தமிழர் நிலத்தை பகல்கொள்ளையிடும் இலங்கை அரசு இஸ்ரேலைக் கண்டிக்கிறது! - மாவை சேனாதிராசா

[தமிழரசு]

தமிழர் நிலத்தை பகல்கொள்ளையிடும் இலங்கை அரசு இஸ்ரேலைக் கண்டிக்கிறது! - மாவை சேனாதிராசா 

[Friday 2014-07-25 11:00]

பலஸ்தீனத்தில் இஸ்ரேல் மேற்கொள்ளும் நில ஆக்கிரமிப்பு நடவடிக்கையை வன்மையாகக் கண்டிக்கும் இலங்கை அரசுதான் வடக்கு, கிழக்கு மற்றும் மலையகப் பகுதிகளில் வாழும் தமிழ்பேசும் மக்களின் காணிகளை பகற்கொள்ளை போல் சுவீகரித்து வருகிறது என்று தமிழ்த் தேசியக் கூட்டமைப்பு நாடாளுமன்ற உறுப்பினர் மாவை சேனாதிராஜா தெரிவித்தார். நாடாளுமன்றில் நேற்று நடைபெற்ற காலவிதிப்பு (திருத்தச்) சட்டமூலம் மீதான விவாதத்தில் உரையாற்றுகையிலேயே அவர் மேற்கண்டவாறு குறிப்பிட்டார்.

  

பலஸ்தீன காஸா பகுதியில் இஸ்ரேல் இராணுவக் குடியேற்றங்கள் முன்னெடுக்கப்பட்டன. அப்போது ஜனாதிபதியுடன் இணைந்து நாமும் இதனைக் கண்டித்தோம். இன்று அங்கு பிரச்சினை உக்கிரமடைந்துள்ளது. உலக நாடுகளின் பார்வையும் திரும்பியுள்ளது. எனவே, உடனடியாகத் தாக்குதல்கள் நிறுத்தப்பட வேண்டும். குண்டுவீச்சுகள் நிறுத்தப்பட வேண்டும். பலஸ்தீனத்தில் இஸ்ரேல் முன்னெடுக்கும் நில ஆக்கிரமிப்பு தடுக்கப்படவேண்டும். அதேவேளை, பலஸ்தீன மக்கள் அனுபவிக்கும் இன்னல்களை ஒத்த வகையில்தான் தமிழ்பேசும் மக்களும் இங்கு பிரச்சினைகளை எதிர்நோக்குகின்றனர்.

வடக்கு, கிழக்கு மற்றும் மலையகப் பகுதிகளில் பகற்கொள்ளைபோல் அரச படைகள் நிலங்களை ஆக்கிரமிப்பதானது தமிழ்பேசும் மக்களின் இருப்பிடத்துக்கு மட்டுமல்ல, பெண்களினதும் சிறுமிகளினதும் பாதுகாப்புக்கும் பாரிய அச்சுறுத்தலாக அமைந்துள்ளது. யாழ்.காரைநகர் சம்பவம் இதற்குச் சிறந்த எடுத்துக்காட்டாகும். ஆகவே, தமிழ் பேசும் மக்களின் நிலப்பரப்புகளிருந்து அரச படைகள் வெளியேற்றப்படவேண்டும். நிலங்கள் என்பது தமிழ், முஸ்லிம் மக்களுக்கு மிகவும் முக்கியமானதொன்றாகும். எனினும், வடக்கு, கிழக்கு, மலையகம் ஆகிய பகுதிகளில் பகற்கொள்ளைபோல் தமிழ்பேசும் மக்களின் காணிகள் சுவீகரிக்கப்படுகின்றன.படையினரை இதற்காக அரசுதான் ஊக்குவிக்கின்றது.

சொந்த இடங்களை இழந்து சொந்த மண்ணிலேயே எமது மக்கள், நண்பர்கள் வீடுகளிலும், முகாம்களிலும் வாழ்கின்றனர். இந்தியாவிலும் பலர் இருக்கின்றனர். காணிகளை மீளப்பெற நூற்றுக்கணக்கான போராட்டங்களை நடத்தினோம். நீதிமன்றத்தை நாடினோம். எனினும், இடைக்கால உத்தரவுகளைக் காட்டி ஆக்கிரமிப்பு இடம்பெறுகின்றது. எமது மக்களின் காணிகளில் இராணுவம் விவசாயம் செய்வதால் பட்டினியால் வாடவேண்டிய நிலை ஏற்பட்டுள்ளது. காணி அபகரிப்புக்கு எதிராக நீதிமன்றில் 2 ஆயிரத்து 176 வழக்குகள் தொடுக்கப்பட்டுள்ளன. நீதி கிடைக்குமானால் மேலும் பல வழக்குகளைத் தொடுக்க மக்கள் தயாராகவே இருக்கின்றனர். எனவே, காணிப்பிரச்சினையைக் கையாள்வதற்கு அரசு விசேட ஆணைக்குழுவொன்றை அமைக்கவேண்டும்" என்றார்.

http://www.seithy.com/breifNews.php?newsID=113756&category=TamilNews&language=tamil