ஓடுபாதைக்கு 5 ஏக்கர் மிகுதி மக்களுக்கு : இராணுவ பேச்சாளர்

[nochchi]

ஓடுபாதைக்கு 5 ஏக்கர் மிகுதி மக்களுக்கு : இராணுவ பேச்சாளர் 

முல்லைத்தீவு மாவட்டம் கேப்பாப்பிலவு பிரதேசத்தில் 245 ஏக்கர் வயல் காணிகளில்  பயிர்ச் செய்கை மேற்கொள்வதற்கு விரைவில் அனுமதி வழங்கப்படும் என இராணுவப் பேச்சாளர் பிரிகேடியர் ருவன் வனிகசூரிய தெரிவித்தார்.

 

பாதுகாப்பு மற்றும் நகர அபிவிருத்தி அமைச்சின் ஊடக மத்திய நிலையத்தில் இன்று (27) நடைபெற்ற வாராந்த ஊடகவியாலளர் சந்திப்பின் போதே அவர் இவ்வாறு கூறினார்.

 

அவர் மேலும் தெரிவிகையில் :- 

 

முல்லைத்தீவு பிரதேசத்தில் புலிகள் அமைத்திருந்த விமான ஓடுபாதையை குறித்த பிரதேசத்து பொதுமக்களின் எதிர்கால பயன்பாட்டிற்கென இராணுவத்தினால் அபிவிருத்தி செய்யப்பட்டுவருகின்றது.

 

இதற்காக 5 ஏக்கர் வயல் நிலத்தில் அபிவிருத்திப் பணிகள் மேற்கொள்ளப்பட்டுவருகின்றன.

 

இப்பிரதேசத்தில் மொத்தம் 250 ஏக்கர் விவசாய காணிகள் உள்ளன. அவற்றில் இந்த 5 ஏக்கர் தவிர்த்து மீதி 245 ஏக்கர் வயல் காணிகளையும் விவசாய நடவடிக்கைகளுக்கு வழங்க உரிய நடவடிக்கைகள் பூர்த்தியடைந்துள்ளன.

 

அபிவிருத்திக்கு பயன்படுத்தப்படும் 5 ஏக்கர் காணிக்குரிய 3 குடும்பங்களுக்கு வேறு இடத்தில் வயல் காணிகள் வழங்கப்படவுள்ளன. அதற்கு அந்த 3 குடும்பத்தினரும் இணக்கம் தெரிவித்துள்ளனர்.

 

இதில் முக்கியமான விடயம் என்னவென்றால் இந்த 250 ஏக்கர் வயல் காணிகளும் அரசுக்குச் சொந்தமானவை எனவும் விவசாய நடவடிக்கைகள் மேற்கொள்வதற்காக மட்டுமே அப்பிரதேச கிராம மக்களுக்கு வழங்கப்பட்டுள்ளது எனவும் குறிப்பிட்டிருந்தார்.

 

 

 

நன்றி - உதயனிணையம்