‘மக்கள் கேப்டனாக’ அம்பயரிடம் ரிவ்யூ கேட்ட தோனி! - வைரல் வீடியோ

[நவீனன்]

‘மக்கள் கேப்டனாக’ அம்பயரிடம் ரிவ்யூ கேட்ட தோனி! - வைரல் வீடியோ

இந்தியாவின் தலைசிறந்த கேப்டன்களில் மிக முக்கியமானவரான மகேந்திர சிங்  தோனி இரண்டு வாரங்களுக்கு முன்னதாக கேப்டன் பதவியில் இருந்து  விலகுவதாக அறிவித்தார். இதையடுத்து விராட் கோஹ்லி ஒருநாள் போட்டிகள் மற்றும் டி20 போட்டிகளுக்கு கேப்டனாக அறிவிக்கப்பட்டார்.

கேப்டன் பொறுப்பைத் துறந்திருந்தாலும், வார்ம் அப் போட்டி ஒன்றில் இந்திய ஏ அணிக்கு தலைமை தாங்கினார் தோனி. பத்து ஆண்டுகளுக்கு முன்னதாக அதாவது 2007ம் ஆண்டு டி20 உலகக்கோப்பையை இந்தியா வென்றது. செப்டம்பர் 24, 2007-ம் ஆண்டு உலகக்கோப்பையை  தோனி தலைமையிலான இந்திய அணி ஜெயிக்க, உடனடியாக அப்போது ஒருநாள் போட்டிகளுக்கு கேப்டனாக இருந்த டிராவிட் பதவி விலகினார். இதையடுத்து செப்டம்பர் மாத இறுதியில் ஒருநாள் போட்டிகளுக்கு தோனி கேப்டனாக பதவியேற்றார். அன்று முதல் கடந்த ஆண்டு இறுதியில் நடந்த நியூசிலாந்து தொடர் வரை ஒருநாள் போட்டிகளில் இன்னொரு கேப்டனுக்கு கீழ் தோனி விளையாடியதே கிடையாது.

இந்நிலையில், ஒவ்வொரு பார்மெட்டுக்கும் ஒரே கேப்டன் என்ற முறை சரிவராது எனச் சொல்லி,  கேப்டன் பதவியை விராட் கோஹ்லிக்கு  விட்டுக்கொடுத்ததால், முதன் முறையாக கோஹ்லி தலைமையிலான இந்திய அணியில் விளையாட வேண்டிய கட்டாயம் தோனிக்கு ஏற்பட்டது. கடந்த  ஞாயிறு அன்று நடந்த இந்தியா இங்கிலாந்து இடையேயான முதல் ஒருநாள் போட்டியில் கோஹ்லி கேப்டனாக பணியைத் தொடங்க, பத்து வருடத்துக்கு பிறகு மீண்டும் விக்கெட் கீப்பர் பேட்ஸ்மேனாக பணியைத் தொடங்கினார் தோனி. 

வழக்கமாக, ஒவ்வொரு ஓவரின் போதும் தோனி வீரர்களை எப்படி ஒருங்கிணைக்கிறார் என்பதை டிவியில் காட்டுவார்கள். அவர் முகத்தையே பார்த்தது வந்தவர்களுக்கு விராட் கோஹ்லி முகத்தை ஒவ்வொரு ஓவருக்கும் காட்டும்போது கொஞ்சம் புதுமையாகத் தான் இருந்திருக்கும். 

ஆட்டத்தின் 27 வது ஓவரை ஹர்திக் பாண்டியா வீசினார். இங்கிலாந்து அணியின் கேப்டன் இயான் மோர்கன் பேட்டிங் பிடித்தார். 27வது ஓவரின் கடைசி பந்தை எதிர்கொண்ட மோர்கனின் பேட்டின் முனையில் லேசாக உரசிச் சென்ற பந்து முன்னாள் கேப்டன் தோனி கையில் தஞ்சமடைந்தது. இதையடுத்து அவுட் என  கத்தினார், ஆனால் அம்பயர் நந்தன் அப்பீலை ஏற்றுக்கொள்ள வில்லை. உடனடியாக டி.ஆர்.எஸ் ரிவ்யூ கேட்டார் தோனி. இதைப்பார்த்துக் கொண்டிருந்த பார்வையாளர்களுக்கு ஆச்சர்யமாக இருந்தது. ஏனெனில் ஃபீல்டிங்கின் போது அந்த அணியின் கேப்டன் மட்டும் தான் டி.ஆர்.எஸ் ரிவ்யூ கேட்க முடியும். விராட் கோஹ்லியிடம் கலந்தாலோசிக்காமல்,  ரிவ்யூ கேட்டதை அம்பயர் கண்டுகொள்ளவில்லை, இதனை கவனித்த விராட் கோஹ்லி உடனடியாக ரிவ்யூ கேட்டார். அதில் மோர்கன் அவுட் என்பது தெள்ளத் தெளிவாக தெரிந்தது. டி.ஆர்.எஸ் ரிவ்யூவை பொறுத்தவரை தோனி சொல்வதற்கு மிகுந்த முக்கியத்துவம் கொடுப்போம் என கோஹ்லி  ஏற்கனவே அறிவித்திருந்தது குறிப்பிடத்தக்கது.

 

@msdhoni reviews instead of @imVkohli and he's spot on pic.twitter.com/EeshQ2RkF6

— Vinay mani tripathi (@eevinaymani) January 15, 2017

தோனியை கேப்டனாகவே கிட்டத்தட்ட பத்து வருடம் பார்த்து பழகிவிட்ட நிலையில், ரசிகர்களே விராட் கோஹ்லி கேப்டன் என்பதை முழுமையாக ஏற்றுக்கொள்ள இன்னமும் சிரமப்படும் நிலையில், தோனி அந்த ஒரு நொடி கேப்டனாகவே DRS ரிவ்யூ கேட்டதை விராட் கோஹ்லியும் வரவேற்றுதான் இருப்பார். ரிவ்யூ கேட்டபடி உற்சாகமாக, கோஹ்லி அருகே வரும்போது, தோனியைப் பார்த்து ‘அவுட்தானே?’ என்று சைகையில் கோஹ்லி கேட்க, தன் பாணியில் நம்பிக்கையாக தோனி தலையசைப்பதை, வீடியோவின்  0.13 மற்றும் 0.57 நிமிடங்களில் பார்த்தால் தெரியும்! 

 

எது எப்படியோ, அந்த ஒரு நொடி கேப்டனாக மாறிய  வீடியோ கிளிப்பிங்கிற்கு சமூக வலைதளங்களில் ஷேர் செய்து கொண்டாடி வருகிறார்கள் தோனி ரசிகர்கள். 

http://www.vikatan.com/news/sports/77953-after-step-down-from-captaincy-dhoni-claimed-drs-review-directly.art