பாகிஸ்தான் நிகாரி கோஷ்

[நவீனன்]

பாகிஸ்தான் நிகாரி கோஷ்

தேவையானவை:
 மட்டன் - ஒரு கிலோ
 ஏலக்காய் - 4
 பட்டை, கிராம்பு - தலா ஒன்று
 கறுப்பு ஏலக்காய் - 2
 பிரிஞ்சி இலை - ஒரு டீஸ்பூன்
 தண்ணீர் - கால் கப்
 இஞ்சி-பூண்டு விழுது - ஒரு டீஸ்பூன்
 மல்லித்தூள் (தனியாத்தூள்) - ஒரு டீஸ்பூன்
 இஞ்சி - நீளவாக்கில் வெட்டியது சிறிது (அலங்கரிக்க)
 மிளகாய்த்தூள் - ஒரு டீஸ்பூன்
 மஞ்சள்தூள் - கால் டீஸ்பூன்
 பூண்டு - 3 பல் (எண்ணெயில் வதக்கி அரைக்கவும்)
 சின்ன வெங்காயம் - 3 (தோலுரித்து, எண்ணெயில் வதக்கி அரைக்கவும்)
 தயிர் - 3 டேபிள்ஸ்பூன் (நன்றாக அடிக்கவும்)
 கரம் மசாலாத்தூள் - 2 டீஸ்பூன்
 ஜாதிக்காய்த்தூள் - கால் டீஸ்பூன்
 ஏலக்காய்த்தூள் - அரை டீஸ்பூன்
 குங்குமப்பூ - அரை டீஸ்பூன் (கால் கப் வெதுவெதுப்பான நீரில் ஊறவைக்கவும்)
 கியூரா எசென்ஸ் - ஒரு துளி
 சப்பாத்தி மாவு - 2 கப் (பிசைந்தது)
 கொத்தமல்லித்தழை - சிறிது (பொடியாக நறுக்கவும்)
 ரோஸ் வாட்டர் - 1 டீஸ்பூன்
 எண்ணெய் - 2 டேபிள்ஸ்பூன்
 உப்பு - தேவைக்கேற்ப

செய்முறை:
வாய் அகன்ற பாத்திரத்தை அடுப்பில் வைத்து எண்ணெய் சேர்த்துச் சூடானதும் ஏலக்காய், பட்டை, கிராம்பு, கறுப்பு ஏலக்காய், பிரிஞ்சி இலையைச் சேர்த்துத் தாளிக்கவும்.

அதனுடன் மட்டனைச் சேர்த்து நிறம் மாறும்வரை வதக்கவும். உப்பு, மஞ்சள்தூள் சேர்த்து 2 நிமிடம் வதக்கவும். தண்ணீர் சேர்த்து மூடி கொதிக்கவிடவும்.

கொதித்ததும் மூடி திறந்து இஞ்சி-பூண்டு விழுது, மல்லித்தூள் (தனியாத்தூள்), மிளகாய்த்தூள், வதக்கி அரைத்த பூண்டு மற்றும் சின்ன வெங்காயம் ஆகியவற்றைச் சேர்த்து 5 நிமிடம் வதக்கவும். இத்துடன் அடித்துவைத்த தயிர், ரோஸ் வாட்டர், கரம் மசாலாத்தூள், ஜாதிக்காய்த்தூள், ஏலக்காய்த்தூள், ஊறவைத்த குங்குமப்பூ அனைத்தையும் அதனுடன் சேர்த்து மூடி, 3 நிமிடம் வேகவிடவும். கியூரா எசன்ஸ் ஒரு சொட்டு சேர்த்து நன்றாகக் கலந்துவிட்டு மூடிப்போட்டு பாத்திரத்தை மூடவும்.
சப்பாத்தி மாவை நீளமாக உருட்டி பாத்திரத்தின் விளிம்பைச் சுற்றி காற்றுப் போகாத வண்ணம் ஒட்டவும். தீயைக் குறைத்து வைத்து முக்கால் மணி நேரம் முதல் ஒரு மணி நேரம் வரை வேகவிடவும்.  பிறகு சப்பாத்தி மாவை நீக்கிவிட்டு, நறுக்கிய கொத்தமல்லித்தழை மற்றும் நீளவாக்கில் நறுக்கிய இஞ்சியைத் தூவி அலங்கரித்து, சூடாகப் பரிமாறவும். ரொட்டி, சூடான கோதுமை பரோட்டா மற்றும் சாதத்துடன் சுவைக்கலாம்.

குறிப்பு:
 நாம் உபயோகப்படுத்தும் ஏலக்காய் பாலிஷ் செய்யப்பட்ட பிறகு கிடைப்பது. பாலிஷ் செய்யாமல் கடைகளில் கிடைக்கும் ஏலக்காய்தான் கறுப்பு ஏலக்காய். வட இந்தியாவில் கறுப்பு ஏலக்காய்களை அதிகம் உபயோகிப்பார்கள்.

http://www.vikatan.com