:D: விடுதலையானது 'குற்றப்பத்திரிகை' செல்வமணி பேட்டி :D

[kirubakaran]

14 வருடங்களாக சிக்கலில் சிக்கி மூச்சு வாங்கிக் கொண்டிருந்த 'குற்றப்பத்திரிகை' படத்தை வெளியிட அனுமதி கிடைத்ததையொட்டி நிம்மதி பெருமூச்சுவிட்டிருக்கிறார் ஆர்.கே. செல்வமணி.

ராஜீவ் கொலை சம்பவத்தை மையமாக வைத்து 1991-ல் 'குற்றப்பத்திரிகை' படத்தை இயக்கினார் செல்வமணி. இப்படத்தில் புலிகளுக்கு ஆதாரவான விஷயங்களும் காங்கிரஸ் கட்சிக்கு எதிரான கருத்துக்களும் இருப்பதாக சர்ச்சை எழுந்ததையொட்டி, படத்திற்கு அனுமதி மறுத்தது சென்சார்.

பல வருடங்களாக கோர்ட் கேஸ் என்று அலைந்த செல்வமணியின் போராட்டத்திற்கு இப்போது வெற்றி கிடைத்துள்ளது. 'குற்றப்பத்திரிகை' வெளியிடுவதில் எந்த சிக்கலும் இல்லை. எனவே சென்சார் இந்தப் படத்திற்கு சான்றிதழ் வழங்கவேண்டுமென நீதிமன்றம் நேற்று தீர்ப்பு வழங்கியது.

காலையில் நீதிமன்றம் தீர்ப்பு வழங்கியதையடுத்து சூட்டோடு சூடாக நிருபர்களை சந்தித்த செல்வமணி, தனது தரப்பு நியாயத்தையும் மகிழ்ச்சியையும் பறிமாறிக்கொண்டார்.

"ஒரு குழந்தை பெற்றெடுப்பதற்கு பத்து மாதங்கள்தான் ஆகும். ஆனால் என்னுடைய இந்தப் படம் வெளிவர 14 வருடங்கள் ஆகிவிட்டது. ஒரு படைப்பாளியாக எனது மனசு நிறையவே காயப்பட்டிருந்தாலும், அந்த காயங்களுக்கு மருந்தாக நல்லதீர்ப்பு கிடைத்துவிட்டது.

சென்சார் கத்திரிப்போடுவதாக இருந்த சில காட்சிகளைகூட வெட்டாமல் அனுமதி வழங்குமாறு சென்சார் போர்டுக்கு நீதிமன்றம் அறிவுறுத்தியுள்ளது.

இத்தனை வருடங்களுக்கு பிறகு படம் வெளிவந்தாலும் இப்போது பார்ப்பது போன்றுதான் கதையும் காட்சியமைப்பும் அமைந்துள்ளது.

தணிக்கை சான்றிதழ் இன்னும் ஓரிரு தினங்களில் கிடைத்துவிடும். சான்றிதழ் பெற்ற கையோடு படத்தை ரிலீஸ் செய்ய திட்டமிட்டிருக்கிறோம்" என்ற செல்வமணி ஸ்வீட் ஸ்டால் நோக்கி நடைபோட்டார்.