தமிழ் சினிமாவின் புதிய வில்லன்... ஃபேஸ்புக் லைவ்!

[நவீனன்]

தமிழ் சினிமாவின் புதிய வில்லன்... ஃபேஸ்புக் லைவ்!

தமிழ் சினிமாவுக்கும், திருட்டு விசிடிக்கும் நடக்கும் சண்டை பற்றி அனைவரும் அறிந்ததே. அதனை சற்றே ஓரங்கட்டி, புதிய பிரச்னையாக உருவெடுத்தது புதுப்படங்களை வெளியிடும் இணையதளங்கள். இதனை எதிர்த்து பல தயாரிப்பாளர்கள் போராடிக் கொண்டிருக்கின்றனர். கபாலி பட விவகாரத்தில் கூட, தயாரிப்பு தரப்பில் இருந்து வழக்குத் தொடுக்கப்பட்டு நிறைய இணையதளங்கள் தடை செய்யப்பட்டது குறிப்பிடத்தக்கது. ஆனால் அதையும் மீறி, நிறைய தளங்களில் அந்தப் படம் வெளியாகி அதிர்ச்சியளித்தது. இந்த சிக்கலே இன்னும் தீராத நிலையில் தற்போது புதிய பிரச்னையாக உருவெடுத்துள்ளது ஃபேஸ்புக் லைவ். கடந்த சில நாட்களாக ஃபேஸ்புக் லைவ் மூலம் தமிழ் திரைப்படங்கள் லைவ்வாக ஒளிப்பரப்பாகிக் கொண்டு இருக்கின்றன. அதில் தீபாவளி ரிலீஸ் படங்களும்  சப் டைட்டிலோடு வெளியாகி அதிர்ச்சியளித்தன. இதனைத் தமிழ் திரைத்துறை எப்படி எதிர் கொள்ளப்போகிறது. தமிழ் சினிமாவின் புதிய வில்லனாகியுள்ளதா இந்த தொழில்நுட்பம்?

ஃபேஸ்புக் சமீபத்தில் புதிதாக அறிமுகம் செய்த சேவை தான் ஃபேஸ்புக் லைவ். இதன் மூலம் ஒரு தனி நபரோ அல்லது ஃபேஸ்புக் பக்கமோ லைவ்வாக தனது பக்கத்தில் ஒளிபரப்பு செய்ய முடியும். 

இது நாள் வரை முக்கிய நிகழ்ச்சிகள், பிரபலங்கள் தங்கள் ரசிகர்களுடன் உரையாடுவது, பிரஸ் மீட் என்று இருந்த இந்த சேவையை பயன்படுத்தி, தற்போது இது போன்ற பைரஸி செயல்களில் இறங்கி இருப்பது தமிழ் சினிமாவுக்கு புதிய தலைவலியை ஏற்படுத்தியுள்ளது.

முன்பெல்லாம் திருட்டு விசிடிக்கள் தான் திரைப்படங்களுக்கு வில்லனாக இருந்து வந்தது. ஆனால் இப்போது ஃபேஸ்புக் லைவ் மூலம் அனைவரையும் எளிதில் சென்றடையும் என்பதை புரிந்து கொண்டு களத்தில் இறங்கியுள்ளன சில ஃபேஸ்புக் பக்கங்கள்.இதனால் அதிகம் பேர் ஈர்க்கப்பட்டு, நிறைய பேர் இதனை பார்க்கிறார்கள். இந்த பக்கங்கள். லைவ் முடிந்ததும் இந்த பக்கங்கள் வீடியோக்களை சேமிப்பதில்லை. ஆகவே இவற்றில் வீடியோ பதிவில் இல்லாமல் லைவ் சமயத்தில் மட்டுமே பார்க்கும் வண்ணம் செயல்படுகின்றன இந்த ஃபேஸ்புக் பக்கங்கள். 

இது குறித்து தயாரிப்பாளர் சங்க துணைத்தலைவர் தேனப்பனிடம் கேட்டோம். இது குறித்து கமிஷனர் அலுவலகத்தில் இன்று புகார் அளிக்க உள்ளதாகவும். இதனை செய்பவர்கள் மீது உரிய நடவடிக்கை எடுக்கப்படும் என்றும் தெரிவித்தார். 

இதே புகார் தொடர்பாக கருத்து தெரிவித்த நடிகர் சங்க தலைவர் நாசர். 'இதனை சில பக்கங்கள் வேண்டுமென்றே செய்கின்றன. இவற்றில் பண நோக்கம் இல்லை என்றாலும் சிலர் உள்நோக்கத்தோடு இது போன்ற செயல்களில் ஈடுபடுகின்றனர். திருட்டு விசிடியை ஒழிக்க கடுமையாக போராடி வருகிறோம். இதனை சமாளிப்பதும் தற்போது கூடுதல் பிரச்னையாகியுள்ளது. மக்களும் இதற்கு எதிராக போராட வேண்டும். அப்போது தான் இதனை ஒழிக்க முடியும். எங்கள் தரப்பிலிருந்தும் சைபர் க்ரைமில் புகார் அளிக்கப்படவுள்ளது என்றார். 

http://www.vikatan.com/news/tamilnadu/71636-facebook-live-is-the-new-villain-for-tamil-cinema.art