யாழிணையம் சில நாட்களுக்கு முன்னர் http:// இல் இருந்து https:// ஆக்கியதன் மூலம் பாதுகாப்பான இணையத் தளமாக மாற்றப்பட்டது. இந்த மாற்றத்தின் மூலம் உங்கள் கணணியிலுள்ள உலாவிக்கும் (உதாரணமாக : குறோம்) யாழ் வழங்கிக்கும் இடையிலான பரிமாற்றங்கள் யாவும் crypt (இரகசிய பரிவர்த்தனை ?) செய்யப்பட்டிருக்கும். யாழ் சேர்வரில் இருக்கும் இந்தப் பரிமாற்றங்களுக்கான சான்றிதழை உலாவி உறுதிப்படுத்திய பின்னரே பரிமாற்றம் ஆரம்பிக்கும்.
ஆனால் சில பக்கங்களின் அல்லது திரிகளின் https:// அல்லாத விடயங்கள் உள்ளடக்கப்பட்டிருக்கும். உதாரணமாக, செய்தி ஒன்றில் உள்ள படம் ஒன்று https:// அல்லாத ஒரு இணையத் தளத்திலிருந்து இணைப்புக் கொடுக்கப்பட்டிருக்கலாம். இவ்வாறான வேளைகளில் உலாவியால் முழுமையாகச் சான்றிதழை உறுதிப்படுத்த முடியாது போகும்போது 'This is not a secure connection' போன்ற பிழைகள் காட்டப்படும். இதன் கீழ் கொடுக்கப்படும் இணைப்பு மூலம் நீங்களே இணையத் தளத்தை உறுதிப்படுத்துவதன் மூலம் உலாவி தொடர்ந்து யாழினைக் காண்பிக்கச் செய்யலாம்.