தங்கபந்து விருதுக்கு மெஸ்சி தகுதியானவர் இல்லை: மரடோனா

[வாத்தியார்]

தங்கபந்து விருதுக்கு மெஸ்சி தகுதியானவர் இல்லை: மரடோனா

 

 

ரியோடி ஜெனீரோ, ஜூலை 15–

 

 

உலகக்கோப்பை கால்பந்து போட்டியில் சிறந்த வீரருக்கான தங்க பந்து (கோல்டன் பால்) விருது அர்ஜென்டினா கேப்டன் மெஸ்சிக்கு வழங்கப்பட்டது.

அர்ஜென்டினா உலக கோப்பையை வெல்லாததால் அவரும் ஆர்வம் இல்லாமல் ஏமாற்றத்துடனதான் இந்த விருதை பெற்றார்.

உலகின் தலைசிறந்த கால்பந்து வீரரான மெஸ்சி இந்த போட்டித் தொடரில் 4 கோல்கள் அடித்து இருந்தார். 4 முறை ஆட்ட நாயகன் விருதை பெற்று இருந்தார். இறுதிப்போட்டியில் அவர் கோல் அடிக்க முடியாமல் போனது மிகுந்த ஏமாற்றமே.

இதற்கிடையே தங்க பந்து விருதுக்கு மெஸ்சி தகுதியானவர் இல்லை என்று அர்ஜென்டினாவை சேர்ந்த முன்னாள் பிரபல வீரர் டிகோ மரடோனா கூறியுள்ளார். இது குறித்து அவர் கூறியதாவது:–

தங்க பந்து விருது மெஸ்சிக்கு கொடுத்து இருக்கக்கூடாது. வர்த்தக ரீதியில் இருப்பவர்களின் விருப்பத்துக்காக அவருக்கு சிறந்த வீரர் விருது கொடுக்கப்பட்டது. இதற்கு அவர் தகுதியானவர் இல்லை. மெஸ்சிக்கு தங்க பந்து விருது வழங்கியது நியாயமற்றது இதை ஏற்றுக்கொள்ள இயலாது. அவர் அந்த விருதை வாங்கி இருக்கக்கூடாது.

இந்த போட்டித் தொடரில் அதிக கோல் அடித்த கொலம்பிய வீரர் ரோட்ரிசுக்குத்தான் தங்கபந்து விருதை வழங்கி இருக்க வேண்டும்.

அர்ஜென்டினாவை விட ஜெர்மனி சிறப்பாக விளையாடியது. 2–வது இடத்தை பிடித்ததன் மூலம் அர்ஜென்டினாவின் மதிப்பு உயர்ந்து இருக்கிறது.

இவ்வாறு அவர் கூறியுள்ளார்.

மரடோனா தலைமையில் 1986–ம் ஆண்டு அர்ஜென்டினா உலக கோப்பையை வென்றது. அப்போது அவர் ‘கோல்டன் பால்’ விருதையும் பெற்றார். மரடோனா போல் மெஸ்சி அர்ஜென்டினா அணிக்கு உலக கோப்பையை பெற்று தர முடியாமல் போனது மிகுந்த ஏமாற்றமே.

 

மாலைமலர்

 

[வாத்தியார்]

தங்கப் பந்து விருதுக்கு மெஸ்ஸி தகுதியானவர் அல்ல: மரடோனா கருத்தால் பரபரப்பு

 

உலகக் கோப்பை கால்பந்து போட்டியில் தங்க பந்து விருதுக்கு லயோனல் மெஸ்ஸி தகுதியானவர் அல்ல என்று அர்ஜென்டீனாவின் கால்பந்து ஜாம்பவான் டிகோ மரடோனா கூறியுள்ளது பரபரப்பை ஏற்படுத்தியுள்ளது.

உலகக் கோப்பை போட்டியில் சிறப்பாக விளையாடும் வீரருக்கு தங்க பந்து விருது வழங்கப்படுகிறது. இந்த ஆண்டு அர்ஜென்டீனா கேப்டன் மெஸ்ஸிக்கு வழங்கப்பட்டுள்ளது. இந்நிலையில் மெஸ்ஸிக்கு தங்கப் பந்து விருது வழங்கிய சர்வதேச கால்பந்து கூட்டமைப்புக்கு (ஃபிபா) அர்ஜென்டீனா முன்னாள் கேப்டன் டிகோ மரடோனா எதிர்ப்பு தெரிவித்துள்ளார். தனியார் தொலைக்காட்சிக்கு அளித்த பேட்டியில் இது தொடர்பாக அவர் மேலும் கூறியது:

லயோனல் மெஸ்ஸி எதையாவது வென்றாக வேண்டும் என்று கால்பந்தை வைத்து வியாபாரம் நடத்தும் சிலர் நினைத்தார்கள். எனவேதான் அவருக்கு தங்கப் பந்து விருது வழங்கப்பட்டுள்ளது.

நிச்சயமாக அவர் தங்க பந்து விருதுக்கு தகுதியானவர் அல்ல. அவருக்கு அந்த விருது வழங்கப்பட்டது நியாயமற்றது. இந்த உலகக் கோப்பையில் கொலம்பியாவின் ஜேம்ஸ் ரோட்ரிகஸ்தான் சிறந்த வீரர். நியாயமாக அவருக்குத்தான் இந்த விருது வழங்கப்பட்டிருக்க வேண்டும் என்றார்.

மரடோனா தலைமையில் 1986–ம் ஆண்டு அர்ஜென்டினா உலக கோப்பையை வென்றது. அப்போது அவர் தங்கப் பந்து விருதையும் பெற்றார். இந்த முறை அர்ஜென்டீனா உலக சாம்பியன் பட்டத்தை வென்றிருந்தால் மரடோனாவுக்கு இணையான புகழை மெஸ்ஸி பெற்றிருப்பார்.

இந்த உலகக் கோப்பை தொடரில் மெஸ்ஸி 4 முறை ஆட்ட நாயகன் விருது பெற்றுள்ளார். போஸ்னியா, ஈரான், ஸ்விட்சர்லாந்து ஆகிய அணிகளுக்கு எதிரான ஆட்டத்தில் மெஸ்ஸி அடித்த கோல்களால்தான் அர்ஜென்டீனா வெற்றி பெற்றது. அர்ஜென்டீனாவை இறுதி ஆட்டம் வரை அழைத்து வந்த பெருமையும் மெஸ்ஸியை சேரும்.

3 லீக் ஆட்டங்களில் அர்ஜென்டீனா மொத்தம் 6 கோல்களை அடித்தது. இதில் 4 கோல்கள் மெஸ்ஸி அடித்ததாகும்.நெதர்லாந்தின் அர்ஜென் ராபென், பிரேசிலின் நெய்மார், அர்ஜென்டீனாவின் டி மரியா, மஸ்சரானோ, ஜெர்மனி வீரர்கள் தாமஸ் முல்லர், குரூஸ், பிலிப் லாம், ஹமெல்ஸ் ஆகியோரும் தங்கப் பந்து விருதுக்கான பட்டியலில் இருந்தனர்.

என்னும் கேப்டனாகவும், அணியில் ஒரு வீரராகவும் இந்த உலகக் கோப்பையில் சிறப்பாக விளையாடிய மெஸ்ஸிக்கு தங்கப் பந்து விருது வழங்கப்பட்டது. இறுதி ஆட்டத்தில் தோல்வியடைந்த வருத்தத்தில் இருந்த மெஸ்ஸி ஆர்வம் இல்லாமல்தான் இந்த விருதை பெற்றார். உலக சாம்பியன் பட்டத்தை வெல்ல முடியாத ஏமாற்றத்தில் இருந்த மெஸ்ஸி, இதுபோன்ற விருதுகள் எனக்கு ஆறுதல் அளித்துவிடாது என்றும் கருத்து தெரிவித்தார்.

 

தி ஹிந்து