நிலத்தடி நீரை நம்பி கோடையில் நெல் பயிரிட கூடாது!

[Athavan CH]

கோடையில் நெல் பயிரிட கூடாது!

நிலத்தடி நீரையும், மண்ணின் வளத்தையும் பாதுகாக்க, கோடை நெல் நடவை தவிர்க்க வேண்டும் என்கிறார், விவசாய ஆராய்ச்சியாளர், வே.ரவி: நான், தமிழ்நாடு வேளாண் பல்கலைக்கழகத்தில், நீர் மற்றும் நில வள ஆராய்ச்சி மையத்தின், தலைவராக பணியாற்றுகிறேன். தமிழகத்தின் அனைத்து பகுதிகளிலும், அதிலும் குறிப்பாக, காவிரி பாசனப் பகுதிகளில், கோடையில் நெல் சாகுபடி செய்வதை தவிர்ப்பது, மிகவும் நல்லது.ஏனெனில், கோடை நெல் சாகுபடி செய்யும் போது, அதிக அளவில் தண்ணீர் தேவைப்படுகிறது. அதற்காக, நாம் நிலத்தடி நீரை அதிக அளவில் உறிஞ்சி எடுக்கும் போது, நிலத்தடி நீர்மட்டம், அதல பாதாளத்திற்கு செல்ல வாய்ப்பு உண்டு.மேலும், இந்த ஆண்டு பருவ மழையும் தமிழகத்தை ஏமாற்றி விட்ட காரணத்தால், பல இடங்களில் நிலத்தடி நீர்மட்டம் மிகவும் குறைந்து விட்டது. இப்போதுள்ள சூழலில், மேலும் நிலத்தடி நீரை உறிஞ்சினால், கடல் நீர் உட்புகுந்து, நிலத்தடி நீரையும், உப்புநீராக மாற்றும்.அதே போல், மண்ணின் தரமும் படிப்படியாக குறைந்து களர், உவர் நிலமாக மாறும். இவ்வாறு மண்வளம் பாதிக்கப்பட்டால், பின் எந்த பயிருமே பயிரிட முடியாது. மேலும், குறுவை, சம்பா, தாளடி, கோடை நடவு என, தொடர்ந்து, நெல் விவசாயம் மட்டுமே செய்து கொண்டிருந்தால், மண்ணானது அனைத்து சத்துக்களையும் இழந்துவிடும்.
அதனால், கோடை சாகுபடியாக நெல் விவசாயம் செய்யாமல், அதற்கு மாற்றாக கோடைப் பயிர்களை பயிரிடும் போது, மண்ணின் வளம் திரும்ப கிடைக்கும். அப்போது, அடுத்தடுத்த குறுவை, தாளடி போன்றவற்றில், நல்ல விளைச்சல் கிடைக்கும்.நெல் சாகுபடி செய்வதற்கு, 1,400 முதல் 1,600 மி.மீ., தண்ணீர் தேவை. ஆனால், உளுந்து, எள் போன்ற கோடைப்பயிர்களுக்கு, 200 முதல் 300 மி.மீ., தண்ணீர் இருந்தாலே போதும்.நிலத்தடி நீர்மட்டம் குறைவது தான், கோடை நெல்சாகுபடியின் போது ஏற்படும் முக்கியமான பிரச்னை. 2003ல் எடுக்கப்பட்ட நிலத்தடி நீர்மட்ட கணக்கெடுப்பின்படி, தமிழகத்தில் மொத்தமுள்ள, 385 பிளாக்குகளில், 8 பிளாக்குகளில் முழுவதுமாக நிலத்தடி நீர் பாதிக்கப்பட்டு உப்பாக மாறியுள்ளது.மேலும், 138 பிளாக்குகள், அளவுக்கதிகமாக பாதிக்கப்படும் தன்மையுடன் உள்ளது. 37 பிளாக்குகள், அபாயகரமான நிலையில் உள்ளன. வெறும், 97 பிளாக்குகள் மட்டுமே, பாதுகாப்பான நிலையில் உள்ளன.கடந்த, 2003லேயே இந்த நிலை என்றால், இன்றுள்ள நிலையை கேட்கவே வேண்டாம். எனவே, கோடை காலத்தில் நெல் சாகுபடியைத் தவிர்த்து, மாற்று பயிர்களை பயிரிடுவது தான் புத்திசாலித்தனம். மேலும், தண்ணீர் வீணாவதை தடுக்க, சொட்டு நீர், தெளிப்பு நீர் போன்ற தொழில்நுட்பங்களை பயன்படுத்தலாம்.

 

http://www.dinamalar.com/splpart_detail.asp?id=93