் தமக்கு ஆயுதம் கொண்டு வர முடியும் என்பதற்காக, புலிகளும் அவ் உடன்படிக்கை, கடலுக்கும் பொருந்த வேண்டும் என வற்புறுத்தவில்லை. ரணில் கூடிய வரை, சர்வதேச சமூகத்தை உடன்படிக்கைக்குள் இழுத்துப் போட்டுக் கொண்டார். புலிகளின் நம்பகத்தன்மையை கேள்விக்குறியாக்குவதே அவரது நோக்கமாகியது. அதை அவர் சர்வதேச பாதுகாப்பு வலயமாக நாடாளுமன்றத்தில் குறிப்பிட்ட போதே புலிகள் உணர்ந்தனர். சர்வதேச தலையீடு அதிகம் என புலிகள் முறையிட்ட போதும், அப்போது எதையும் செய்ய முடியாதிருந்தது. புலிகள் தந்திரத்துக்காகவே போர் நிறுத்தத்துக்கு முன்வந்தனர். எனவே, அவர்களது நடவடிக்கைகளின் காரணமாக, அவர்களது நம்பகத்தன்மை சர்வதேச சமூகத்தின் முன் கேள்விக் குறியாகிய நிலையில், சர்வதேச சமூகம் அரசாங்கத்துக்கு புலிகளின் ஆயுதக் கப்பல்களைப் பற்றிய தகவல்களை வழங்கத் தொடங்கியது. போர் நிறுத்தம் கடலில் இல்லாததினால், உடன்படிக்கையை மீறாமலேயே, அந்தத் தகவல்களின் அடிப்படையில் இலங்கையின் கடற்படையினர் அந்தக் கப்பல்களை அழிக்க முடிந்தது. 2007 ஆம் ஆண்டு, ஆரம்பத்திலிருந்து ஒரு பனடோல் வில்லையாயினும் வெளிநாடுகளில் இருந்து, தருவித்துக் கொள்ள புலிகளால் முடியாமல் போய்விட்டதாக, புலிகளின் முன்னாள் ஆயுதக் கொள்வனவாளர் செல்வராசா பத்மநாதன் (கே.பி), ஊடகவியலாளர் டி.பி.எஸ் ஜெயராஜிடம் பின்னர் கூறியிருந்தார். இந்தநிலையில் தான், வன்னிப் போர் நடைபெற்றது. எனவே, புலிகளின் தோல்வி தவிர்க்க முடியாததாகிவிட்டது. இராணுவத்தினர் போரிட்ட போதிலும், இறுதிக் கட்டத்தில் அதன் பிரசார இலாபத்தை அரசியல்வாதிகளே அடைந்தனர். இன்னமும் கூட, போர் வெற்றிக்காக மஹிந்த என்ன பங்களிப்பை செய்தார் என்பதைக் கோடிட்டுக் காட்ட முடியாதவர்களும் போர் வெற்றியின் உரிமையாளராக மஹிந்தவையே காண்கிறார்கள். தமிழ் மக்களும், போரில் புலிகள் அடைந்த தோல்விக்கு, பொன்சேகாவை விட, மஹிந்தவே காரணம் என நினைத்தார்கள் போலும். புலிகள் அடைந்த தோல்வியினாலும் போரினால் தாம் அனுபவித்த துன்பங்கள் மற்றும் அவமானங்களாலும் பாதிக்கப்பட்ட தமிழ் மக்கள், 2010 ஆம் ஆண்டு ஜனாதிபதித் தேர்தலின்போது, மஹிந்தவுக்கு எதிராகவும் போரின்போது, இராணுவத்தை வழிநடத்திய பொன்சேகாவுக்கு ஆதரவாகவும் வாக்களித்தனர். போர் வெற்றியின் புகழை அரசியல் தலைமை கொள்ளையடித்திருந்தும், அந்த நிலைக்கு இராணுவத் தளபதியாக இருந்த பொன்சேகாவுக்கே மறுப்புத் தெரிவிக் முடியாமல் போய்விட்டது. அவரும் அதை ஆமோதித்தே கருத்துத் தெரிவிக்க நேரிட்டது. “30 ஆண்டு காலமாக இருந்த போரை, இரண்டு வருடங்களும் பத்தே மாதங்களில் முடித்தீர்களே என்ன இரகசியம்” எனப் போர் முடிந்த உடன், அப்போது செயற்பட்டுக் கொண்டிருந்த ‘பொட்டம் லைன்’ பத்திரிகையின் ஊடகவியலாளர் ஒருவர் கேட்டபோது, பொன்சேகா அளித்த பதில் அதையே காட்டுகிறது. “போரில் வெற்றி பெறுவதற்காக, எனக்கு உறுதியான அரசியல் தலைமை பின்புலமாக அமைந்தது. போரை நிறுத்துமாறு, அரசாங்கத்தின் மீது, சர்வதேச நெருக்குவாரம் ஏற்படுத்தப்பட்ட போதெல்லாம், ஜனாதிபதி மஹிந்த ராஜபக்ஷ வளைந்து கொடுக்காமல் உறுதியாக நின்றார். ஜனாதிபதிக்குப் புறம்பாகப் பாதுகாப்புச் செயலாளர் கோட்டாபய ராஜபக்ஷவும் என் மீது நம்பிக்கை வைத்திருந்தார். அவர்கள் எதிரியைப் புரிந்து கொண்டிருந்தனர். இருவரும் நல்ல புரிந்துணர்வோடிருந்தனர்” என பொன்சேகா பதிலளித்திருந்தார். அவர் கூறிய ஒரு கருத்து முற்றிலும் உண்மையே. பொன்சேகாவின் மீதான மஹிந்தவினதும் கோட்டாபயவினதும் நம்பிக்கையின் காரணமாகவே, மஹிந்த ஜனாதிபதியாகப் பதவியேற்றவுடன் பொன்சேகா இராணுவத் தளபதியாக நியமிக்கப்பட்டார். அந்த நம்பிக்கையை கோட்டாபய, இந்திய ஊடகவியலாளர் வி.கே.சஷிகுமாருடன் நடத்திய பேட்டியொன்றின் போது வெளியிட்டு இருந்தார். அந்தப் பேட்டியை அடிப்படையாகக் கொண்டு சஷிகுமார், ‘இன்டியன் டிபென்ஸ் ரிவீவ்’ ஊடகத்துக்கு எழுதிய கட்டுரையில், இவ்வாறு குறிப்பிடப்பட்டுள்ளது. “கோட்டாபய இராணுவப் பின்னணியுள்ளவர். அவர் சொந்த விருப்பத்தில் இலங்கை இராணுவத்திலிருந்து ஓய்வு பெற்றிருந்தார். லெப்டினன்ட் ஜெனரல் சரத் பொன்சேகாவுடனான தமது நற்புறவை அவர் தொடர்ந்தும் பேணி வந்தார். அவர் பொன்சேகாவிடம், “உம்மால் போரில் வெற்றி பெற முடியுமா” எனக் கேட்டார். “ஆம், ஆனால் எனது குழுவைத் தெரிவு செய்ய நீங்கள் எனக்கு அனுமதி வழங்க வேண்டும்” என அனுபவசாலியான பொன்சேகா கூறினார். கோட்டாபயவும் மஹிந்தவும் இணங்கினர். “இராணுவம் தமது கடமையைச் செய்ய இடமளிப்போம். அத்தோடு நாம் அரசியல் ரீதியாக கோட்டையை பாதுகாத்துக் கொள்வோம்” என அவர்கள் பொன்சேகாவிடம் கூறினர். அந்தச் சீரான ஒழுங்கு பலனளித்தது. நாம் முன்னர் கூறியது போல், போர் முடிவடைந்தபோது, போர் வெற்றியின் புகழ், அரசியல் தலைமைத்துவத்திடம் சென்றடைந்திருந்த போதிலும் போரின் ‘ஸ்டாராக’த் தொடர்ந்தும் பொன்சேகாவே மக்கள் மனதில் இருந்தார். அதைப் போரின் புகழைத் தமதாக்கிக் கொண்ட அரசியல் தலைமையாலும் புறக்கணிக்க முடியவில்லை. அவ்வாறு புறக்கணிக்கும் அவசியமும் இருக்கவில்லை. எனவே, போர் முடிவடைந்தவுடன் சுயாதீன தொலைக்காட்சி சேவையுடன் நடத்திய செவ்வியொன்றின்போது, கோட்டாபய ராஜபக்ஷ இவ்வாறு கூறினார். “இலங்கைப் பாதுகாப்புப் படைகளின் தொழில்சார்தன்மை உலகம் முழுவதிலும் பரவலாகப் பாராட்டைப் பெற்றள்ளது. இலங்கையின் வடக்கு, கிழக்குப் பகுதிகளில் புலிகள் கைப்பற்றிக் கொண்டிருந்த பிரதேசங்களை மீட்பதில் இராணுவத் தளபதி லெப்டினன்ட் ஜெனரல் சரத் பொன்சேகா ஆற்றிய பங்களிப்பின் காரணமாக, இந்திய பாதுகாப்புச் செயலாளர் எம்.கே. நாராயணன், அவர் உலகிலேயே மிகச் சிறந்த இராணுவத் தளபதி எனக் கூறியிருக்கிறார்”. அவர் மேலும் கூறுகிறார், “லெப்டினன்ட் ஜெனரல் சரத் பொன்சேகாவின் அனுபவம், அறிவு, துணிவு மற்றும் வீரம் இல்லையாயின் இந்த வெற்றிகளை ஒருபோதும் அடைய முடியாது”. அந்தப் பேட்டியின் மற்றொரு இடத்தில், போர் வெற்றிக்கான மற்றொரு காரணத்தை விளக்கி, கோட்டாபய ராஜபக்ஷ மேலும் இவ்வாறு கூறுகிறார். “எவ்வாறு முகம் கொடுப்பது எனப் பிரபாகரன் திகைத்துப் போகும் வகையிலான போர்த் தந்திரங்களை இராணுவத் தளபதி உபயோகித்தார். எதிரியைத் தாக்குவதற்காக இராணுவத் தளபதி, இராணுவத்தினரைச் சிறு குழுக்களாகப் பாவித்தார். ஒரே நேரத்தில் பல முனைகளில் தாக்குதல்களை நடத்துவதற்காக அவரிடம் பரந்துபட்ட போர் முனையொன்று இருந்தது”. இவ்வாறு அரசியல் தலைமையும் இராணுவத் தலைமையும் ஒன்றை ஒன்று பாராட்டிக் கொண்டாலும், அதே கால கட்டத்தில் அல்லது அதற்குச் சற்றுப் பின்னர், இரு சாராருக்குமிடையே பனிப் போரொன்றும் இருந்துள்ளது என இப்போது தெரிய வந்துள்ளது. அதன் காரணமாகத் திடீரென பொன்சேகா இரண்டு நாட்களுக்குள் இராணுவத் தளபதி பதவியிலிருந்து இராஜினாமாச் செய்ய வேண்டும் என மஹிந்தவால் கேட்டுக் கொள்ளப் பட்டார். அதற்குப் பதிலாக இராணுவ விடயங்களில் அதை விடக் குறைந்த அதிகாரமும் அந்தஸ்தும் உள்ள பாதுகாப்பு ஆளணித் தலைவர் பதவிக்கு பதவி உயர்த்தப்பட்டார். அவருக்குப் பதிலாக போர்க் காலத்தில் வன்னித் தளபதியாகக் கடமையாற்றிய மேஜர் ஜெனரல் ஜகத் ஜயசூரிய நியமிக்கப்பட்டார். அவர் மஹிந்தவின் தூரத்து உறவுக்காரர். ஆனால், அப்போதும் பொன்சேகாவே போரின் ‘ஸ்டாராக’ இருந்தார். எனவே புதிய இராணுவத் தளபதி பதவியேற்ற உடன், ஜயசூரியவும் பொன்சேகாவின் புகழ் பாடினார். அரச பத்திரிகையொன்றுடனான பேட்டியொன்றின்போது, அவர் இவ்வாறு கூறினார். “பிரதானமாக அவரது (பொன்சேகாவினது) உன்னத தலைமைத்துவம் மற்றும் அர்ப்பணிப்பின் காரணமாகவே, ஒரு போதும் தோற்கடிக்க முடியாததாகக் கருதப்பட்ட புலிகளைத் தோற்கடிக்க எம்மால் முடிந்தது. அவரது தலைமையின் கீழான குழுவில் ஓரங்கமாக இருந்தமையிட்டு நான் பெருமையடைகிறேன். அவரது காலத்தில் போரில் வெற்றியடைவதற்காக நான் அவருக்கு பூரண ஒத்துழைப்பை வழங்கினேன்”. இராணுவத் தளபதி பதவியிலிருந்து பதவி நீக்கம் செய்யப்பட்டமையே பொன்சேகாவின் வீழ்ச்சியைக் குறித்த முதலாவது சம்பவமாகும். அதேவேளை, அவருக்கும் மஹிந்தவுக்கும் இடையிலான பிணக்கின் முதலாவது வெளிப்பாடாகவும் அது இருந்தது. அந்தப் பகையின் காரணமாக பொன்சேகா இராணுவச் சேவையிலிருந்து விலகி, 2010 ஆம் ஆண்டு ஜனாதிபதித் தேர்தலின் போது, மஹிந்தவுக்கு எதிராகப் போட்டியிட்டார். ஆனால், படையினரால் கிளிநொச்சி கைப்பற்றப்பட்ட போது, சிங்கள மக்கள் என்னதான் கூறினாலும், மஹிந்தவுக்கு எதிரான அந்தத் தேர்தலின் போது, அதேமக்கள் பொன்சேகாவுக்கு வாக்களிக்கவில்லை. அவர் அவமானகரமாகத் தோல்வியைத் தழுவினார். பொன்சேகாவே புலிகளைத் தோற்கடித்தார் என்பதை மறந்து, தாமே உலகில் மிகச் சிறந்த இராணுவத் தளபதியாக வர்ணிக்கப்பட்ட பொன்சேகாவுக்கு, மஹிந்தவின் ஆட்கள் வழமை போல், புலி முத்திரையைக் குத்தினர். முதன் முதலாக பொன்சேகாவை உலகில் சிறந்த தளபதி எனக் கூறிய இலங்கையரான கோட்டாபயவும் எந்தவொரு தளபதியும் செய்யக் கூடியதையே பொன்சேகாவும் செய்தார் என்று கூறினார். இப்போது பொன்சேகா, போர்க் குற்றமிழைத்தார் எனக் குற்றஞ்சாட்டுகிறார். ஜயசூரிவுக்கு ஆதரவாகவும் பொன்சேகாவுக்கு எதிராகவும் மஹிந்தவின் ஆட்கள் ஆர்ப்பாட்டம் நடத்துகிறார்கள். அதற்கு முன்னர் மஹிந்த, பொன்சேகாவுக்கு எதிராக இரண்டு இராணுவ நீதிமன்றங்களை நிறுவி அவருக்குச் சிறைத் தண்டனையும் வழங்கி, அவரது பதக்கங்களையும் பறித்து, அவரது ஓய்வூதியத்தையும் பறித்தார். பொன்சேகா போரின் போது, புலிகளுக்கு எதிரான கடற்படையின் நடவடிக்கைகளை குழப்ப முனைந்தார் என இறுதிப் போர்க் காலத்தில், கடற்படைத் தளபதியாக இருந்த அட்மிரல் வசந்த கரன்னாகொட, தாம் எழுதிய ‘அதிஷ்டானய’ (திடசங்கற்பம்) என்ற நூலில் குறிப்பிட்டு இருக்கிறார். தளபாடங்கள் இல்லை என மஹிந்த, போருக்கு பின்வாங்கியதாக பொன்சேகாவின் ஆதரவாளர்கள் கூறுகின்றனர். இவர்கள் ஒன்று சேர்ந்து புலிகள் போன்றதோர் பலம் வாய்ந்த கிளர்ச்சிக் குழுவொன்றைத் தோற்கடித்ததே ஆச்சரியமாக இருக்கிறது. பொன்சேகாவின் குற்றச்சாட்டினால் மனித உரிமை மீறல் என்ற விடயம் மீண்டும் களமிறங்கியிருக்கிறது. இக் குற்றச்சாட்டுகள் தொடர்பான விசாரணைக்கு அரசாங்கமும் தெற்கே உள்ளவர்களும் காட்டும் அச்சமும் குற்றச்சாட்டை மென்மேலும் நிரூபித்துக் கொண்டே இருக்கிறது. அவர்களது இந்த அச்சத்தின் காரணமாக ஆரம்பத்தில் போர் குற்றம் புரிந்த ‘இரு சாராரும்’ என்று கூறி வந்த ஐ.நா அதிகாரிகளும் புலிகளை மறந்து விட்டார்கள். கடந்த வருடம் ஐ.நா மனித உரிமை உயர் ஸ்தானிகர் மனித உரிமைப் பேரவையில் சமர்ப்பித்த அறிக்கையில், புலிகளுக்கு எதிராகக் குற்றச்சாட்டுகள் இருக்கவில்லை என்பது அதற்கு உதாரணமாகும். விசாரணையொன்றை எதிர்நோக்காமல் அரசாங்கத்துக்கு ஒரு போதும் இந்த குற்றச்சாட்டிலிருந்து தப்பித்துக் கொள்ள முடியாது. http://www.tamilmirror.lk/சிறப்பு-கட்டுரைகள்/பொன்சேகாவின்-எழுச்சியும்-வீழ்ச்சியும்/91-204116
  7. ‘வடக்கு, கிழக்கு இணைப்பை சம்மதிக்க மாட்டோம்’ “வடக்கு, கிழக்கு மாகாணங்கள் மீண்டும் இணைக்கப்படுவதற்கு, நாங்கள் ஒரு போதும் சம்மதிக்க மாட்டோம். இந்த விடயத்தில், நாங்கள் மிகத் தெளிவாக இருக்கின்றோம்” என்று, புனர்வாழ்வளிப்பு மற்றும் மீள்குடியேற்ற இராஜாங்க அமைச்சர் எம்.எல்.ஏ.எம்.ஹிஸ்புல்லா தெரிவித்தார். “கிழக்கு, ஓர் இனத்துக்குச் சொந்தமானது அல்ல. அதேபோன்று வடக்கும் ஓர் இனத்துக்கு சொந்தமானது அல்ல இந்த விடயத்தில் முஸ்லிம்கள் தெளிவாக இருக்க வேண்டும்” என்றும் அவர் கேட்டுக்கொண்டார். “கிழக்கு மாகாண முதலமைச்சரும் அவருடைய கட்சி சார்ந்த தலைவரும் முஸ்லிம் சமூகத்தைக் காட்டிக் கொடுத்து வடக்கையும் கிழக்கையும் இணைத்து இந்த மாகாணத்தில் வாழுகின்ற மூவின மக்களையும் இரத்த கறைக்குள் கையளிப்பதற்கு, முயற்சிக்கின்றனர். அதற்கு நாங்கள் இடமறிக்க கூடாது” என்றும் அவர் கேட்டுக்கொண்டார். கிழக்கு மாகாண சபை உறுப்பினர் எம்.எஸ். சுபைரின் நிதியொதுக்கீட்டில் கொள்வனவு செய்யப்பட்ட பொருட்களை, மட்டக்களப்பு ஏறாவூர் பதீயுதீன் மஹ்மூத் வித்தியாலயத்துக்கு கையளிக்கும் நிகழ்வு, நேற்று (18) திங்கட்கிழமை நடைபெற்றது. இந்நிகழ்வில், கலந்துகொண்டு உரையாற்றுகையிலேயே, அவர் மேற்கண்டவாறு தெரிவித்தார். அங்கு அவர் தொடர்ந்து உரையாற்றுகையில், “இனிவரும் காலங்களில் மாகாண சபைத் தேர்தல், தொகுதிவாரி அடிப்படையில் நடைபெறவுள்ளது மட்டக்களப்பு மாவட்டத்தில் தற்போது 11 உறுப்பினர்கள் தெரிவுசெய்யப்படுகிறார்கள். அவற்றையும் தொகுதிவாரி அடிப்படையில் மாற்ற வேண்டும். நாட்டிலுள்ள ஒவ்வொரு பிரதேச செயலகங்களையும் ஒவ்வொரு தொகுதியாக மாற்றுங்கள். இதனால், இனப்பிரச்சினை தொகுதிப் பிரச்சினைகள் எற்படாதென ஸ்ரீ லங்கா சுதந்திரக் கட்சிக் கூட்டத்தில் ஆலோசனை முன்வைத்துள்ளோம் அது சிறந்த ஆலோசனை என ஏற்றுள்ளார்கள். மட்டக்களப்பு மாவட்டத்தில் 14 பிரதேச செயலகங்கள் உள்ளன தற்போது 11 உறுப்பினர்கள் உள்ளார்கள் மூன்று உறுப்பினர்களை அதிகரிக்க வேண்டி வரும். மாவட்டத்தில் தமிழ் - முஸ்லிம் மக்கள் முரண்படாமல் பிளவுகள் ஏற்படாமல் தங்களுடைய பிரதிநிதித்துவத்தைக் காப்பாற்றிக்கொண்டு எவ்வாறு ஒற்றுமையாக செயற்படுவது என்பது பற்றி சிந்திக்கவேண்டும். கிழக்கு மாகாணத்தில், தமிழ் சகோதரர் சந்திரகாந்தன் முதலமைச்சராக இருந்தார். ஹாபிஸ் நஸீர் இன்று முதலமைச்சராக இருக்கின்றார். விமல வீர திஸாநயக்க முதலமைசராக நாளை வரக்கூடும். இவ்வாறு, மூவின மக்களும் ஒற்றுமையாக நிர்வாகம் செய்யக்கூடிய ஒரே மாகாணம் கிழக்கு மாகாணம்தான். கிழக்கு மாகாணத்தை வடக்குடன் இணைத்து கிழக்கை அநாதரவாக்கி மீண்டும் இந்த மண்ணிலே இரத்த ஆற்றை ஓடவைத்து, யுத்த சூழலை உருவாக்குவதற்கு, நாங்கள்; இடமளிக்க மாட்டோம். தமிழ்த் தேசியக் கூட்டமைப்பு அல்லது தமிழ் மக்களுடைய பிரதிநிதிகள் அல்லது ஏனைய கட்சிகளுடைய பிரதிநிதிகளினால் இனப்பிரச்சனை தீர்வு தொடர்பான சில ஆலோசனைகள் முன்வைத்துள்ளனர். இந்நிலையில் எதிர்வரும் 21ஆம் திகதி இடைக்கால அறிக்கையை பிரதமர், நாடாளுமன்றத்தில் சமர்ப்பிக்கவுள்ளார். யுத்தம் மாத்திரம் முடிவடைந்துள்ளது. இன்னும், இனப்பிரச்சினைக்குத் தீர்வு காணப்படவில்லை. இனப்பிரச்சினைக்கான நிரந்தர தீர்வு இந்த அரசாங்கம் கொடுக்க தவறுமாகவிருந்தால் பெரும் நெருக்கடி நிலைமையே ஏற்படும். அதிகாரங்கள் நிறைந்த தங்களுடைய நிர்வாகத்தை தாங்களே செய்யக்கூடிய வளமான மாகாணசபைகள் உருவாக்கப்பட வேண்டும் வடக்கு மற்றும் கிழக்கு என தனியான மாகாணங்கள் உருவாக்கப்பட வேண்டும். அதன் மூலமே எங்களுடைய பிரச்சினைகளுக்கு தீர்வு காண முடியும். வடக்கு, கிழக்கு இணைப்பு பற்றி இன்று யாராவது பேசிக்கொண்டிருந்தால் அது சாத்தியப்படாத விடயமாகும். அரசாங்கத்தின் பலம் எதிர்க்கட்சிகளின் பலம் ஆகிய சூழ்நிலைகளை சாத்தியமான முறையில் பயன்படுத்தி எமது பிரச்சினைகளுக்கு தீர்வு காணவேண்டும். ஸ்ரீ லங்கா முஸ்லிம் காங்கிரஸின் தலைவர் ரவூப் ஹக்கீம், முஸ்லிம்களுடைய நிலைப்பாட்டை வெளியிலும் பேசவில்லை நாடாளுமன்றத்திலம் பேசவில்லை எழுத்து மூலமாகவும் கொடுக்க வில்லை. வடக்கும் கிழக்கும் மீண்டும் இணைவதற்கு ஒரு போதும் இடமளிக்க மாட்டோம் என்று மிகத் தெளிவாக ஸ்ரீ லங்கா முஸ்லிம் காங்கிரஸ் தலைவர் பேசவேண்டும். எதிர்காலத்தில் இதுதான் எங்களுடைய பிரச்சினையாகும்” என்றார். http://www.tamilmirror.lk/அம்பாறை/வடக்கு-கிழக்கு-இணைப்பை-சம்மதிக்க-மாட்டோம்/74-204057
  8. உயிர் வளர்த்தேனே

    உயிர் வளர்த்தேனே 17: அரிசியை ஊரை விட்டு ஒதுக்க வேண்டாம் e சிறுதானியங்கள் பற்றி மட்டுமே இந்தத் தொடரில் தொடர்ந்து பேசிவருவதால் அரிசியின் மீது மறுப்புணர்வு இருக்குமோ என்று பலரும் நினைக்கலாம். ஆனால், இல்லை. முப்போதும் எப்போதும் அரிசியை மட்டுமே சார்ந்திருப்பதைத்தான் நாம் மறுக்க வேண்டும். மெத்தென்ற அரிசிச் சோற்றை மெல்லுகிறபோது முதலில் இளம் இனிப்புச் சுவையும், அடுத்து மென்மையான துவர்ப்பும், கசப்பும் கூடி இறுதியில் உப்பாக நாவில் நின்று நர்த்தனமாடும். நிதானமாக அரைத்துக் கூழாகித் தொண்டையில் இறங்குகிறபோதும், ஒரு மலர், காம்பிலிருந்து தன்னை விடுவித்துக்கொண்டு தரையில் வந்து அமர்வதுபோல இரைப்பையைச் சென்றடைகிறபோதும் அரிசிச் சோறு தரும் சுகமே அலாதிதான். அரிசி ஆர்வம் எனக்கு நெருக்கமான அண்ணன் ஒருவர் இருக்கிறார். மூன்று வேளையும் எதை ருசித்து, எவ்வளவு உண்டாலும் அவருக்கு வயிறும், மனதும் அடங்காது. இறுதியாக ஒரு கவளம் சோற்றைத் தயிர் அல்லது மோரில் பிசைந்து சுவர்ப் பூச்சுக்குச் சிமிண்டு சாந்து அறைவதுபோல் கப்பென்று அறைந்தால்தான் `ஹப்ப்ப்ப்பா…’ என்று அவருக்கு நிறைவாக இருக்கும். அரிசியின் மீது பலருக்கும் இதே பிடிப்பு உண்டு. அதிலும் நேற்றிரவு ஆறின சோற்றில் வடி கஞ்சி ஊற்றி, உப்பு போட்டு ஊற வைத்த பழைய சோற்றை மையாகப் பிசைந்து, பிசைக்குத் தப்பிய பருக்கைகளைத் (தெலுங்கில் இதை `மெதுக்குலு’ என்பர். எவ்வளவு பொருத்தமான பெயர்) வலையில் மீனை அரித்து எடுப்பதுபோல் விரல்களில் திரட்டி, உருண்டை பிடித்து, வாயில் நிரப்பி மென்று உள்ளிறக்கி, அதே வாயில் நீராகாரத்தையும் இரண்டு வாய் குடித்தால் சொர்க்கமே நமக்குப் பக்கத்தில் வரும். நல்ல வெயில் நேரத்தில் அந்த மப்புடன் வேப்ப மரத்தடியில் தூங்கினால் சொர்க்கம் நம் கண்ணுக்குள் நிலைக்கும். இத்தனை சுகம் தருவதால்தான் அரிசி நமக்கு முதன்மை உணவாக இருக்கிறது. உலகின் பெரும்பகுதி மக்களுக்கும் அதுதான் முதன்மை உணவு. அரிசியின்றிக் கழிவதில்லை உலகின் வெவ்வேறு ஆற்றின் கரையொட்டிய பகுதிகளில் கிட்டத்தட்ட ஒரே காலகட்டத்தில் நெல் வேளாண்மை தோன்றியிருக்கும் என்பது பொதுவான ஒரு அனுமானம். உலகின் பெரும்பகுதி உணவுத் தேவையை ஈடுசெய்வது அரிசியே. அதிலும் குறிப்பாகத் தென்னிந்தியர்களான நமக்கு, ஒவ்வொரு பொழுதும் அரிசியின்றிக் கழிவதில்லை. ஏழைத் தாய்மார்கள் தங்களிடம் இருப்பில் உள்ள கடைசிப் பிடியரிசியை உலையில் இடும்போது, அவர்களது அடிவயிற்றில் இனம் புரியாத பயம் கிடுகிடுக்கும். இந்தப் பயம் வேளாண் கலாச்சாரம் சார்ந்தது. முன்பு ஒவ்வொரு விவசாயக் கூலித் தொழிலாளி வீட்டிலும்கூட மூலை அடுக்குப் பானைகளில் தானியங்கள் சேமிக்கப்பட்டிருக்கும். நாம் முன்னரே சொன்னதுபோல இன்று குதிர்களும், அடுக்குப் பானைகளும் முற்றாக வழக்கொழிந்து, அடுப்பிலே உலை வைத்துவிட்டு, சுருட்டின ரூபாய் நோட்டை விரித்துக்கொண்டு அரிசி வாங்கக் கடைக்கு ஓடுகிறார்கள் தாய்மார்கள். 1960-களின் மத்தியில் தொடங்கிய பசுமைப் புரட்சிக்குப் பின்னரே நெல் விளைச்சல் பரவலானது. பசுமைப் புரட்சி நிலத்தினின்றும் சிறுதானி யங்களை அகற்றிவிட்டு, ஏகபோக ஆதிக்கம் செலுத்தத் தொடங்கியது. அரிசி அரசியல் தமிழகத்தில் அரிசி ஏகபோக இடத்தைப் பிடித்ததைப் போலவே மற்ற நாடுகளிலும் மற்ற தானிய விளைச்சல் திட்டமிட்டுப் புறக்கணிக்கப்பட்டுள்ளது. அரிசி, கோதுமை, பெருஞ்சோளமாகிய மக்காச் சோளம் ஆகிய மூன்றும் இப்படிப் பேராதிக்கம் செலுத்துகின்றன (நம்முடைய நாட்டுச் சோளம் எளிதில் மட்கிவிடும். அமெரிக்க மஞ்சள் சோளம் அவ்வளவு எளிதில் மட்குவதில்லை. அதனால் இதற்கு மக்காச் சோளமென்று பெயர் வைத்துள்ளனர் நம் மக்கள்). இவை மூன்றையும் பெரு உற்பத்திக்கும், ஆலை சார்ந்த வணிகப் பண்ட உற்பத்திக்கும் பயன்படுத்துவது எளிது. அதனால் அரிசி, கோதுமை, மக்காச் சோளம் ஆகிய மூன்றும் ஏகபோக நிலைக்கு மாற்றப்பட்டுள்ளன. இதற்குப் பின்னுள்ள விரிவான அரசியலைப் பேசுவதற்கான களம் இதுவல்ல. அண்ணா காலத்தில் தமிழக அரசியலைப் புரட்டிப் போட்ட ஒரு முக்கியக் கருவியாக அரிசி இருந்தது. அப்போது ‘ரூபாய்க்கு ஒரு படியரிசி நிச்சயம், மூன்று படியரிசி லட்சியம்’ என்பது திமுகவின் 1967 சட்டமன்றத் தேர்தல் முழக்கம். கருணாநிதியின் அதிகாரம் எம்.ஜி.ஆர். கைக்கு மாறியதற்குக் காரணம் அரசியல் மட்டுமல்ல. `அரிசி’யியல் காரணமும் உண்டு. விசேஷ அரிசி விவசாயக் குடும்பங்களில் சிறுதானியமே முதன்மை உணவு என்றாலும் அரிசிக்குக் கூடுதல் முக்கியத்துவம் இருக்கத்தான் செய்தது. ஆற்றுப் பாசனம், ஏரிப் பாசனம் என நீர் வசதி நிரம்பிய பகுதிகளில் இரண்டு மூன்று போகங்களாக நெல் விளைவிக்கப்பட்டது. என்னதான் சிறுதானியங்கள் சத்து மிகுந்தவை என்றாலும் ஒரு விசேஷம், சடங்கு, சம்பிரதாயம், கொண்டாட்டங்கள் அனைத்திலும் முதலிடத்தைப் பிடித்திருப்பது நெல்லும் அரிசியும்தான். அதற்குப் பின்புலத்திலும் ஒரு காரணி உண்டு என்றாலும் இங்கே அதற்குள் இறங்க வேண்டாம். மறைந்த பிள்ளைச் சோறு மிதமான சுவையுடைய அரிசிச் சோறு செரிக்க எளிதானது. நிறைய எரிமச் சத்தை வழங்கக்கூடியது. உடல் பலவீனமானவர்களுக்கு, திட உணவு உண்ணத் தொடங்கும் குழந்தைகளுக்கு மிகவும் ஏற்றது. அரிசிச் சோறு வடிக்காத விவசாயக் குடும்பங்களில் குழந்தை இருந்தால், அக்குழந்தைகளுக்கு ஊட்டுவதற்கு அரிசிச் சோறு வடிக்கிறவர்கள் முதல் வேலையாகக் கிண்ணத்தில் போட்டு, சம்பந்தப்பட்ட வீட்டுக்குக் கொடுத்தனுப்பி விடுவார்கள். கொடுப்பவர்களுக்கும் பெறுகிறவர்களுக்கும் சண்டை இருந்தால்கூட ‘பிள்ளை சோறு’ கிண்ணம் நகர்வது நின்று போகாது. பிள்ளைச் சோறு தரத் தவறுவதும், பெரியவர்கள் சண்டையை முன்னிட்டுப் பிள்ளைச் சோற்றைப் பெற மறுப்பதும் பாவம் என்று கருதுகிற உயரிய பண்பு பசுமைப் புரட்சி வரையும் தமிழகக் கிராமங்களில் நீடித்தது. மறையாத பொங்கலின் சுவை ‘அமிழ்தினும் ஆற்ற இனிதேதம் மக்கள் சிறு கை அளாவிய கூழ்’ என்று வள்ளுவர் சொல்கிற அளவுக்கு இல்லாவிட்டாலும், பிள்ளைக்கு ஊட்டுவதற்காக அன்னையின் கை நையப் பிசைகிற சோறும் பெருமளவு இனிதுதான். சோற்றைப் பிசைகிற அம்மாவின் விரலிடுக்கில் பிதுங்கி நிற்கும் வெள்ளை முத்துகளை வழித்து நக்கி மகிழும் பெரிய பிள்ளைகளாக நீங்கள் இருந்ததில்லையா? கிராமத்துக் கோயில்களில் அன்றாடம் மாலை வேளையில் மணியடித்துப் பூசை செய்து அரச இலையில் பிடியளவு பொங்கல் தருவார்கள். பொங்கல் என்றாலே வெல்லம், நெய் என்ற படிமத்தை வழித்து எடுத்துவிடுங்கள். பச்சை நெல்லை பூசாரினி உரலில் இட்டுக் குற்றிய இளஞ்சிவப்பு அரிசியை எதுவுமே போடாமல் பொங்கி, கறுப்பாக எண்ணெய்ப் பிசுக்கு பிடித்த பிள்ளையாருக்குப் படைப்பார்கள். உள்ளங்கை பொத்துப் போகும் அளவுக்கான சூட்டுடன் அரச இலையில் தரப்படும் அந்தப் பொங்கலை ஆள்காட்டி விரலால் தொட்டு நாக்கில் வைத்தாலே, தலைக்குச் சுரீர் என்று ஏறும். அத்தனை சுவை. ஐம்பது ஆண்டுகளுக்கு முன்னர் நான் சுவைத்தது, நினைக்குந்தோறும் நாவில் நீர் ஊறச் செய்கிறது. அந்தச் சுவை அரை நூற்றாண்டில் எங்கே தொலைந்தது? பிளீச் செய்தது போன்ற இன்றைய மின்னலடிக்கும் பளீர் வெள்ளை அரிசி நமக்கு ஏற்றதுதானா? இதை எப்படிப் பயன்படுத்துவது என்பது குறித்து அடுத்தடுத்த வாரங்களில் பார்ப்போம். http://tamil.thehindu.com
  9. உயிர் வளர்த்தேனே 01: உணவைச் சேமித்த முதல் இனம் ‘உடலை வளர்த்தேன், உயிர் வளர்த்தேனே’ என்றார் திருமூலர். நம் உயிரை உடலில் நிலைக்கச் செய்வதற்காக உயிரை, வளர்ப்போம் என்கிறார் அவர். மிஞ்சிப் போனால் 120 ஆண்டுகள்வரை உயிரை வளர்த்துச் செல்ல முடியும். அதற்குப் பின்னர் எந்தக் கொம்பனின் உயிரும் உடலில் நிலைத்திருக்க முடியாது. அது சரி, உயிர் எப்படி வளரும்…? பிறக்கும்போது இரண்டு கிலோவாக இருக்கும் உடலை, நான்கைந்து முழுக் கோழிகளைத் தின்று, கன்வேயரில் வைத்துத் தள்ளுவதைப்போலக் கூடைக் கணக்காக முட்டைகளை வாய்க்குள் தள்ளி, மென்று தின்றால் தாடை வலித்துப் போகும். அப்புறம் அதை உணவுக் குழாயில் தள்ளி, குளியல் தொட்டி போன்ற கடாயில் எண்ணெய்க் குளியல் போட்ட ஊர்வன, பறப்பன, நடப்பனவற்றைப் பொரித்து கையில் கிடைத்ததையெல்லாம் உள்ளே தள்ளி, உடலை நானூறு கிலோ வரைக்கும்கூட வளர்த்தெடுக்கலாம். ஆனால் உயிரை….? உயிர் வளருமா…? மனித உயிர் வேறு வகையில் வளர்ந்திருக்கிறது. இந்த உலகில் தோன்றும் பல்லாயிரக் கோடிக்கணக்கான மற்ற உயிர்கள் தோன்றிப் பிறகு மறைந்தும் விடுகின்றன. ஆனால், மனித உயிர் மட்டுமே வளர்ந்துகொண்டே போகிறது. மற்ற உயிர்கள் எதன் கையிலும் நாளைக்கான உணவு இல்லை. கிடைத்ததைத் தின்பது அல்லது பசிக்கிறபோது தேடித் தின்பது அல்லது எஜமான் அளித்ததைத் தின்பது என்ற அளவில்தான் தம் உடலை வளர்த்து, உயிரை நிறைவு செய்துவிடுகின்றன. உலகில் உள்ள ஒட்டுமொத்த உயிர்களிலும் மனித இனம் மட்டுமே உணவைச் சேமித்து வைத்து உண்கிறது, தங்கள் எதிர்காலத்துக்கான உணவைச் சேமிக்கிறது. பறவைகள் உணவைத் தேடிச் சுமந்து வந்து, பறக்கும்வரை தம் குஞ்சுகளுக்கு ஊட்டுகின்றன. மனிதரைப் போலத் தானியங்களையும், பருப்புகளையும், தயார் நிலை உணவுகளையும் அடுத்தடுத்த மாதங்களுக்கென்று எந்த உயிரினமும் சேமித்து வைப்பதில்லை. சிங்கம் ஒரு கொடூர மிருகம் என்று நமக்குக் கற்பிக்கப்பட்டிருக்கிறது. எத்தனை நாள் பசிக்குப் பின்னர் சிங்கம் ஒரு உயிரினத்தை வேட்டையாடினாலும், அந்த இறைச்சியை நேற்றைய பசிக்கோ, கிடைக்குமோ கிடைக்காதோ என்ற அவநம்பிக்கையில் நாளைக்கும் சேர்த்தோ உண்பதில்லை. வேட்டையாடிய சிங்கம் உண்ணும்வரை அதன் அருகிலேயே செந்நாய், நரி போன்ற சிறு விலங்குகளும், பறவைகளும் காத்துக்கொண்டிருக்கும். அவற்றைப் பார்த்து சிங்கம் முறைப்பதோ உறுமுவதோ “என் இறைச்சியைப் பங்கு போட்டுக்கொள்ள நீங்க யாரு’’ என்று துரத்துவதோ இல்லை. தன் விருந்தை முடித்து நாக்கால் வாயைத் துடைத்துக்கொண்டு அங்கிருந்து அகன்றுவிடுகிறது. மனிதர்கள் மட்டுமே மதியத்துக்கான சோற்று டப்பாவைத் தூக்கிக்கொண்டு ஆபீஸ் போகிறார்கள். மனிதர்கள் மட்டுமே நாளைக்கான மாவை பிரிட்ஜில் வைத்திருக்கிறான். மனிதர்களின் வீட்டில் மட்டுமே மூட்டை அரிசியும் பருப்பும் தவமிருக்கின்றன. மனிதர்களுக்காக மட்டுமே வேகன் வேகன்களாக தெற்கிலிருந்து நெல்லும், வடக்கிலிருந்து கோதுமையும் ரயிலில் கூகூவென்று கூவிக்கொண்டு விரைகின்றன. ஒரு சாயல்குடிக்காரரிடம் கடிபடுவதற்காக பண்ணை ஆப்பிள் சான்பிரான்சிஸ்கோ ஊரகப் பகுதி காற்றில் உள்ள ஈரப்பதத்தை உறிஞ்சுகிறது. கனடாவில் தயாராகும் ஒரு ஊக்க மருந்துக்காகக் கேரளத் தேங்காய் ஏற்றுமதியாகிறது. (உள்நாட்டில் சாப்பிட்டால் அது கொலஸ்ட்ரால், அங்கே சாப்பிட்டால் அது உடலுக்கு வலு தரும் மருந்து. அதுதானே சூட்சுமம்). மனிதர்களுக்காகவே மலை மலையாகத் தானியங்கள், மத்தியச் சேமிப்பில் குவிக்கப்படுகின்றன. ஆதி மனிதர்கள் உணவு சேமிக்கத் தொடங்கியதிலிருந்தே உயிரின் வளர்ச்சி ஆரம்பம் ஆகிவிட்டது. எப்படி..? தழைகள், கனி, காய், கிழங்கு, இறைச்சி, பால் (இதுவே அறிமுகமான படிநிலை) என்று இருந்த உணவுமுறையில் தானியத்தை உண்ண முடியும் என்று ஆதி மனிதர்கள் கண்டுகொண்டதே, மனித உயிரின் வளர்ச்சியில் ஒரு முக்கியமான கட்டம். அவ்வளவு ஏன், தாய் முலைப்பாலை மட்டுமல்ல, இன்னொரு விலங்கின் பாலும் குடிக்கத் தகுந்ததுதான் என்ற கண்டுபிடிப்புகூட மிக முக்கியமான தாவல்தான். எந்த விலங்கு தன் பாலை நமக்கு அளிக்கும், எதன் பாலை நம் உடல் செரிக்கும் என்பதைக் கண்டுபிடிக்க எத்தனை மூதாதையர் தம் தாடையிலே ரத்தம் சொரிந்தனரோ? அடுத்த வாரம்: செங்கிஸ்கான் பாணி நல்லதா? கெட்டதா? தொடர்புக்கு: kavipoppu@gmail.com எழுத்தாளர் போப்பு என்ற புருசோத்தமன் கவிதை, கதைகள் எழுதியிருந்தாலும், தற்போது உடல்நல எழுத்தாளராக அறியப்பட்டுள்ளார். மொழிபெயர்ப்புப் பணி, இயற்கை சார்ந்த உணவகம், அக்குபங்சர் மருத்துவம் என வேறுபட்ட அனுபவங்களைக் கொண்டவர். உணவு-உடல்நலன் சார்ந்து சமீப காலத்தில் அவர் எழுதிய நூல்கள் பிரபலமானவை. தொடரும்... http://tamil.thehindu.com/general/health/உயிர்-வளர்த்தேனே-01-உணவைச்-சேமித்த-முதல்-இனம்/article9118462.ece
  10. நலம் நல்லது!

    பிளாஸ்ரிக் போத்தல்களை பயன்படுத்துபவரா நீங்கள்...! எம்முடைய இல்லங்களில் இருக்கும் மாணவர்கள் அல்லது மாணவியர்கள் தங்களது பாடசாலைக்கு செல்லும் போது தங்களுடன் பிளாஸ்ரிக் போத்தல்களில் குடிநீரை எடுத்துச் செல்வது வழக்கம். ஒரு சில குடும்பங்களில் உள்ள பிள்ளைகள் அந்த போத்தல்களை மாற்றுவது கிடையாது. 6 மாதம் அல்லது ஒரு வருடம் கூட அதனை எடுத்துச் செல்கிறார்கள். ஆனால் இது போன்று தொடர்ச்சியாக பிளாஸ்ரிக் போத்தல்களை தண்ணீருக்காக பயன்படுத்தும் போது, அவற்றால் காய்ச்சல் ஏற்படுகிறது என்று தற்போது கண்டறியப்பட்டிருக்கிறது. அத்துடன் இவ்வகையான பிளாஸ்ரிக் போத்தல்களில் தண்ணீரை தொடர்ச்சியாக எடுத்துச் செல்லும் அதில் பாக்டீரியாக்கள் தங்கிவிடுகின்றன என்றும். இவை தான் உடலுக்கு ஆரோக்கிய சீர்கேட்டை ஏற்படுத்துகிறது என்றும் கண்டறிந்திருக்கிறார்கள். அத்துடன் ஒவ்வொரு மாதத்திற்கும் ஒரு புதிய பிளாஸ்ரிக் போத்தல்களை பயன்படுத்தலாம் என்றும். தொடர்ச்சியாக 3 மாதத்திற்கு மேல் ஒரு போத்தல்களை பயன்படுத்தக்கூடாது என்றும் அறிவுறுத்தியிருக்கிறார்கள். பிளாஸ்ரிக் போத்தல்களில் குடிநீரை அருந்துவதை தவிர்ப்போம். ஆரோக்கியம் காப்போம். டொக்டர் நந்தகுமார் தொகுப்பு அனுஷா. தகவல் : சென்னை அலுவலகம் http://www.virakesari.lk/article/24623
  11. காய்ச்சல்... சில குறிப்புகள்! - நலம் நல்லது! - 1 #DailyHealthDose மருத்துவர் கு.சிவராமன் ஆனந்த விகடனில் வெளியான ‘ஆறாம் திணை’, ‘ஏழாம் சுவை’, ’உயிர் பிழை’ தொடர்கள் மூலம் பரவலான வாசகர்களின் கவனத்தைப் பெற்றவர் மருத்துவர் கு.சிவராமன். இவருடைய `நலம் 360’ மற்றும் `நாட்டு மருந்துக்கடை’ ஆகியவையும் மிக முக்கியமான மருத்துவ நூல்கள். உணவு எப்படி மருந்தாகிறது; இயற்கை, நோய் வராமல் காக்க நமக்கு என்னவெல்லாம் வழங்கியிருக்கிறது என்பதையெல்லாம் ஆதாரபூர்வமாக, அழுத்தமாக எடுத்துச் சொல்பவர். நம் ஆரோக்கியத்துக்கு வழிகாட்ட, இனி விகடன் டாட்.காமில் திங்கள் முதல் வெள்ளி வரை சின்னச்சின்ன டிப்ஸுகளையும் வழங்க இருக்கிறார். பின்பற்றுவோம்... பயன்பெறுவோம்! மருத்துவர் கு.சிவராமன் மழைக்காலத்தில் அதிக அளவில் நம்மைத் தாக்குவது காய்ச்சல். இப்போதெல்லாம் காய்ச்சல் வந்தாலே, `என்னது காய்ச்சலா? உஷாரா இருங்க... எல்லா பக்கமும் `டெங்கு’வாம், `சிக்குன்குனியா’வாம்... ஏதோ மர்மக் காய்ச்சலாம்!’ எனக் கலவரத்துடன்தான் காய்ச்சலை எதிர்கொள்கிறோம். மூன்று நாட்களுக்கு மேல் ஜுரம் இருந்தால், மருத்துவர் பரிசோதனைக்கு நீட்டும் பட்டியலில் டைஃபாய்டு, மலேரியா, காமாலை, டெங்கு, சிக்குன்குனியா... என விதவிதமான பரிந்துரைகள். காய்ச்சல் ஏன் வருகிறது, மழைக்காலத்தில் அதைத் தவிர்ப்பது எப்படி எனத் தெரிந்துகொள்வோமா? * காய்ச்சல் ஒரு தனி நோய் அல்ல. வெள்ளை அணுக்களைக்கொண்டு, நமது உடல் கிருமிகளுடன் நடத்தும் யுத்தத்தில் கிளம்பும் வெப்பமே காய்ச்சல். வலுவான நோய் எதிர்ப்பு ஆற்றல் இல்லாதபோது ஜுரம் கொஞ்சம் நீடிக்கலாம். புதுவகையான பாக்டீரியா, வைரஸ்களுக்கு எதிரான யுத்தம் எனில், ஜுரம் நீடிக்கலாம். உடலில் வெள்ளை அணுக்கள் - கிருமிகளுக்கு இடையிலான யுத்தத்தில் ரத்தத் தட்டுக் குறைவு, உடல் நீர்ச்சத்துக் குறைவு, ஈரல்-மண்ணீரல் வீக்கம் எனத் தொந்தரவுகள் அதிகரிக்கும். அதுவே உடலின் இயல்பு வாழ்க்கையைப் பாதித்து, சுகவீனத்தை (ஜுரத்தை) உண்டாக்கும். * இனிப்பு, பால், நீர்க்காய்கறிகளைத் தவிருங்கள். மருத்துவர் பால் அருந்தச் சொல்லியிருந்தால், அதில் மிளகு, மஞ்சள் தூள், பனங்கற்கண்டு சேர்த்து, காலை 8 மணி முதல் மாலை 6 மணிக்குள் மட்டும் அருந்துங்கள். இரவிலும் அதிகாலையிலும் வேண்டாம்! * ஆவி பிடித்தல், நெற்றிக்குப் பற்று இடுவது, சுக்கு-மல்லிக் கஷாயம் அருந்துதல்... என வாரம் ஒரு நாள் கண்டிப்பாகச் செய்யுங்கள். சூடான தேங்காய் எண்ணெயில் கற்பூரம் கலந்து தயாரிக்கப்படும் கற்பூராதி தைலத்தை, குழந்தைகளுக்கு நெஞ்சில் தடவிவிடுங்கள். * மிளகு, மஞ்சள், லவங்கப்பட்டை, கிராம்பு, கொள்ளுப் பயறு, நாட்டுக்கோழி முதலான, உடலுக்கு வெம்மை தரும் உணவுகளை அவ்வப்போது சேர்த்துக்கொள்வது நல்லது. * காலையில் கரிசாலை முசுமுசுக்கை இலை போட்ட தேநீர், மதியம் தூதுவளை மிளகு ரசம், மாலையில் துளசி பச்சைத் தேயிலை தேநீர்... இவை மழைக்கால நோய் எதிர்ப்பு உணவுகள். * ரத்தத் தட்டுக்களை உயர்த்த, சளியை வெளியேற்ற, இருமலை நீக்க, இரைப்பையை ஆரோக்கியமாக வைத்திருக்க மிகச் சிறந்த மருந்து ஆடுதொடா இலைச்சாறு. மருத்துவர் ஆலோசனையுடன், சரியான இலைதானா என உறுதிப்படுத்திக்கொண்டு ஓரிரு இலையை அரைத்து, சாறு எடுத்து, மழைக்காலத்து சளி காய்ச்சலை எளிதில் போக்கலாம். * இரு சக்கர வாகனத்தின் முன்புறத்தில் குழந்தைகளை அமர்த்தி, மாலை, இரவு நேரங்களில் பயணம் செய்யாதீர்கள். வாடைக் காற்று தாக்காமல் காதுகளைக் கவனமாக மூடிக்கொள்வது நல்லது! * முதலில், காய்ச்சல் வராமல் தடுக்க முழு முயற்சி எடுக்க வேண்டும். தண்ணீரைச் சேமிக்கும் பாத்திரத்தை மூடி வையுங்கள். வீட்டுக்கு வெளியே மூலையில் நீங்கள் போட்டு வைத்திருக்கும் பழைய பெயின்ட் டப்பா, ரப்பர் டயர், பாத்திரங்களை அகற்றுங்கள். வேப்பம் புகையோ, கார்ப்பரேஷன் கொசுவிரட்டிப் புகையோ காட்டுங்கள். கொதித்து ஆறிய தண்ணீரை மட்டுமே அருந்துங்கள். சூடாக, அப்போது சமைத்த உணவை உண்ணுங்கள். லேசான தும்மல், ஜுரம் இருக்கும்போது, பொது இடங்களுக்குச் செல்வதைத் தவிருங்கள். http://www.vikatan.com/news/health/71359-treatment-tips-for-fever-nalam-nallathu-1-dailyhealthdose.art
  12. ஜப்பானில் அதிசக்தி வாய்ந்த நிலநடுக்கம்! ஜப்பானின் அணு உலை நகரமான ஃபுகுஷிமாவை சற்றுமுன் அதிசக்தி வாய்ந்த நிலநடுக்கம் தாக்கியுள்ளது. ரிக்டர் அளவில் 6.2 எனப் பதிவாகியிருக்கும் இந்த நிலநடுக்கத்தினால் ஏற்பட்ட பாதிப்புகள் குறித்து தகவல்கள் எதுவும் உடனடியாக வெளிவரவில்லை. உள்ளூர் நேரப்படி அதிகாலை 2.37 மணிக்கு ஏற்பட்டுள்ள இந்த நிலநடுக்கம், நிலத்தில் இருந்து பத்து கிலோமீற்றர் ஆழத்தில் ஏற்பட்டுள்ளதாகவும் அளவிடப்பட்டுள்ளது. http://www.virakesari.lk/article/24713
  13. ஊஞ்சல் தேநீர்

    ஊஞ்சல் தேநீர் யுகபாரதி - 29 பெரியார்தாசன், கல்லூரியில் பேராசிரியராக இருந்த காலத்தில் ஊழல் அரசியல்வாதி களுக்கு எதிராக மிகக் காத்திரமாகப் பேசிவந்தார். அப்போது எம்ஜிஆர் முதலமைச்சர். அவருக்கு எதிராகவும், அவர் நக்ஸலைட்டுகளை ஒடுக்க எடுத்து வந்த நடவடிக்கைக்காகவும் கடுமையாக விமர்சிக்கிறார். இந்தத் தகவல் காவல்துறை உயரதிகாரி மோகன்தாஸ் மூலமாக எம்ஜிஆருக்குத் தெரிய வருகிறது. ஒரு கல்லூரியில் பேராசிரியராக இருப்பவர் நக்ஸலைட்டுகளுக்கு ஆதரவாகப் பேசிவருவது குற்றமாகப் பார்க்கப்பட்டு, கைது வாரண்டும் பிறப்பிக்கப்படுகிறது. இதையடுத்து எம்ஜிஆர் ‘கைது செய்வதற்கு முன்பாக பெரியார்தாசனை வந்து என்னைச் சந்திக்கச் சொல்லுங்கள்...’ என்கிறார். மாநிலத்தின் முதலமைச்சர் தன்னுடைய பேச்சினால் கோபமுற்றிருப்பதை அறிந்த பெரியார்தாசன், தனக்கு வந்து விட்ட எந்த பாதிப்புக்காகவும் தன் பேச்சை வாபஸ் பெற்றுக்கொள்ள எண்ணவில்லை. மாறாக எம்ஜிஆரை சந்திக்கிறார். எம்ஜிஆரும், ‘நானும் உங்கள் பேச்சின் ரசிகன்தான். எதையும் வெளிப்படையாகப் பேசக்கூடியவர் என்பதை அறிவேன். இருந்தாலும் ஒரு கல்லூரிப் பேராசிரியராக இருந்துவரும் நீங்கள் மாணவர்களை கிளர்ச்சிக்குத் தூண்டுவது சரியா? சட்டத்தின் பார்வையில் நீங்கள் தவறாகப் புரிந்துகொள்ளப்பட்டாலும் மனசாட்சிக்கு விரோதமில்லாமல் நடப்பவர் என்பதால் நடவடிக்கையைத் தவிர்க்கிறேன்...’ என கைது வாரண்டை கிழித்துவிடுகிறார். எங்கே பேராசிரியர் வேலையும் பறிபோய்விடப் போகிறதோ என அச்சத்தோடு போன தன்னை, ஆசையோடு சாப்பிட வைத்து, மறுக்க மறுக்க ஒரு கட்டு பணத்தாளை சட்டைப் பாக்கெட்டில் திணித்தனுப்பிய எம்ஜிஆரை அதன்பிறகும்கூட பெரியார்தாசன் விமர்சிக்காமல் இல்லை. எம்ஜிஆர். நல்லவிதமாகத் தன்னிடம் நடந்துகொண்டார் என்பதற்காக, கைது செய்யாமல் காசு கொடுத்து கெளரவித்தார் என்பதற்காக அவருடைய மக்கள் விரோத ஆட்சியை கண்டிக்காமல் இருக்கமாட்டேன் என்றே பேசிவந்தார். ‘‘ஒரு நல்ல கருத்து வெகு ஜனங்களைப் பற்றிக்கொண்டால், அது பெளதீக சக்தியாக மாறும்...’ என்ற காரல் மார்க்ஸை பெரியார்தாசன் வெகுவாகப் பின்பற்றினார். கற்பதையும் கற்பிப்பதையும் தொடர்ந்து செய்துவந்த அவர், “மீனுக்கு நீந்தவும் கன்றுக்குட்டிக்கு தாவவும் கற்பிக்க வேண்டியதில்லை. ஏனெனில், கற்றுக்கொண்டே பிறப்பவை இதர உயிரினங்கள். கற்றுக் கொள்வதற்காகவே பிறப்பவர்கள் மனிதர்கள்!” என்பார். “சாப்பிடுவதற்காக ஒரு கவளம் சோற்றை கையில் எடுக்கின்ற போது அதில் நூறு பேருடைய வியர்வையாவது கலந்திருக்கிறது என்பதை உணர வேண்டும். அப்போதுதான் இந்த சமூகத்தின் மீது நமக்கு அன்பு வரும். அக்கறை வரும். நமக்குத் தேவையான ஒவ்வொன்றையும் தருகின்ற சமூகத்திற்கு நாமும் எதையாவது தர வேண்டும் என்ற எண்ணம் வரும்...’’ என மேடைதோறும் சொல்லி வந்தார். ஒரு நல்ல பேச்சைக் கேட்டவுடன், நமக்குள் ஏற்பட வேண்டிய நல்ல விளைவுகளை அவருடைய சொற்பொழிவுகள் செய்து வந்தன. மாதம் ஐந்து கூட்டமென தொடர்ந்து தனி ஒருவராக இருநூற்றி ஐம்பது கூட்டங்களுக்குமேல் சொற்பொழிவு செய்திருக்கிறார். அவர் பேச்சைக் கேட்கையில் நமக்கு சோர்வே வராது என்பது விஷயமில்லை. அவருமே சோர்வில்லாமல் பேசுவதுதான் வியப்பு. ஒருமுறை மலைவாழ் மக்கள் மாநாட்டில் அவருடைய பேச்சைக் கேட்ட அன்பர்கள், நினைவுப் பரிசாக பாம்பைக் கையில் கொடுத்திருக்கிறார்கள். அச்சம்பவத்தை சிரிக்க சிரிக்க அவர் சொல்ல கேட்க வேண்டும். “பாம்பை மாலையாகப் போட வந்ததுகூட பிரச்னையில்லை. அதை வீட்டுக்கு எடுத்துப்போங்கள் என்றார்களே அங்குதான் டகிலடித்தது. இத்தனை வீரமாகப் பேசிய நீ பாம்புக்கு பயந்தவனா என அவர்கள் எண்ணியிருக்கலாம். அதற்காக, ஆடு பாம்பே விளையாடு, பாம்பே என்று பாடும் சித்தராகவா முடியும் சொல்லுங்கள்..!” என்று கேட்பார். இப்படி ஊர்தோறும் விடாமல் அவர் பேச்சுக்குக் கிடைத்த எதிர்வினைகளும் திகிலூட்டும் சம்பவங்களும் எத்தனையோ உண்டு. எதைச் செய்தாலும் மனம் ஒன்றி செய்யும் தன்மையை தன்னுடைய பள்ளித் தமிழாசிரியர் சுந்தரமூர்த்தி வாத்தியாரிடமிருந்து பெற்றதாக அவரே ஒரு நேர்காணலில் குறிப்பிட்டிருக்கிறார். “வாக்குண்டாம் நல்ல மணமுண்டாம் மாமலராள் நல்நோக்குண்டாம், துப்பார்த் திருமேனி தும்பிக்கையான் பாதம், தப்பாமல் சார்வார் தமக்கு” என்ற பாடலை விநாயகர் பாடலாக நாம் நினைத்துக்கொண்டிருக்கிறோம். உண்மையில், அது விநாயகர் பாடலே அல்ல. “எவன் ஒருவனுக்கு திக்குவாயிருக்கிறதோ, எவன் ஒருவனுக்கு சித்தப்பிரமை பிடித்திருக்கிறதோ, எவன் ஒருவனுக்கு கண்பார்வை மங்கலாக இருக்கிறதோ, அவனுக்கான மருத்துவப் பாட்டு அது. சித்த மருத்துவப் பாட்டைத்தான் இந்த சிகாமணிகள் விநாயகர் துதியாக்கி, அதை நம்மையும் பாட வைத்திருக்கிறார்கள். ‘துப்பார்த் திருமேனி’ என்றால் இன்றைக்கு நம்மால் குப்பைமேனி என்றழைக்கப்படும் இலையே அன்றி வேறில்லை. இரவில் அவ்விலைமீது குப்பையைக் கொட்டினால் அக்குப்பை காலையில் இருக்காது. தன்னைத் தானே தூய்மையாக்கிக் கொள்ளும் இலை அது. அதேபோல தும்பிக்கையான் பாதம் என்றால் தும்பைப்பூ. குப்பைமேனி இலையையும் தும்பைப்பூவையும் கையாந்தகரை வேரையும் சேர்த்து கசாயமாக்கிக் குடித்தால் திக்குவாய் சரியாகிவிடும் என்றுதான் பாடினார்களே தவிர, விநாயகரைத் தொழுதால் வினை தீரும் என்று பாடவில்லை. தமிழர்கள் என்றைக்கோ எழுதிய மருத்துவப் பாட்டின்படி கசாயம் குடித்து சரியான திக்குவாயன்தான் உங்களிடம் பேசிக்கொண்டிருக்கும் பெரியார்தாசன்!” என்றும் இன்னொரு இடத்தில் சொல்லியிருக்கிறார். மேடைப் பேச்சுக்களை வெறும் கைதட்டல்களுக்காக அவர் நிகழ்த்தியதில்லை. நேற்றைக்கு ஒரு மேடை, இன்றைக்கு ஒரு மேடை என மேடைகள் வித்தியாசப்பட்டாலும் அவர் ஒரே மாதிரியான கொள்கையைத்தான் கடைப்பிடித்தார். எதிரே இருப்பவர்கள் உற்சாகத்தோடு தன்னை உள்வாங்கிக் கொள்ளவேண்டும் என்பது தான் அந்தக் கொள்கை. அந்தந்த கணத்து அதிசயங்களை அவர்போல யாரும் கொண்டாடியதில்லை. நேற்று ஒரு மாதிரியும் இன்று ஒரு மாதிரியும் தோன்றினால் அதையும் மேடையிலேயே சொல்லிவிடுவார். ‘சைவப் பற்றாளனாக இருந்த தான் பெரியாரின் சீடனாகி, புத்தரை தரிசித்து, நல்மன பெரியார்தாசனாக நம்பிக்கை பெற்று, அப்துல்லாவாக தற்போது ஏக இறைவனை தொழத் தொடங்கியிருக்கிறேன்’ என்று ஒளிவு மறைவில்லாமல் தன் நிலையை அறிவித்தார். தன்னுடைய மாறுதல்கள் ஒவ்வொன்றும் சுய தேவைகளுக்காகவோ லெளகீக வாய்ப்புகளுக்காகவோ நிகழ்ந்ததில்லை என்பதை தெளிவுபடுத்துவதாகவே அவருடைய இறுதியுரைகள் அமைந்துள்ளன. “இதுயாவுமே தத்துவத் தேடலில் நானடைந்த படிப்பினைகள். என்னை பின் தொடர்வதில் சிலருக்கு சிரமம் இருக்கலாம். ஆனால், நான் செல்லும் பாதைக்கு உண்மையாயிருக்கிறேன். சந்தேகத்தோடு என்னைப் பார்க்கிறவர்களுக்கு என் சத்தியத்தைப் பிரமாணப்படுத்த வேண்டியதில்லை...” எனவும் கூறியிருக்கிறார். மாறிக்கொண்டே இருப்பதுதான் வளர்ச்சி என்றும் அம்மாற்றித்தினால் நிகழ்வதுதான் கொள்கை என்றும், அவரே அவரை சோதனைக்கு உட்படுத்திக் கொண்டார். ஏற்றுக்கொண்ட ஒன்றுக்கு விசுவாசமாக இருப்பது ஒருவகையென்றால் அதுவாகவே மாறிவிடும் இயல்புதான் அவருடையது. தான் இஸ்லாத்தைத் தழுவிக்கொண்டதாக அறிவித்தவுடன் எழுந்த விமர்சனங்களையும் அவர் அப்படித்தான் எதிர்கொண்டார். தொலைபேசியிலும் நேரிலும் அவரிடம் இதுகுறித்து விவாதித்தவர்களை கடுமையான சொற்கள் கொண்டு அவர் காயப்படுத்தவில்லை. நெஞ்சைத் திறந்து காட்டிய பின்னும் தன் நேர்மையைச் சந்தேகிப்பவர்களை ஒரு புன்னகையோடு அவர் கடந்துபோனார். நீண்ட ஆய்வுக்கும் வாசிப்புக்கும் பின்பே இஸ்லாத்தை தழுவியதாக அவர் சொன்னதை கருத்துமுதல்வாதிகள் ‘கதைவிடுகிறார்’ என்றார்கள். இதுவரை மறுமையிலோ இறைக்கோட்பாட்டிலோ நம்பிக்கையில்லாதவருக்கு திடீரென்று எப்படி ஞானம் வந்தது எனவும், மறுபிறவி உண்டென்று இப்போது உணர்கிறவர் நாத்திகம் பேசியது பித்தலாட்டமா எனவும் கேட்டார்கள். அவர் எந்த முடிவுகளையும் நிர்ப்பந்தத்தால் எடுக்கவில்லை என்று மட்டும் தெரிகிறது. தன் தரப்பை நியாயப்படுத்துவதற்காக எந்த அஸ்திரங்களையும் பிரயோகிக்கக்கூடியவர் அல்ல அவர். தெரிதலிலும் அறிதலிலும் அதன்பின்னான புரிதலிலுமே அவர் பயணித்தார். அவருடைய கல்லூரிக் காலங்களில் இருந்தே பலவிதமான கருத்துமோதல்களின் களமாக அவரிருந்திருக்கிறார். பச்சையப்பன் கல்லூரி நிர்வாகம் ஆள்குறைப்பு நடவடிக்கையில் ஈடுபட்டபொழுது, அதை வீட்டுக்குக்கூட தெரிவிக்காமல் தொடர் பசியுடன் நூலகத்திலேயே கழித்த பொழுதுகள் அவருடையவை. குருவிக்கரம்பை சண்முகம் மூலம் விஷயமறிந்த சுரதா, மதிய வேளைகளில் தனக்கு வாங்கிக் கொடுத்த ஜனதா சாப்பாட்டை அவர் எங்கேயும் சொல்லாமல் இருந்ததில்லை. பல மொழிகளைக் கற்றிருந்தார் என்றாலும், அவராலும் சில கேள்விகளுக்குப் பதில் சொல்லமுடியாமல் போனது உண்மைதான். இன்றைக்கு திருப்புகழ் சந்தத்தை வைத்துக்கொண்டு யாரால் பாட்டெழுத முடியுமென்று கேட்ட சுரதாவை கவிதைகளால் வெல்ல முடிந்த பெரியார்தாசனுக்கு அரபு மொழியைக் கற்க முடியாமல் போனதேயென்ற வருத்தமிருந்தது. காய்த்தல் உவத்தலற்று பேசும் அவர் கணீர் குரலைக் கேட்ட இயக்குநர் பாரதிராஜா, தம்முடைய ‘கருத்தம்மா’ திரைப்படத்தில் குணச்சித்திர நடிகராக அவரை அறிமுகப்படுத்தினார். நடித்த முதல் படத்திலேயே குணச்சித்திர நடிகருக்கான தேசிய விருதையும் அவர் பெற்றார். எத்தனையோ மேடைகளில் வாய்கிழியப்பேசிய தன்னை, வாய்பேச முடியாத கதாபாத்திரத்தில் நடிக்க வைத்த சினிமாவையும் அதற்குக் கிடைத்த தேசியவிருதையும் எள்ளலோடு பகிர்ந்துகொள்வதை வழக்கமாக வைத்திருந்தார். பெண் சிசுக்கொலை பெரும் பிரச்னையாக இருந்த அந்தக் காலக்கட்டத்தில் ‘கருத்தம்மா’ திரைப்படம் வெளிவந்தது. காலத்தின் தேவை கருதி எடுக்கப்பட்ட அத்திரைப்படத்தில் நடித்ததும் சமூகப்பணியே என்னும் எண்ணம் அவரிடமிருந்தது. அதன்பின்னும் பல படங்களில் அவர் நடித்திருக்கிறார். இருபத்தியாறு படங்களுக்குமேல் நடித்திருப்பதாக செய்தி. என்றாலும், ‘கருத்தம்மா’ அளவுக்கு வேறு எந்த பாத்திரத்திலும் அவர் சோபிக்கவில்லை. திரைத்துறைக்கு வந்தபிறகும் தம்முடைய அசலான பேச்சுக்கலையை அவர் கைவிடவில்லை. மக்கள் தன்னிடமிருந்து எதிர்பார்ப்பது நடிப்பை அல்ல என்பது அவருக்குத் தெரிந்திருந்தது. மெய்யையும் ஞானத்தையும் எதிர்பார்த்த மக்களிடம், பொய்யாகவும் போலியாகவும் நடந்துகொள்ள அவர் விரும்பவில்லை. சில நேரங்களில் அவர் தவறாகப் புரிந்துகொள்ளப்பட்டிருக்கிறார். பாக்கியம் சங்கரின் நூல் வெளியீட்டு விழாவில் அவர் சொன்னதுபோல, காலத்திற்கேற்ப கருத்துக்களும் மாறிக்கொண்டே இருக்கின்றன. எந்த கருத்தையும் தைரியமாக எதிர்கொள்ளும் திராணி வேண்டும். மேலும், ஒன்றே சிறந்ததென்று தொங்கிக்கொண்டிருக்கக் கூடாது. உண்மையில், ஒரு பகுத்தறிவாளன் என்பவன் அறிவின் கண்களையும் அன்பின் கண்களையும் ஒன்றாகவே திறந்துகொள்கிறான். இதிலுள்ள விநோதம் என்னவென்றால், அவன் கண்களை மூடிக்கொண்ட பிறகுதான் அவனையும் அவன் காட்டியதையும் இந்த உலகம் பார்க்கத் தொடங்குகிறது. (பேசலாம்...) kungumam.co.
  14. ஊஞ்சல் தேநீர் யுகபாரதி புதிய தொடர் ஆரம்பம் - 1 ‘தயாராயிருங்கள் காம்ரேட். நாளையோ, நாளை மறுநாளோ புரட்சி வந்துவிடும். கவலைகள் மடியப் போகின்றன. இழிவுகளும் கேடுகளும் தங்கள் மூட்டைகளைக் கட்டிக்கொண்டு கிளம்பக் காத்திருக்கின்றன. காலம் நம்மை நோக்கி வருகிறது. கவனமாயிருங்கள்’ என யாரோ சில பேர், லட்சிய விதைகளை நமக்குள் விதைத்துக்கொண்டே இருக்கிறார்கள். இவர்களால் தான், ஓரளவாவது உயிர்ப்போடு இருக்கும் இன்றைய வாழ்வை சூனியம் கவ்வாதிருக்கிறது. சொந்த நலனை விட்டொழித்து தம்முடைய அந்திமக் காலம் வரை உழைக்கும் அந்த ஒரு சிலரே வரலாறுகளையும் உருவாக்குகிறார்கள். ஆனாலும், உலக வரலாறுகள் முழுக்க தவறாகவே எழுதப்படுகின்றன. தங்களை உருவாக்க உதவியவர்களை, உழைத்தவர்களை அது ஒருபோதும் உண்மையாகக் குறித்து வைப்பதில்லை. ஏழாம் வகுப்பு இறுதித் தேர்வு விடுமுறையில் எனக்கும் புரட்சி செய்து வரலாறாகும் எண்ணம் இருந்தது. அப்போது தஞ்சாவூர் பூக்காரத் தெருவிலுள்ள சுப்ரமணிய சுவாமி திருக்கோயிலுக்கு தட்டி போர்டு எழுதுபவனாக நானிருந்தேன். தட்டி போர்டு எழுதுதல் என்றால் ஒன்றுமில்லை. கோயிலில் நிகழ்வுறும் விழாக்களைப் பற்றி குறிப்பெழுதி விளம்பரப்படுத்தும் வேலை. சதுரமாகவோ வட்டமாகவோ அல்லது நீள் சதுரமாகவோ தட்டியைத் தயாரித்து, வெள்ளைக் காகிதங்களை ஒட்டி, அதன்மேல் அவர்கள் தரும் குறிப்புகளை எழுதித் தர வேண்டும். இன்று லட்சார்ச்சனை விழா, விநாயகர் சதுர்த்தி சிறப்பு பூஜை, தைப்பூசத் திருநாளை முன்னிட்டு பக்தர்கள் பால்காவடி, சந்தனக்காப்பு, பிரதோஷ சிறப்பு வழிபாடு என எதையாவது அந்தக் கோயில் குருக்களோ, ஈ.ஓ.வோ தரும் அறிவுரைப்படி எழுதித் தர வேண்டும். இதற்கென்றே கலர் மாத்திரைகள் என்னும் பெயரில் கலர் வில்லைகளை ஸ்டேஷனரிகளில் விற்பார்கள். ஒரு தட்டி எழுத குறைந்தது பத்து வில்லைகள் தேவைப்படும். அரக்கு கலர் வில்லைகளும் பச்சை நிற வில்லைகளும் கூடுதல் விலை. அரக்கு வில்லைகளை இந்து மதத்தினரும், பச்சை நிற வில்லைகளை இஸ்லாமிய அன்பர்களும் வாங்கிப் பயன்படுத்துவார்கள். மத நம்பிக்கைகள்கூட வண்ணங்களால்தான் கட்டமைக்கப்பட்டுள்ளன. எனக்கு அந்த வேலையைச் செய்வதில் அலாதி பிரியம் இருந்தது. ஓவியனாகும் வெறியில் அலைந்துகொண்டிருந்த காலம் அது. அந்த வேலையைத் திறம்படச் செய்வதற்காகவே எழுத்துருக்களை வெவ்வேறு வகையில் எழுதிப் பழகினேன். சுவர் விளம்பரங்களில் எழுதப்பட்டிருக்கும் எழுத்துருக்களை காப்பி செய்தோ, உள்வாங்கிக்கொண்டோ நானும் அதைப் போலவே எழுதிப் பார்ப்பேன். எழுதிப் பழகிய எழுத்துருக்களை தட்டி போர்டுகளில் செப்பமாகக் கொண்டு வர முயற்சி செய்வேன். பார்ப்பவர்களை வியக்க வைக்க வேண்டும் என்பதற்காகவே நீட்டியும் குறுக்கியும் எழுத்துருக்களை நான் படுத்திய பாடு கொஞ்ச நஞ்சமல்ல. சுப்ரமணிய சுவாமி கோயில் குருக்கள் கல்யாணராமன், என் அப்பாவின் அன்புக்குப் பாத்திரமானவர். அதன் காரணமாகவே அந்த வேலையை எனக்குக் கொடுத்தார்கள். அந்த வேலைக்குச் சொற்ப சம்பளமும் உண்டு. தவிர, பூஜை அன்று விசேஷ மரியாதையும், கூடுதல் பிரசாதமும் கிடைக்கும். படித்துக்கொண்டே வேலையும் செய்து வந்த என்னை அச்செயலுக்காகப் பலரும் பாராட்டுவார்கள். என்னை உற்சாகப்படுத்த அவர்கள் பாராட்டுவதை பெரிய விஷயமாக எடுத்துக்கொண்டு, ‘போன வார பிரதோஷத்திற்கு கூட்டம் வந்ததே என்னால்தான்’ என்பது போல பிகு செய்வேன். பக்குவப்படாதபோது கிடைக்கிற பாராட்டு பரிகாசத்துக்குரியது என்று இப்போது புரிகிறது. அது என் பிரதான வேலை இல்லை என்றபோதும் அதை மிகச் சிரத்தையோடு செய்து வந்தேன். முதல் நாள் தெரிவித்தால், மறுநாளே தட்டியைத் தயாரித்துத் தருவேன். விழாக்காலங்களில் இன்னும் விரைவாக. ஒருமுறை அவசர கதியில் விழா ஏற்பாடு செய்யப்பட்டது. என்னையும் அவர்கள் அவசரப்படுத்த, ‘லட்சார்ச்சனை’ என்பதற்குப் பதில் ‘லட்சியார்ச்சனை’ என்று எழுதிவிட்டேன். கல்யாணராமனும் கவனிக்காமல் தட்டியை கோயில் முகப்பில் கட்டிவிட்டார். அவ்வளவுதான்... ஒரே களேபரமாகிவிட்டது. பக்த கோடிகளின் இதயம் புண்ணாகும்படி எழுதிவிட்டதாகப் புகார் கிளம்பியது. உடனே, அவ்வேலையில் இருந்து என்னைத் தூக்கிவிட்டார்கள். அதைவிட ‘கம்யூனிஸ்ட்காரரின் பையன் என்பதால் வேண்டுமென்றே லட்சார்ச்சனையை லட்சியார்ச்சனை என்று எழுதிவிட்டதாக’ப் புரளி கிளப்பினார்கள். வேண்டு மென்றே நான் அப்படி எழுதவில்லை என்று சொல்லியும் அவர்கள் நம்பவில்லை. என் ஓவியக் கனவுகள் அந்த சம்பவத்திலிருந்து பாழ்படத் துவங்கின. ஆனாலும், நான் விடவில்லை. ஓவியங்களை வரைய முறையாகப் பயில எவ்வளவோ முயற்சி யெடுத்தேன். அன்று நவீன ஓவியத்தில் தேசிய விருது பெற்றிருந்த தும்பத்திக்கோட்டை ஓவியர் புகழேந்தியிடம் போய், ‘‘ஓவியம் கற்றுத் தர இயலுமா?’’ என்று கேட்டேன். ‘‘நீங்களாக வரைந்து உருவாகவேண்டியதுதான். ஓரளவு வரைந்து தேர்ச்சி பெற்றபின் அதற்கென்றிருக்கும் கவின் கலைக் கல்லூரியில் சேருங்கள்’’ என்றார். அந்த வார்த்தையைப் பின்பற்றி கொஞ்ச காலம் வரைந்து வந்தேன். சுவர் விளம்பரம் செய்துவந்த பலரையும் சந்தித்து என் ஆசையை வெளிப்படுத்தி, என்னையும் வேலையில் சேர்த்துக் கொள்ளக் கேட்டேன். பலரும் பலவித காரணங்களைச் சொல்லி திருப்பி அனுப்பினார்கள். நானாகச் சில ஓவியங்களைக் கிறுக்கினேன். என்றாலும், விவேகானந்தரை வ.உ.சியைப் போலவும் காரல் மார்க்ஸை ஏங்கல்ஸைப் போலவும்தான் வரைய முடிந்தது. எப்படியாவது எம்.எஃப்.உசேனாகும் தீவிரத்திலிருந்த என் ஆர்வத்தைப் பொருட்படுத்தி, என்னைத் தம்பியாக்கிக் கொண்ட அண்ணன்கள்தான் வீரமணியும் நீலமேகமும். இரண்டு பேருமே கட்சி மாநாடுகளுக்கு சுவர் விளம்பரம் எழுதுபவர்கள். அந்தக் காலத்தில் புகழ்பெற்றிருந்த தரணி சிமென்ட் விளம்பரத்தை ஊர்தோறும் எழுதியவர்தான் நீலமேகம் அண்ணன். இரவு நேரங்களில்தான் அவர்கள் பணி தொடங்கும். வண்ணக் கலவைகளை வாளியில் கரைத்துக்கொண்டு தெருத் தெருவாக தோழர்கள் துணையோடு புரட்சிகர கருத்துக்களை எழுதுவார்கள். நானும் அவர்களுடன் வாளி தூக்கவோ தூரிகையைக் கழுவித் தரவோ கிளம்புவேன். ஆளும் அரசைக் கண்டித்து அவர்கள் எழுதும்போது காவல்துறையினர் வந்துவிடுவார்கள். ‘இப்படியெல்லாம் எழுதக்கூடாது. கைது செய்வோம்’ என்பார்கள். ‘சரி, எழுதவில்லை’ என்று சொல்லி போக்குக் காட்டிவிட்டு வேறொரு சுவரில் போய் காவல்துறையின் அடக்குமுறைக்கு சவால் விடும் வாசகங்களை எழுதுவார்கள். அப்படித் தெருத் தெருவாகச் சுற்றிய காலத்தில்தான் சுவரெழுத்து சுப்பையாவைப் பற்றித் தெரிந்துகொள்ள முடிந்தது. தீவிர திராவிடக் கழகத் தொண்டரான சுவரெழுத்து சுப்பையா செய்துவிட்டுப் போயிருக்கும் காரியங்கள் போற்றுதலுக்குரியன. தனி ஒரு மனிதனாக தமிழகத் தெருக்கள் முழுக்க பகுத்தறிவுப் பிரசாரம் செய்திருக்கிறார். ‘கடவுளை மற, மனிதனை நினை’ என்ற வாசகம் நமக்குள் பதிய அவரே காரணம். ‘நெற்றியில் திருமண், நெஞ்சிலே களிமண்’ என்றும், ‘விஞ்ஞானி கண்டது விரைவு ராக்கெட், அஞ்ஞானி கண்டது விபூதி பாக்கெட்’ என்றும் அவரே சுயமாக முழக்கங்களை உருவாக்கினார். அவர் கலர் வில்லைகளைப் பயன்படுத்தவில்லை. நெடுஞ்சாலைகளில் உருகும் தாரையே மண்ணெண்ணெயைக் கலந்து மையாக்கியிருக்கிறார். தூரிகையைத் தேடவில்லை. தன் கைவிரலில் துணியைக் கட்டிக்கொண்டு சுவர்களில் எழுத்துருக்களைக் கொண்டுவந்திருக்கிறார்! பெரியார் ஒரு கூட்டத்தில் கலந்துகொள்கிறார் என்றால் முதல் நாளே அந்த ஊருக்குப் போய் தெரு முழுக்க எழுதுவார்; ‘மெகாபோன்’ மூலம் விளம்பரப்படுத்தியும் இருக்கிறார். மக்கள் பெருமளவு கூட்டத்தில் கலந்துகொண்டால், ‘நேற்று சுப்பையா வந்தாரா?’ என்று பெரியாரே கேட்கும் அளவுக்கு அவரது பணி இருக்கும். (பேசலாம்...) http://kungumam.co.in
  15. எம்ஜிஆர் 100 | 1 - அண்ணா குறிப்பிட்ட 'கவிதை'! M.G.R. தமிழர்களைப் பொறுத்த அளவில் தமிழாகி விட்ட ஆங்கில எழுத்துக்கள். ஒருவர் ஒரு துறையில் வெற்றி பெறுவதே கடினம். அதிலும் முதலிடம் பெறுவது இன்னும் கடினம். அதைத் தக்க வைத்துக் கொள்வது அதைவிட கடினம். சினிமா, அரசியல் இரண்டு துறைகளிலும் வெற்றி பெற்றதோடு மட்டுமல்லாமல், முதலிடம் பெற்று, அதை கடைசி வரை தக்க வைத்துக் கொண்ட அதிசயமே அசந்து போகும் அதிசயம் எம்.ஜி.ஆர். தமிழர்களை மயக்கும் மந்திரச் சொல்லாக அவர் பெயர் ஆனது ஏதோ மாயா ஜாலத்தால் அல்ல. அதற்கு பின்னணியில் இருக்கும் அவரது திட்டமிட்ட கடும் உழைப்பு. அவருக்கே அமைந்த வசீகரம். இந்த இரண்டும் கூட எல்லா நடிகர்களுக்கும் இருந்து விடலாம். ஆனால், மற்றவர்களுக்கு இல்லாத புகழும் பெருமையும் மக்கள் ஆதரவும் எம்.ஜி.ஆருக்கு மட்டுமே ஏன்? இவற்றை எல்லாம் தாண்டிய மனிதாபிமானம் என்பதே பதிலாக இருக்கும். இந்த குணத்தால் மக்களை அவர் நேசித்தார். அதனால்தான் மக்கள் அவரை நேசித்தனர். அதனால்தான், இதுவரை எந்த தமிழக முதல்வரும் செய்யாத சாதனையாக அடுத்தடுத்து மூன்று முறை ஆட்சியைக் கைப்பற்றினார். 1917-ம் ஆண்டு ஜனவரி 17ல் பிறந்த எம்.ஜி.ஆரின் நூற்றாண்டு விழா கடந்த மாதம் 17-ம் தேதி தொடங்கியுள்ளது. இலங்கையில் கண்டியில் பிறந்து, தந்தையை இழந்து, தாய் மற்றும் தமையனுடன் தமிழகம் வந்து நாடகத்தில் சேர்ந்து சினிமாவில் சிறிய வேடங்களில் தலைகாட்டி, கதாநாயகனாக உயர்ந்து, பொதுவாழ்வில் ஈடுபட்டு, கட்சியின் தலைவராகி, அவர் தமிழக முதல்வரானது எல்லாருக்கும் தெரிந்ததுதான். ஆனால், எம்.ஜி.ஆரின் இந்த நெடிய சாதனை வாழ்வில் ஊடாடி இருக்கும் சினிமா, அரசியல், தனிப்பட்ட வாழ்க்கையில் அவரது அருங்குணங்களை, திறமைகளை, சாதுர்யங்களை, மனிதாபிமானத்தை, பண்பு நலன்களை விளக்கும் வகையில், அவரது நூற்றாண்டு விழாவை முன்னிட்டு எம்.ஜி.ஆர். 100 என்ற பெயரில் 100 முத்துக்களை தொகுத்து வாசகர்களுக்கு அளிக்கிறோம். ‘‘மரத்திலே பழுத்த கனி தங்கள் மடியிலே விழாதா? என்று பலர் ஆவலாக காத்திருந் தனர். நல்லவேளையாக அது எனது மடியிலேயே வந்து விழுந்தது. அதை எடுத்து எனது இதயத்திலே வைத்துக் கொண்டேன். அந்த இதயக்கனிதான் எம்.ஜி.ஆர்.’’ எம்.ஜி.ஆரைப் பாராட்டி அறிஞர் அண்ணா கூறியதுதான் இது. அண்ணா எழுதிய ‘சிவாஜி கண்ட இந்து ராஜ்யம்’நாடகத்தில் நடிப்பதற்காக நடிகர் டி.வி.நாராயணசாமியால் அண்ணாவிடம் எம்.ஜி.ஆர். அறிமுகப்படுத்தப்பட்டார். சினிமா வில் துணை வேடங்களில் நடித்து வந்த எம்.ஜி.ஆர் கதாநாயகனாக நடிக்க முதலில் ஒப்பந்தமான படம் ‘சாயா'. படத்தின் கதாநாயகி டி.வி. குமுதினி. அப்போதே அவர் புகழ் பெற்ற நடிகை. புதுமுக நடிகரான எம்.ஜி.ஆருடன் நடிப்பதற்கு குமுதினியின் கணவர் எதிர்ப்பு தெரிவித்தார். இதுபோன்ற சில காரணங்களால் ‘சாயா' படம் நின்று போனது. பின்னர், தீவிர முயற்சிக்குப் பிறகு வாராது வந்த மாமணிபோல, ஜூபிடர் நிறுவனத்தின் ‘ராஜகுமாரி’ படத்தில் கதாநாயகனாக நடிக்க எம்.ஜி.ஆருக்கு வாய்ப்பு கிடைத்தது. அந்தப் படத்தில் நடிக்க வேண்டி இருந்ததால் நாடகத்தில் நடிக்க நேரம் ஒதுக்க முடியவில்லை. அதனால், அந்த நாடகத்தில் எம்.ஜி.ஆரால் நடிக்க முடியாமல் போனது. என்றாலும் அண்ணாவோடு எம்.ஜி.ஆருக்கு பழக்கம் தொடர்ந்தது. அவரது பணத்தோட்டம், சந்திரோதயம் புத்தகங்களைப் படித்து அண்ணாவாலும் அவரது கொள்கைகளாலும் ஈர்க்கப்பட்டு திமுகவில் தன்னை இணைத்துக் கொண்டார் எம்.ஜி.ஆர். திமுக கொடியை முதன்முதலாக திரையில் காட்டியவர் எம்.ஜி.ஆர்.தான். அவரே தயாரித்து இயக்கி நடித்த ‘நாடோடி மன்னன்' படத்தில் ஆணும் பெண்ணும் இருவண்ணக் கொடியை ஏந்தியபடி திரும்புவது போன்ற எம்.ஜி.ஆர். பிக்சர்ஸின் இலச்சினை (லோகோ) படத்தின் ஆரம்பத்திலும் முடிவிலும் காட்டப் பட்டது. எம்.ஜி.ஆரின் படங்களில் அண்ணாவைப் பற்றியும் திமுக கொள்கைகளைப் பற்றிய வசனங் களும் பாடல்களும் கட்டாயம் இடம்பெற்றன. அண்ணா தமிழக முதல்வரானதும் சென்னையில் 1968-ம் ஆண்டு தொடக்கத்தில் இரண்டாம் உலகத் தமிழ் மாநாடு நடைபெற்றது. அப்போது, சென்னையில் மையப் பகுதியான அண்ணா சாலையில் (அப்போது மவுண்ட் ரோடு) ‘தி இந்து’ தமிழ் நாளிதழ் அலுவலகம் எதிரே கையை உயர்த்தியபடி கம்பீரமாக நிற்கும் அண்ணாவின் சிலையை தனது சொந்த செலவில் எம்.ஜி.ஆர். நிறுவினார். சர்.ஏ.ராமசாமி முதலியார் சிலையை திறந்து வைத்தார். உலகத் தமிழ் மாநாட்டில் கருத்தரங்கு ஒன்றில் எம்.ஜி.ஆர். பேசினார். கவிதையைப் பற்றிய நயமான விளக்கம் அளித்தார். ‘அழகும் உள்ளத்து உணர்ச்சியும் சேர்ந்ததுதான் கவிதை ’ என்று கூறினார். கூடியிருந்த மக்கள் கரகோஷம் எழுப்பினர். பின்னர், அண்ணா பேச வந்தார். எம்.ஜி.ஆருக்கே குருவாயிற்றே? கேட்க வேண்டுமா? கவிதை பற்றி அவர் கூறும்போது, ‘அறிந்ததனை அறிந்தோர்க்கு அறிவிக்கும் போதினிலே அறிந்ததுதான் என்றாலும் எத்துணை அழகம்மா? என்று அறிந்தோரையும் வியக்க வைக்கும் அருங்கலையே கவிதையாகும்’ ... என்று கவிதையாலேயே கவிதைக்கு விளக்கம் அளித்தார் அறிஞர் அண்ணா. மக்களின் கரகோஷம் அடங்க வெகுநேர மாயிற்று. தொடர்ந்து அண்ணா பேசும்போது, ‘அழகும் உள்ளத்து உணர்ச்சியும் சேர்ந்ததுதான் கவிதை என்று எம்.ஜி.ஆர். கூறினார். நீங்கள் கைதட்டினீர்கள். எதற்கு என்று யோசித்தேன். பிறகுதான் தெரிந்தது. அவர் தன்னைப் பற்றியே சொல்லியிருக்கிறார். ஆம். அழகும் உணர்ச்சியும் சேர்ந்த எம்.ஜி.ஆரே ஒரு கவிதைதானே...’ என்றார் அண்ணா. மக்களின் ஆரவாரம் விண்ணைப் பிளந்தது. இதயக்கனியின் ஈர்ப்பு ரகசியம் அறிந்தவர் அண்ணா! தொடரும்.. http://tamil.thehindu.com
  16. எம்ஜிஆர் 100

    எம்ஜிஆர் 100 | 26 - படம் ஓடினால் மன்னன், ஓடாவிட்டால் நாடோடி! M.G.R. ஒரு காரியத்தில் இறங்கினார் என்றால் என்ன இடையூறு வந்தாலும் அதை முடிக்காமல் விடமாட்டார். அதற்கு மிகப் பெரிய உதாரணம் அவர் முதன் முதலில் தயாரித்து, இயக்கி, நடித்து பிரம்மாண்டமான வெற்றி பெற்ற படமான ‘நாடோடி மன்னன்’. ‘மலைக்கள்ளன்', ‘அலிபாபாவும் 40 திருடர்களும்', ‘மதுரை வீரன்', ‘தாய்க்குப் பின் தாரம்' என்று வெற்றிப் படிகளில் ஏறி புகழின் உச்சியில் இருந்த எம்.ஜி.ஆர். நடிப்பதற்காக பல் வேறு படவாய்ப்புக்கள் காத்திருந்தன. ஆனால், அதையெல்லாம் ஒதுக்கிவிட்டு தனது முழு கவனத்தையும் ‘நாடோடி மன்னன்’ படம் எடுப்பதில் திருப்பினார் எம்.ஜி.ஆர்.! அது ஏன் என்பதற்கான விளக்கமும் கொடுத்தார். ‘‘நான் சொந்தத்தில் ‘நாடோடி மன்னன்’ படத்தை ஏன் ஆரம்பித்தேன்? எனக்காக எத்தனையோ படங்கள் காத்திருக்கும் நேரத்தில் அதில் நடித்து முடித் தாலே வாழ்க்கைக்கு தேவையான பணம் சம்பாதித்து நிம்மதியாக இருக்கலாம். ஆனால், ‘நாடோடி மன்னன்’ ஒரு பரி சோதனை முயற்சி. என் விருப்பப்படி செய்து அதற்கு மக்களின் பதில் என்ன? என்று எதிர்பார்க்கிறேன்’’ என்றார் எம்.ஜி.ஆர். ‘நாடோடி மன்னன்’ படத்துக்கான கனவு 20 வயதிலேயே எம்.ஜி.ஆரின் மனதில் கருக்கொண்டது. படப்பிடிப்பு ஒன்றில் கலந்து கொள்வதற்காக கொல் கத்தா சென்ற எம்.ஜி.ஆர்., அங்கு ‘இஃப் ஐ வேர் கிங்’ என்ற படத்தைப் பார்த்தார். இந்தப் படமே எம்.ஜி.ஆர். மனதில் விதை யாய் விழுந்து விருட்சமாக வளர்ந்தது. அதன் விளைவுதான் ‘நாடோடி மன்னன்.’ படத்துக்காக பணத்தை பணம் என்று பார்க்காமல் எம்.ஜி.ஆர். செலவழித்தார். சில நேரங்களில் அவரது அண் ணன் சக்ரபாணியே கவலைப்படும் அள வுக்கு கடன் வாங்கி செலவு செய்தார். காட்சி களின் பிரம் மாண்டத்துக்கு மட்டுமல்ல; படத்தில் பணி யாற்றும் நடிகர்களுக் கும் தொழிலாளர் களுக்கும் தாராள மான சம்பளமும் வழங்கப்பட்டது. படப்பிடிப்பு குழுவினர் விரும்புவதை சாப்பிடுவதற் காக படப்பிடிப் பின்போது மினி ஓட்டலையை எம்.ஜி.ஆர். ஏற்பாடு செய்து விட்டார். அந்தக் காலத்தில் பணக்காரர் கள் மட்டுமே குடிக்கும் ‘ஓவல்டின்’ என்ற பானம் பெரிய அண்டாக்களில் வைக்கப்பட் டது. முதன்முதலாக பல தொழிலாளர்கள் ‘ஓவல்டின்’ குடித்ததே அப்போதுதான். படம் முடிந்த பிறகு ‘‘வெற்றியோ, தோல்வியோ அது மக்கள் தீர்ப்பைப் பொறுத்தது. படம் ஓடினால் நான் மன்னன், ஓடாவிட்டால் நாடோடி’’ என்று சர்வ சாதாரணமாக சொன்னார் எம்.ஜி.ஆர். மக்கள் எம்.ஜி.ஆரை மன்னனாக்கி னர். அதுவரை வெளியான படங்களை வசூலில் புரட்டிப் போட்டு அமோக வெற்றி பெற்றது ‘நாடோடி மன்னன்’. 19 ஆண்டுகள் கழித்து தேர்தலில் வெற்றி பெற்று ஆட்சியைப் பிடித்து எம்.ஜி.ஆர். நிஜமாகவே முடிசூடியதற்கு கால்கோள் நடத்தியது ‘நாடோடி மன்னன்’. மதுரையில் பல லட்சம் மக்கள் முன் னிலையில் நடந்த வெற்றி விழாவைத் தொடர்ந்து சென்னையிலும் 30.11.1958ல் எஸ்.ஐ.ஏ.ஏ. திடலில் பேரறிஞர் அண்ணா தலைமையில் வெற்றி விழா கொண்டாட்டம் நடந்தது. விழாவில் எம்.ஜி.ஆருக்கு வீரவாளை அண்ணா பரிசளித்தார். இந்தக் கூட்டத்தில்தான், ‘‘மரத்தில் பழுத்த கனி தங்கள் மடியில் விழாதா என்று பலரும் எதிர்பார்த்திருக்க, நல்லவேளையாக அந்தக் கனி என் மடியில் விழுந்தது. அதை எடுத்து என் இதயத்தில் வைத்துக் கொண்டேன். எம்.ஜி.ஆரை பாராட்டுவது என்னை நானே பாராட்டிக் கொள்வது போலாகும்’’ என்று அண்ணா பேசினார். ‘நாடோடி மன்னன்’ பற்றி குறிப்பிடும் போது நடிகை பானுமதி பற்றி சொல்லி யாக வேண்டும். நடிப்பு, தயாரிப்பு, இசை, இயக்கம் என்ற பன்முகத்திறமை கொண்டவர் பானுமதி. ‘மலைக்கள்ளன்’, ‘மதுரை வீரன்’ என்று ஏற்கெனவே வெற்றி பெற்ற படங்களில் எம்.ஜி.ஆருக்கு பானுமதியே ஜோடி. ‘நாடோடி மன்னன்’ படத்திலும் அவரையே நாயகியாக நடிக்க எம்.ஜி.ஆர். ஒப்பந்தம் செய்தார். பானுமதி அந்தக் காலத்திலேயே சுதந்திரமாக செயல்படும் நடிகை. எம்.ஜி.ஆரும் அப்படியே. தான் விரும்பு கிறபடி காட்சிகள் வரும்வரை எம்.ஜி.ஆர். விடமாட்டார். அதனால்தான் இன்றும் அவர் படங்களை ரசிக்க முடிகிறது. எம்.ஜி.ஆர். மீண்டும் மீண்டும் காட்சி களை எடுப்பது பானுமதிக்கு பிடிக்கவில்லை. ‘‘எடுத்த காட்சிகளையே எத்தனை முறை எடுப்பீங்க?’’ என்று எம்.ஜி.ஆரைப் பார்த்து கேட்டார். சக நடிகையின் ஒத்துழைப்பு இப்படி இருக்கும்போது கோபம் வந்தாலும், எம்.ஜி.ஆர். அமைதியாகவே பதில் சொன்னார், ‘‘படத்தின் தயாரிப்பாளர் மட்டுமின்றி, இயக்குநரும் நான்தான். என் இயக்கத்தில் நடிக்க விருப்பம் இருந்தால் நடிங்க. இல்லைன்னா விட்டுடுங்க.’’ இதைத் தொடர்ந்து, படத்தில் இருந்து விலகிக் கொண்டார் பானுமதி. பிறகு, அவர் இறப்பது போல காட்சிகள் மாற்றப்பட்டு நடிகை சரோஜா தேவியை கதாநாயகியாக அறிமுகப்படுத்தினார் எம்.ஜி.ஆர். கருத்து வேறுபாடுகள் இருந்தாலும் ஒருவரின் திறமையை எம்.ஜி.ஆர். மதிப்பார். படத்தில் இருந்து பாதியில் விலகினாலும் சென்னையில் நடந்த வெற்றி விழாவுக்கு பானுமதியையும் பெருந்தன்மையுடன் அழைத்து, அவருக் கும் விருது வழங்கினார் எம்.ஜி.ஆர். அதன் பின்னரும், எம்.ஜி.ஆர். - பானுமதி நடிப்பில் ‘ராஜா தேசிங்கு’, ‘கலை அரசி’, ‘காஞ்சித் தலைவன்’ ஆகிய படங்கள் வெளியாயின. பன்முகத் திறமை மிக்க பானுமதிக்கு தமிழக அரசின் சார்பில் அதுவரை ‘கலைமாமணி’ பட்டம் வழங்கப்படாததை அறிந்த எம்.ஜி.ஆர், தான் முதல்வராக இருந்தபோது ‘கலைமாமணி’ விருதை பானுமதிக்கு வழங்கி கவுரவித்தார். எம்.ஜி.ஆர். நல்ல இசை ஞானம் உடை யவர். ‘நாடோடி மன்னன்’ படப்பிடிப்பின் போது ஒருநாள், இசையமைப்பாளர் எஸ்.எம். சுப்பையா நாயுடுவுடன் பாடல் களுக்கான இசையமைப்பு பற்றி எம்.ஜி.ஆர். ஆலோசித்துக் கொண்டிருந் தார். அப்போது, ‘‘நீங்கள் இசையமைப் பில் எல்லாம் தலையிட வேண்டுமா?’’ என்று எம்.ஜி.ஆரிடம் கேட்டார் பானுமதி. இசை பற்றி எம்.ஜி.ஆருக்கு பெரிதாக ஒன்றும் தெரிந்திருக்காது என்ற எண்ணம் பானுமதிக்கு. எம்.ஜி.ஆருக்கு நினைவாற்றல் அபா ரம். எத்தனை ஆண்டுகள் ஆனாலும் எதை யும் மறக்க மாட்டார். பானுமதி கேட்ட கேள்விக்கு, 27 ஆண்டுகளுக்குப் பின் முதல்வராக இருந்தபோது செயல்வடி வில் அவருக்கு பதிலளித்தார் எம்.ஜி.ஆர். தமிழக அரசு இசைக் கல்லூரியின் முதல்வராக பானுமதியை எம்.ஜி.ஆர். நியமித்தார். பின்னர், அந்த பதவியின் அந்தஸ்து மேம்படுத்தப்பட்டு இயக்குநர் மற்றும் முதல்வராக பானுமதி பதவி வகித்தார். 2005-ம் ஆண்டு பானுமதி மறைந்த தினம், எம்.ஜி.ஆர். நினைவு நாளான டிசம்பர் 24-ம் தேதி. படங்கள் உதவி: ஞானம், செல்வகுமார் எம்.ஜி.ஆர். நடித்த ‘மதுரை வீரன்’ திரைப்படம் தமிழகத்தில் திரையிடப்பட்ட 33 திரையரங்குகளிலும் 100 நாட்கள் ஓடி சரித்திரம் படைத்தது. எந்த கருப்பு வெள்ளை படமும் இந்த சாதனையை முறியடிக்கவில்லை. பெங்களூரிலும், இலங்கையிலும் தலா ஒரு திரையரங்கில் 100 நாட்கள் ஓடியது. எம்.ஜி.ஆர். கதாநாயகனாக நடித்த முதல் வெள்ளி விழா படம் என்பதோடு, ரூ.1 கோடி வசூல் செய்த முதல் தமிழ்படம் என்ற பெருமை பெற்றது ‘மதுரை வீரன்.’ - தொடரும்... http://tamil.thehindu.com
  17. சக்தி டிவி செய்திகள் 20 09 2017 , 8PM
  18. நயன்தாராவுடன் அமெரிக்காவில் பிறந்தநாள் கொண்டாடிய விக்னேஷ் சிவன் நானும் ரௌடிதான் இயக்குனர் விக்னேஷ் சிவன், தன்னுடைய பிறந்த நாளை நயன்தாராவுடன் அமெரிக்காவில் கேக் வெட்டி கொண்டாடியுள்ளார். தமிழ், தெலுங்கு, மலையாள பட உலகில் முன்னணி நாயகியாக வலம் வருபவர் நயன்தாரா. இப்போது 3 மொழி படங்களிலும் ‘பிசி’யாக நடித்து வருகிறார். ஆரம்பத்தில் நயன்தாராவும், சிம்புவும் காதலிப்பதாக கூறப்பட்டது. பின்னர் பிரபுதேவாவுடன் நெருங்கி பழகினார். அவரை திருமணம் செய்து கொள்வதற்காக நயன்தாரா மதம் மாறியதாகவும் செய்திகள் வெளியாகின. தற்போது இயக்குனர் விக்னேஷ் சிவனை காதலித்து வருவதாக சொல்லப்படுகிறது. சென்னை எழும்பூரில் உள்ள ஒரு அடுக்குமாடி வீட்டில் இருவரும் தங்கி இருப்பதாகவும் கூறப்படுகிறது. இதை அவர்கள் மறுக்க வில்லை. சில மாதங்களுக்கு முன்பு நயன்தாரா விக்னேஷ் சிவனுடன் ரோம் நகருக்கு சென்று, போப் பிரான்சிஸிடம் ஆசி பெற்றார். பின்னர் இருவரும் மோதிரம் மாற்றி ரகசிய திருமணம் செய்து கொண்டதாகவும் தகவல் வெளியாகின. விக்னேஷ் சிவனுக்கு விலை உயர்ந்த கார் ஒன்றை நயன்தாரா பரிசாக வழங்கி இருக்கிறார் என்றும் சொல்லப்பட்டது. இன்று விக்னேஷ் சிவன் பிறந்தநாள். இதை இருவரும் கோலாகலமாக கொண்டாட முடிவு செய்தனர். இதற்காக கடந்த வாரம் நயன்தாராவும், விக்னேஷ் சிவனும் அமெரிக்காவின் நியூயார்க் நகரின் பல்வேறு இடங்களுக்கு ஜோடியாக சென்று வந்தனர். இந்த புகைப்படங்களை நயன்தாரா தனது டுவிட்டர் பக்கத்தில் வெளியிட்டுள்ளார். இன்று விக்னேஷ் சிவன் பிறந்தநாளை நயன்தாரா ஜோடியாக கேக் வெட்டி கோலாகலமாக கொண்டாடி மகிழ்ந்தார். இது பற்றி நயன்தாரா அவரது டுவிட்டர் பக்கத்தில், ‘விக்னேஷ் சிவனுக்கு பிறந்த நாள் வாழ்த்துக்கள். நாங்கள் புன்னகையுடன் பார்த்தோம். எல்லாமே மகிழ்ச்சி. கடவுள் அவரை ஆசீர்வதிக்கட்டும். இந்த ஆண்டு மிகச்சிறந்த ஆண்டாக அமையட்டும். இது மிகவும் மகிழ்ச்சியான பிறந்தநாள். உங்கள் ரசிகர்கள் உங்களை தொடர்பவர்கள் அனைவருக்கும் இது சிறப்பான நாள்’ என்று குறிப்பிட்டுள்ளார். நயன்தாரா-விக்னேஷ் சிவன் அமெரிக்காவில் கோலாகலமாக பிறந்த நாள் கொண்டாடிய புகைப்படங்கள் இணைய தளங்களில் வேகமாக பரவி வருகிறது. http://cinema.maalaimalar.com/Cinema/CinemaNews/2017/09/18205151/1108665/Vignesh-shivan-birthday-celebrate-with-nayanthara.vpf
  19. இளமை புதுமை பல்சுவை

    உலகின் நீளமான இமை முடிகளைக் கொண்ட கின்னஸ் சாதனைப் பெண் சீனாவைச் சேர்ந்த 48 வயதான யு ஜியான்ஸியாவின் இமை முடிகள் கற்பனைக்கு எட்டாத அளவு மிக நீளமானவை. சாதாரணமாக மனிதர்களின் இமை முடிகள் 0.8 முதல் 1.2 சென்டிமீட்டர் வரை தான் நீளமாக இருக்கும். ஆனால், ஜியான்ஸியாவின் இமை முடிகள் 12.4 சென்டிமீட்டர் நீளம் கொண்டவை. உலகின் மிக நீளமான இமை முடிகளைக் கொண்டவர் என்ற கின்னஸ் சாதனையையும் ஜியான்ஸியா நிலைநாட்டியுள்ளார். 2018 ஆம் ஆண்டு கின்னஸ் புத்தகத்தில் அவரின் பெயர் இடம்பெறவுள்ளது. உலகம் முழுவதும் 500 பேர் இந்தப் பிரிவில் போட்டியிட்டுள்ளனர். தனது இந்த சாதனை குறித்து ஜியான்ஸியா தெரிவித்துள்ளதாவது, எனக்கு மட்டும் ஏன் இவ்வளவு நீளமாக இமை முடிகள் வளர்கின்றன என ஆச்சரியமாக உள்ளது. நான் கோடிக்கணக்கில் பணம்புரளும் மிகப்பெரிய நிறுவனத்தின் தலைவராகப் பதவி வகித்து வந்தேன். 2013 ஆம் ஆண்டு விருப்ப ஓய்வு பெற்றுக்கொண்டேன். இயற்கை மீது தீராத ஆர்வம் எனக்குண்டு. அதனால் மிகப்பெரிய தோட்டத்தை உருவாக்கினேன். அதில் 1,600 வகை ரோஜா செடிகளை வளர்த்து வந்தேன். அப்போதுதான் என் இமை முடிகள் மிக நீளமாக வளர ஆரம்பித்தன. அதற்கு முன்பு வரை நான் சாதாரணமாகத்தான் இருந்தேன். தோட்டத்துக்கும் என் இமை முடிகளுக்கும் ஏதாவது தொடர்பு இருக்குமா என்று கூட யோசித்திருக்கிறேன். நீளமாக வளர ஆரம்பித்தவுடன் அதை வெட்டாமல் விட்டுவிட்டேன். என் வாய் வரை வளர்ந்துவிட்டன. எல்லோரும் இது எனக்குக் கஷ்டமாக இருக்கும் என்று நினைக்கிறார்கள். நான் ஒருநாளும் எந்தவித அசவுகரியத்தையும் உணர்ந்ததில்லை. உலகிலேயே நீளமான இமை முடிகளுக்குச் சொந்தக்காரி என்பதில் எனக்குப் பெருமையாகத்தான் இருக்கிறது. தவறுதலாக முடிக்கு எந்தவித ஆபத்தும் வந்துவிடக்கூடாது என்பதில் கவனமாக இருக்கிறேன். நீளமான இமை முடிகள் ஆரோக்கியத்தையும் நீண்ட ஆயுளையும் குறிப்பதாகப் படித்திருக்கிறேன். ஒவ்வொரு தடவை முகத்தைச் சுத்தம் செய்யும்போதும் கவனமாக இருக்கிறேன் http://newsfirst.lk
  20. இது ஒரு பல்சுவை திரி. நான் படித்தது பார்த்ததை பதிவிடுகிறேன். இயன்றவரை யாழில் வேறு திரிகளில் வராத நிகழ்வுகளை பதிவிட முயற்சிக்கிறேன். கால்கள் இல்லை... நம்பிக்கை உண்டு: மாடலிங் துறையில் சாதிக்கும் சீசர்! பிறக்கும்போதே இரண்டு கால்களும் இல்லாமல் பிறந்தவர் கென்யா சீசர் (23). ஆனால் தற்போதோ இவர் ஒரு வெற்றிகரமான உள்ளாடை மாடல். கென்யா 5 வயதாக இருக்கும்போது தாய்லாந்தைச் சேர்ந்த ஒரு அனாதை இல்லம் அவரை தத்து கொடுத்தது. அவர் தனது புதிய குடும்பத்துடன் (ஒரேகான்) போர்ட்லாந்து சென்றார். சக்கர நாற்காலி மற்றும் ஸ்கேட்டிங் போர்டை பயன்படுத்தி அவர் நடக்கக் கற்றுக்கொண்டார். கலிபோர்னியாக்ச் சேர்ந்தவரான கென்யா, தனது வாழ்க்கை குறித்து கூறுகையில், “மாடலிங் துறையில் சாதிக்க வேண்டும் என்ற எனது கனவு தற்போது நிறைவேறி இருக்கிறது. நான் முக்கியமாக தடகள உள்ளாடைகள் விளம்பரங்களில் நடிக்கிறேன். இது சில சமயம் வேடிக்கையாக இருக்கும். நான் வித்தியாசமாகவும், கவர்ச்சியாகவும் இருக்கிறேன். கவர்ச்சியாக உணர கால்கள் தேவை இல்லை. எனது வேலையை விரும்பி செய்து நான் சம்பாதிக்கிறேன். எனது அழகை மக்களிடையே காட்டுவதை விரும்புகிறேன். இது எனது பலத்தை காட்டுகிறது” என்கிறார். இந்த உள்ளாடை மாடலிங் துறை மூலம் தினமும் 65 ஆயிரம் ரூபாய் வரை வருமானம் ஈட்டி வருகிறார் கென்யா. பேஷன் துறையின் தடைகளை உடைத்து இவ்வாறு இவர் புகழ் பெறுவதன் மூலம், பெண்களுக்கு முன் உதாரணமாக இருக்கிறார். விளையாட்டின் மீதுள்ள ஆர்வத்தால், தற்போது 2018 பாரா ஒலிம்பிக் போட்டிக்கு பயிற்சி பெறுகிறார் கென்யா. வாழ்க்கையில் தனது பயணம் குறித்து, இவர் எழுதியுள்ள ஒரு புத்தகம் அடுத்த வருடம் (2016 ல்) வெளிவரவுள்ளது.
  21. கிழக்கை யார் ஆள்வது என்பதை மக்களே தீர்மானிப்பர் கிழக்கின் முதலமைச்சராக சிங்களவர் ஒருவர் வரவேண்டும் என நான் வலியுறுத்தியதாக அப்பட்டமான பொய் பிரசாரமொன்று மேற்கொள்ளப்பட்டு வருவதாக சுட்டிக்காட்டிய இராஜாங்க அமைச்சர் ஹிஸ்புல்லாஹ், வடகிழக்கு இணைப்புக்கு எதிராக தான் கருத்துத்தெரிவித்து வருவதால் இவ்வாறான பொய்யான தகவல்களைப் பரப்பி, மக்களை குழப்பி தனக்கெதிராக சேறு பூசும் நடவடிக்கைகள் மேற்கொள்ளப்பட்டு வருவதாகவும் தெரிவித்தார். இராஜாங்க அமைச்சர் ஹிஸ்புல்லாஹ் இன்று புதன்கிழமை இது தொடர்பில் வெளியிட்ட விசேட அறிக்கையில் மேலும் குறிப்பிடப்பட்டுள்ளதாவது, வடக்கு கிழக்கு மாகாணங்கள் மீண்டும் இணைக்கப்படுவதற்கான முயற்சிகள் திரைமறைவில் மேற்கொள்ளப்பட்டு வரும் நிலையில் அதற்கெதிராக முஸ்லிம் அரசியல் தலைமைத்துவம் என்ற ரீதியில் நான் மாத்திரமே பகிரங்கமாக கருத்துக்களை முன்வைத்து வருகின்றேன். இதனால் எனக்கெதிராக திட்டமிட்ட வகையில் பொய்யான பிரசாரங்கள் மேற்கொள்ளப்பட்டு வருகின்றன. அந்தவகையில், “கிழக்கு மாகாணத்தில் மூவின மக்களும் ஒற்றுமையாகவும் -சம உரிமையுடன் சகல அதிகாரங்களையும் பெற்று வாழ்ந்து வரும் நிலையில் வடக்கும் கிழக்கும் இணைக்கப்பட்டால் அந்நிலை இல்லாது போகும். அத்துடன், கிழக்கில் தமிழர் ஒருவர் முதலமைச்சராக இருந்தார், தற்போது முஸ்லிம் ஒருவர் முதலமைச்சராக உள்ளார். எதிர்காலத்தில் சிங்களவர் ஒருவர் முதலமைச்சராக வர முடியும்” என்ற ரீதியில் நான் நேற்று முன்தினம் திங்கட்கிழமை ஏறாவூரில் தெரிவித்த கருத்தை சிலர் திரிவுபடுத்தி “கிழக்கில் சிங்களவர் ஒருவர் முதலமைச்சராக வர வேண்டும்” என்று நான் வலியுறுத்தியதாக சில ஊடகங்கள் மூலம் அப்பட்டமான பொய் பிரசாரமொன்று மேற்கொள்ளப்பட்டிருந்தன. கிழக்கு மாகாணத்தை யார் ஆள வேண்டும் என்பதை கிழக்கு மக்கள் தான் தீர்மானிப்பார்கள். அதனை வெளிச்சக்திகள் தீர்மானிக்க முடியாது. கிழக்கு மாகாணத்தைப் பொறுத்தவரை மூவின மக்களும் ஒற்றுமையோடு சம உரிமைகளைப் பெற்று வாழ்ந்து வருகின்றனர். பிள்ளையான் முதலமைச்சராக இருந்த போது அவரது அமைச்சரவையில் முஸ்லிம்கள் சார்பில் நானும், உதுமாலெப்பையும் அமைச்சர்களாக இருந்தோம். வீமலவீர திஸாநாயக்க மற்றும் நவரட்ன ராஜா ஆகியோரும் அமைச்சர்களாக இருந்தனர். ஆனால், எமக்கிடையில் எந்தவித பிரச்சினைகளுமின்றி சிறப்பானதொரு நிர்வாகத்தை நாங்கள் மேற்கொண்டிருந்தோம். ஆனால், தற்போது அந்நிலை மாறியுள்ளது. கிழக்கில் இனவாத அரசியலை மேற்கொண்டு அதிகாரத்தைக் கைப்பற்ற முடியும் என சில சக்திகள் நினைத்துக்கொண்டுள்ளன. இந்நிலை, கிழக்கின் ஒற்றுமைக்கே பாதிப்பாக அமையும். நான் எந்த இடத்திலும் ‘சிங்களவர் ஒருவர் கிழக்கின் முதலமைச்சராக வர வேண்டும்;’ என வலியுறுத்தவில்லை. அப்படி சிங்களவர் ஒருவரை முதலமைச்சராக்க வேண்டிய தேவையோ- எண்ணமோ எமக்கில்லை. நான் வடக்குடன் கிழக்கை இணைப்பதற்கு மேற்கொள்ளப்பட்டு வரும் முயற்சிகளை விமர்சித்து பேசும் போது ஒரு கட்டத்தில் கிழக்கில் மூவினத்துக்கும் அதிகாரம் உள்ளன. தமிழ் சமூகத்தைச் சேர்ந்த பிள்ளையான் முதலமைச்சராக இருந்தார். தற்போது முஸ்லிம் சமூகத்தை சேர்ந்த நஸீர் அஹமட் முதலமைச்சராக உள்ளார். எதிர்காலத்தில் சிங்களவர் ஒருவர் முதலமைச்சராக வரமுடியும். இந்நிலை வடக்குடன் கிழக்கு இணைக்கப்பட்டால் இல்லாது போகும் என்றே குறிப்பிட்டேன். ஆனால் இதனை சில ஊடகங்கள் திரிவுபடுத்தி நான் “சிங்களர் ஒருவர் கிழக்கின் முதல்வராக வர வேண்டும்’ என்று வலியுறுத்தியதாக செய்தி வெளியிடப்பட்டுள்ளன. இது அப்பட்டமான திரிவுபடுத்தப்பட்ட செய்தியாகும். தேர்தல் நெருங்கும் போது இவ்வாறான பொய் பிரசாரங்களை மேற்கொண்டு எனக்கும் எனது ஆதரவாளர்களுக்கும் சேறு பூசுகின்ற சதித்திட்டங்களை சில சக்திகள் மேற்கொண்டு வருகின்றமை கவலைக்குரிய விடயமாகும் என்றார். http://tamil.adaderana.lk/news.php?nid=95593
  22. ++ இந்த காணொளி இல் 2.45 நிமிடத்தில் இருந்து பாருங்கள்.