25 ஆயிரம் கொடுத்தால் அவுஸ்திரெலியா போகலாம்

[கந்தப்பு]

பாஸ்போர்ட்’ வேண்டாம்...‘விசா’ வேண்டாம்...இருபத்தஞ்சாயிரம் ரூபாய் கொடுத்தா போதும். ஆஸ்திரேலியாவுக்குப் போகலாம்.

‘என்ன ஆச்சரியமாக இருக்கா..

இப்படி ஒரு கும்பல் தமிழகத்தில் வலம் வந்து கொண்டிருக்கிறது. இவர்களின் குறி இலங்கைத் தமிழர்கள்தான்.

கடந்த புதன்கிழமையன்று காலை கூடலூர் மசினக்குடி போலீஸார் ஊட்டி சாலையில் வாகன சோதனை மேற்கொண்டிருந்தபோது இரண்டு சுற்றுலா வேன்களில் 11 பெண்கள், 11 குழந்தைகள் உள்பட மொத்தம் 57 பேர் இருந்துள்ளனர்.

அவர்களை விசாரித்ததில், ‘அவர்கள் இலங்கைத் தமிழர்கள் என்றும், ஊட்டி,கூடலூர்,முதுமலை பந்திப்பூர் பகுதிகளை சுற்றிப்பார்க்க வந்ததாகவும்’ கூறியுள்ளனர். அவர்களிடம் இலங்கை அகதிகளுக்கான எந்த ஆவணங்களும் இல்லை.

அதிர்ச்சியடைந்த போலீஸார், அவர்கள் அத்தனை பேரையும் அழைத்துச் சென்று அருகில் உள்ள மாவனல்லா சமுதாயக்கூடத்தில் தங்க வைத்தனர். கூடலூர் டி.எஸ்.பி. லட்சுமணன், இன்ஸ்பெக்டர் தங்கவேல் ஆகியோர் அவர்களிடம் விசாரணை மேற்கொண்டபோது,மேலும் பல தகவல்கள் கிடைத்தன.

போலீஸாரிடம் சிக்கிய 57 பேரில் 15 பேர் புழல், கும்மிடிப்பூண்டி, பல்லாவரம், மண்டபம் இலங்கைத் தமிழர் அகதிகள் முகாம்களைச் சேர்ந்தவர்கள். மீதி 42 பேர் தங்களைப் பற்றிய விவரம் பதிவு செய்யாமல் சென்னை உள்பட வெவ்வேறு பகுதிகளில் வீடு எடுத்துத் தங்கியுள்ளவர்கள்.இவர்கள் அத்தனை பேரும் ஆஸ்திரேலியா செல்வதற்காக சென்னையைச் சேர்ந்த ரூபன் என்பவரிடம் ரூ.15,000 முதல் ரூ.25,000 வரை பணம் கொடுத்துள்ளனர்.

இவர்களிடம் மொபைல் உள்பட பல பொருட்களை வாங்கி வைத்துக்கொண்ட ரூபன்,‘ஆஸ்திரேலியா செல்வதற்கு முறையான ஏற்பாடுகள் செய்ய ஒரு மாத காலம் ஆகும்.அதுவரை நீங்கள் தமிழ்நாட்டை சுற்றிப்பார்த்து வாருங்கள்!’என்று அனுப்பி வைத்திருக்கிறார்.

சென்னையிலிருந்து இருவாரங்களுக்கு முன்பு புறப்பட்ட இவர்கள் திருப்பரங்குன்றம், குற்றாலம், திருச்சி, மதுரை என்று சுற்றிவிட்டு, நான்கு நாட்களுக்கு முன்பு நீலகிரி மாவட்டம் கூடலூரில் தனியார் வீடுகளை வாடகை எடுத்துத் தங்கியுள்ளனர்.

இலங்கை அகதிகள் சொல்லச்.சொல்ல..போலீஸாருக்குத் தலைசுற்ற ஆரம்பித்தது. ‘உங்களுக்கு கூடலூரில் வீடுகள் ஏற்பாடு செய்து கொடுத்தது யார்’ என்று அகதிகளிடம் போலீஸார் கேட்டனர்.

‘எல்லா ஏற்பாடுகளையும் செய்தது ரூபனின் ஆட்கள்தான். அவருடைய தொலைபேசி எண் கூட எங்களுக்குத் தெரியாது. ஆனால், அவரிடம் எங்கள் கைபேசி எண்களும் உண்டு. ரூபன் சொன்னதாகச் சொல்லி, ‘இங்கு செல்லுங்கள், உதவிகள் கிடைக்கும்’ என்பார்கள். அப்படியே செல்வோம்.அப்படித்தான் எங்களுக்கு ஒருவர் போன் செய்து வீடுகள் அரேஞ்ச் செய்து கொடுத்தார்!’ என்றனர்.

கடைசியில் இவர்களை நீலகிரி எஸ்.பி.மகேஷ்குமாரே நேரடியாக ஒருநாள் முழுக்க விசாரித்து,‘இவர்களில் யாரும் விடுதலைப்புலிகள் அமைப்பைச் சேர்ந்தவர்கள் இல்லை.யாரிடமோ ஆஸ்திரேலியா செல்வதற்கு பணம் கொடுத்துள்ளார்கள் என்பதை பதிவு செய்து, அனைவரையும் அகதிகள் முகாம்களுக்கு அனுப்பி வைத்தார்.

இது குறித்து க்யூ பிராஞ்ச் போலீஸாரிடம் பேசியபோது,“அகதிகள் முகாமில் தங்கியிருப்பவர்களுக்கு வருடத்தில் மூன்று மாதங்கள் வெளியே சுற்றுலா செல்ல அனுமதியுண்டு.இவர்கள் அப்படி வந்தவர்களாகத் தெரியவில்லை.இலங்கையிலிருந்து புதிதாக வருபவர்கள் தமிழ்நாட்டிற்கு வந்தவுடன்,ஆஸ்திரேலியா செல்வதிலேயே விருப்பம் காட்டுகிறார்கள்.

அங்கே சென்றதும்,தாங்கள் நிராயுதபாணிகள் என்று சரணடைந்து விடுகின்றனர். சரணடையும் அகதிகளுக்கு மறு வாழ்வு தர அந்நாட்டு சட்டத்தில் இடமுண்டு. அவர்கள் சில மாதம் சிறையில் அடைக்கப்படுவர். பின்னர் விடுதலை ஆனதும் அவர்களுக்கு வேலை கொடுப்பார்கள்.

இதை வைத்து தமிழகத்தில் பெரிய அளவில் பணம் பறிக்கும் கும்பலைச் சேர்ந்தவன்தான் ரூபன். இலங்கை அகதிகளை இவர்கள் ஆஸ்திரேலியாவிற்கு எப்படி அனுப்புகிறார்கள் என்பதை தொடர்ந்து கண்காணித்து வருகிறோம்!’’ என்றனர்.

சமீபத்தில் சென்னை மண்ணடியில் சுற்றித் திரிந்த 3பேரை போலீஸார் பிடித்து விசாரித்தனர். அப்போது, ‘‘ஆஸ்திரேலியா செல்லப் போகிறோம்’’ என்று பதில் சொன்னார்கள். போலீஸார், ‘பாஸ்போர்ட், விசாவைக் கேட்க’ அவர்கள் பதில் சொல்லத் தெரியாமல் தடுமாறியுள்ளனர்.அவர்களை துருவித் துருவி விசாரித்தபோது,‘‘இங்குள்ள ஏஜெண்டுகளிடம் பணம் கொடுத்துவிட்டால் படகுகளில் ஏற்றி ஆஸ்திரேலியாவில் கொண்டுபோய்ச் சேர்த்துவிடுவார்கள்’’ என்று கூலாகச் சொல்லியுள்ளனர்.

ஏதோ ஆண்டிபட்டிக்கு அனுப்பி வைப்பது போல இலங்கைத் தமிழர்களை ஆஸ்திரேலியாவுக்கு அனுப்பிக்கொண்டிருக்கிறது ஒரு கும்பல். இவ்வளவு நாள் உளவுத்துறைக்கும் ,க்யூ பிராஞ்ச் போலீஸாருக்கும் இந்த விஷயம் தெரியாதது, ‘ஆச்சரியம் கலந்த அதிர்ச்சியாக இருக்கிறது’ என்கின்றனர் உள்ளூர் போலீஸார்.

கா.சு.வேலாயுதன்

- குமுதம் ரிப்போட்டர்