உலக கால்பந்தாட்ட தரவரிசையில் ஜேர்மன் அணி 20 வருடங்களின் பின் மீண்டும் முதலிடம் -

[நவீனன்]

உலக கால்பந்தாட்ட தரவரிசையில் ஜேர்மன் அணி 20 வருடங்களின் பின் மீண்டும் முதலிடம்
2014-07-18 10:09:03

 

உலக கிண்ணத்தை வென்ற பிலிப் லாஹ்ம் தலைமையிலான ஜேர்மன் கால்பந்தாட்ட அணி சர்வதேச கால்பந்தாட்ட தரவரிசையில் மீண்டும் முதலிடம் பெற்றுள்ளது.

1990 ஆம் ஆண்டின்பின்னர் உலக கிண்ணத்தை வென்ற ஜேர்மன் அணி கடந்த 20 வருடங்களில் உலக தரவரிசையில் முதலிடத்தைப் பெற்றமை  இதுவே முதல் தடவையாகும்.

முன்னாள் சம்பியனும் இதுவரை முதலிடத்தில் இருந்த அணியுமான ஸ்பெய்ன் தற்போது 8 ஆவது இடத்துக்கு தள்ளப்பட்டுள்ளது.
மெஸ்ஸி தலைமையிலான ஆர்ஜென்டீனா 5 ஆவது இடத்திலிருந்து 2 ஆவது இடத்துக்கு முன்னேறியுள்ளது.

நெதர்லாந்து 3 ஆம் இடத்தையும் கொலம்பியா 4 ஆவது இடத்தையும் பெற்றுள்ளன. பெல்ஜியம் 12 ஆவது இடத்திலிருந்து 5 ஆவது இடத்துக்கு முன்னேறியுள்ளது. உருகுவே 6 ஆவது இடத்திலும் உள்ளன.

பிரேஸில் 7 ஆவது இடத்தையே பெற்றுள்ளது. ஸ்பெய்ன் 8 ஆவது இடத்திற்கு கீழிறங்குள்ளது.  சுவிட்ஸர்லாந்து, பிரான்ஸ் ஆகியன முறையே 9 மற்றும் 10 ஆவது இடங்களில் உள்ளன.

11 முதல் 20 வரையிலான இடங்களிலுள்ள அணிகளின் விபரம்:
(11) போர்த்துகல், (12) சிலி, (13) கிறீஸ், (14) இத்தாலி, (15, அமெரிக்கா, (16) கொஸ்டாரிக்கா, (17) குரோஷியா, (18) மெக்ஸிகோ, (19) பொஸ்னியா மற்றும் ஹேர்ஸிகோவினா, (20) இங்கிலாந்து
- See more at: http://www.metronews.lk/article.php?category=sports&news=6218#sthash.siQhgdQF.dpuf

[நவீனன்]

ஜெர்மனி மீண்டும் நம்பர்–1
ஜூலை 17, 2014.

பாரிஸ்: ‘பிபா’ உலக கால்பந்து ரேங்கிங்கில் (தரவரிசை), ‘உலக சாம்பியன்’ ஜெர்மனி மீண்டும் ‘நம்பர்–1’ இடத்துக்கு முன்னேறியது. ஸ்பெயின் அணி 8வது இடத்துக்கு தள்ளப்பட்டது.

 

சர்வதேச கால்பந்து போட்டியில் சிறந்து விளங்கும் அணிகளுக்கான ரேங்கிங் (தரவரிசை) பட்டியலை, ‘பிபா’ நேற்று வெளியிட்டது. இதில், சமீபத்தில் பிரேசிலில் நடந்த உலக கோப்பை தொடரின் பைனலில், அர்ஜென்டினாவை வீழ்த்தி 4வது முறையாக சாம்பியன் பட்டத்தை கைப்பற்றிய ஜெர்மனி அணி, 20 ஆண்டுகளுக்கு பின், ‘நம்பர்–1’ இடத்துக்கு முன்னேறியது. கடைசியாக 1994ம் ஆண்டு ஜூன் மாதம் வெளியிடப்பட்ட தரவரிசையில் முதலிடம் பிடித்தது.

 

பைனல் வரை முன்னேறிய அர்ஜென்டினா அணி, 5வது இடத்தில் இருந்து 2வது இடத்துக்கு முன்னேறியது. மூன்றாவது இடத்துக்கான போட்டியில், பிரேசிலை வீழ்த்திய நெதர்லாந்து அணி 12 இடங்கள் முன்னேறி, மூன்றாவது இடம் பிடித்தது.

 

பிரேசில் பின்னடைவு:

அரையிறுதியில், ஜெர்மனியிடம் மோசமான தோல்வி கண்ட பிரேசில் அணி, 3வது இடத்துக்கான போட்டியில் நெதர்லாந்திடம் வீழ்ந்தது.  இதனையடுத்து நான்கு இடங்கள் பின்தங்கிய பிரேசிலுக்கு 7வது இடம் கிடைத்தது. ‘நடப்பு சாம்பியன்’ அந்தஸ்துடன் களமிறங்கி, முதல் சுற்றோடு திரும்பிய ஸ்பெயின் அணி, முதல் இடத்தில் இருந்து எட்டாவது இடத்துக்கு தள்ளப்பட்டது.

 

அதிக கோல் அடித்தவருக்கான ‘கோல்டன் ஷூ’ விருது வென்ற ஜேம்ஸ் ரோட்ரிக்ஸ் இடம் பெற்ற கொலம்பிய அணி, 4 இடங்கள் முன்னேறி 4வது இடம் பிடித்தது. ‘கறுப்பு குதிரை’யாக வலம் வந்த பெல்ஜியம் (5வது இடம்), இங்கிலாந்து, இத்தாலி அணிகளுக்கு ‘சிம்மசொப்பனமாக’ விளங்கிய உருகுவே (6வது இடம்) அணிகளும் முன்னேற்றம் கண்டன. மூன்று இடங்கள் பின்தங்கிய சுவிட்சர்லாந்து அணி 9வது இடத்தை பிடித்தது. ஏழு இடங்கள் முன்னேறிய பிரான்ஸ் அணி, 10வது இடத்தை கைப்பற்றியது.

போர்ச்சுகல் (11வது இடம்), இத்தாலி (14வது இடம்), அமெரிக்கா (15வது இடம்), இங்கிலாந்து (20வது இடம்) அணிகள் பின்னடைவை சந்தித்தன. லீக் சுற்றில், உருகுவே, இத்தாலி அணிகளை வீழ்த்தி, இங்கிலாந்துக்கு எதிராக ‘டிரா’ செய்த கோஸ்டாரிகா அணி, 12 இடங்கள் முன்னேறி 16வது இடம் பிடித்தது.

உலக கோப்பை தொடருக்கு தகுதி பெறாத இந்திய அணி, 154வது இடத்தில் இருந்து 151வது இடத்துக்கு முன்னேறியது.

 

 

http://sports.dinamalar.com/2014/07/1405617075/klosegermany.html